Туркийн Ерөнхийлөгч Тайип Эрдоган БРИКС-ийн орнуудын удирдагчдад хандан Туркийг бүрэлдэхүүндээ багтааж өгөхийг хүссэн байна. Энэ тухай өнгөрсөн ням гаригт “Hürriyet” сонинд мэдээлснийг ТАСС агентлаг уламжлав. Долдугаар сарын 27-ны өдөр Йоханнесбургт Эрдоган сэтгүүлчидтэй уулзахдаа “Хэрвээ биднийг энэ нэгдэлд оруулвал нэршил нь БРИКСТ болно” хэмээн хэлсэн байна.
Тус хэвлэлд мэдээлснээр, Туркийн Ерөнхийлөгч “БРИКС-ийн орнуудын удирдагчид миний саналыг халуун дотноор хүлээж авсан. Ялангуяа Хятад улс өргөжин тэлэхийг хүсч буйг илэрхийлсэн. Би энэхүү нэгдэлд бусад улс орнууд орох боломжтойг олж харсан. Тэд эсэргүүцээгүй” хэмээн мэдэгджээ. Эрдоган “БРИКС-ийн орнуудаас биднийг нэгтгэж, эвлэлдэн нэгдэх боломж бүрдүүлэх шаардлагатай алхмуудыг авч үзэхийг хүсч байна” хэмээн нэмж хэлсэн байна.
Долдугаар сарын 25-наас 27-ны өдрүүдэд Йоханнесбург хотноо БРИКС-ийн орнуудын удирдагчдын 10 дахь дээд хэмжээний уулзалт зохион байгуулагдсан. Энэхүү уулзалтад оролцогчид олон талт харилцааг бэхжүүлэх, дэлхийн энх тайван, аюулгүй байдлыг сахин хамгаалах асуудлуудыг хэлэлцжээ.