Э.Бат-Үүл: Сонгуулийн хороо шүүх эрх мэдэл рүү халдаж байна

Баянзүрх дүүргийн Засаг даргаар Э.Бат-Амгаланг томилсонтой холбогдуулан АН-ыг төлөөлөн Нийслэлийн Засаг дарга асан Э.Бат-Үүл, АН-ын Нарийн бичгийн дарга О.Магнай нар өнөөдөр мэдээлэл хийлээ.

Хотын дарга асан Э.Бат-Үүл:

Баянзүрх дүүргийн Засаг даргыг томилсон асуудал хууль бус юм. Хүчээр албан тушаалыг булааж авч болохгүй. Энэ бол Үндсэн хуулийг зөрчиж байгаа хэрэг юм. Сонгуулийн зургаан тойрог дээр маргаантай зүйл байхгүй. Сонгуулийн хуулийг зөрчсөн зүйл гараагүй байна гээд шүүхийн шийдвэр гарчихаад байхад энэ зургааг Сонгуулийн хороо эсрэгээр нь сонгуулийн явцад мөнгө тараасан гэж шийдвэр гаргасан. Тэгэхээр сонгуулийн хороо шүүхийн эрх мэдэл рүү халдаж байна гэсэн үг юм. Манай хоёр хүн Н.Гарамгайбатаар, Н.Батбаяр нарын тухай сэтгүүлчийн асуултад хариулахад үнэхээр харамсалтай зүйл болсон. Энэ бол хэлмэгдэлтийн үеийг сануулж байна. Яг Цагаансарын үеэр ээж аавтай нь золгуулахгүй сэтгэл санаагаар нь дарамталж хэлмэгдүүлж байна гэж үзэж байна гэв.

АН-ын Нарийн бичгийн дарга О.Магнай:

Бүгдэнд нь өдрийн мэнд хүргэе. АН-ын нарийн бичгийн дарга болсоор анх удаа та бүхэнтэйгээ уулзаж байна. Баянзүрх дүүрэг дээр АН 22 суудал авч, МАН 19 суудал авсан. Сонгуулийн хороо зургаан нэр дэвшигчийг сонгуулийн хууль зөрчсөн гэж үзсэн. Гурван шатны шүүхээр яваад энэ шийдвэр хууль зүйд нийцэхгүй байна гээд хүчингүй болгосон. АН-ын нэр дэвшигчдийг хасах тухай 60, 64 гэж хоёр тогтоол гарсан. Энэ тогтоолыг үндэслэж Хотын дарга Баянзүрх дүүргийн засаг даргаар Э.Бат-Амгаланг томилсон нь хууль бус юм. Одоо энэ тогтоолоо хүчингүй болгож байх шиг байна. Цуглаанд оролцсон хамгаалагч цагдаа нарын хувьд дүрэмт хувцасанд нь нэр байгаагүй. Тэгэхээр эрх баригчдын гар хөл болсон гэж үзэж болохоор байна. Энэ талаар Цагдаагийн дарга Энхтөрд хариу өгөх шаардлагыг өнөөдөр хүргүүллээ.

О.ӨНӨР