Хууль зүйн байнгын хорооноос УИХ ба НҮБ-ын Хөгжлийн Хөтөлбөр хамтран хэрэгжүүлж буй “Иргэдийн оролцоотой хууль тогтоох үйл ажиллагааг дэмжих нь” төслийн дэмжлэгтэйгээр Монгол Улсын Засгийн Газраас өргөн барьсан “Хууль тогтоомжийн төсөл боловсруулах, өргөн мэдүүлэх, хууль тогтоомжийг хэрэгжүүлэх журмын тухай хуулийн төслийн хэлэлцүүлэг өнөөдөр Төрийн ордын Б танхимд болно.
Хуулийн төслийг УИХ-аар хэлэлцэхээр энэ оны нэгдүгээр сарын 30-ны өдөр шийдвэрлэсэн бөгөөд Хууль зүйн байнгын хорооноос ажлын хэсэг байгуулан төслийн анхны хэлэлцүүлэгт бэлтгэн ажиллаж байгаа гэнэ.
“Иргэдийн оролцоотой хууль тогтоох ажиллагааг дэмжих нь” төсөл нь 2013 оноос хэрэгжиж байгаа бөгөөд УИХ-д бодлогын судалгаа хийх, оролцогч талуудтай нээлттэй зөвлөлдөх замаар хууль боловсруулах ажиллагааг сайжруулах, иргэд ба сонгогдсон төлөөлөгчид хоорондын харилцааг бэхжүүлэх, НҮБ-ын Авлигын эсрэг конвенцийн тайланг гаргах, хэрэгжүүлэх ажиллагаа, ёс зүй ба сонирхлын зөрчилтэй холбоотой бодлого, хууль тогтоомжийн хэрэгжилтэд дэмжлэг үзүүлэх зорилготой аж.
Төслийн зүгээс энэ хуулийн төслийг боловсруулж эхлэхээс нь дэмжиж, зөвлөх баг, судалгаагаар хангах, олон нийтийн оролцоог хангах, хэлэлцүүлэг өрнүүлэх ажлыг зохион байгуулж байгаа ажээ.
Тус хэлэлцүүлэг нь энэ хуулийн төслийг боловсруулах хүрээнд хийж буй дөрөв дэх хэлэлцүүлэг бөгөөд төслийн үзэл баримтлалын гол гол асуудлууд болох хууль тогтоомж боловсруулах техникийн болон агуулгын шаардлагууд, үр нөлөөний үнэлгээ, магадлан шалгалт хийх, олон нийтийн оролцоог хангах, хуулийн хэрэгжилт, хяналт үнэлгээ зэргийг дэлгэрэнгүй ярилцана. Мөн мэргэжлийн холбоо, бизнес эрхлэгчид, төрийн бус байгууллагуудын төлөөллийн байр суурийг сонсох юм.
Хэлэлцүүлэгт УИХ-ын ажлын хэсгийн гишүүд, Хууль зүйн яам, холбогдох төрийн болон төрийн бус байгууллагууд, мэргэжлийн холбоодын төлөөлөл оролцох ажээ.
Хуулийн төсөл болон бусад дэлгэрэнгүй мэдээллийг splp.parliament.mn хаягаар авах боломжтой.