Category: соёл-урлаг

Азийн хамгийн нэр хүндтэйд тооцогддог Бусаны олон улсын кино наадамд “They Sing Up on the Hill” буюу “Од ба Гэгээ” бүрэн хэмжээний уран сайхны кино “А” хэсэгт шалгарчээ. “Window on Asian Cinema” хэсэгт шалгарсан энэхүү бүтээл дэлхийн нээлтээ Бусанд хийхээр болсон байна. Тус киноны найруулагчаар Л.Бат-Амгалан ажилласан бол гол дүрд нь Б.Дөлгөөн /Magnolian/, М.Номин-Эрдэнэ /NMN/ нар тогложээ.

Сонирхуулахад, таван жилийн өмнө найруулагч Л.Бат-Амгалангийн “Хуучны сайхан өдрүүд” богино хэмжээний кино уралдаант хэсэгт нь шалгарч Азийн кино наадмыг шуугиулж байсан юм. Мөн 2013 онд Бусаны олон улсын кино наадмаас найруулагч С.Бямба “Алсын удирдлага” киногоороо тэргүүн шагнал хүртэж, Ч.Хоролдоржийн “Шарга даага” бүтээл уг кино наадамд нээлтээ хийж байсан билээ.

Есдүгээр сарын 22-ны өдрийн 19:00 цагт “Улаанбаатар палас”-ын концертын Их танхимд Монгол Улсын Хөдөлмөрийн Баатар, Төрийн шагналт, Ардын уран зохиолч, Соёлын гавьяат зүтгэлтэн Бавуугийн Лхагвасүрэнгийн “Би цаг тооны үргэлжлэл” уран бүтээлийн их цэнгүүн болно.

“Монгол суутнууд” төслийн хүрээнд “Монгол Медиа Ивэнт Групп” ХХК-иас тус цэнгүүнийг зохион байгуулж буй аж. Их найрагчийн уран бүтээлийн цэнгүүний тасалбарын үнэ 25-35 мянган төгрөг бөгөөд ticket.mn болон 1900-1800 1900-1950 утсуудаар захиалга авч, үнэгүй хүргэж буй юм байна. Дэлгэрэнгүй мэдээллийг 99075959,80067291 утсаар авах боломжтой ажээ.

Загвар өмсөгч бүсгүй энэ намрын хамгийн том шоу үзүүлбэрийн багт багтахаар болжээ.Нью-Йорк хотноо явагдсан “Victoria’s Secret”-ийн урьдчилсан шалгаруулалтад тун амжилттай оролцсон тухай төлөөлөгч нь мэдээлжээ.

Төрөлхийн арьс цайрах өвчтэй Винни Харлоу загварын ертөнцөд хөл тавьж анхлан Тайра Банксийн “America’s Next Top Model” нэвтрүүлгээр олны танил болж байсан юм.Гадаад төрхөөсөө болж үргэлж бусдад дорд үзэгдэж өссөн бүсгүй тун удалгүй дэлхийн нэртэй брендүүдийн нүүр царайгаар тодрон, зэрэглэл өндөртэй модель болсон билээ.

Энэ сарын 5-8-ны хооронд Улаанбаатар хотноо “ӨМӨЗО-ны соёл, аялал жуулчлалын өдрүүд” арга хэмжээ зохион байгуулагдаж байна.

Тус арга хэмжээний хүрээнд өнөөдөр “Өвөр Монгол, Сычуань мужийн соёл, аялал жуулчлалын танилцуулга, загварын шоу, Өвөр Монголын амтат хоолны фестиваль”-ийн үеэр өмнөд хөршийн өвөрмөц зан заншил, үзэсгэлэнт байгаль, онцгой амтат хоолны соёлыг танилцуулж байна.

Хоолны урлагаар нь тухайн улс үндэстний түүх соёлыг танин мэддэг. Монголчуудын идээ ундаа өөрийн гэсэн өвөрмөц өнгө төрхтэй байдгийн адилаар Өвөр Монгол хоол нь Монгол болон Хятадын соёлыг агуулсан, бусад Хятадын мужуудаас онцлогтой байдаг байна.

Монгол Улсад хүрэлцэн ирэх жуулчдыг манай хөрш хоёр орны жуулчид тэргүүлдэг. Өнгөрсөн 2017 онд БНХАУ-аас Монгол Улсыг зорьсон жуулчдын тоо 2016 онтой харьцуулахад 8,9 хувиар өсч 144 мянган жуулчин зорчсон байна. Харин 2018 оны эхний долдугаар сарын байдлаар ирсэн БНХАУ-ын жуулчдын тоо 85855-д хүрсэн байна. Энэ нь өнгөрсөн жилийн мөн үетэй харьцуулахад жуулчдын тоо 6900-аар буюу найман хувиар өссөн үзүүлэлт юм гэж нийслэлийн Аялал жуулчлалын газраас мэдээллээ.

Улаанбаатар хотноо Өвөр Монголын соёл, аялал жуулчлалын өдрүүд үргэлжилж байна. Энэ хүрээнд Хөх хот, Улаанбаатар хотын хамтарсан “Найрамдалт хотуудын аялгуу” тоглолт 09 дүгээр сарын 6-ны өдөр Улаанбаатар чуулгын байранд боллоо. Тоглолтын ажиллагаанд нийслэлийн Засаг даргын орлогч Ш.Энхтөр оролцлоо. Тоглолтод Улаанбаатар чуулга болон Хөх хотын чуулгын уран бүтээлчид оролцлоо. Ирэх онд Монгол, БНХАУ хооронд дипломат харилцаа тогтоосны 70 жилийн ой болно. Энэ ойг угтан Монгол Улсын иргэдэд ӨМӨЗО-ны ахуй амьдрал, соёл, уламжлал, аж байдлын онцлогийг таниулах арга хэмжээг зохион байгуулж байгаа юм гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

Энэ сарын 5-наас 12-ны өдрүүдэд Улаанбаатар хотноо Монгол Улсын Ерөнхийлөгчийн ивээл дор Монголын урчуудын эвлэлээс “Улаанбаатар-2018″ Олон улсын дүрслэх урлагийн наадмыг зохион байгуулах юм.

Тус наадам нь дүрслэх урлагаар дамжуулан олон нийт болон залуу үеийнхний урлаг соёлын боловсролыг нэмэгдүүлж, Монгол Улсын Дүрслэх урлагийг дэлхий нийтэд сурталчлан таниулах үндсэн зорилготой ажээ. Энэ хүрээнд олон улсын уран бүтээлчдийн бүтээлүүдээс дэлгэн үзүүлэх юм байна.

“Улаанбаатар 2018” олон улсын наадамд Монгол, Орос, Хятад гурван улсын кураторууд ажиллах ажээ. Мөн Монгол Улсад үйл ажиллагаа явуулж буй галерейнуудад (Үүнд: МУЭ-ийн арт галерей, UB арт галерей, Цагаан уул арт галерей, Q арт галерей, 976 арт галерей, MN 17 арт галерей, Best арт галерей, Өв арт галерей, Хаан галерей, Норпей арт галерей) Монголын шилдэг уран бүтээлчдийн үзэсгэлэн дэлгэгдэх бөгөөд гол павилион нь Морьтны хөшөөнд байх юм байна.

Энэхүү олон улсын наадамд БНХАУ (И Сан, Ли Хонгбо, Жианг Феймо), Швед (Жоанэс Ниэлсон), Эстониа (Сим-Танел Аннус), Мьянмар (Мин Тэйн Сунг), Австрали (Тан Лаурэнс), БНСУ (Ли Квон Соеп), ОХУ-аас (Жигжит Баясгаланов, Юрий Мандаганов, Татьяна Бороноева) зэрэг олон улсын шилдэг уран бүтээлчид оролцох ажээ.

БНХАУ-ын алдарт барималч И Сан өөрийн бүтээл болох “Хил хязгааргүй соёл иргэншил” бүтээлээ уг олон улсын наадамд зориулан Монгол Улсын Засгийн газарт хандивлах юм байна.

Энэ сарын 6-ны өдөр “Улаанбаатар-2018” Олон улсын дүрслэх урлагийн наадмын Арт-форум зохион байгуулах ба форумд Монголын урлаг судлаач, эрдэмтэн профессорууд болон олон улсын кураторууд хүрэлцэн ирж, Монголын Дүрслэх урлагийн өнөөгийн чиг хандлага, түүний олон улс дахь байр суурийн талаар хэлэлцүүлэг, уран бүтээлчдийн яриа, лекц зохион байгуулах ажээ.

Нийслэлийн Засаг даргын Тамгын газар, нийслэлийн Аялал жуулчлалын газар, нийслэлийн Соёл Урлагийн газар, “Их талын жазз” ТББ-ууд хамтран Жазз хөгжмийг олон нийтэд таниулах, түгээн дэлгэрүүлэх зорилгоор “Их талын жазз” олон улсын XII их наадмыг зохион байгуулах гэж байна. Олон улсын наадам энэ сарын 7-ны өдөр 20.00 цагаас “Гэрэлт гудамж”-нд болох аж. Тус арга хэмжээний үеэр Монгол, Япон Улсын жазз хамтлаг, дуучид мэргэжлийн жазз хөгжмийг эгшиглүүлнэ.

XX зууны эхээр АНУ-д үүсч байсан жазз хөгжмийн урсгалыг 50 гаруй жилийн тэртээ манай улсын орчин үеийн эстрад урлагийг үндэслэгчдийн нэг “Баянмонгол” чуулга бидэнтэй анх танилцуулж байсан түүхтэй.

Сэтгэл сэргэм тансаг хөг аялгуу, хөнгөн хэмнэл, ямар ч хөгжмийн урсгалтай хорших уян хатан байдлаар нь жаззыг дэлхийн хөгжим гэлцдэг. Жинхэнэ амьд тоглолтоор торгон мэдрэмжийг төрүүлдэг энэхүү хөгжим тропикал, бест, латин, чөлөөт, жааз рок, жааз реп гэх мэтчилэн 20 гаруй төрөлтэй байдаг.

Үзэгч сонсогч та бүхнийг “Их талын жазз” олон улсын наадмыг зорин ирж жазз хөгжмийн гайхамшгийг мэдрэхийг урьж байна гэж нийслэлийн Аялал жуулчлалын газраас мэдээлэв.

Монгол Улс олон улсад анхны эмэгтэй балетын гоцлоочтой боллоо. Р.Булган нь өнгөрсөн дөрөвдүгээр сард Арабеск олон улсын балетын тэмцээнээс мөнгөн медаль хүртсэн анхны эмэгтэй балетчин болсон түүхтэй. Тэрбээр ХБНГУ-д төрсөн бөгөөд ОХУ-ын Перм хотын бүжгийн сургуулийг төгссөн юм байна.

Р.Булган нь П.И. Чайковский нэрэмжит Пермийн дуурь бүжгийн театрын балетын гоцлооч болсон бөгөөд өчигдөр /2018.09.03/ алдарт “Хунт нуур” балетын хар, цагаан хунгийн дүрийг амжилттай бүтээсэн аж.

Нобелийн шагналт зохиолч Казүо Ишигүрогийн “Өдрөөс үлдсэн зүйл” роман Монголын уншигчдад хүрэхэд бэлэн болжээ. Монсудар хэвлэлийн газар монгол хэлнээ албан ёсны эрхтэйгээр орчуулан олны хүртээл болгохоор бэлтгэжээ.

Казүо Ишигүрогийн зохиолуудаас хамгийн алдартай энэхүү зохиолын нээлт 2018 оны есдүгээр сарын 6-ны Пүрэв гарагийн 19 цагаас Монсудар хэвлэлийн газар, Altan Khalis холбоо хамтран iCinema кино театрт зохион байгуулах гэж байна.

Нээлтийн арга хэмжээний үеэр Оскарын шагналт Энтони Хопкинс, Эмма Томпсон нарын тоглосон “Өдрөөс үлдсэн зүйл” киног үзүүлэх юм байна.

Зохиолч Казүо Ишигүро 1983 онд Уинифред Холтбигийн нэрэмжит шагнал (Winifred Holtby), 1986 онд Костагийн номын шагнал (Whitbread), 1989 онд Бүүкер (Booker), 1995 онд Их Британийн Эзэнт Улсын одон (OBE), 1998 онд Урлаг, утга зохиолын одон (Chevalier de l’Ordre des Arts et des Lettres), 2017 онд Нобелийн шагнал зэрэг утга зохиолын салбарын хамгийн нэр хүндтэй шагналуудыг хүртсэн юм.

Номын тухай товч мэдээллийг: http://www.monsudar.mn/books/view/234/ хуудсаас авна уу.

Лавлах утас: 75850724, 99046645

“Хятадын соёлын өдрүүд” арга хэмжээ Улаанбаатар хотноо энэ сарын 4-8-ныг хүртэл үргэлжлэх юм байна.

Монгол Улс, БНХАУ-ын хамтын ажиллагааг өргөжүүлэн хөгжүүлж, хоёр орны найрсаг харилцааг бэхжүүлж, соёл уламжлалыг сурталчлан таниулахад дээрх арга хэмжээ чиглэж буй аж. “Хятадын соёлын өдрүүд” арга хэмжээг БСШУСЯ, ӨМӨЗО-ы Ардын засгийн газрын Хэвлэл мэдээллийн алба хамтран зохион байгуулж, Монголын Сэтгүүлчдийн Нэгдсэн эвлэл мэдээлэл сурталчилгааны чиглэлээр дэмжин оролцох юм.

Дөрвөн өдөр үргэлжлэх уг арга хэмжээг Монголын телевиз, сонин сэтгүүл, сайт, радиогийн нийт 60 сэтгүүлч сурвалжлах бөгөөд зохион байгуулагчдын зүгээс тэдний дунд шилдэг, мэдээ мэдээлэл, нийтлэл, нэвтрүүлгийн уралдаан зарласан байна.