“Google” болон “Microsoft” компанийн Энэтхэг захирлууд эх орондоо туслахаар болсноо зарлажээ.
Тодруулбал, “Google”-ийн Сундар Пичай, “Microsoft” компанийн Сатя Наделла нар коронавирусийн халдварын эсрэг тэмцэж буй Энэтхэг улсад яаралтай тусламж дэмжлэг үзүүлэхээр болсон байна..
Сатья Наделла Твиттер хуудсандаа “Энэтхэгийн өнөөгийн байдал миний зүрхийг шархлуулж байна” хэмээн бичжээ. Мөн тэрээр “АНУ-ын Засгийн газар тусламж үзүүлэхээр ажиллаж байгаад талархаж байна. Microsoft өөрийн нөөц, технологийг ашиглан тусламжийн ажилд гараа сунгаж, Энэтхэгт хүчилтөрөгчийн чухал төхөөрөмжүүдийг худалдан авахад дэмжлэг үзүүлэх болно” гэжээ.
Сундар Пичай “Ковидын хямрал улам бүр дордож байгааг хараад сэтгэлээр унаж байна” гээд Google болон тус компанийн ажилтнуудын зүгээс 1.35 тэрбум рупигийн (18 сая ам.доллар) тусламж үзүүлэхээ мэдэгдлээ.
