Японы сүмогийн холбооны захирлуудын зөвлөлийн хурлаар Хаврын тэмцээнийг цуцлахгүйгээр шийдвэрлэв. Дэлхий дахиныг түгшээж буй коронавирус Японд ч эрсдэл өндөртэй байгаа учраас сургуулийг хааж, олон нийтийн үйл ажиллагааг цуцалсан билээ.
Харин төр засгийнхаа зөвлөмжийг Японы сүмогийн холбооны захирлуудын зөвлөл шууд биелүүлэлгүй, “Харү башё”-г үзэгчгүйгээр явуулах шийдвэрт хүрчээ. Ингэснээр Хаврын тэмцээнийг үзэх тасалбар авсан үзэгчдэд бараг нэг тэрбум иен (ойролцоогоор 10 сая ам.доллар) буцаан олгох юм. Харин сүмогийн холбоо Харү башёг шууд дамжуулсны төлбөрт олон нийтийн NHK телевизээс 500 сая иенийг авах ажээ. Үүнээс өмнө 1945 оны зуны тэмцээнийг хаалттайгаар явуулсан бөгөөд тэр үед үзэгчдийн суудлыг шархадсан цэргүүдээр дүүргэж байжээ.