Сангийн яам, Татварын ерөнхий газар, УИХ-ын дэргэдэх Төсвийн тогтвортой байдлын зөвлөл, Татварын мэргэшсэн зөвлөхийн нийгэмлэг зэрэг мэргэжлийн байгууллагууд нэгдэж “Тогтвортой хөгжилд татварын боловсролын үүрэг” үндэсний анхдугаар зөвлөгөөнийг зохион байгууллаа.
Татвар бол төрийн бодлогын нэг илэрхийлэл, улс орны оршин тогтнох үндэс суурь тусгаар тогтнолын баталгаа бөгөөд хүн бүрийн үндсэн хуулиар хүлээсэн 4 үндсэн үүргийн нэг юм. Татвар төлөх нь хүний нийгмийн хөгжил дэх төрт улсын үндсэн шинж бөгөөд өдгөө тогтвортой хөгжлийн суурь эх үүсвэр аж.
Г.Алтанзаяа (ТМЗН-ийн Ерөнхийлөгч, доктор профессор, татварын шинжээч): Зөвлөгөөний үндсэн агуулга бол үндсэн хуульд заасан үндсэн үүргээ хэрэгжүүлдэг нийгмийн харилцааг бий болгох, зөвхөн төлдөг биш нийгмийн олон асуудлуудыг зохицуулдаг, нийгмийн шударга ёсыг илэрхийлэх гол хэмжүүр болж өгдөг. Татварын дарамтыг харилцаанд орж байгаа үйлдлээрээ хэмжих үү, төлж байгаа татвараараа хэмжих үү гэдгийг ялгаж ойлгох хэрэгтэй. Үндсэндээ татварын хувь хэмжээний ачааллыг хэмжих юм бол Монгол улс татварын хувьд харьцангуй дарамт багатай улс гэдэг нь дэлхийн аль ч улс орны судалгаагаар тодорхой байна. Тэгэхээр таны хувьд юуг татварын дарамт гэж үзэж байгаагаа өөрөө мэдэх хэрэгтэй. НӨАТ-ын буцаан олголт олгодог 2,3 улс орон байдаг. Тэдгээр улсууд 2 хувийг л буцаан олгодог.
Татварын орлого нь улсын төсвийн 80 хувийг, дотоодын 25 хувийг эзэлдэг.
2021 онд хийгдсэн “Төсвийн тогтвортой байдалд татварын боловсрол нөлөөлөх нь” судалгаагаар татварын талаарх ойлголт, мэдлэг, мэдээллийн хүртээмжийн талаарх судалгаанд 2000 гаруй иргэнийг хамруулахад 73.4 хувь нь татварын талаарх ойлголт мэдлэгийг хөдөлмөрийн харилцаанд ороод мэдэж авсан гэж хариулсан байна.
Татварын боловсрол нь татварын алба, иргэдийг холбох гүүр тул улс төрийн дэмжлэгтэйгээр өргөн хүрээний оролцогч талуудын хамтын ажиллагааны нэгдэлд төлөвших учиртай.
М.САЙНЗАЯА