“Ариун цэврийн тухай” хуулийг “Эрүүл ахуйн тухай хууль” болгон шинэчлэн найруулж өчигдрөөс эхлэн орон даяар мөрдөж эхэллээ. Дээрх хуулийг шинэчлэн найруулах болсон шалтгаан нь хотжилт, бүтээн байгуулалт, үйлдвэржилт, техник, технологийн дэвшилтэд суурилсан хөгжил өсөн нэмэгдэж байгаа өнөөгийн нөхцөлд одоогийн мөрдөж байгаа хүчин төгөлдөр хууль нь цаг үеийн шаардлагыг бүрэн хангахгүй байсан аж.
Хүн ам өсч, бүтээн байгуулалтын ажил өрнөж, хотжилт, уул уурхай, аялал жуулчлал, үйлдвэржилт эрчимтэй явагдаж хүрээлэн байгаа орчинд сөрөг үр дагавар дагуулсаар байна. Тухайлбал, томоохон хот, суурин газрын агаарын бохирдол гамшгийн хэмжээнд хүрч, азотын давхар исэл, хүхэрлэг хий, хар тугалга болон нарийн ширхэглэгт тоосонцрын хэмжээ эрүүл ахуйн зөвшөөрөгдөх хэмжээнээс өндөр байгаа нь хүн амын дунд амьсгалын замын өвчлөл, түүн дотроо уушигны цочмог, архаг үрэвсэл, хорт хавдар, зүрх судасны эмгэг, харшлын өвчин нэмэгдэх, хүний дархлааны түвшин буурах, хүүхдийн бие бялдрын өсөлт, хөгжилт саарах зэрэг сөрөг нөлөө үзүүлж байна.
Мөн ундны ус бохирдол, Үйлдвэрийн болон ахуйн хог хаягдал, эрүүл ахуйн шаардлага хангаагүй энгийн бие засах газар, бохирын цооногийн тоо нэмэгдсэнээр хөрсний бохирдлын түвшин нэмэгдэж, хүн амын дунд гэдэсний халдварт өвчин гарахад нөлөөлж байна гэж албаныхан үзжээ.