Бүгд найрамдах Турк улсын Ерөнхийлөгчийн ивээл дор тус улсын Эрүүл мэндийн яам болон ДЭМБ хамтран зохион байгуулж буй Уламжлалт анагаах ухаан, эмийн бус эмчилгээний олон улсын хоёрдугаар хурал энэ сарын 24-28-нд Истанбул хотноо болж байна. Энэ удаагийн хуралд 40 гаруй улс орны Эрүүл мэндийн сайд, дэд сайд болон олон улсын байгууллага, хөгжлийн агентлаг, төрийн бус байгууллага болон иргэний нийгмийн байгууллагын төлөөлөл, эрдэмтэн, судлаачид нийт 2000 орчим төлөөлөгчид оролцож байгаа юм.
Эрүүл мэндийн сайд Д.Сарангэрэл хуралд оролцох үеэрээ Туркийн Эрүүл мэндийн сайд Фахреттин Коча-тай албан ёсны уулзалт хийж, хоёр талын хамтын ажиллагааны талаар харилцан ярилцаж, санал солилцжээ. Уулзалтад Монгол Улсаас БНТУ-д суугаа Элчин сайд Р.Болд болон Истанбул дахь Ерөнхий консулын газрын төлөөлөл оролцсон байна. Эрүүл мэндийн сайд Д.Сарангэрэл хоёр улсын ЭМЯ-д хоорондын зөвлөлдөх уулзалтыг зохион байгуулж, хамтын ажиллагааны төлөвлөгөөг шинэчлэн байгуулахыг дэмжиж байгаагаа мэдэгдэхийн зэрэгцээ цаашид 5000 гаруй жилийн түүхтэй Монголын уламжлалт анагаах ухааны мэдлэг, туршлагаас харилцан суралцах, эмч мэргэжилтэн солилцох зэргээр хамтран ажиллах боломжтой болохыг хэлжээ.