Чингэлтэй дүүргийн 16-р хорооныхон “Иргэний танхим”-тай боллоо. Чингэлтэй дүүрэг нийт 19 хороотой. Хороод тус бүр иргэний танхимтай ч зарим хорооны хувьд хүн ихтэй тул хурлын байрны багтаамж, хүрэлцээ сул байдаг байна. Дүүргийн 16-р хорооны иргэд Иргэний танхимтай боллоо. Танхимыг хоёр сарын хугацаанд дүүргийн орон нутгийн төсвөөс 100-аад сая төгрөгийн хөрөнгө оруулалттайгаар бүтээн байгуулжээ.
Уг 16-р хороонд 12 мянга гаруй иргэн, 3400 орчим өрх оршин суудаг байна. Иргэд хороо, нутаг дэвсгэрт тулгамдаж байгаа асуудлыг холбогдох удирдлагуудтай ярилцаж, шийдвэрлэхэд иргэний танхим зайлшгүй шаардлагатай болдог байжээ. Иймээс Иргэний танхим нь хувь хүний хөгжлийн төв байхад чиглэнэ гэдгийг хорооны дарга онцоллоо. Дүүргийн ИТХ нийт 35 төлөөлөгч, 7 тэргүүлэгчтэй. 16-р хорооноос 2 төлөөлөгч сонгогдон ажиллаж байгаа юм байна.