Хүний аминд хүрсэн БНХАУ-ын иргэн Шуаншид /SHUANGXI/ холбогдох хэргийг Сум дундын 16 дугаар шүүхэд хэлэлцэн шийдвэрлэжээ. Шүүхээс шүүгдэгч Шуаншид Эрүүгийн хуулийн тусгай ангийн 91 дүгээр зүйлийн 91.1 дэх хэсэгт зааснаар 11 жилийн хугацаагаар хорих ялыг чанга дэглэмтэй эрэгтэйчүүдийн хорих ангид эдлүүлэхээр шийдвэрлэсэн байна.
Хэргийг тодруулбал, Өмнөговь аймгийн Ханбогд сумын Хайрхан багийн нутаг, Цагаанхад гэх газар 2014 оны 06 дугаар 27-ны орой БНХАУ-ын иргэн SHUANGXI /Шуанши/ гэгч нь согтуугаар БНХАУ-ын иргэн WULIJITAOGETAO /Өлзийтогтох/-той маргалдаж түүний зүрхэн тус газар нь хутгалан амь насыг хохироосон гэмт хэрэг үйлджээ.
Түүний үйлдэлд Сум дундын нэгдүгээр прокурорын газраас Эрүүгийн хуулийн 91 дүгээр зүйлийн 91.1-д зааснаар яллах дүгнэлт үйлдэж шүүхэд шилжүүлсэн юм.