“Эрдэнэс Тавантолгой” компанийн Төлөөлөн удирдах зөвлөл өнгөрсөн долоо хоногийн пүрэв гаригт хуралдаж, Б.Батбилэгийг тус компанийн захирлын үүрэг гүйцэтгэгчээр томилжээ.
Б.Батбилэг нь “Эрдэнэс Тавантолгой” компанид Борлуулалт, ложистик хариуцсан захирал, мөн давхар Санхүү эрхэлсэн дэд захирлын үүрэг гүйцэтгэж буй аж. Мөн түүнийг УИХ-ын гишүүн асан Батж.Батбаярын хүү гэдэг тодотгол дагаж байна.
Өмнө нь энэ асуудлыг Засгийн газрын хуралдаанаар хэлэлцэн, эл албанд Ч.Сайнбилэгийг томилсон нь “Эрдэнэс тавантолгой” компанийн ТУЗ-ийн дарга байсантай холбоотой тухай эх сурвалж онцоллоо. Харин өнгөрсөн пүрэв гаригт “Эрдэнэс Тавантолгой” компанийн ТУЗ хуралдаж, дээрх шийдвэр гаргасан тул Засгийн газрын хуралдаанаар асуудлыг оруулах шаардлагагүй юм байна.
Онцлоход, “Эрдэнэс Тавантолгой” компанийн захирлаар Я.Батсуурь томилогдон ажиллаж байсан ч Авлигатай тэмцэх газраас баривчлан саатуулснаар орны хүнийг томилох шаардлагатай болж, тус компанийн ТУЗ-ийн дарга Ч.Сайнбилэгийг томилоод байв.
Гэвч тэрээр өнгөрсөн долоо хоногт албан тушаалаасаа чөлөөлөгдөх хүсэлт гаргаж, өмнөх захирал буюу Я.Батсуурь ажлаа үргэлжлүүлэх ёстой гэж мэдэгдсэн ч Б.Батбилэгийг тус компанийн захирлын үүрэг гүйцэтгэгчээр томилжээ.