Спортын төв хэвлэл “Таван цагариг” сонины 20 жилийн ойн нэрэмжит дартсын тэмцээн “Pump” ресторанд өнгөрсөн бямба гаригт боллоо. Монголын сонгодог дартсын холбоотой хамтран зохион байгуулсан тус тэмцээнд манай хэвлэл мэдээллийн салбарынхан өрсөлдөв. “Засгийн газрын мэдээ” сонины тамирчид шаггүй сайн дартс тоглодогоо баталж, алтан медаль, шилжин явах цомын эзэд болж 200000 төгрөгөөр шагнууллаа. Мөнгө, хүрэл медалийг “Зууны мэдээ” сонин, “Star” телевизийн баг авч 150000-100000 төгрөгөөр шагнуулав. Удаах байрт “МН Таван цагариг”, “ETV” телевизийн багууд орсон юм. Тоглолт бүрт шовх гарч байсан нь энэ тэмцээн хэр өрсөлдөөнтэй, сонирхолтой болсныг илтгэж байв. Гурван сумаар хамгийн өндөр буюу 193 оноо авсан “Таван цагариг” сонины ерөнхий эрхлэгч Н.Баясгаланд Монголын сонгодог дартсын холбооноос мэргэжлийн дартсын самбар, сум бэлэглэхээр болсон юм. Мөн тэмцээний үеэр болсон хөгжөөнт тоглоомны төрөлд “МН Таван цагариг” багийн тамирчин Б.Хаш-Эрдэнэ гурван сумаар 93 оноо авч, түрүүллээ.
