БГД- ийн VII хорооны иргэн З.Шижирбаатар.
Миний хувьд хямралаас гарах боломж бий гэдэгт итгэлтэй явдаг. Харин нэг эх үүсвэрээс хэт их зээл авч, түүнийхээ эршээлд орох вий гэсэн бодол төрдөг. Харин ОУВС-гаас бол хөнгөлөлттэй нөхцөлтэй бодлогын зээл олгодог, өндөр шалгууртай, санхүүгийн хатуу сахилга бат шаарддаг учраас тэдний хөтөлбөрт хамрагдах нь зөв гэж үздэг билээ. Хөрөнгийн эх үүсвэрийг дотоодоосоо илрүүлэн нэмж чадвал Монголын эдийн засаг сэргэхэд илүү их хувь нэмэр оруулах юм.
Манай Үндсэн хуульд “Монгол Улсын иргэдэд өмчлүүлснээс бусад газар түүнчлэн газрын хэвлий түүний баялаг, ой усны нөөц, ан амьтан төрийн өмч мөн” гээд заачихсан байгаа. Тэгвэл төр яагаад өөрийнхөө өмчийн зохих хэсгийг төв банкныхаа тэнцэлд бүртгэж, баялгийн сан байгуулж болдоггүй юм. Энд би бүх баялгийг тэнцэлд бүртгэнэ гэж бодохгүй байна. Зөвхөн хайгуулын лиценз авч нөөц нь тогтоогдоод одоо ашиглагдаж эхэлсэн цөөн тооны баялгийн 1-2 хувийг Монголбанкны тэнцэлд байршуулж активаа нэмэгдүүлэх боломжтой. Надад ашигт малтмалын нөөц нь тогтоогдсон материал олдохгүй шүү дээ. Зөвхөн төвийн хэвлэл мэдээллийн хэрэгслээр байнга гарч байгаа Таван толгойн нүүрсний ордын нөөцөөр тооцож үзэхэд нэг хувь нь 3.78 их наяд төгрөг гарч байгаа юм. Тэгэхээр нөөц нь тогтоогдоод ашиглаж байгаа бусад баялгийг нэмж тооцоход 20-иод их наяд төгрөгийн эх үүсвэр нээгдэнэ. Энэ мөнгө зөвхөн банкны тэнцэлд бүртгэгдэх зүйл биш. Баялаг нь банкны активт байна. Эх үүсвэрийн талаас багагүй хэсэг нь санхүүгийн эх үүсвэр болно. Сангийн яаманд байршуулсан эх үүсвэрийг зөвхөн Монгол Улсын Үндэсний аюулгүй байдлын зөвлөл, УИХ-ын шийдвэрээр “Чингис” бондын төлбөр… гэх мэт тулгамдсан төлбөрийг төлөхөд зарцуулна. Элдэв төрлийн жижиг өр төлбөрт энэ мөнгийг зарцуулахгүй, маш нарийн хяналттай байна. Дотоодын томоохон хөрөнгө оруулалтыг санхүүжүүлэхэд ашиглаж болох байх л даа. Түүнийг зөвхөн Үндэсний аюулгүй байдлын зөвлөл, УИХ шийдвэрлэх байх.