Category: соёл-урлаг

ДБЭТ-т “Мodern of Night” нэртэй модерн бүжгийн тоглолт ирэх сарын 4-нд болох гэж байна.   Энэ тоглолтыг “Монголын балетын хөгжил сан” нийслэлийн Засаг даргын Тамгын газрын дэмжлэгтэйгээр ‘’Найрсаг Улаанбаатар-375’’ аяны хүрээнд  зохион байгуулж байгаа билээ.  Оюун санаа, сэтгэхүйн ертөнцөө үйл хөдлөлөөр илэрхийлдэг балетын урлагийн энэхүү тоглолтод дэлхийд алдартай “Бостон” балетын гоцлоочид уригдан ирж байгаагаас гадна МУГЖ Д.Алтанхуяг оролцоно. Английн “Рояал”, ОХУ-ын “Большой”, Италийн “Ла Скала” зэрэг дэлхийн сор театруудын тайзнаа уригддаг сонгодог урлагийн тоглолтыг ийнхүү Монголчууд эх орондоо үзэх боломжтой болж байна. 

Улсын драмын эрдмийн театрын жүжигчин Цэрэндоржийн Баясгалан Косово улсад болсон моно жүжгийн “МонАкт-2014” фестивальд Монгол Улсаа төлөөлөн оролцсон юм. Түүний хувьд уг фестивальд “Би Эдит Пиаф байна” моно драмын жүжгээрээ амжилттай оролцож, “Шилдэг уран бүтээл-Гран при” шагналын эзэн болж, Монголын драмын урлагийг гадаад ертөнцөд тунхагласан анхны монгол жүжигчин болсон билээ. ЮНЕСКО-гоос зохион байгуулдаг тус фестивальд Герман, Польш, Орос, Монгол, Украйн, Македон, Косово, Монтенегро, Румын, Словак зэрэг дэлхийн 13 улсын 70 гаруй уран бүтээлчид өөрсдийн моно жүжгээр оролцсон аж. УДЭТ-ын жүжигчин Ц.Баясгалан Францын алдарт дуучин Эдит Пиафын амьдрал уран бүтээлийг моно жүжгээрээ тайзнаа харуулахдаа түүний долоон дууг франц хэл дээр дуулжээ. Тус моно жүжгийг Украины зохиолч Нина Мазурын зохиолыг Урлагийн гавьяат зүтгэлтэн Б.Баатар найруулж ерөнхий зураачаар СТА Н.Батбилэг ажилласан юм.  

Олон улсын өндөр зэрэглэлийн тэмцээн, уралдаанаас гранпри болон шагналт байр эзэлсэн тамирчид, уран бүтээлчдэд Монгол Улсын Засгийн газраас шагнал урамшил олгодог тусгай тогтоол амьдрал дээр хэрэгжиж эхэлснийг зуны олимпийн наадам болон ДАШТ-д өндөр амжилт гаргасан тамирчдын урамшуулал тодорхой харуулдаг. Тэгвэл жүжигчин Ц.Баясгалангийн оролцож гранприг нь авчирсан фестиваль Засгийн газрын тогтоолд ЮНЕСКО-гоос зохион байгуулсан олон улсын фестиваль гэдгээрээ яг үг, үсэгчлэн таарч байгаа юм. Энэ тогтоолоор тэргүүн байр буюу гранпри хүртсэн уран бүтээлч 65 сая төгрөгийн эзэн болох юм байна. Монгол Улсын жүжигчдээс анх удаа эл нэр хүндтэй шагналыг эх орондоо авчирсан тул Соёл, спорт, аялал жуулчлалын яам болон Улсын драмын эрдмийн театрынхан жүжигчин Ц.Баясгаланд Засгийн газрын тогтоолын дагуу 65 сая төгрөгөөр урамшуулахыг дэмжээд байгаа аж. Олимп, ДАШТ-ээс алт, мөнгө, хүрэл медаль авчирсан тамирчинд Ерөнхийлөгчийн зарлигаар гавьяат болон төрийн дээд шагналыг шууд гардуулдаг уламжлалын дагуу бодсон ч жүжигчин Ц.Баясгалан Монгол Улсын гавьяат жүжигчин гэсэн эрхэм алдрын эзэн мөдхөн болно гэж түүний шүтэн бишрэгчид, мэргэжил нэгтнүүд найдлага тавьж байгаа юм байна. ЮНЕСКО-гоос зохион байгуулсан Косовогийн моно драмын “Моно АКТ” фестивалийг зохион байгуулах хорооны дарга Ментор Зимбарежаас Соёл, спорт, аялал жуулчлалын яаманд Ц.Баясгалангийн гранпри авсан амжилтыг баталгаажуулсан гарын үсэгтэй албан бичгийг саяхан ирүүлсэн байна.

Загвар зохион бүтээгч Б.Баасандэлгэр Италийн “Vogue” сэтгүүл Muuse.com сайтууд хамтран зохион байгуулдаг “MUUSExVOGUE Talents young Vision Awards 2014 International” тэмцээнд амжилттай оролцож байна. Тэмцээнд дэлхийн 44 орны 400 гаруй загвар зохион бүтээгч оролцож байгаа бөгөөд тэмцээний хоёрдугаар шатанд 150 хүн үлдсэний дотор Б.Баасандэлгэр багтжээ. Тэрээр энэхүү тэмцээнд “Deelte” хэмээх коллекцоороо оролцож байгаа юм.

Тэмцээний ялагч Muuse брэндийн загвар зохион бүтээгч болохоос гадна muuse.com сайтаар бүтээгдэхүүнээ худалдан борлуулах эрхтэй болох аж. Түүнчлэн алдарт “Vogue” сэтгүүлд нийтлэл бичүүлэх эрхтэй болох гэнэ.

Тэмцээний дараагийн шатанд үлдэх 50 загвар зохион бүтээгчийн шалгаруулахдаа vogue.muuse.com хуудсаар авсан саналыг голлох үзүүлэлтээ болгох юм. Тиймээс нутаг нэгтнээ дэмжин санал өгөхийг хүсвэл та бүхэн дараах линкийг ашиглаарай.

http://vogue.muuse.com/#!vote/1190-baasandelger-batbekh

Б.Баасандэлгэр үүний өмнө мөн л ОУ-ын загварын тэмцээнд оролцон эх орныхоо нэрийг гаргаж байсан бөгөөд 600 орчим хүнээс шилдэг 26-д багтан Миланы загварын шоунд бүтээлүүдээ танилцуулж байсан юм.

Ингээд түүний “Deelte” коллекцыг танилцуулъя.

Хийлч О.Байгаль, Төгөлдөр хуурч Б.Оюу нар энэ сарын 28-нд хамтарсан тоглолтоо хийхээр болжээ. Тэд хамтарсан тоглолтынхоо талаар өчигдөр хэвлэлийн  хурал хийж, мэдээлэл өглөө. Монголын шинэ залуу хөгжимчид маань 2013 онд дэлхийн шилдэг хөгжмийн зохиолчдын бүтээлээс сорчлон “The Best of classics” хамтарсан тоглолтоо Улаанбаатар хот болон Хонконгд тоглож байсан. Харин энэ удаа тэд хоёр дахь тоглолтоо “Glorious Mongolia” нэртэйгээр толилуулахаар болжээ.  Энэ жил дан Монголын шилдэг хөгжмийн зохиолчдын бүтээлүүдийг хүргэж байгаагаараа онцлог аж. Тодруулал, Б.Дамдинсүрэн, Л.Мөрдорж, Б.Шарав, З.Хангал, Э.Чойдог, Ж.Чулуун, Н.Жанцанноров нарын бүтээлүүдээс тоглох гэнэ. Мөн уг тоглолтонд гэрэл зурагчин Г.Ган-Өлзийн Молнголын 21 аймгаар тойрон аялсан “Хөх тэнгэрийн орноор” аяллын шилдэг бүтээлүүдийг 3D проектор ашиглан хөгжимтэй хослуулж хүргэхээс гадна,  УДБЭТ-ын “Memory Pop Orchestra” хамтлаг, МУГЖ Ө.Уянга тэргүүтэй хамтлаг дуучид хүрэлцэн ирэх аж. Тоглолт “Mongolian stars melchers” компанийн байранд болох бөгөөд тасалбарын үнэ нь 88 мянга төгрөг. Үүнд үдшийн зоог, дарс, тоглолтын дараах “After party” зэрэг багтжээ. 

Э. АНУЖИН

МҮОНР 80 жилийн ой хүрээнд “Радио ярьж байна”нээлттэй өдөрлөгийг өчигдөр Чингисийн талбайд зохион байгуулсан юм.  Талбайд цуглагсад “Задгай цагаан”-ы ая дор хүмүүн төрөлхтөн бүжсэн байна. 

“Харанга” хамтлагийн дуучин Х.Лхагвасүрэн “Морин хуур, Толин хул” тоглолтоо наадмын өмнөх өдөр буюу долдугаар сарын 10-нд хийхээр болжээ.  Өнгөрсөн жилийн наадмаар тэрээр анх удаа тоглолтоо  зохион байгуулж байсан юм. Түүний энэхүү тоглолтыг жил бүрийн Үндэсний их баяр наадмын үеэр үзэж байх санал хүсэлтийг  үзэгчдээс ирүүлсэн гэнэ. Тоглолт “UB PALACE”-ын концертын их танхимд 18.00 цагаас болох аж. 

Улсын дуурь, бүжгийн эрдмийн театрын тайзнаа өнөөдөр “Үүлэн заяа”
дуурийг тоглоно. Гурван бүлэг, дөрвөн үзэгдэлтэй уг дуурийг 1988 онд анх
тоглож, УГЗ Ч.Жамсранжав удирдаж байсан түүхтэй. Үндэсний сонгодог
бүтээлийн нэг “Үүлэн заяа” дуурь нутагт нь ган гачиг болж өөр газар
нүүдэллэсэн ард олон нутагтаа буцаж ирж явна. Хоовондой түшмэл эзэн
ноёныхоо бие муудсан тухай мэдээг олонд дуулгаснаар тэд аян нүүдлээ түр
зогсооно.

Монголд артхаус киног түгээн дэлгэрүүлэх зорилготой “Алтан хальс” холбоо 2013 онд зохион байгуулсан “Монголын андерграунд кино уралдаан”-ыхаа шууд үргэлжлэл болгож, энэ жил “Алтан хальс олон улсын андерграунд кино наадам”-ыг зохион байгуулж байгаа аж.

Түүнчлэн энэ үеэр наадмын шилдгүүдэд “Алтан хальс Гран при”, “Шилдэг хүүрнэлт кино”, “Шилдэг хүүрнэлт бус кино”, “Шилдэг анимаци”, “Шүүгчдийн нэрэмжит шагнал” гэсэн төрлөөр шагнал гардуулах юм байна.

Монголын кино урлагт цочроо өгөх 33 андерграунд бэсрэг кино, дэлхийн шилдэг богино хэмжээний андерграунд бүтээлүүдтэй танилцуулах тус наадам өнөөдөр СУИС-ийн Оюутан театрт 11.00 цагаас эхэлжээ.

Хөтөлбөр

11:00 Кино наадмын нээлт

11:20 Нээлтийн кино (Албан ёсны толилуулалт)

Дон Херцфельд – Янзтай сайхан өдөр

12:30 Уралдаант бус хэсгийн бүтээлүүд

12:50 Их завсарлага

13:30 Уралдаант хэсэгт өрсөлдөж буй бүтээлүүд (1-р хэсэг)

15:20 Завсарлага

15:30 Уралдаант хэсэгт өрсөлдөж буй бүтээлүүд (2-р хэсэг)

17:40 Завсарлага

18:00 Дэлхийн шилдэг богино бүтээлүүд (Албан ёсны толилуулалт)

Харун Фароки – Ноцтой тоглоом 1

Ив Хеллер – Крем 21

Кен Жэкобс – Өдөр ба шөнө

Гаи Мэддин – Дэлхийн зүрх

18:30 Шагнал гардуулах ёслол

20:00 Dreamers” Night – Movie Soundtrack Party 

Монголын үндэсний радиогийн 80 жилийн ой энэ онд тохиож байгаа. Ойн хүрээнд олон үйл ажиллагаа зохион байгуулж буйгйин нэг нь ирэх ням гаригт Чингис хааны нэрэмжит төв талбайд болох нээлттэй өдөрлөг юм.

Радиогийн үйл ажиллагааг сурталчлан таниулах, түгээн дэлгэрүүлэх зорилго бүхий нийтийг хамарсан “Радио ярьж байна” өдөрлөг хоёр хэсгээс бүрдэх юм байна.  Нээлттэй өдөрлөг монголын радиогийн 80 жилийн түүхийг өгүүлэх жүжигчилсэн тоглолтоор эхэлж, үйл ажиллагаа өндөрлөх нь.

Харин өдөрлөгийн хоёрдахь хэсэг болох “Задгай цагаан” нийтийн цэнгээнт бүжиг 20.00 цагаас эхэлж, сонсогч олон нийтээ бүжгэнд урих юм байна. Бүжгийн дундуур урлагийн тоглолт болохоос гадна шилдэг бүжигчдийг шалгаруулах гэнэ.

 “Алтаргана” бага наадам Хэнтий аймгийн Биндэр суманд амжилттай болж өндөрлөлөө.

Наадамд Хэнтий аймгийн 10 гаруй сумаас ирж оролцсон ардын авьяастнууд буриад дуу, шүлэг, магтаал зэрэг 12 төрлөөр өрсөлджээ.

Энэ үеэр Дадал сумын ахмад настан Б.Бадамцэрэн суухан хуурыг урлаж наадмын зохион байгуулагчдад гардуулсан юм.

Бага наадмаас шалгарсан ардын авьяастнууд ирэх сарын 18, 19-нд болох  “Алтаргана” их наадамд оролцох эрхтэй болжээ.