Их монгол улс байгуулагдсаны 808, АХ-ын 93 жилийн ойн их баяр цэнгэл наадмын адуун сүргийн манлай азарганы уралдаан барианд орлоо. Газар газрын 220 гаруй азарга Хүй долоон худгийн тэнгэрт буяны тоосоо өргөж, ХХ зуун манлай хүлэгч Д.Даваахүүгийн хүү Баянбатын хонгор түрүүлэн ирж түмэн олноо баясгалаа. Хонгор азарга хязааландаа улсад аман хүзүүлж давхар уяагаар Төвийн бүсийн даншигт түрүүлж байсан энэ цагт тодорч буй идэрхэн ажнай. Харин аман хүзүүнд Хөвсгөл аймгийн Мөрөн сумын ААУ Түдэндоржийн Болдбаатарын халиун хурдалсан юм. Халиун азарган тухайд Сүхбаатар аймгийн Халзан сумын ААУ Я.Буйрын унаган адуу бөгөөд шүдлэн наснаасаа хойш аймаг, бүсийн уралдаанд олон түрүүлж айрагдаж байгаа энэ цагийн цуут хурдан хүлэг. Засгийн газрын тогтоолтой бүсийн уралдаанд нэг түрүүлж, гурав айрагдаад байгаа бөгөөд өнгөрсөн жил Хэнтийн 90 жилд түрүүлж байсан. Сүхбаатар аймгийн Эрдэнэцагаан сумын ААУ Эзэнмөнхийн Мөнх-Эрдэнэ уяа сойлгыг нь тааруулдаг. Айргийн гуравт Ховд аймгийн Буянт сумын харьяат Эрдэнэ-Очирын Тамирын хүрэн халзан, айргийн дөрөвт Дундговь аймгийн Эрдэнэдалай сумын уяач Содномцэрэнгийн Цэмбэлийн зээрд, айргийн тавд Улаанбаатар хотын Баянзүрх дүүргийн уяач Бадамын Оргилын халтар тус тус хурдалж, уясан эзэн унасан хүүхдээ баярлууллаа.
6.Өвөрхангай аймгийн Хужирт сумын уугуул Дуламын Сугарын хул.
7. Дорноговь аймгийн Хатанбулаг сумын уугуул Монхдойн Жаргалсайханы хул алаг.
8. Хөвсгөл аймгийн уугуул Гордойн Доржпүрэвийн хонгор.
9. Ховд аймгийн Буянт сумын уугуул Ширчинжавын Энхсайханы халтар.
10. Завхан аймгийн Завханмандал сумын уугуул Цэрэндоржийн Мөнххуягийн зээрд. Зээрд азарга энэ жил Дүнжингарав хаврын бүсийн уралдаанд аман хүзүүдсэн билээ.