Говийн гайхамшигт 6 амьтны нэг болох хар сүүлтийн талаарх сонирхолтой баримтуудыг хүргэж байна. Мөн энэхүү амьтныг хууль бусаар агнасан тохиолдолд ямар ял шийтгэл хүлээлгэдэг талаарх мэдээллийг Экологийн цагдаагийн албанаас мэдээллээ.
СОНИРХОЛТОЙ БАРИМТ,
- Эрийг ооно, эмийг шаргачин, төлийг янзага гэнэ.
- Хар сүүлт нь дунджаар 6-12 жил насалдаг.
- Хар сүүлтийн ооно эвэртэй, Шаргачин эвэргүй.
- Ооно 110-116 см, шаргачин 93-110 см урт, ооно 23-33 кг, шаргачин 18-20 кг жинтэй байдаг.
- Сонсгол нь маш сайн, их хурдан, цагт 55-62 км туулж чадна.
- Эр нь 3, эм нь 2 наснаас үржилд ордог. Ороо хөөцөө нь 12 сарын 20-доос 1 сарын 10 хүртэл үргэлжилнэ.
- Хар сүүлт жилд 30 орчим тонн хорголоор говь цөлийн хөрсийг борддог.
- Шаргачин нь үр төлөө аюул, заналхийллээс хамгаалахын тулд бут, сөөглөг орчинд нуудаг бөгөөд янзага бутны ёроолд хярж хөдөлгөөнгүй нуугдаж, шаргачин харин аюул заналхийллийг хөлийн хурдаар холдуулж, төөрүүлэх үйлдэл хийдэг байна.
Монгол Улсын Улаан номонд “Ховор” амьтнаар бүртгэгдсэн хар сүүлт зээрийг хууль бусаар агнасан бол Эрүүгийн хуулийн 24.5.1-д зааснаар 27 сая хүртэлх төгрөгөөр торгох, эсхүл 1-5 жилийн хорих ял эдлүүлэхээс гадна ЗГ-ын 2023 оны 260 дугаар тогтоолд заасан 3.330.000 төгрөгийн экологи, эдийн засгийн үнэлгээг 2 дахин нэмэгдүүлсэнтэй тэнцэх хэмжээгээр хохирлыг нөхөн төлүүлнэ.