Чөлөөт бөхийн эрэгтэйчүүдийн 32, эмэгтэйчүүдийн 22 дахь удаагийн насанд хүрэгчдийн Азийн аварга шалгаруулах тэмцээнд оролцох Монгол Улсын эрэгтэйчүүдийн шигшээ баг өнөөдөр БНХАУ-ын Шиань хотыг зорив. Эрэгтэйчүүдийн жингийн барилдаан энэ сарын 23-нд буюу мягмар гаригт эхлэх бөгөөд манай улсаас 57 кг-ын жинд ОУХМ Н.Насанбуян, 61 кг-д ОУХМ Ц.Цогбадрах, 65 кг-д ОУХМ Т.Тулга, 70 кг-д ОУХМ Э.Тэмүүлэн, 74 кг-д спортын мастер Б.Отгонбаяр, 79 кг-д спортын мастер Д.Төгс-Эрдэнэ, 86 кг-д ОУХМ Г.Ганхуяг, 92 кг-д ОУХМ Б.Өлзийсайхан, 97 кг-д ОУХМ Ө.Батзул, 125 кг-д ОУХМ М.Лхагвагэрэл нар хүч үзнэ. Эрэгтэй бөхчүүдээс гурав нь хоёр дахиа, долоо нь анх удаа тивийн аваргад зодоглохоор болжээ.
Хөдөлмөрийн баатар, гавьяат тамирчин С.Батцэцэг, гавьяат тамирчин С.Цэрэнчимэд, ОУХМ А.Батцэцэг, Э.Гантуяа, З.Болортунгалаг, Ц.Намуунцэцэг, Б.Энхцэцэг, Б.Дөлгөөн, спортын мастер Г.Ариунжаргал, Н.Загардулам нарын бүрэлдэхүүнтэй бүсгүйчүүд нөгөөдөр эх орноосоо мордох бол сонгомол бөхийн хоёр тамирчин (М.Даваабанди, Г.Ханбүргэд) маань 25-нд Хөх хотоос Шиань шууд очих юм.
Монголын чөлөөт бөхийн эрэгтэй тамирчид 1989 онд Японы Оараи хотод болсон Азийн АШТ-ээс, эмэгтэй бөхчүүд 2000 оны БНСУ-ын Сөүлийн Азийн аваргад анх зодоглосноос хойш тасралтгүй оролцож, 23 алт, 61 мөнгө, 84 хүрэл, нийт 168 медаль хүртээд байна.