Москва хотын Улаан талбайд долоо дахь өдрөө үргэлжилж буй Олон улсын цэргийн хөгжмийн наадамд МУГЖ, “Чингис хаан” одонт дуучин Г.Ариунбаатар оролцож байна.
Тус наадам нь наймдугаар сарын 24-нөөс ирэх сарын 2-н хүртэл үргэлжилнэ. Өнөөдрийн тоглолтод МУГЖ Г.Арунбаатар дэлхийд алдартай сопрана Хибла Герзмаватай хамт “Подмосковные вечера” дууг дуулна хэмээн “Кремьлийн spasstower.ru” сайт-д мэдээлжээ.
Монголын театрын урлагийн хөгжилд өөрийн авьяас билэг, хөдөлмөр зүтгэлээ зориулж ирсэн ахмад уран бүтээлчид, театрын зүтгэлтнүүдээ мөнхжүүлэх, тэдний бүтээл туурвилын баялаг өв санг хойч үедээ уламжлан хөгжүүлэх үүднээс 2005 оноос УДЭТ-ын хамт олон “Бид мартахгүй” дурсамж хүндэтгэлийн үйл ажиллагааг зохион байгуулж ирсэн.
Өчигдөр/08.29/ тайз дэлгэцийн урлагийн “Алтан үе”-ийн ахмад уран бүтээлчдийн нэг Монгол Улсын Хөдөлмөрийн баатар, Ардын жүжигчин, Төрийн шагналт Гомбожавын Гомбосүрэнгийн мэндэлсний 100 жилийн ой тохиож буйтай холбогдуулан үр хүүхдүүдийнх нь санаачилгаар театрын Уран бүтээлийн хэлтсийн хамт олныг Г.Гомбосүрэн багшийн нэрэмжит болгож, “Алдрын танхим”-ыг тохижуулан хүлээлгэн өгөв.
Гомбожавын Гомбосүрэн 13 насандаа Бүрэн сумандаа төмрийн лантуучны хийж, ажил хөдөлмөрийн амтыг анхлан мэдэрчээ. Худгийн моторчноос эхлээд жолоочоор хүртэл ажиллаж байсан тэрээр театрын тайзнаа анх 1942 оны долдугаар сард “Хатанбаатар Магсаржав” жүжигт цагаан цэргийн офицер болж гарсан түүхтэй. Түүнээс хойш “Учиртай гурван толгой” жүжгийн Юндэн, “Ээдрээ” жүжгийн Мөнх-Очир гүн, “Арвай хээрийн тал” жүжгийн Халзан Тавхай, “Отелло” жүжгийн Отелло, “Лир ван” жүжгийн Лир ван, “Эдип хаан” жүжгийн Эдип зэрэг Монголын театрын алтан сан хөмрөгт орсон үндэсний болон дэлхийн сонгодог жүжгийн гол дүрийг бүтээсэн байдаг.
Г.Гомбосүрэн зөвхөн театрт ажиллахаас гадна Говийн нүдэн”, “Гурван найз”, “Их хааны удам”, “Мандах нарны туяа”, “Мандухай цэцэн хатан”, “Мичидийн зургаан гялаан”, “Нүгэл буян”, “Тойрох хуудас”, “Улаан дарцаг”, “Үер” , “Өглөө”, “Хүний амь”, “Цогт тайж”, “Цэц магнай”, “Энэ хүүхнүүд үү” зэрэг дэлгэцийн бүтээлд гэгээн дүрээ мөнхлөн үлдээжээ.
Өмнөд Солонгосын “Big Hit” компанийн уран бүтээлчид болох “BTS” хамтлагийнхан шинэхэн уран бүтээл “Youtube” сайтын рекордыг шинэчлэн тогтоосон талаар “ВВС” агентлаг мэдээллээ.
Тус хамтлагийнхан өнгөрөгч баасан гаригт “IDOL” дуугаа цацсан бөгөөд 24 цагийн дотор “Youtube” сайтаас уг бүтээл 45 сая хандалт авчээ. Ийнхүү тус хамтлагийн Америкийн поп дуучин Тэйлор Свифтийн амжилтыг ардаа орхилоо.
Тэйлорын өнгөрсөн онд гаргасан “Look What You Made Me Do” дуу 24 цагийн дотор 43.2 сая хандалт авч байв.
Монгол, Германы хамтарсан кино төслийн баг “Алтан судал” киноныхоо зураг авалтыг Төв аймгийн Заамар суманд эхлүүлжээ. Энэ нь ХБНГУ-ын уран бүтээлчидтэй хамтран хийж буй анхны бүрэн хэмжээний уран сайхны кино юм байна. Тус киноны найруулагчаар “Ингэн нулимс” киногоо Оскарт нэр дэвшүүлж явсан Л.Бямбасүрэн ажиллаж байна. Гол дүрд нь Дундговь аймгийн Өндөршил сумын долдугаар ангийн сурагч Б.Бат-Ирээдүй сонгогдож, соёлын тэргүүний ажилтан Н.Ялалт, Батцэцэг нартай хамтран тоглож байгаа ажээ.
УДЭТ-ын уран бүтээлчид 21 аймгаар хийх Намар цагийн аялан тоглолтоо Баянхонгор аймгаас эхлүүлэхээр болжээ. Ирэх сарын 12, 13, 14-ны өдрүүдэд Баянхонгор аймагт тус театрын 50 шахам уран бүтээлч ажиллаж, орон нутгийн үзэгчдэд бүтээлээ толилуулах юм байна.
Аялан тоглолтын бүрэлдэхүүнд театрын удирдлага, ахмад, дунд, залуу үеийн төлөөлөл болсон жүжигчид нас насны үзэгчдэд зориулсан үндэсний түүхэн болон сонгодог, орчин үеийн, хүүхдийн зэрэг төрөл жанарын бүтээлүүдээ толилуулах аж.
Баянхонгор аймагт тоглох хөтөлбөрт Э.Оюуны зохиол, Н.Наранбаатарын найруулга “Би эндээс явахгүй” драмын жүжиг, СГЗ Ш.Гүрбазарын зохиол “Надаар тоглосон хайр” уянгын драмын жүжиг, Рей Куни . Ж.Чэпмен “Эцсийн зогсоол зөвхөн чи” инээдмийн жүжиг, С.Михалков “Бардам туулай” хүүхдийн жүжгүүд багтжээ.
Тус театрын уран бүтээлчид шилдэг сор бүтээлүүдийн дээжис болох дээрх жүжгүүдээ бүх насны үзэгчид 50 хувь хөнгөлөлттэй үнээр үзэх боломжийг олгож буйгаараа онцлогтой юм байна.
“Blue Mon” төвийн “Norphei Art” галерейд Монголын урчуудын эвлэлийн хорооны гишүүн, зураач Н. Гүнчинсүрэн, Л. Давааням нарын “Анир” сэдэвт уран зургийн хамтарсан үзэсгэлэн нээлтээ хийлээ. “Анир” үзэсгэлэнд байгалийн сэдэвтэй 30 гаруй бүтээл олны хүртээл болж байгаа бөгөөд реалист академик уран зургийн чадварыг харуулж байгаагаараа онцлог аж.
“Анир” уран зургийн үзэсгэлэнгийн тухай зураач Н. Гүнчинсүрэнгээс тодрууллаа. Тэрээр “Хүүхэд байхаасаа л зураг зурсан. Нэгдүгээр ангид байхад манай дээд ангийнхан хэрэм зуруулдаг байсан. Дараа нь тавдугаар ангидаа хөгжим бүжгийн коллежид ороод сурсаар зураач болсон. Энэ удаагийн зургийн үзэсгэлэнгийн онцлог нь байгалийн зургаар дагнасан, хамтарсан уран зургийн үзэсгэлэн гэдгээрээ давуу талтай болж байна. Ирэх есдүгээр сард “UB Art” галерейд “Европын тэмдэглэл” гэсэн хамтарсан зургийн үзэсгэлэн гаргах төлөвлөгөөтэй байгаа. Эдгээр байгалийн зургуудыг заримыг нь судалбар таталбар хийж байгаад урландаа ирээд бүтээл болгосон бол зарим байгалийн зургийг өөрийн нүдээр харж байгаад зурсан. Тухайлбал “цагаан суваргын орой” бүтээлээ Дундговь аймагт очиж байгаад зурсан, миний онцлог бүтээлүүдийн нэг юм.” Гэв.
Б. ОДГЭРЭЛ
Олон үндэстэн, ястны уламжлалт цай, цайны соёл нь нүүдэлчдийн их өвийн нэг юм. Тиймээс олон үндэстэн, ястны соёлын биет болон биет бус өв, язгуур урлаг, цайны соёлын өвийг түгээн дэлгэрүүлэх, өвлүүлэн үлдээх, сурталчлах, орон нутгийн аялал жуулчлалыг хөгжүүлэх зорилгоор “Цайны зам өв соёлын наадам”-ыг есдүгээр сарын 24-30-ны өдрүүдэд Ховд аймгийн төв, Манхан сумын Гурван Сэнхэрийн агуйд зохион байгуулахаар боллоо.
“Цайны зам өв соёлын наадам”-ын ерөнхий зохион байгуулагчаар Ховд аймгийн Засаг даргын Тамгын газар, хамтран зохион байгуулагчаар Боловсрол, соёл, шинжлэх ухаан, спортын яам, Байгаль орчин, аялал жуулчлалын яам, Хүнс, хөдөө аж ахуй, хөнгөн үйлдвэрийн яам ажиллаж байна.
“Цайны зам өв соёлын наадам”-ын хүрээнд Буянт сумын соёлын өдөр, Бэсрэг наадам, “Тэмээн жин” арга хэмжээ, “Адуучин” тэмцээн, Гурван Сэнхэрийн агуйтай танилцах аялал, Гурван Сэнхэрийн агуйгаас салаалсан таван маршрутын дагуу ойрын зайн аялал хийх, “Соёлын биет бус өвийн бусад зүйлтэй хөөмийлөх урлагийн харилцан хамаарлын шинжлэх ухааны үндэс” сэдэвт эрдэм шинжилгээний бага хурал, Олон улсын хөөмийн V наадам, Тууль, цуур, бий биелгээ, хөөмий, уран нугаралтын үзүүлбэр тоглолт, Угсаатны цай чанах, патентжуулах арга хэмжээ, “Цайны зам” эрдэм шинжилгээний бага хурал, Гэрэл зураг, уран зургийн үзэсгэлэн болон дуудлага худалдаа, Уран нугаралтын бэсрэг наадам, Ховд сумын Казак үндэстний соёлын өдөр, Булган сумын торгууд, хошууд угсаатны соёлын өдөр зэрэг арга хэмжээнүүдийг зохион байгуулах бөгөөд 17 сум, төрийн болон төрийн бус байгууллагуудын төлөөлөл оролцох аж.
Хамгийн олон үзэгчтэй “Авьяаслаг монголчууд” телевизийн шоу нэвтрүүлэг тун удахгүй дахин үзэгчдийн хүртээл болох гэж байна.“Монгол ТВ” телевизийн уран бүтээлчид дэлхийн 60 гаруй оронд хийгдсэн, 100 гаруй oрны үзэгчдийн хүртээл болсон Авьяастан тодруулдаг тус нэвтрүүлгийг эх орондоо хийхээр албан ёсны эрхийг нь авсан билээ.
Авьяаслаг Монголчууд шоуны шүүгчээр өмнө нь хөгжмийн зохиолч, продюсер, харанга хамтлагийн ахлагч Ц.Чулуунбат, хөтлөгч нэвтрүүлэгч С.Чимгээ, реппер Rokitbay, хийлч Дээгий нар байсан. Харин энэ удаа тэд цоо шинэ бүрэлдэхүүнээр дахин Авьяаслаг Монголчууд шоуг хийх гэж байна. Тус шоуны шүүгчээр ажиллахаар Чингис хаан одонт, Дуурийн дуучин Г. Ариунбаатар, Реппер Рокит Бэй, Жүжигчин Г. Ундармаа, Хөтлөгч П.Анужин нар тодроод байгаа юм.
Нийслэлийн Засаг даргын хэрэгжүүлэгч агентлаг Залуучуудын хөгжлийн газар, “Цацрах эгшиг” ТББ-тай хамтран “Бодитоор мэдэрье, эерэгээр харъя” уриатай алкохолгүй амьд хөгжмийн хоёр дахь удаагийн тоглолтыг энэ сарын 19-ний өдөр “Дээврийн хөндий” бүжгийн клубт зохион байгууллаа.
Тус тоглолтыг мэдээллийн технологийн “Yesuimind” ХХК, “REDD” бэлэн хувцасны дэлгүүр, “MUSIC WORLD” амьд хөгжмийн дэлгүүр, “Анхны алхам” гэрэл зургийн студи дэмжин хамтран ажилласан юм.
Нийслэлийн Засаг дарга бөгөөд Улаанбаатар хотын Захирагчийн 2016-2020 оны үйл ажиллагааны хөтөлбөрийн хүрээнд “Нийслэлийн Залуучууд” дэд хөтөлбөрийг Нийслэлийн иргэдийн Төлөөлөгчдийн Хурлын Тэргүүлэгчдийн 2017 оны 158 дугаар тогтоолоор батлуулсан бөгөөд тус хөтөлбөрийн 2.2.4-т “Залуучуудын амралт, чөлөөт цаг өнгөрүүлэх орчин нөхцөл, үйлчилгээний хүртээмжийг нэмэгдүүлэх” зорилтын хүрээнд соёл, урлагийн шинэ хамтлаг, дуучин залуучуудыг дэмжих, тэдний уран бүтээлийг олон нийтэд сурталчлан таниулах, чөлөөт цагаа зөв боловсон, эрүүл орчинд өнгөрөөх нөхцөлийг бүрдүүлэх зорилгоор энэхүү тоглолтыг зохион байгуулсан юм.
Хорт зуршлаас татгалзахад уриалж буй тус тоглолтод поп, метал, альтернатив, панк болон рок урсгалын шинэ залуу 6 хамтлаг өөрсдийн санаачилгаар оролцов. Тоглолтыг нийт 100 орчим залуус үзэж, сонирхсон бөгөөд зорилтот бүлгийн залуучуудад энэхүү тоглолтыг үнэ төлбөргүй үзүүлсэн юм гэж нийслэлийн Залуучуудын хөгжлийн газраас мэдээллээ.
Дэлхийн аялал жуулчлалын нүүр царайг сонгох хамгийн том шалгаруулалт болох “The world miss tourism ambassador 2018” тэмцээний тайзнаа Монгол бүсгүйн гоо үзэсгэлэнг гайхуулж чадсан Б.Гүнзаяа эх орондоо өчигдөр ирлээ. 7-р сарын хорин тавнаас 8-р сарын наймны хооронд Тайланд улсад зохион байгуулагдсан энэхүү тэмцээнд Монгол улсын төлөөлөл эхнээсээ номинаци бүрт тэргүүлж дэмжигч, фэнүүдээ баярлуулж, омогшуулж байсан билээ.
1994 оноос хойш уламжлал болон зохион байгуулагдаж байгаа тус тэмцээний энэ оны шалгаруулалтад 57 орны гоо охид шалгаран уригдаж 14 хоногийн туршид тусгай хөтөлбөрийн дагуу тэсвэр хатуужил, гоо үзэсгэлэн, нийгмийн хариуцлага, авъяас чадвараараа өрсөлдсөнөөс Монгол охин Б.Гүнзаяа 3-р байрын шагналыг эх орондоо авчирч байна.
Дэлхийн аялал жуулчлалын элчийг шалгаруулдаг тус тэмцээнд улс орноо төлөөлөн оролцож байгаа охид эх орныхоо түүх соёл, хөгжил дэвшил, жуулчдын анхаарлыг татахуйц гарц боломжийг сурталчилдагаараа ач холбогдолтой. “The world miss tourism ambassador 2018” арга хэмжээг зохион байгуулагчид болоод хэвлэлийн агентлагууд, үзэгчдийн онцолсоноор Монголын төлөөлөл болон оролцсон Б.Гүнзаяа онгон дагшин байгалийн сүр хүч, нүүдэлчин амьдралын хэмнэл, тал нутгийн охидын эрэмгий зоригийг илтгэсэн эко видео, хувийн үзүүлбэр, үндэсний хувцасаараа өөрийн эрхгүй анхаарал татаж байсныг мэдээлжээ.
Б.Гүнзаяа охин ийнхүү дэлхийн нэр хүндтэй арга хэмжээнд амжилт үзүүлж эх орноо сурталчилж, аялал жуулчлалын хөгжилд хувь нэмрээ оруулсандаа баяртай байгаагаа илэрхийлж байна. Мөн тэмцээний хамгийн чухал шалгаруулалт болох олон нийтийн санал асуулгын сүлжээнд Монголчууд хамтдаа байж, тасралтгүй саналаа өгч нийт дүнгээрээ тэргүүлж байсан нь онцлох үйл явдал болж чадсан юм. Энэ бол бидний эв нэгдлийг харуулсан үнэхээр сэтгэл догдлуулсан мөчүүд байсан гэж Б.Гүнзаяа хэлж байна.
Тэмцээнийг үзэхээр дэлхийн 100 гаруй орны 40 орчим сая жуулчин Тайландыг зорин ирсэн бөгөөд эх орноо төлөөлөн оролцож байгаа охидоос тус орны өв соёлыг танин мэдэж дараа дараагийн аялалынхаа зорилгыг тодорхойлсоноо илэрхийлсэн байна. Манай орны хувьд энэхүү олон улсын цараатай тэмцээнд 3 дахь удаагаа амжилттай оролцож байгаа бөгөөд Б.Гүнзаяа энэ удаа хүндэт титмийг ийнхүү эх орондоо авчирч байна. Түүнийг “Чингис хаан” нисэх буудал дээр гэр бүл, найз нөхөд дэмжигч фенүүд нь тосон авч хүндэтгэл үзүүлсэн байна.
