Манай улсын хөлбөмбөгийн шигшээ баг өчигдөр Маврики улсын шигшээ багт хожигдсон. Тэгвэл дэлхийн хөлбөмбөгт томоохон тоглолтууд боллоо.
Мягмар гарагт Санкт-Петербургт болсон нөхөрсөг тоглолтод ОХУ-ын хөлбөмбөгийн шигшээ баг Францын шигшээ багт 3:1 харьцаатайгаар хожигдлоо. Европын хөлбөмбөгийн аварга шалгаруулах тэмцээнд дэд байр эзэлсэн Францын шигшээ багаас 40 ба 83 дахь минутад Килиан Мбаппе, 48 дахь минутад Поль Погба нар гоол оруулсан бол Оросын шигшээ багийн цорын ганц хариу гоолыг Федор Смолов 68 дахь минутад оруулсан байна.
Мөн тус өдөр Мадридад болсон нөхөрсөг тоглолтод Испанийн шигшээ багт 6:1 харьцаатай бут ниргүүлсэн Аргентины хөлбөмбөгийн үндэсний шигшээ багт тус улсын домогт хөлбөмбөгчин Диего Марадона нийгмийн сүлжээгээр дамжуулан сэтгэл санааны дэмжлэг үзүүлсэн байна. Марадонаг Аргентины шигшээ багийн дасгалжуулагчаар ажиллаж 2009 онд Боливийн шигшээ багт мөн л 6:1 харьцаатай хожигдож байснаас хойш анх удаа дээрх томоохон ялагдлыг хүлээж байгаа ажээ. “Яг одоо бидний хийж чадах зүйл бол ур чадвараа сайжруулах явдал юм” гэж Марадона нийгмийн сүлжээнд бичсэн байна. Аргентины гол гол сонинууд харин энэ хожигдлыг Лионель Месси гэмтлийн улмаас тоглоогүйтэй холбон тайлбарлахын зэрэгцээ шигшээ багт Фигу, Сержио Рамос зэрэг авъяаслаг хөлбөмбөгчидтэй эн тэнцэхүйц чадварлаг тамирчид дутагдаж байгааг тэмдэглэжээ.
Б.АМАРТҮВШИН
