СБД-ийн ахмад настан Р.Намсрай
Манай улсын хувьд нийслэлээ нүүлгэж өөр газар байгуулалх зайлшгүй шаардлагатай. Энэ янзаараа байвал тун удахгүй Монголын бат
хүн амын 70-80 хувь нь Улаанбаатар хотод төвлөрөхөөр байна. Улаанбаатар хотын хувьд оршин суугчдын тоог энэ хэмжээнд нь барьж, хөрсний бохирдол, утаа, цэвэрлэх байгууламжийн асуудлуудаа шийдэн дэлхийн жишигт нийцсэн, хүмүүс оршин суухад таатай эко хот болох ёстой. Нийслэлээ өөр тохиромжтой газар нүүлгэж шилжүүлсэнээр Улаанбаатарын төвлөрлийг сааруулж, хоёр дахь том хоттой болж, улс орноо тогтвортой хөгжүүлэх боломж дээшилнэ. Орон нутагт хөрөнгө оруулалт нэмэгдэж, үйлдвэр аж ахуйн газрууд олноор баригдаж, хүмүүсийн амьдрах орчин сайжирсан тохиолдолд ч Улаанбаатар нийслэл хэвээрээ байх юм бол хүн амын өсөлт нь улсын дундчаас хэзээд өндөр байх юм. Өмнөд Солонгосоор жишээ авахад тус улсын хүн амын тоо 40 сая, тэдний 20 сая нь нийслэл Сөүл хотод оршин суудаг. Ядахдаа Сөүл нь үргэлж зэвсгээр занал хийж байдаг Хойд Солонгосын хилийн хажууханд байдаг учир толгойгоо өвтгөх асуудал ихтэй. Хэдийгээр Өмнөд Солонгос улс нь суурин соёл иргэншилтэй, сүүлийн цөөхөн жилийн дотор гайхамшигтай бүтээн байгуулалт хийж хөгжлийн өндөр түвшинд хүрсэн орон хэдий ч хүн амын хагас нь нийслэлдээ шавааралдан сууж байна. Хүн ам цөөхөнтэй манайх шиг орны хувьд хүн амын олонх нь нэг газар бөөгнөрөн суух нь үндэсний аюулгүй байдлын хувьд байж болошгүй асуудал юм. Муугаар бодоход хэн нэгэн дайсан, террорист санаатай санамсаргүйгээр цөмийн бөмбөг Улаанбаатар хотод хаяхад Монгол Улс мөхөхөөр ийм эмзэг байдалтай байна. Одоогоор улс орны эдийн засгийн байдал хүнд, боломж муу байгаа ч гэсэн хүсэл байвал эрдэмтэн мэргэжилтнүүдийн дунд хэлэлцүүлэг явуулах, тооцоо судалгааг хийх, шийдэх зэрэг ажлыг яаралтай эхлүүлэх шаардлагатай гэж бодож байна.
“Өдрийн сонин”-ы “Хэлэх эрхийн индэр“-т оролцон үзэл бодлоо илэрхийлэхийг хүсвэл 99650208 дугаарын утсаар холбоо барина уу.
Тэмдэглэл хөтөлсөн Э.МӨНХТҮВШИН