Category: улс-төр

Монгол Улсын Их Хурлын чуулганы нэгдсэн хуралдаан өнөөдөр (2024.05.22) боллоо. Хуралдааныг Улсын Их Хурлын дэд дарга Л.Мөнхбаатар даргалан явуулсан юм.

Хуралдааны эхэнд, “Өсвөрийн парламент 2023” хөтөлбөрийн оролцогч хүүхдүүдээс Улсын Их Хурлын болон Засгийн газрын гишүүдэд дэвшүүлж буй хүүхдийн эрүүл, аюулгүй орчинд амьдрах, сурч боловсрох, хөгжих, хүүхдийн эрхийг хангах нөхцөл, эрх зүйн орчныг сайжруулах талаарх санал санаачилгыг Хөдөлмөр, нийгмийн хамгааллын сайд Х.Булгантуяа уламжлан танилцуулав. Тэрбээр, “Өсвөрийн парламент” хөтөлбөр гурав дахь жилдээ үр дүнтэй хэрэгжиж, энэ сарын 10-11-ний өдрүүдэд хаалтаа хийснийг мэдээлж, хөтөлбөрт жил бүр хүсэлтээ өгсөн 900 гаруй хүүхдээс 90 хүүхэд сонгогдон оролцож байсан бол энэ жилээс оролцоог нэмэгдүүлж 105 орчим оролцогчдыг хамруулсан бөгөөд хөтөлбөр НҮБ-ын Хүүхдийн сангийн жишиг хөтөлбөрийн нэг болсныг онцоллоо. Гурван жилийн хөтөлбөрт нийт 330 орчим сурагч 21 аймаг, нийслэлийн есөн дүүргээс шалгаран оролцсон бөгөөд тэд цааш анги, сургууль, аймаг, дүүргийнхээ үе тэнгийн хүүхдүүдэд сурсан мэдсэнээ хуваалцаж, эерэгээр нөлөөлж байдгийг сайд Х.Булгантуяа тэмдэглээд, энэ нь “Өсвөрийн парламент” хөтөлбөрийн үр дүн, цар хүрээ өргөжүүлж байна хэмээн дурдав. Хөтөлбөрт оролцсон 330 оролцогч сүүлийн гурван жилийн хугацаанд нөлөөллийн ажил, “Цахим давалгаа” ажлуудаараа нийт 500 000 гаруй хүүхдэд тогтвортой хөгжлийн зорилго, байгаль орчиндоо ээлтэй байх, хариуцлагатай иргэн байх талаар мэдээлэл хүргэж, хамтран ажиллажээ.

Өсвөрийн парламент 2023 оны хөтөлбөрийн оролцогч хүүхдүүд, Монгол Улсын төр, засгаас аливаа асуудалд бидний саналыг авдаггүй, сонсдоггүй, бидний оролцоог хангадаггүй атлаа ач холбогдолгүй асуудалд маш их төсөв тусгадаг гэсэн шүүмжлэлийг Улсын Их Хурал, Засгийн газарт хандсан эрүүл, аюулгүй орчинд амьдрах, сурч боловсрох, хөгжих, хүүхдийн эрхийг хангах нөхцөл байдал эрх зүйн орчныг сайжруулах талаарх саналуудынхаа хамт дайсан байна.

1. Хүүхдийг цэвэр, эрүүл, тогтвортой орчинд амьдруулах үүрэг амлалтаа биелүүлэхэд чиглэсэн зоригтой, бодитой алхмуудыг хийж, хүүхдийн эрхийг хүндлэн хамгаалж, ханган биелүүлэх,
2.  Бүх насны харилцан адилгүй нөхцөл байдалд, тухайлбал, хотод гэр болон байшин хороолол, хөдөөд аймаг, суманд амьдарчбайгаа хүүхдүүдэд уур амьсгалын өөрчлөлт өөр өөр нөлөө үзүүлэх магадлалтай учраас хүүхдийн эрхэд нөлөөлөх байдлын үнэлгээг тогтмол хийдэгбайх,
3. Уур амьсгалын өөрчлөлт, дасан зохицох төлөвлөгөө, шийдвэр, шийдэл боловсруулахдаа хүүхдүүдийг хамрууланоролцуулж, аюул гамшгийн үед хэрхэх зэрэг шаардлагатаймэдээллээр хангах,
4. 4. Хот,суурин газрыннүүрсээр ажилладаг халаалтын болон уурын зуухыг бүрэн халж, цэцэрлэг, сургууль, эрүүл мэндийн барилга байгууламжийг төвлөрсөн системд холбох, цэвэр эрчим хүчний технологид шилжүүлэх,
5. 5. Цэцэрлэг,сургуулийн барилгын жишиг зураг төслийг шинэчлэн боловсруулж,агаар сэлгэх систем заавал суурилуулдаг байх, барилга барихад ашиглагддаг түгээмэл материалын чанарт хяналт тавих,
6. 6. Сургууль,цэцэрлэг зэрэг хүүхдийн байгууллагын орчны эрсдэлтхүчин зүйлсийг тодорхойлох, эрүүл мэндийн нөлөөллийн үнэлгээ хийх зардлыг улсын төсвөөс санхүүжүүлдэг байх, үнэлгээний мэдээллийн сан бий болгох,
7. 7. Сургуулийн барилга, байгууламж, ус дамжуулах шугам хоолой, ариун цэврийн байгууламжийг үер болон байгалийн гамшигт тэсвэртэй байдлаар барьж байгуулах,
8. Сургууль, цэцэрлэгийн ус хангамж, ариун цэврийн байгууламжийн дэд бүтцийг шинэчлэх,засварлах зардлыг улсын төсөвт үе шаттайгаар тусган хэрэгжүүлж, халуун, хүйтэн усны хэрэглээгээр бүрэн хангах,
9. Боловсролын ерөнхий хуульдтанхимын бус сургалтаар байгаль орчныг хамгаалах, тандан судлах хүрээнд нийгэмд чиглэсэн ухуулга нөлөөллийн ажлыг нэмж тусгах,
10. 10.Анги танхимын дүүргэлтийг норм хэмжээнд байлгах,
11. 11.Хүүхэд,өсвөр үеийнхний байгаль орчин, уур амьсгалын өөрчлөлтийн талаарх мэдлэг, дасан зохицох, даван туулах, эрүүл мэндээ хамгаалах чадварыг нэмэгдүүлэх, тэдний санал, санаачилга, үйлдлийг орон нутгийн шийдвэр гаргагчид дэмжих, хамтран хэрэгжүүлэх үе тэнгийн сургагч багш нарыг бэлтгэх,
12. 12. НҮБ-ынУур амьсгалын өөрчлөлтийн суурь конвенцын талуудаас2019 онд санаачлан баталсан Засгийн газар хоорондын “Хүүхэд, залуучууд уур амьсгалын үйл хэрэг” тунхаг бичигт нэгдэн орох,
13. 13. Парламентын боловсрол,Өсвөрийн парламент хөтөлбөрүүдийгтасралтгүй сайжруулж, хүүхэд, өсвөр үеийнхэнд илүү хүртээмжтэй, ойлгомжтой, сайн агуулгатай болгох, хамрах хүрээг өргөжүүлж улс даяар явуулах боломж бүрдүүлэх,
14. 14. Парламентын ардчиллын үнэт зүйлийг бүртгэх, цуглуулах, хадгалж хамгаалах, судлах, сурталчлах, иргэд олон нийтэд таниулах, музейтэй байх,
15. 15.Хууль тогтоомж сурталчлах төвийг 21 аймаг,нийслэлийн дүүргүүдэд байгуулах

гэсэн саналуудыг “Өсвөрийн парламент 2023” хөтөлбөрийн оролцогч хүүхдүүд гаргаж, Улсын Их Хурлын гишүүд, сайд нарт илгээсэн байна.

Чуулганы нэгдсэн хуралдааны эхэнд мэдүүлсэн Мэдээллийн технологийн үйлдвэрлэлийг дэмжих тухай хуулийн төсөл болон хамт өргөн мэдүүлсэн хуулийн төслүүдийн анхны хэлэлцүүлгийг хийлээ. Хуулийн төслүүдийг Инновац, цахим бодлогын байнгын хорооны хуралдаанаар хэлэлцсэн талаах санал дүгнэлтийг Улсын Их Хурлын гишүүн Ч.Ундрам танилцууллаа. Тус Байнгын хорооны хуралдаанаар хуулийн төслүүдийг хэлэлцэх үед Улсын Их Хурлын гишүүн Э.Батшугар, мэдээллийн технологийн үйлдвэрлэл, дэвшилтэт технологийг хөгжүүлэх виртуал бүсийн үйл ажиллагааг удирдлага, зохион байгуулалтаар хангах орон тооны бус зөвлөлийг Үндэсний зөвлөл болгох, Улсын Их Хурлын гишүүн Ж.Чинбүрэн, тогтмол үйл ажиллагаа явуулах Үндэсний зөвлөлийн ажиллах хугацааг хуулийн төсөлд тодорхой тусгах, Улсын Их Хурлын гишүүн Х.Ганхуяг, Үндэсний зөвлөлийг Монгол Улсын Ерөнхий сайд тэргүүлж, дэд даргаар цахим хөгжил, харилцаа холбооны асуудал эрхэлсэн Засгийн газрын гишүүн ажиллах зэрэг санал дурдсан бол Улсын Их Хурлын гишүүн Б.Саранчимэг, мэдээллийн технологийн үйлдвэрлэлийг дэмжих виртуал бүсэд бүртгэгдсэн үйлдвэрлэл эрхлэгчийн үйл ажиллагаа явуулах байрны түрээсийн зардлын 50 хүртэлх хувийг санхүүжүүлэх тухай заалтыг хасах санал гаргажээ.

Хуулийн төслүүдийг хэлэлцүүлэгт бэлтгэх Ажлын хэсгээс бэлтгэсэн болон Байнгын хорооны гишүүдээс гаргасан зарчмын зөрүүтэй нийт 20 санал нэг бүрээр санал хураалт явуулахад чуулганы нэгдсэн хуралдаанд оролцсон гишүүдийн олонх дэмжсэн тул эцсийн хэлэлцүүлэгт бэлтгүүлэхээр Инновац, цахим бодлогын байнгын хороонд шилжүүлэв.

Мөн хуралдаанаар Монгол Улсын Ерөнхийлөгчөөс санаачлан, өргөн мэдүүлсэн Төрийн бэлгэ тэмдгийн тухай хуульд нэмэлт оруулах тухай хуулийн төслийг хэлэлцэх, эсэх тухай асуудлыг хэлэлцэв. Хууль санаачлагчийн илтгэлийг Ерөнхийлөгчийн Тамгын газрын дарга Я.Содбаатар уншиж танилцуулав. Хуулийн төсөлд төрийн далбааг байнга мандуулах газар, байршлыг Монгол Улсын Ерөнхийлөгч тогтоож байхаар, Монгол Улсын Ерөнхийлөгч, Улсын Их Хурлын дарга, Ерөнхий сайд улс орноо сурталчлах, эх оронч үзлийг төлөвшүүлэх зорилгоор төрийн далбааг иргэн, хуулийн этгээдэд хүндэтгэлтэйгээр гардуулан өгөх зохицуулалтыг тусгасан байна. Тус хуулийн төсөл батлагдсанаар Монголын ард түмний түүхэн уламжпал, хүсэл тэмүүлэл, эв нэгдэл, шударга ёс, цог хийморийн илэрхийлэл болсон төрийн далбаандаа хүндэтгэлтэй хандах, үндэсний эв нэгдлийг бэхжүүлэх, улс орноо сурталчлах, эх оронч үзлийг төлөвшүүлэхэд эерэг нөлөө үзүүлнэ хэмээн төсөл санаачлагч үзжээ.

Хуулийн төслийг Төрийн байгуулалтын байнгын хорооны хуралдаанаар хэлэлцсэн талаарх санал дүгнэлтийг Улсын Их Хурлын гишүүн Д.Сарангэрэл танилцууллаа. Тэрбээр, хуулийн төсөлд иргэдийн оролцоог хангах, санал авах зорилгоор https://d.parliament.mn цахим системд байршуулаад байгааг мэдээлээд, Байнгын хорооны хуралдааны үеэр Улсын Их Хурлын гишүүн Б.Жаргалмаа төрийн далбааг байнга мандуулах байршлийг хэрхэн тогтоох талаар асуулт асууж, хариулт авсан талаар танилцуулав. Төрийн бэлгэ тэмдгийн тухай хуульд нэмэлт оруулах тухай хуулийн төслийг үзэл баримтлалын хүрээнд хэлэлцэхийг Төрийн байгуулалтын байнгын хорооны хуралдаанд оролцсон гишүүдийн 63.2 хувь нь дэмжсэн байна.

Хууль санаачлагчийн илтгэл болон Байнгын хорооны санал дүгнэлттэй холбогдуулан Улсын Их Хурлын гишүүн С.Ганбаатар, төрийн сүлд, төрийн далбаа, төрийн дуулал гэхийг улсын сүлд, далбаа, дуулал гэж солих боломжтой эсэх талаар асуув. Түүний асуултанд өгсөн хариултдаа Ерөнхийлөгчийн Тамгын газрын дарга Я.Содбаатар, Монгол Улсын тусгаар тогтнол бүрэн эрхт байдлын бэлгэ тэмдэг нь төрийн сүлд, туг, далбаа, тамга, дуулал мөн хэмээн Үндсэн хуульд заасан тул “төрийн” гэх үгийг “улсын” болгож өөрчлөхийн тулд Үндсэн хуульд өөрчлөлт оруулах шаардлагатайг онцолсон юм. Мөн тэрбээр, энэ оны долдугаар сарын 10-нд тохиох “Төрийн далбааны өдөр”-өөр 60 метр өндөр төрийн далбаа мандуулах гэж байгаа талаар мэдээлсэн юм.

Төрийн байгуулалтын байнгын хороо дэмжсэн хуулийн төслийг үзэл баримтлалын хүрээнд хэлэлцэх нь зүйтэй гэсэн саналаар санал хураалт явуулахад чуулганы нэгдсэн хуралдаанд оролцсон гишүүдийн 54.8 хувь нь дэмжсэн тул анхны хэлэлцүүлэгт шилжүүллээ.

Дараа нь Олон хүүхэд төрүүлж өсгөсөн эхийг урамшуулах тухай хуульд нэмэлт оруулах тухай хуулийн төслийн анхны хэлэлцүүлгийг хийлээ. Монгол Улсын Ерөнхийлөгчийн санаачилсан уг төслийн анхны хэлэлцүүлгийг Нийгмийн бодлогын байнгын хорооны хуралдаанаар хийсэн талаарх санал дүгнэлтийг Улсын Их Хурлын гишүүн М.Оюунчимэг танилцуулав. Байнгын хорооны хуралдаанаар хуулийн төслийг хэлэлцэх үед Улсын Их Хурлын гишүүдээс асуулт, санал гараагүй бөгөөд Улсын Их Хурлын гишүүн, Нийгмийн бодлогын байнгын хорооны дарга П.Анужингаас хуулийн төслийн 2 дугаар зүйлийн “эсхүл” гэснийг хасах, 3 дугаар зүйлд тусгасан хууль хэрэгжих хугацааг 2025 оны нэгдүгээр сарын 01-ний өдрөөс эхлэн дагаж мөрдөх талаар зарчмын зөрөөтэй хоёр санал гаргасныг хуралдаанд оролцсон гишүүдийн олонх дэмжжээ.

Дээрх зарчмын зөрүүтэй саналуудаар санал хураалт явуулахад явуулахад чуулганы нэгдсэн хуралдаанд оролцсон гишүүдийн олонх дэмжив. Иймд хуулийн төслийг эцсийн хэлэлцүүлэгт бэлтгүүлэхээр Нийгмийн бодлогын байнгын хороонд шилжүүлэв.

Чуулганы нэгдсэн хуралдаанаар Цэргийн алба хаагчийн тэтгэвэр, тэтгэмжийн тухай хуульд нэмэлт, өөрчлөлт оруулах тухай хуулийн төслийн эцсийн хэлэлцүүлгийг хийлээ. Уг хуулийн төслийн эцсийн хэлэлцүүлгийг Нийгмийн бодлогын байнгын хорооны хуралдаанаар хэлэлцсэн талаарх танилцуулгыг Улсын Их Хурлын гишүүн М.Оюунчимэг хийв. Байнгын хорооны хуралдаанаар эцсийн хэлэлцүүлгийг хийх үед Улсын Их Хурлын гишүүн Ц.Сандаг-Очир албан үүргээ гүйцэтгэж байгаад амиа алдсанаас гадна эрүүл мэндээрээ хохирсон, хөдөлмөрийн чадвараа алдсан албан хаагчдын асуудлыг хэрхэн зохицуулах талаар, одоо хүчин төгөлдөр мөрдөгдөж байгаа хуулиар төрийн цэргийн байгууллагуудаас үзүүлж байгаа дэмжлэг туслалцааны талаар асуулт асууж, хариулт авчээ.

Байнгын хорооны санал дүгнэлттэй холбогдуулан гишүүдээс асуулт, санал гараагүй тул эцэслэн батлах бэлтгэл хангуулахаар тус Байнгын хоронд шилжүүлэв.

Үүний дараа Ахмад настны тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төслүүдийн эцсийн хэлэлцүүлгийг явууллаа. Хуулийн төслүүдийг Нийгмийн бодлогын байнгын хорооны хуралдаанаар хэлэлцсэн талаарх санал дүгнэлтийг Улсын Их Хурлын гишүүн Д.Сарангэрэл танилцуулав. Тэрбээр, хуулийн төслүүдийг санаачилж, өргөн мэдүүлсэн Н.Энхболд нарын 14 гишүүний нэрсийг нэг бүрчлэн дуудаж, анхны хэлэлцүүлгийн үед хуралдаан даргалагчаас өгсөн гүйцээн боловсруулах чиглэлийн дагуу бэлтгэгдсэн зарчмын зөрүүтэй нэг саналыг Байнгын хорооны хуралдаанаар эцсийн хэлэлцүүлгийг явуулах үед гишүүдийн олонх дэмжсэн талаар дурдсан юм. Зарчмын зөрүүтэй саналын томьёололд, хуулийн төслийн 1 дүгээр зүйлд тусгасан 7 дугаар зүйлийн 8 дахь нэмэлт хэсгийг “7.8. Энэ хуулийн 7.6-д заасан Ахмадын өргөө, бусад төв нь төрийн болон орон нутгийн өмчит барилга, байгууламжид байрлан үйл ажиллагаагаа явуулж байгаа бол барилга байгууламж, хөдлөх ашиглалт, засварын зардлыг төсвөөс гэрээний үндсэн дээр хэсэгчлэн болон бүрэн санхүүжүүлнэ” гэж өөрчлөн найруулахаар тусгасан байна.

Байнгын хорооны санал дүгнэлттэй холбогдуулан Улсын Их Хурлын гишүүн С.Ганбаатар асуулт асууж, холбогдох хуулиар нэгэнт зохицуулсан харилцааг энэ хуулийн төсөлд дахин тусгах шаардлагагүй гэж үзэж байгаагаа илэрхийлэв. Мөн тэрбээр, Засгийн газар дэмжээгүй заалтыг хасах, эсэх талаар асуулт асууж хариулт авлаа. Түүний асуултанд Улсын Их Хурлын гишүүн, Ажлын хэсгйин ахлагч Д.Сарангэрэл хариулахдаа, тэтгэвэрт гарсан ахмад настнуудын хөдөлмөр эрхлэлтийг дэмжихэд чиглэсэн бүлгийг хуулийн төсөлд оруулсан талаар танилцуулаад, ингэхдээ нийгмийн даатгалын шимтгэл төлөх, эсэхээ өөрөө сонгож шийдвэрлэж болох уян хатан зохицуулалттай байхаар тусгасан гэсэн юм.

Байнгын хорооны санал дүгнэлтэд дурдсан зарчмын зөрүүтэй саналаар санал хураалт явуулахад Улсын Их Хурлын чуулганы нэгдсэн хуралдаанд оролцсон гишүүдийн олонх дэмжсэн учир хуулийн төслүүдийг эцэслэн батлах бэлтгэл хангуулахаар Нийгмийн бодлогын байнгын хороонд шилжүүлэв.

Монгол Улсын шүүхийн тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төслүүдийг хэлэлцэх, эсэх тухай асуудлыг дараа нь хэлэлцсэн юм. Хууль санаачлагчийн илтгэлийг Улсын Их Хурлын гишүүн Д.Цогтбаатар тавив. Тэрбээр илтгэлдээ, Монгол Улсын урт хугацааны хөгжлийн “Алсын хараа-2050” бодлогын эрх мэдлийн хуваарилалт, хяналт-тэнцлийг оновчтой болгож, засаглалын тогтвортой байдлыг хангах зорилтын хүрээнд шүүхийн хараат бус байдал хангагдаж, хариуцлагатай, иргэн төвтэй шүүх тогтолцоог төлөвшүүлэх, шүүх үйл ажиллагаанд цахим технологи нэвтрүүлж, шуурхай, чирэгдэлгүй болгох, ёс зүй цогц чадамжтай шүүхийн хүний нөөц бэлтгэх суурь тогтолцоог бий болгож төгөлдөржүүлэх, мөн шүүхийн ил тод, нээлттэй байдлыг хангах хөтөлбөр батлан хэрэгжүүлж, иргэдийн шүүхэд итгэх итгэлийг дээшлүүлэх зэрэг зорилтыг тодорхойлсон талаар танилцуулж, Улсын Их Хурлаас Нийтийн мэдээллийн ил тод байдлын тухай, Хүний хувийн мэдээлэл хамгаалах тухай, Цахим гарын үсгийн тухай хуулиудыг баталснаар эрх зүйн орчинд ахиц гарсныг онцолсон юм. Шүүхийн үйл ажиллагааны нээлттэй ил тод байдлыг дээшлүүлэх, цахимжилтыг нэвтрүүлэхэд одоо хүчин төгөлдөр үйлчилж байгаа хуулийн зохицуулалтыг боловсронгуй болгох хэрэгцээ шаардлага үүссэн тул хуулийн төслүүдийг боловсруулснаа тэрбээр дурдаад, Монгол Улсын шүүхийн тухай болон хамт өргөн мэдүүлсэн хуулийн төслүүдэд шүүхийн нээлттэй, ил тод байх арга зам буюу хэлбэрийг нарийвчлан зааж, хуульд тусгайлан зааснаас бусад тохиолдолд аливаа хэрэг маргааныг хянан шийдвэрлэх ажиллагааны явцад талуудын гаргасан гомдол, нэхэмжлэл, тайлбар, хүсэлт, шүүх хуралдааны тэмдэглэл, шүүхийн шийдвэрийг сонирхогч этгээд биечлэн болон цахимаар танилцах боломж бүрдүүлэхээр, шүүх хуралдааныг нээлттэй явуулах, цахим хуудас, хэвлэл мэдээллийн хэрэгсэл, нэг бол олон нийтийн цахим сүлжээгээр хуулийн хүрээнд шууд дамжуулах, эсхүл олон нийтэд дуу, дүрсний бичлэгээр хүргэх харилцааг тухайлан тусгасан хэмээн танилцуулсан юм. Эрүү, иргэн, захиргааны хэрэг хянан шийдвэрлэх ажиллагааг цахимаар явуулах хуулийн төслүүдэд тусгаж, бэлтгэл хангах үүднээс захиргааны хэргийг шүүхэд цахимаар хянан шийдвэрлэх ажиллагааг 2025 оны зургадугаар сарын 22-ноос, эрүү, иргэний хэргийн хувьд 2025 оны 12 дугаар сарын 22-ноос тус тус эхлэхээр заажээ. Цахимаар хэрэг хянан шийдвэрлэх ажиллагаанд шүүн таслах бүх үйл явц, үе шат хамаарах бөгөөд онцлог шаардлага бүхий платформ, баталгаатай цахим шуудан ашиглахаар тусгасан байна. Мөн шүүхийн сургалт, судалгаа, мэдээллийн хүрээлэнг Шүүхийн сургалт, судалгаа, мэдээллийн академи болгох, шүүгч өөр ажилд тодорхой хугацаагаар томилогдон ажиллах тохиолдолд орон тоог нөхөн бүрдүүлж ачааллыг тэнцвэржүүлэх, шүүгчийн зэрэг дэвийн асуудлыг Улсын Их хурал нарийвчлан тогтоох зэрэг онцлог зохицуулалтуудыг оруулсан байна. Түүнчлэн, бүх шатны шүүхэд шүүгчийн туслахын хомсдол бий болсныг арилгах зорилгоор уг ажлыг эрхлэх хүн заавал хуульчийн мэргэжлийн үйл ажиллагаа эрхлэх зөвшөөрөл авсан байх гэсэн шаардлагыг хасахаар хуулийн төсөлд тусгажээ.

Түүний дараа хуулийн төслүүдийг хэлэлцэх, эсэх асуудлыг Хууль зүйн байнгын хорооны хуралдаанаар хэлэлцсэн талаарх санал дүгнэлтийг Улсын Их Хурлын гишүүн Ц.Мөнхцэцэг танилцуулсан юм. Улсын Их Хурлын дарга Г.Занданшатар, Улсын Их Хурлын гишүүн Д.Тогтохсүрэн, Н.Учрал, Д.Цогтбаатар нарын гишүүдийн санаачлан, өргөн мэдүүлсэн дээрх хуулийн төслүүдийн хэлэлцэх, эсэхийг тус Байнгын хорооны хуралдаанаар хэлэлцэх үед Улсын Их Хурлын гишүүн Н.Алтанхуяг гол үзэл баримтлалынх нь талаар,  Улсын Их Хурлын гишүүн Ц.Сандаг-Очир шүүхийн ил тод, нээлттэй байх зарчмыг хэрэгжүүлэхэд тулгараад байгаа асуудлын талаар, Улсын Их Хурлын гишүүн Б.Энх-Амгалан шүүх хуралдааны дуу, дүрсний бичлэг, тэмдэглэлийг эвлүүлэн өөрчлөлт хийх засвар оруулахаас урьдчилан сэргийлэх зохицуулалт, шүүхийн цахим хуудсанд байршуулах мэдээллийн хугацааны талаар асуулт асууж, хариулт авсан байна. Хуулийн төсөл батлагдсанаар нэмэлт чиг үүргийг хэрэгжүүлэх хүний нөөцийн болон бусад материаллаг зардалд жилд ойролцоогоор 1 852.2 сая төгрөг зарцуулах шаардлагатайг болон Байнгын хорооны хуралдааны үеэр хуулийн төслүүдийн хэрэгцээ шаардлага, ач холбогдол, нарийвчилсан зохицуулалтуудын талаар үг хэлж, байр сууриа илэрхийлснийг тэрбээр танилцуулаад, хуулийн төслүүдийг үзэл баримтлалын хүрээнд хэлэлцэхийг байнгын хорооны хуралдаанд оролцсон гишүүдийн олонх дэмжсэн гэлээ.

Хууль санаачлагчийн илтгэл болон Байнгын хорооны санал дүгнэлттэй холбогдуулан Улсын Их Хурлын гишүүн Д.Ганбат шүүхийн ил тод байдлыг далимдуулан шүүгдэгчийг олон нийтийн сүлжээгээр яллах, шүүгчид нөлөөлөх нөхцөл байдал үүсэх, эсэх талаар, Улсын Их Хурлын гишүүн Б.Баттөмөр төслүүдийг олон нийтээр хэлэлцүүлж санал авсан эсэх, Улсын Дээд шүүх, Засгийн газар ямар санал өгсөн, цахимаар хэрэг хянан шийдвэрлэх талаарх шүүхийн практикын судалгаа хийсэн эсэх, цахим шүүхийн платформыг блокчэйн технологид суурилах эсэх болон шүүгчдийн боловсролыг хэрхэн дээшлүүлэх талаар асуулт асууж хариулт авав. Улсын Их Хурлын гишүүдын асуултад хууль санаачлагч Д.Цогтбаатар хариулт өгч, шүүхийн үйл ажиллагаа хаалттай, нууц байх тусам сөрөг үр дагавартайг онцлон, АНУ-д шүүхийн бие даасан телевизийн суваг ажиллаж байгааг жишээлж, Улсын Дээд шүүх болон холбогдох байгууллагын мэргэжилтнүүдийг оролцуулсан хэлэлцүүлгээр ил тод, нээлттэй байдлыг хангахгүйгээс гарч буй үр дагаварыг илүүтэй онцолсон болон өнөөдрийн хаалттай нөхцөл байдал цааш үргэлжил болохгүйг ихээхэн чухалилж ярилцсан гэсэн юм.  Мөн хууль санаачлагчдын нэг, Улсын Их Хурлын гишүүн Н.Учрал, өнгөрсөн хугацаанд бид төрийн мэдээлэл солилцооны Хур системээр шүүхийн 18 төрлийн лавлагаа, мэдээлэл солилцдог болсон хэмээн танилцуулж, амьдрал дээр шүүх хурлыг нээлттэй явуулах боломж бүрдсэн тул эрх зүйн зохицуулалтыг бүрдүүлэх шаардлагатай болсон гээд, технологийн хувьд шүүх өөрөө бие даасан, хараат бус байх зарчим хэрэгжүүлэх үүднээс блокчэйн буюу кодлогдсон хараат бус технологийг ашиглана гэлээ.

Хуулийн төслүүдтэй холбогдуулан Улсын Их Хурлын гишүүн, Хууль зүй дотоод хэргийн сайд Б.Энхбаяр үг хэлж, дэмжиж байгаагаа илэрхийлээд, хэлэлцүүлгийн шатанд анхаарах, сайжруулах шаардлагатай өсвөр насны хохирогчтой хэргийг шийдвэрлэх, шүүгчдийн оны болон зэрэг зиндааны ялгаа гаргахгүй байх, Шүүхийн сургалт, судалгаа, мэдээллийн академийн үйл ажиллагааг шүүгчийн лизнез, зөвшөөрөлтэй хамаатуулахгүй байх зэрэг цөөнгүй асуудал байгааг анхааруулав. Мөн Улсын Их Хурлын гишүүн Б.Энх-Амгалан үг хэлж, шүүхийн үйл ажиллагааг ил тод, нээлттэй болгосноор “хонгилын шүүгч” гэсэн зүй бус зүйл гарахгүй, шударга байдал төлөвшинө гэдгийг онцолж, хуулийн төслүүдийг дэмжиж байгаагаа илэрхийлээд, өмгөөлөгчдийн ажиллах боломж, нөхцөлийг сайжруулах, шүүх хуралдааны бичлэг цахим хуудсанд хадгалагдах хугацааг нарийвчлан тогтоох, урт хугацаагаар үргэлжилсэн шүүх хуралдааны аль хэсгийг ил байлгах зэрэг асуудалд анхаарахыг зөвлөв.

Энэхүү Монгол Улсын шүүхийн тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төслүүдийг хэлэлцэх, эсэх талаар санал хураалт явуулахын өмнө Шүүх байгуулах тухай хуулийн шинэчилсэн найруулгын төсөл болон хамт өргөн мэдүүлсэн хуулийн төслүүдийн эцсийн хэлэлцүүлгийг явуулсан юм. Хуулийн төслүүдийг эцсийн хэлэлцүүлэгт бэлтгэсэн талаарх Хууль зүйн байнгын хорооны танилцуулгыг Улсын Их Хурлын гишүүн Д.Ганбат хийлээ. Хуулийн төслүүдийн анхны хэлэлцүүлгийг Улсын Их Хурлын чуулганы нэгдсэн хуралдаанаар явуулах үед хуралдаан даргалагчаас өгсөн гүйцээн боловсруулах чиглэлийн дагуу боловсруулсан нэг саналын томьёоллыг Байнгын хорооны хуралдаанаар эцсийн хэлэлцүүлгийг хийх үед санал хурааж шийдвэрлэхэд хуралдаанд оролцсон гишүүдийн олонх дэмжсэн байна. Мөн Байнгын хорооны хуралдаанд оролцсон гишүүд хуулийн төслийн зарим заалтаар дахин санал хураах шаардлагатай гэж үзсэн тул Монгол Улсын Их Хурлын чуулганы хуралдааны дэгийн тухай хуулийн 42.2.3-д заасныг баримтлан зургаан санал хураалт явуулахад хуралдаанд оролцсон гишүүдийн дийлэнх олонх нь дэмжжээ.

Өөрийн хийсэн танилцуулгатай холбогдуулан тэрбээр Ажлын хэсгээс нэг шүүгчид оногдох ажлын ачаалал ямар байгаа, уг ачаалал шүүгчийн гаргаж байгаа шийдвэрт нөлөөлж буй эсэх, тэдний хараат бусаар ажиллах нөхцөл, цалин хангамжийн талаар асууж, хариулт авсан юм. Түүний асуултанд Шүүхийн ерөнхий зөвлөлийн дарга Л.Энхбилэг хариулсан юм. Тэрбээр, бидний судалгаагаар, эрүүгийн хэргийн шүүгчид жилдээ 105, иргэний хэрэг дээр 209, захиргааны шүүхийн хувьд нэг шүүгчид 50 орчим хэрэг оногдож байвал зохист ачаалал гэж үзнэ. Гэтэл одоо энэ ачаалал 200 дахин давчихсан байна гэлээ. Тус зөвлөлийн 2016 оны 42 дугаар тогтоолоор Монгол Улсад нийт 699 шүүгч ажиллахаар тогтоосон бөгөөд хэлэлцэж буй хуулийн төслүүдийг энэ ачааллаар тооцон төлөвлөжээ.

Чуулганы нэгдсэн хуралдааныг даргалан явуулсан, Улсын Их Хурлын дэд дарга Л.Мөнхбаатар хэлэлцэж буй асуудалтай холбогдуулж хэлсэн үгэндээ, Монгол Улсын Үндсэн хуульд 2019 онд оруулсан нэмэлт, өөрчлөлтөөр шүүхийг тойргийн зарчмаар байгуулах эрх зүйн үндэс бол бүрдсэн талаар дурдаж, энэхүү Шүүх байгуулах тухай хууль батлагдсанаар анхан шатын шүүхийг тойргийн зарчмаар байгуулж, маргааны төрлөөр дагнасан хоёр шинэ шүүх буюу гэр бүл, хүүхдийн дагнасан шүүх, хялбар ажиллагааны шүүх ажиллах нөхцөл бүрдэнэ гэлээ. Ингэснээр шүүхийн үйлчилгээг иргэдэд хүргэх зохион байгуулалтад өөрчлөлт орж, шүүгчийн ажлын ачаалал тэнцвэржин, тэр хэрээр иргэдэд хүртээмжтэй, шуурхай, чанартай болох ёстой гээд, анхан шатын шүүхүүдийг тойргийн зарчмаар байгуулахдаа алслагдсан дүүргийн шүүхийн одоогийн зохион байгуулалтыг хэвээр үлдээсэн болон аймаг дахь эрүү, иргэний хэргийн анхан шатын шүүхийг нэгтгэж байгаа, харин Орхон, Дархан-Уул аймгийнх тусдаа ажиллахыг танилцуулсан юм. Мөн тэрбээр, Захиргааны хэргийн дагнасан шүүхийн тогтолцоог нэвтрүүлснээс хойш 20 жилийн дараа энэ тогтолцооны хөгжлийн дараагийн үе шат руу шилжиж байна хэмээгээд, хуулийн төсөлд Хялбар ажиллагааны дагнасан шүүх 2025 оноос, Гэр бүл, хүүхдийн хэргийн дагнасан шүүх 2026 оноос ажиллаж эхлэхээс тусгасныг онцлов.

Шүүх байгуулах тухай хуулийн шинэчилсэн найруулгын төсөл болон хамт өргөн мэдүүлсэн хуулийн төслүүдтэй холбогдуулан боловсруулсан, Хууль зүйн байнгын хороо дэмжсэн зарчмын зөрүүтэй долоон саналаар нэг бүрчлэн санал хураалт явуулав. Улсын Их Хурлын чуулганы нэгдсэн хуралдаанд оролцсон гишүүдийн олонх зарчмын зөрүүтэй саналын томьёоллуудыг дэмжсэнээр төслүүдийг эцэслэн батлах бэлтгэл хангуулахаар Хууль зүйн байнгын хороонд шилжүүллээ. Мөн үүний өмнө хэлэлцсэн Монгол Улсын шүүхийн тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төслүүдийг хэлэлцэх, эсэх талаар санал хураав. Чуулганы нэгдсэн хуралдаанд оролцсон гишүүдийн 56.1 хувь нь төслүүдийг хэлэлцэх нь зүйтэй гэж үзсэн тул үзэл баримтлалын хүрээнд хэлэлцэхийг дэмжсэнд тооцон анхны хэлэлцүүлэгт шилжүүлэв.

Үүний дараа Монгол Улсын Их Хурлын сонгуулийн тухай хуульд нэмэлт өөрчлөлт оруулсантай холбоотойгоор хууль хоорондын давхардал, хийдэл, зөрчлийг арилгах зорилгоор боловсруулсан Зөрчлийн тухай хуульд нэмэлт, өөрчлөлт оруулах тухай, Зөрчил шалган шийдвэрлэх тухай хуульд өөрчлөлт оруулах тухай, Эрүүгийн хэрэг хянан шийдвэрлэх тухай хуульд өөрчлөлт оруулах тухай, Захиргааны хэрэг хянан шийдвэрлэх тухай хуульд нэмэлт оруулах тухай, Төрийн албаны тухай хуульд нэмэлт оруулах тухай, Сонгуулийн автоматжуулсан системийн тухай хуульд нэмэлт, өөрчлөлт оруулах тухай хуулийн төслүүдийн хэлэлцэх, эсэх асуудлыг хэлэлцэв. Хууль санаачлагчийн илтгэлийг Улсын Их Хурлын гишүүн, Хууль зүй, дотоод хэргийн сайд Б.Энхбаяр, Хууль зүйн байнгын хорооны санал дүгнэлтийг Улсын Их Хурлын гишүүн Б.Энх-Амгалан танилцуулав. Байнгын хороо хуулийн төслүүдийг үзэл баримтлалын хүрээнд хэлэлцэхийг дэмжсэн байна.

Хэлэлцэж буй асуудалтай холбогдуулан Улсын Их Хурлын гишүүн Ц.Идэрбат, Үндэсний Аудитын газраас сонгуульд зарцуулах зардлыг дээд хэмжээг тогтоосон үндэслэлийн талаар асуулт асуусан юм. Түүний асуултад Сонгуулийн ерөнхий хорооны Тамгын газрын дарга Д.Бат-Эрдэнэ хариулахдаа, нэг нэр дэвшигчээс зарцуулах зардлын дээд хэмжээг 1.2 тэрбум төгрөгөөр тогтоосон нь тойрог томссонтой холбоотой гэсэн юм. 2020 оны сонгуулиар энэ хэмжээ нэг аймагт 400 сая төгрөг байсантай харьцуулахад одоо гурван аймаг нийлж нэг тойрог болсон нөхцөлд зардлын дээд хэмжээ өсөөгүй хэмээн тэрбээр тайлбарлаад, харин ч сонгуулийн зардлыг бууруулах зохицуулалтууд хэрэгжиж эхэлсэн гэсэн юм. Энэ талаар иргэд, сонгогчдод зөв ойлголт өгч ажиллахыг Улсын Их Хурлын гишүүн Ц.Идэрбат Сонгуулийн ерөнхий хороонд зөвлөлөө.

Хуулийн төслүүдийг үзэл баримтлалын хүрээнд хэлэлцэхийг дэмжих, эсэх талаар санал хураалт явуулахад чуулганы нэгдсэн хуралдаанд оролцсон гишүүдийн олонх дэмжсэн тул анхны хэлэлцүүлэгт бэлтгүүлэхээр Хууль зүйн байнгын хороонд шилжүүлэв.

Засгийн газраас санаачилсан Эм, эмнэлгийн хэрэгслийн тухай хуулийн шинэчилсэн найруулгын төсөл болон хамт өргөн мэдүүлсэн хуулийн төслүүдийн эцсийн, мөн уг хуулийн төсөлтэй холбогдуулан боловсруулсан Улсын тэмдэгтийн хураамжийн тухай хуульд өөрчлөлт оруулах тухай, Чөлөөт бүсийн тухай хуульд өөрчлөлт оруулах тухай хуулийн төслүүдийн анхны хэлэлцүүлгийг тус тус хийлээ. Хуулийн төслүүдийг хэлэлцсэн талаарх Нийгмийн бодлогын байнгын хорооны танилцуулга болон санал дүгнэлтийг Улсын Их Хурлын гишүүн Д.Сарангэрэл, Ц.Идэрбат нар хийв.

Улсын Их Хурлын чуулганы нэгдсэн хуралдаанаар хуулийн төслүүдийн анхны хэлэлцүүлгийг явуулахад олонхын дэмжлэг авсан саналуудыг төсөлд нэмж, эцсийн хувилбарыг бэлтгэсэн талаар Улсын Их Хурлын гишүүн Д.Сарангэрэл дурдаад, анхны хэлэлцүүлгийн үеэр хуралдаан даргалагчаас төслийн таван зүйл, Байнгын хороо дэмжээгүй хоёр санал, мөн хамт өргөн мэдүүлсэн Зөвшөөрлийн тухай хуульд нэмэлт, өөрчлөлт оруулах тухай хуулийн төслийг гүйцээн боловсруулах чиглэл өгсний дагуу зарчмын зөрүүтэй саналыг томьёоллууд бэлтгэснийг танилцуулсан юм. Эдгээр зарчмын зөрүүтэй 11 саналыг Байнгын хорооны хуралдаанд оролцсон гишүүдийн олонх дэмжсэн байна. Мөн тэрбээр Улсын тэмдэгтийн хураамжийн тухай хуульд өөрчлөлт оруулах тухай, Чөлөөт бүсийн тухай хуульд өөрчлөлт оруулах тухай хуулийн төслүүдийн анхны хэлэлцүүлгийг эцэслэн батлах үе шаттай нэгтгэн явуулах горимын санал гаргасныг Байнгын хорооны хуалдаанд оролцсон гишүүдийн олонх дэмжсэнийг Улсын Их Хурлын гишүүн Ц.Идэрбат танилцуулгадаа дурдсан юм.

Нийгмийн бодлогын байнгын хорооны дэмжсэн зарчмын зөрүүтэй 11 саналын томьёолол болон анхны хэлэлцүүлгийг эцэслэн батлах үе шаттай нэгтгэн явуулах тухай горимын саналаар санал хураалт явуулахад чуулганы нэгдсэн хуралдаанд оролцсон гишүүдийн олонх дэмжлээ. Иймл хуулийн төслүүдийг эцэслэн батлах бэлтгэл хангуулахаар Байнгын хороонд шилжүүлэв гэж Улсын Их Хурлын Хэвлэл мэдээлэл, олон нийттэй харилцах газраас мэдээллээ.

Энэ удаагийн УИХ-ын сонгуулийг холимог тогтолцоогоор 126 гишүүнийг тодруулна. Тиймээс саналын хуудас ямар байх, сонгогчдын хувьд саналын хуудас бөглөхдөө юуг анхаарах ёстой талаар хүргэе. Сонгуулийн ерөнхий хороо УИХ-ын 2024 оны сонгуулийн саналын хуудасны загварыг баталсан. Саналын хуудаст хуульд заасан шаардлага бий. Тодруулбал, саналын хуудаст нам эвсэл, нэр дэвшигчийн дараалал, нэр, овгийг хэрхэн тэмдэглэх тухай хуулийн зохицуулалт бий. СЕХ-оос нэр дэвшигч болон нам, эвслийг сонгох хоёр саналын хуудас хэвлэнэ. Саналын хуудас нууцлалтай үнэт цаас. Саналын хуудас ил болон далд нууцлал бий. Саналын хуудаст Дээд шүүхэд бүртгүүлсэн дарааллын дагуу нам, эвслийн нэрийг бичнэ. Эвслийн хувьд хамгийн эхэнд Дээд шүүхэд бүртгүүлсэн намын дарааллыг харж, жагсаах аж.

Энэ талаар СЕХ-ны нарийн бичгийн дарга Д.Даваа-Очир “Урьдчилсан байдлаар саналын хуудасны загвар гарсан.

Бид тестэлж үзсэн. 10 мандаттай тойрогт 250 нэр дэвшигч өрсөлдөж, 10-ыг нь сонгоход машины уншилт 27 секунд болж байна. 25 нам эвслээс сонгож, уншуулахад 11 секунд болж байна. Тойрогт нэр дэвшигчийг сонгох саналын хуудас хамгийн ихдээ 78.7 см урттай байна. Нам эвсэлд санал өгөх хуудасны урт ихдээ 27.9 см байна” гэсэн юм. Ингээд 2024 оны УИХ-ын сонгуулийн саналын хуудасны загварыг хүргэе.

Засгийн газрын ээлжит хуралдаан үргэлжилж байна.

Хуралдаанаар “Хөдөө аж ахуйн бирж” ХХК-ийн төрийн мэдлийн хувьцааг олон нийтэд биржээр нээлттэй арилжаалах тухай Засгийн газрын тогтоолын төсөл, “Газрын тосны боловсруулах үйлдвэрийн талаар авах зарим арга хэмжээний тухай” Засгийн газрын тогтоолын төсөл, Хүний эрхийг хангах чиглэлээр зарим хуульд нэмэлт, өөрчлөлт оруулах тухай хуулийн төсөл, “Мэргэшлийн үндэсний шаталсан бүтэц батлах тухай” Засгийн газрын тогтоолын төсөл зэрэг асуудал хэлэлцэнэ.

Нийт 23 асуудал хуралдааны товд багтжээ.

УИХ-ын гишүүн, Улаанбаатар хотын хөгжлийн бодлого эрхэлсэн түр хорооны дарга, Баянзүрх дүүргийн МАН-ын дарга Энхтайваны Бат-Амгалантай ярилцлаа.

-НИЙТИЙН ТЭЭВРИЙН ТОГТОЛЦООНД ТОМ ӨӨРЧЛӨЛТ ГАРГАХ ШААРДЛАГАТАЙ БАЙНА-

-Энэ удаагийн парламентын бүрэлдэхүүний Улаанбаатар хот, нийслэлчүүдийн төлөө хийж хэрэгжүүлсэн хамгийн бодит, томоохон ажил бол Монгол Улсын нийслэл Улаанбаатар хотын эрхзүйн байдлын тухай хуулийг шинэчлэн баталсан явдал гэж харж байна.Энэ ажилд манлайлан ажилласан гишүүний хувьд ямар өөрчлөлт оруулснаараа нөхцөл байдлыг хэрхэн дээрдүүлж буй талаар ярилцлагаа эхлүүлье гэж бодлоо?

-Нийслэлийн эрх зүйн байдлын тухай хууль 29 жилийн өмнө батлагдаж, энэ хугацаанд дорвитой суурь өөрчлөлтийг хийж чадаагүй. Улаанбаатар хотын эрх зүйн чадамж, Засаг даргын үүрэг оролцоо, хэм хэмжээ, төсөв санхүүгийн бололцоо, хүн амын суурьшил, нягтаршил, эдийн засаг өнөөдрийнхтэй харьцуулшгүй өөр байсан. Тэр үеийн эрх зүйн суурь зохицуулалтаар өнөөгийн Улаанбаатар хотыг зохицуулна гэдэг хэцүү. Энэ хууль анх батлагдсанаас хойш 27 жил өнгөрчээ. Харин түр хороо байгуулснаар Монгол Улсын нийслэл Улаанбаатар хотын эрх зүйн байдлын тухай хуулийг шинэчлэн баталлаа. Энэ хуулийг шинэчлэн баталсан нь том дэвшил, ололт. Мөн нийслэлийн 1.7 сая иргэнд нийгмийн томоохон суурь дэмжлэгийг үзүүлж чадна. Үүнийг дагаад төсвийн реформ, татварын бие даасан эрх зүйн зохицуулалтыг хийхээс гадна олон мянган ажлын байр бий болно гэж харж байна.

Нийслэлийн Засаг дарга Засгийн газарт асуудлаа оруулдаггүй, аль нэг яамаар дамжуулж асуудлаа оруулдаг байсан. Хотынхоо асуудлыг хотын дарга нь УИХ-д танилцуулахгүй болохоор бүх зүйл хэвийн, болж байгаа мэт ойлгогддог. Жишээ нь, эрүүл мэндийн байгууллагын ажилтан, албан хаагчдын олонх нь нийслэлд ажиллаж, амьдарч байна. Гэтэл энэ хүмүүсийнхээ цалинг ч нэмж чаддаггүй. Энэ мэт олон асуудлыг зохицуулсан, эрх зүйн чадамжийг бий болгож байгаагаараа тус хууль онцлогтой. Тухайлбал, яамд Засгийн газрын хуралдаанаар хоттой холбоотой асуудлыг хэлэлцүүлэх бол заавал хотын даргаас санал авч орох зохицуулалт орсон.

Хоёрдугаарт, хотын дарга өөрөө асуудлаа оруулдаг, танилцуулдаг, хэлэлцүүлдэг болсон. Энэ бол хотын дарга саналын эрхтэй болж байна гэсэн үг юм. 1.7 сая иргэний эрх ашгийн өмнөөс хот, нийтийн аж ахуй, нийгэм, эдийн засаг, төсөв, санхүү, ажлын байрыг нэмэгдүүлэх, хөдөлмөр эрхлэлтийг дэмжих чиглэлээр дуугарах боломжтой болсон. Энэ дутагдаад байсан учраас хот гэдэг их айл хаягдчихсан байсан. Иргэдийнхээ эрх ашгийг хамгаалж дуугарч, асуудлаа УИХ, Засгийн газарт танилцуулна.

Гуравдугаарт, газар чөлөөлөлтийг улс, нийслэлийн төсвөөр хийхээр болсон. Өмнө нь энэ талаар тодорхой зохицуулалт байдаггүй байсан. Иргэдэд нэн чухал шаардлагатай байгаа зам, гүүр, инженерийн дэд бүтэц, сургууль, цэцэрлэгийн мөнгийг нь шийдээд, хотоос газар чөлөөлөлтөд мөнгө тавь гэдэг. Гэтэл хотод мөнгө байдаггүй. Нөгөө бүтээн байгуулалтын мөнгөө Сангийн яам буцаагаад татчихдаг. Тиймээс УИХ, Засгийн газар, Улаанбаатар хот уялдаа холбоотой ажиллаж, улс, нийслэлийн мөнгөөр газар чөлөөлөлтийг хийх зохицуулалт орсон. Энэ бол маш том дэвшил.

Тэгэхээр хотоо сайхан болгохын төлөө цаашид хотын иргэд, иргэний нийгмийн байгууллага, аж ахуйн нэгжүүдтэйгээ төр, хувийн хэвшлийн түншлэлийн хүрээнд хамтарч ажиллана. Үүнээс гадна Улаанбаатар хотын шууд орлого нь хүн амын орлогын албан татвар, бусад татвараас бүрддэг. Түүнийг улсын төсөвт төвлөрүүлдэг. Ер нь “Оюу толгой” компанитай дүйцэхүйц орлогыг нийслэл төвлөрүүлдэг гэсэн үг. Энэ эх үүсвэрийг л хотод нь үлдээгээд өгөөч ээ гэдэг санаачилгыг анх гаргасан. Ингээд Улаанбаатар хотын хөрөнгө оруулалт, санхүүжилтийг дэмжих зорилгоор улсын төсвөөс жилд 420 тэрбум төгрөгөөс бууруулахгүйгээр санхүүжилт олгож байх шийдвэр гарсан.

-Нийслэлээс сонгогдсон УИХ-ын гишүүдээ нэгтгээд Улаанбаатар хотын хөгжлийн бодлого эрхэлсэн Түр хороог байгуулаад ажиллаж байгаа. Та бүхний дуу нэгтэй зүтгэсэн асуудал бол LRT буюу хөнгөн тулгуурт галт тэрэгтэй болж, замын түгжрэлийн асуудлыг шийдвэрлэх байсан. Гэтэл одоо метро барихаар боллоо гэх. Таны хувьд энэ асуудал дээр ямар байр суурьтай байна вэ?

-Нийслэл Улаанбаатар хотын хөгжлийн бодлого эрхэлсэн Түр хороог 2020 оны Улсын Их Хурлын ээлжит сонгуулийн үр дүнгээр Улаанбаатар хотоос сонгогдсон гишүүд нэгдэж, байгуулсан. Түр хороо Монгол Улсын Засгийн газрын “Шинэ сэргэлтийн бодлого”, “Улаанбаатар хотын хөгжлийн төлөвлөгөө”-ний уялдаа холбоог бэхжүүлэх, хотын өмнө тулгамдсан агаарын бохирдол, түгжрэлийг шийдвэрлэх чиглэлээр онцгой анхаарч ажиллаж байгаа.

Мөн бидний хийж хэрэгжүүлэхээр, бодлого шийдвэрийг нь тодорхойлохоор ажиллаж байгаа бас нэг чухал асуудал бол түгжрэл. Цаашид нийтийн тээврийн тогтолцоонд том өөрчлөлт хийх шаардлагатай байна. Өнгөрсөн жилүүдэд метро, дүүжин тээвэр, тусгай зориулалтын автобус, LRT гэх мэт олон судалгаа хийгдсэн. Мэдээж олон талаас нь асуудлыг судалж, харьцуулж байж зөв шийд гарна. Дэлхийн том хотуудын жишгийг харвал 3 саяас дээш хүнтэй хотод метро тохиромжтой гэж үзээд барьж, байгуулсан байдаг. Метро бол ирээдүйгээ харсан маш том бүтээн байгуулалт болно.2008 оноос хойш үе үеийн хотын дарга нарын шүүгээнд тоосонд дараатай байсан метроны төслүүд ЖАЙКА олон улсын байгууллага дээр нэгтгэгдээд, шинэчлэгдээд ажил хэрэг болоод эхэлсэн.

Нийтийн тээврийн төсөл арилжааны төсөл биш гэдгийг энд онцолъё. Ямар ч улс оронд нийтийн тээврийн төсөл арилжааны төсөлд ордоггүй. Тиймээс энэхүү төсөл нь нийгэм, эдийн засагт ямар нөлөөтэй вэ гэдгийг ойлгох хэрэгтэй. Зарим хүмүүс болохоор метро их зардал орно, ашгаа яаж нөхөх вэ, улсын төсөв, гадаадын зээл санхүүжилтээр хийгээд иргэд эргээд өр зээлд орно гэдэг байдлаар эмзэг хандаж байгаа. Яг бодит байдал дээр тийм зүйл болохгүй. Метро, LRT аль нэг нь хийгдэж дуусах л юм бол улаанбаатарчуудад ажлын байрнаас эхлээд, ажлын бүтээмжээ нэмэгдүүлэх маш том боломжийг олгоно. Хотын түгжрэл ихтэй замын маршрутаар зорчдог иргэд өдөрт 2.5 цагийг түгжрэлд дэмий өнгөрөөж байгаа. Үүнийг жилд дундажлаад тооцвол, иргэн 35 хоногийг машин дотроо өнгөрөөж байна. Дундаж наслалт 72 гэж тооцвол түүнийхээ 6.5 жилийг түгжрэлд өнгөрөөхөөр харагдаж байгаа юм.

Дээрээс нь хөдөлмөрийн бүтээмжийг харах нь зүйтэй. Нэг хүн 2.5 цагт 20,400 төгрөгийн бүтээмж алдаж байна гэсэн тооцоолол бий. Энэ маршрутын дагуу хувийн машин болоод нийтийн тээврээр зорчигчдын тоогоор үржүүлбэл, жилд 2.4 их наяд төгрөгийн эдийн засгийн хохирол амсаж байна гэж харж болно. Автомашины түгжрэлд зогсохдоо шатааж буй шатахууныг 2.5 мотортой машинаар дундажлаад тооцвол 3.46 литр бензин зарцуулж байгаа. Энэ нь 8400 төгрөг, жилийн турш 440 тэрбум гаруй төгрөгийн хохирол учирч буй юм.Жилд гурван их наяд гаруй төгрөгийн бодит хохирлоос гадна хүмүүсийн бухимдал, байгаль орчинд үзүүлэх сөрөг үр дагавар бий гэсэн судалгааны дүгнэлт гарсан. Тиймээс үүнийг зориглоод хийх нь чухал.

Хэрэв Улаанбаатар хотын эрх зүйн байдлын тухай хуулийг батлаагүй бол одоогийн хотын даргын шүүгээнд ч метро, LRT төсөл тоосонд дараатай байх байсан биз. Тийм учраас би метро байна уу, LRT байна уу Улаанбаатар хотод заавал багтаамж ихтэй нийтийн тээвэр байх ёстой гэдэг байр суурьтай байдаг. Үүнээс болж зарим нэг гишүүнтэй чуулганы хуралдаан дээр ам мурийж байсныг ч хүмүүс мэдэх байх.

-ҮНДСЭН ХУУЛЬ БАТЛАГДСАНААС ХОЙШ 30 ГАРУЙ ЖИЛИЙН ДАРАА Л ГЭМТ ХЭРЭГ, МАРГААНЫ УЛМААС ХОХИРСОН ИРГЭД СЭТГЭЛ САНААНЫ ХОХИРЛЫГ ХЭРХЭН, ЯАЖ ТООЦУУЛЖ АВАХ ВЭ ГЭХ АСУУДЛЫГ ТОДОРХОЙ ХЭМЖЭЭНД ХУУЛЬЧИЛСАН-

-2022 оны төгсгөлд таны ахалсан Ажлын хэсгийн боловсруулж, батлуулсан Шүүх шинжилгээний тухай хуулийн шинэчилсэн найруулга 2023 оны нэгдүгээр сарын 01-ний өдрөөс мөрдөгдөж эхлээд байна. Энэ хуулийг шинэчлэн найруулах үндэслэл нь юу байсан бэ?

-Шүүхийн шинжилгээний тухай хууль нь 2009 оны 12 дугаар сарын 03-ны өдөр батлагдсан байсан. Эрүү, иргэн, захиргааны хэргийг хянан шийдвэрлэх, зөрчил шалган шийдвэрлэх ажиллагааны явцад ул мөр, эд мөрийн баримтыг илрүүлж бэхжүүлэх, түүнд криминалистик, шүүх эмнэлэг, санхүү, эдийн засгийн зэрэг шүүх шинжилгээ хийж, шүүхийн шийдвэр гаргахад ач холбогдол бүхий нотлох баримтад үндэслэн шинжээчийн дүгнэлтийг гаргах, шүүх шинжилгээний байгууллага, шинжээчийн эрх зүйн байдлыг тогтоосон харилцааг зохицуулсан. Энэ хууль 2009 онд хууль батлагдсан цагаас хойш 5 удаа 40 гаруй зүйлд нэмэлт өөрчлөлт оруулсан байдаг.

Үүнтэй холбогдуулан шүүх эрх мэдлийн болон хууль сахиулах байгууллага хоорондын чиг үүрэг, үйл ажиллагааны эрх зүйн үндсийг шинээр авч үзэх шаардлага гарсан. Тиймээс процессын хуулиудад нийцүүлэн Шүүхийн шинжилгээний тухай хуулийг боловсронгуй болгох шаардлага тулгарсан. Мөн нийгмийн хөгжлийг дагаад инженер техник, хүрээлэн байгаа орчин, цахим технологи болон нийгэм, хууль зүйн салбарт тулгамдаж буй сэтгэл санааны хямрал буюу сэтгэцэд учирсан хор уршгийн зэргийг тогтоох шинжилгээ зэрэг зарим тусгай мэдлэг шаардагдах онцлог шинжилгээг хэрхэн хийх талаарх зохицуулалт хуульд тодорхой бус байсан нь энэхүү хуульд нэмэлт өөрчлөлт оруулах үндэслэл болсон.

Байгуулагдаад 80 гаруй жил болж буй баялаг түүхтэй Шүүх шинжилгээний байгууллагыг ч шинэчлэн байгуулах шаардлагатай. Монгол Улсын хэмжээнд буюу бүх аймагт шүүх шинжилгээний байгууллагууд үйл ажиллагаагаа явуулж байгаа. Боловсон хүчин, санхүүгийн бэрхшээл их. Тиймээс Шүүх шинжилгээний Ерөнхий газар улсын хэмжээнд бүсчилж ажиллах төлөвлөгөөг эхний ээлжинд тусгасан.

-Шүүх шинжилгээний тухай хуульд 2009 оноос хойш хэд хэдэн удаа нэмэлт өөрчлөлт орсон гэлээ. Энэ удаагийн шинэчилсэн найруулгаар сэтгэл санааны хохирлыг тооцох заалтууд орсон нь хамгийн чухал гэж харагдсан. Энэ талаар тодорхой мэдээлэл өгөхгүй юу?

-2009 оноос хойш энэ хуульд 5 удаа нэмэлт өөрчлөлт орсон байдаг. Харин анх удаа шинэчилсэн найруулга орж байгаа юм. Тухайн хуулийн 50-иас дээш хувьд нь өөрчлөлт орж байгаа үед шинэчилсэн найруулга гэж үздэг. Энэ дундаа шинэ Үндсэн хууль батлагдсанаас хойш 30 гаруй жилийн дараа л гэмт хэрэг, маргааны улмаас хохирсон иргэд сэтгэл санааны хохирлыг хэрхэн, яаж тооцуулж авах вэ гэх асуудлыг тодорхой хэмжээнд хуульчилж өгсөн.

Энгийнээр хэлэхэд, иргэд сэтгэл санааны хохирол гэж ярьдаг. Хуульд сэтгэцэд учирсан хор хохирол гэж шигтгэж өгсөн. Олон улсын хэллэгээрээ ч, анагаах ухааны нэршлээрээ ч тэр сэтгэл санааны хохирол гэдэг нь сэтгэцэд учирсан хор хохирол гэдгийн нэг л бүрэлдэхүүн хэсэг хэмээн үзсэн байдаг. Яагаад гэвэл, олон улсын практикт сэтгэл санааны хохирлыг аргачлалын хувьд хүнд, хөнгөн, хүндэвтэр хэмээн үнэлсэн байдаг. Энэхүү аргачлалыг дагаж мөрдөхийн тулд хуульд тусгайлан зааж өгсөн. Энэ дотроо гэмт хэргийн улмаас хохирсон иргэд сэтгэл санааны хохирлоо хуульд заасан аргачлалын дагуу Шүүх шинжилгээний байгууллагаар дүгнэлт гаргуулж, шүүхээр нэхэмжлэх хууль эрх зүйн орчин бүрдэж байна гэсэн үг. Олон улсын практикт янз бүрийн аргачлал байдаг юм билээ. Тухайн орны нийгэм, эдийн засгийн байдал, хөгжлийн түвшин, ДНБ, хөгжлийнхөө загварчлалаар өөр өөр.

-Шүүх шинжилгээний тухай хуулийн шинэчилсэн найруулгад нөхөн олговрын хэмжээг гурван аргачлалаар тооцож оруулсан байсан. Эдгээр аргачлалыг тайлбарлаж өгөхгүй юу?

-Анх удаа энэхүү аргачлалыг гаргаж байгаа. Мэдээж гэмт хэргийн улмаас амиа алдсан иргэн, түүний ар гэрт олгох нөхөн олговрыг гэм буруутай этгээдээр төлүүлэх ийм л үйл ажиллагаа. Үүнд үндсэн гурван аргачлал орж ирсэн. Нэгдүгээрт, хөдөлмөрийн хөлсний доод хэмжээг 150 дахин нэмэгдүүлсэнтэй тэнцэх хэмжээний мөнгөн дүн буюу хамгийн бага суурь үнэлгээ нь 82 сая төгрөг байхаар тогтсон. Хоёрдугаарт, гэмт хэргийн улмаас амиа алдаж буй иргэдийн зарим тохиолдолд насны хувьд залуухан байхыг үгүйсгэхгүй. Энэ үүднээс Монгол Улсад мөрдөгдөж байгаа дундаж наслалтыг тооцож авч үзсэн. Монгол Улсад эрэгтэйчүүдийн дундаж наслалт 67 орчим, эмэгтэйчүүдийн 75 орчим байна. Дундажлан авч үзвэл, 72 гэсэн нас гарч ирж байгаа юм. Дараагийн аргачлал бол, гэмт хэргийн улмаас өнчирч үлдсэн хохирогчийн үр хүүхэд, ар гэрт энэхүү аргачлалыг 127-128 сая төгрөгийг 2 дахин нугалах буюу 260-270 сая төгрөгөөр нөхөн олгохоор оруулсан.

-Нийгэм, цаг үеийн байдлаас шалтгаалан шүүх шинжээчийн дүгнэлттэй холбоотой асуудал их үүсэж, олон нийтийн хардлагыг төрүүлэх болсон. Шүүх шинжээчийн хариуцлага талаас ямар заалт орж ирсэн бэ?

-Тухайлсан шинжээчийн хувьд хоёр гол заалт орж ирсэн. Нэгдүгээрт, тухайн шинжээч хараат бусаар ажил үүргээ явуулах боломж бололцоотой болж байгаа. Энэ нь тусгайлсан программаар санамсаргүй тохиолдлоор уг хэргүүд шинжээчид хуваарилагдах зарчмаар оруулсан. Хоёрдугаарт, олон нийтэд ил болсон хэргүүдийг шүүх, прокурорын байгууллагын зөвшөөрөлтэйгөөр шинжээч нар өөрсдөө олон нийтийн мэдээллийн хэрэгслээр таниулж, мэдээлэх заалтууд орж ирсэн.

-АНХАН ШАТНААС ЭХЭЛЖ АЖИЛЛАСАН УЧРААС ИРГЭДИЙНХЭЭ АМЬДРАЛЫГ МАШ САЙН МЭДНЭ-

-Баянзүрх дүүргээс өмнөх сонгуулийн жилүүдэд дүүрэгт нэг нам, нийслэлд өөр нам, УИХ-д бие даагч сонгогдсонтой холбоотойгоор хөрөнгө оруулалт, бүтээн байгуулалтаараа ч хоцрогдсон байсан. Харин 2020 оны сонгуулиар бүх шатанд МАН иргэдийн итгэлийг хүлээснээрээ энэ бүх хоцрогдлыг нөхөх том даалгавар авсан. Шат шатандаа уялдаа холбоотой байх, хүчээ нэг цэгт зангидах амаргүй үе. Ийм үед ямар зарчмаар ажиллаж байна вэ?

-Төрийн дээд, дунд, доод шат гэлтгүй бид иргэдийнхээ сайн сайхны төлөө ажиллах ганц л том зорилготой. Ажиллаж байгаа үедээ аль болох түүхийг бүтээж, амжилт гаргах хэрэгтэй. Харин хийж дууссан үедээ ирээдүй хойч үедээ залгамж халаагаа хүлээлгэж өгөөд зөв замаар явах ёстой гэж боддог. Миний хувьд Баянзүрх дүүрэгт төрж өсөөд, ажиллаж амьдраад явж байгаа. ДИТХ-д хоёр удаа, НИТХ-ын Төлөөлөгчөөр нэг удаа сонгогдон ажиллаж байсан. Улмаар 2020 оны сонгуулиар УИХ-ын гишүүнээр сонгогдоод ажиллаж байна. Анхан шатнаас нь эхлэн ажилласан учраас иргэдийн амьдрал, нийслэлийн иргэдийн өмнө тулгамдаж буй асуудал, Баянзүрх дүүрэгт шаардлагатай бүтээн байгуулалтын ажлууд нь юу вэ гэдгийг маш сайн мэднэ. Өөрөөр хэлбэл, Баянзүрх дүүргийн хөгжлийн зураглалыг том зургаар нь харж байна. Баянзүрх дүүрэг Улаанбаатар хотын хамгийн их хүн амтай дүүрэг. Тэр ч утгаараа дүүргийн асуудал бол нийслэлийн асуудал гэсэн үг.

-Баянзүрх дүүргийг хөгжүүлэх хөгжлийн бодлогыг санаачлан боловсруулсан гэж сонссон. Тэгэхээр дүүргийн өмнө тулгамдаж буй олон асуудал энэхүү бодлогын баримт бичгийг хэрэгжүүлснээр шийдэгдэнэ гэдэгт итгэлтэй байгаа юу?

-Улс орны хөгжлийг бүтээн байгуулалт, эдийн засгийн тоон үзүүлэлтээр хэмжих нь зохисгүй. Боловсролтой, эрүүл хүн улсын гол баялаг, хөгжлийн хүч. Тийм ч учраас нэн түрүүнд хүний хөгжилд анхаарч зорилтуудаа тодорхойлж, эрүүл мэнд, боловсрол, гэр бүл гэсэн гурван үндсэн концепцод тулгуурласан. Иргэдийн хурал, эрдэмтэн, судлаачдын хамтарсан баг хоёр жилийн хугацаанд төрийн байгууллага, иргэдийн 100 гаруй удаагийн уулзалт, хэлэлцүүлгийг зохион байгуулсны үндсэн дээр боловсруулж, баталсан.

Өөрөөр хэлбэл, Баянзүрх дүүргийн иргэд юу хүсэж байна вэ гэдгийг тодорхойлж, хэрхэн хэрэгжүүлэх вэ гэдгийг тооцоо судалгаанд үндэслэн шинжлэх ухаанчаар боловсруулсан. Тиймдээ ч “Хөгжлийн зураглал 2030” баримт бичиг нь ирэх 10 жилийн хугацаанд засгийн эрх хэнд байхаас үл хамааран хэрэгжих дүүргийн хөгжлийн бодлогын гол суурь нь болно гэдэгт итгэлтэй байна. Бие даасан эдийн засагтай, гаднаас хөрөнгө оруулалт татдаг, хөгжлийн баримжаагаа тодорхойлсон нь бидний хамгийн чухал амжилт.

Улсын Их Хурлын Төрийн байгуулалтын байнгын хорооны өнөөдрийн /2024.05.21/ хуралдаанаар “Орхоны хөндийд “Шинэ Хархорум” хот байгуулах тухай” Улсын Их Хурлын 2023 оны 07 дугаар тогтоолын хэрэгжилтийн явцын талаар мэдээлэл сонслоо.

Барилга, хот байгуулалтын сайд Ц.Даваасүрэн Байнгын хороонд мэдээлэл хийсэн.

Тэрбээр, УИХ-аас баталсан “Алсын хараа-2050” урт хугацааны хөгжлийн бодлогод Орхоны хөндийд шинэ нийслэлийн байршлыг сонгож, техник, эдийн засгийн үзүүлэлт, хөгжлийн ерөнхий төлөвлөгөөг боловсруулж бүтээн байгуулалтын ажлыг эхлүүлнэ гэж, Монгол Улсын Засгийн газрын 2020-2024 оны үйл ажиллагааны хөтөлбөрт Орхоны хөндийд шинэ хотын суурьшлын бүсийн байршлыг судалж, техник, эдийн засгийн үзүүлэлт боловсруулна гэсэн зорилтуудыг дэвшүүлсэн. Монгол Улсын Ерөнхийлөгчийн 2022 оны 230 дугаар зарлигаар Орхоны хөндийн түүхэн дурсгалт газарт төр захиргаа, соёл, боловсрол, аялал жуулчлалд түшиглэсэн байгаль орчинд ээлтэй, орчин үеийн шийдлийг тусгасан Хархорум хотыг байгуулах холбогдох судалгааг хийх, төслийг боловсруулан УИХ-д өргөн мэдүүлэхийг Засгийн газарт даалгаж, Юнескогийн дэлхийн соёлын өвд бүртгэгдсэн Орхоны хөндийн соёлын дурсгалт газрын өв соёлыг хамгаалах Монголын эзэнт гүрний эртний нийслэл Хархорум хотыг сэргээн байгуулах түүхэн үйл хэрэг, их бүтээн байгуулалтад манлайлан оролцохыг нийт иргэд, аж ахуйн нэгж байгууллагуудад уриалсан.

Мөн УИХ-ын 2023 оны 07 дугаар тогтоолоор Монгол Улсын урт хугацааны хөгжлийн зорилтод нийцүүлэн хүн амын нутагшил суурьшлын зохистой тогтолцоог бүрдүүлэх, хот, хөдөөгийн тэнцвэрт хөгжлийг хангах, түүх, соёл, аялал жуулчлалыг дэмжих зорилгоор Орхоны хөндийд шинэ Хархорум хотыг байгуулахаар шийдвэрлэж, шинэ Хархорум хотыг байгуулахтай холбогдуулан 2030 он хүртэлх хугацаанд шинэ хот байгуулах газрын байршил, хэмжээг тогтоож, холбогдох хууль тогтоомжийн дагуу тухайн газрыг улсын тусгай хэрэгцээнд авах, хотын хөгжлийн ерөнхий төлөвлөгөө, зам тээвэр, эрчим хүч, инженерийн дэд бүтцийн хангамжийн техник, эдийн засгийн үндэслэл, зураг төслийг боловсруулах, хотыг байгуулах ажлыг удирдан зохион байгуулах байнгын бүтэц, тогтолцоог бий болгох, бүтээн байгуулалтыг хэрэгжүүлэх төлөвлөгөөг батлах, түүнд шаардагдах хөрөнгийг улс, орон нутгийн төсвийн болон санхүүжилтийн бусад эх үүсвэрээс гаргахаар төлөвлөн арга хэмжээг үе шаттай авч хэрэгжүүлэхийг Засгийн газарт даалгасан. Төрөөс баримталж буй бодлого, холбогдох шийдвэрийг хэрэгжүүлэх хүрээнд Засгийн газрын 2023 оны 38 дугаар тогтоолоор шинэ Хархорум хотын бүтээн байгуулалтын үндэсний хороо, 2023 оны 40 дүгээр тогтоолоор шинэ Хархорум хотын бүтээн байгуулалтын асуудал хариуцсан захиргааг тус тус байгуулан эхний ээлжийн арга хэмжээний төлөвлөгөөний дагуу тодорхой ажлуудыг гүйцэтгэж эхлээд байна. Шинэ Хархорум хот байгуулах газрын байршил, хэмжээг тогтоож, Засгийн газрын 2024 оны 21 дүгээр тогтоолоор Орхоны хөндийд шинэ Хархорум хот байгуулах зориулалтаар Архангай аймгийн Өгийннуур, Хашаат сум болон Өвөрхангай аймгийн Хархорин сумын нутаг дэвсгэрт нийт 189.363 га газрыг улсын тусгай хэрэгцээнд авлаа. Түүнчлэн тус газрын хөрсний судалгаа, инженер геологийн судалгааны ажил хийгдэж байна.

Мөн Хархорум хотын ундны хэрэгцээг хангах усны судалгааны ажлыг эхлүүлэхэд бэлэн болсон. Нийслэлээс шинэ Хархорум хүртэлх авто зам, цахилгаан дамжуулах шугам болон шинэ нисэх буудал байгуулах байршлийг сонгон тогтоогоод байна. Монгол Улсын Ерөнхийлөгчийн Тамгын газар, шинэ Хархорум бүтээн байгуулалтын асуудал хариуцсан захиргаатай хамтран шинэ Хархорум хотын хөгжлийн үзэл баримтлалыг боловсруулах олон улсын нээлттэй уралдааныг зарласан бөгөөд нийт 54 улсын 428 баг оролцохоор бүртгүүлээд байна. Эдгээр багууд нь 2024 оны 07 дугаар сарын 16-ны өдрийн дотор өөрсдийн төлөвлөлтийн үзэл баримтлалыг боловсруулж ирүүлэх бөгөөд 08 дугаар сарын 01-ний өдрийг хүртэл олон улсын нэртэй архитектурч, төлөвлөгч нараас бүрдсэн үнэлгээний багаар үнэлүүлэн, нэгдсэн үзэсгэлэн зохион байгуулж олон нийтийн саналыг авна. Эдгээр багуудаас 5-ыг сонгож, шинэ Хархорум хотын хөгжлийн концепцыг боловсруулах ажлыг хийнэ. Шинэ Хархорум хотын төв цэг болох төв талбайн тохижилтын ажил, Ерөнхийлөгчийн ордны цогцолборын зураг төсөл болон Шинэ Хархорум хотын бүтээн байгуулалтыг дэмжих тухай анхдагч хуулийн төслийг Ерөнхийлөгчийн Тамгын газартай хамтран боловсруулж байна. Монгол Улсын нутаг дэвсгэрийн төв хэсэгт үндэсний соёл иргэншлийн өв уламжлалыг хадгалсан, тогтвортой хөгжлийн зорилтуудыг хангасан, ногоон, ухаалаг, хүн төвтэй шинэ хотыг төлөвлөж байгуулснаар эртний нийслэл Хархорум хотыг дэлхий дахинд шинээр таниулах соёл, аялал жуулчлалыг хөгжүүлэх, улс орны нийгэм, эдийн засгийн өсөлтийг дэмжих, төвлөрлийг сааруулах, гадаад, дотоод, хөрөнгө оруулалтыг татах, шинжлэх ухаан, технологи, инновацад тулгуурласан ажлын байрыг бүс орон нутагт шинээр бий болгох, хүн амын хэт төвлөрөлийг бууруулах зэрэг ач холбогдлыг бүрдүүлэхээр ажиллаж байна гэсэн мэдээллийг өглөө.

Шинэ Хархорум хотын бүтээн байгуулалтын асуудал хариуцсан захиргааны дарга Н.Нацагдорж бүтээн байгуулалттай холбоотой нэмэлт мэдээллийг өгсөн.

Шинэ Хархорум хотыг 500 мянган хүн ам амьдрахаар төлөвлөжээ. Хотын суурьшлын бүсийг 25 мянган га-д хийхээр төлөвлөсөн аж. Энэ нь Улаанбаатар хоттой харьцуулвал 3 дахин том бөгөөд Улаанбаатар хотын суурьшлын бүс 9200 га юм байна. Хот байгуулалтын өнөөгийн нөхцөл байдал, нутаг дэвсгэрийн онцлог, нийгэм эдийн засгийн өсөлт, цаг үеийн өөрчлөлтүүд, ирээдүйн хотжилтын чиг хандлагад нийцүүлэн Хархорум хотыг Засаг захиргаа, Түүх, соёлын аялал жуулчлал, Олон улсын харилцаа, Өндөр технологийн үйлдвэрлэл, Эрүүл мэндийн үйлчилгээний төв болгон хөгжүүлэх үйл ажиллагааны тэргүүлэх чиглэлийг тодорхойлсон аж. Хотод байгуулах нийгмийн дэд бүтэц буюу цэцэрлэг, сургууль хаана, хэдийг байгуулах нь үндсэндээ тодорхой болсон гэсэн мэдээллийг өгсөн. Хотын хамгийн өндөр хэсэг 26 давхар буюу 80 метр хүртэл, дунд хэсэгтээ газрынхаа зориулалтаас шалтгаалаад 50 метр хүртэл буюу 16 давхар барилгатай байхаар төлөвлөжээ.

“Шинэ Хархорум” хотын төлөвлөлтөд иргэд, олон нийт, эрдэмтэн, судлаачид, хот төлөвлөлтийн салбарын мэргэжилтнүүд, төрийн болон мэргэжлийн байгууллага, гадаад, дотоодын хөрөнгө оруулагч нарын санал, зөвлөмжийг авах үйл ажиллагааг үе шаттайгаар явуулсан гэлээ. Нийт 68 удаагийн уулзалт, 5 удаагийн хэлэлцүүлгийг зохион байгуулсан байна. Мэдээлэлтэй холбогдуулан УИХ-ын гишүүд асуулт асууж, байр сууриа илэрхийлсэн юм.

Мөн хуралдаанаар Төрийн бэлгэ тэмдгийн тухай хуульд нэмэлт оруулах тухай хуулийн төслийг хэлэлцэх эсэх асуудлыг хэлэлцлээ.

Монгол Улсын Ерөнхийлөгчөөс өргөн мэдүүлсэн хуулийн төслийн талаар Ерөнхийлөгчийн Тамгын газрын дарга Я.Содбаатар танилцуулав.

Төрийн бэлгэ тэмдгийн тухай хуулиар Монгол Улсын Төрийн сүлд, туг, далбаа, тамгыг үйлдэх, дүрслэх, дээдлэн хэрэглэх журмыг хуульчлан зохицуулж байгаа бөгөөд уг хуулийн 13 дугаар зүйлийн 1 дэх хэсэгт төрийн далбааг байнга мандуулах газрыг тодорхойлж, мөн хуулийн 25 дугаар зүйлд иргэд, өрх, аж ахуйн нэгж, байгууллага нь төрийн бэлгэ тэмдгээ гүнээ дээдлэн хүндэтгэж, бүх ард түмний баяр наадам, ёслол, хүндэтгэлийн арга хэмжээ болон бусад үед Төрийн сүлд, далбаагаа барих байрлуулах, мандуулах буюу Төрийн дууллыг эгшиглүүлж болохоор заасан.

Төрийн далбаандаа хүндэтгэлтэй хандах, түүхт ёс, түүхэн уламжлалаа нандигнан өвлөх, үндэсний эв нэгдлийг бэхжүүлэх, улс орноо сурталчлах, эх оронч үзлийг төлөвшүүлэх зорилгоор төрийн далбааг байнга мандуулах эрх зүйн орчинг сайжруулах, түүнчлэн төрийн далбааг иргэн, хуулийн этгээдэд дурсгал болгон хадгалуулах зохицуулалтын хамрах хүрээг өргөжүүлэх зорилгоор Төрийн бэлгэ тэмдгийн тухай хуульд нэмэлт оруулах тухай хуулийн төслийг боловсрууллаа хэмээн танилцуулсан.

Хуулийн төсөлд төрийн далбааг байнга мандуулах газар, байршлыг Монгол Улсын Ерөнхийлөгч тогтоож болохоор, Монгол Улсын Ерөнхийлөгч, Улсын Их Хурлын дарга, Ерөнхий сайд улс орноо сурталчлах, эх оронч үзлийг төлөвшүүлэх зорилгоор төрийн далбааг иргэн, хуулийн этгээдэд хүндэтгэлтэйгээр гардуулан өгөх эрх зүйн зохицуулалтыг тусгажээ.

Хуулийн төсөл батлагдсанаар монголын ард түмний түүхэн уламжпал, хүсэл тэмүүлэл, эв нэгдэл, шударга ёс, цог хийморийн илэрхийлэл болсон төрийн бэлгэ тэмдэг төрийн далбаандаа хүндэтгэлтэй хандах, үндэсний эв нэгдлийг бэхжүүлэх, улс орноо сурталчлах, эх оронч үзлийг төлөвшүүлэхэд эерэг нөлөө үзүүлнэ хэмээн төсөл санаачлагч үзсэн байна.

Хуулийн төсөлтэй холбогдуулан УИХ-ын гишүүд асуулт асууж, байр сууриа илэрхийлсэн бөгөөд хуралдаанд оролцсон гишүүдийн олонх хуулийн төслийг хэлэлцэх нь зүйтэй хэмээн үзэж, Байнгын хорооны санал, дүгнэлтийг чуулганы нэгдсэн хуралдаанд танилцуулахаар тогтлоо.

Дараа нь Хот, тосгоны эрх зүйн байдлын тухай хуулийн шинэчилсэн найруулгын төсөл болон хамт өргөн мэдүүлсэн хуулийн төслүүдийн анхны хэлэлцүүлгийг явууллаа.

Хуулийн төслүүдийг хэлэлцүүлэгт бэлтгэх үүрэг бүхий ажлын хэсгийг УИХ-ын гишүүн Н.Учралаар ахлуулан байгуулж, бүрэлдэхүүнд нь УИХ-ын гишүүн Э.Бат-Амгалан, Ж.Батжаргал, Б.Баттөмөр, Г.Дамдинням, Т.Доржханд, Ц.Мөнх-Оргил, Ц.Мөнхцэцэг, С.Одонтуяа, Г.Тэмүүлэн нар ажилласан юм. Төслүүдийг анхны хэлэлцүүлэгт бэлтгэсэн талаар Ажлын хэсгийн ахлагч Н.Учрал танилцуулсан юм.  Ажлын хэсэг есөн удаа хуралдаж, Хот тосгоны эрх зүйн байдлын тухай хуулийн төсөл болон хамт өргөн мэдүүлсэн бусад хууль, тогтоолын төсөлд шаардлагатай зарим зүйл, хэсэг, заалтыг нэмэх, төслийн хэсэг, заалтыг бусад хууль тогтоомжтой нийцүүлэх, нэр, томьёог тодорхой болгохтой холбогдуулан зарчмын зөрүүтэй саналын томьёолол бэлтгэжээ. Ажлын хэсгийн бэлтгэсэн зарчмын зөрүүтэй саналын томьёолол дараах хүрээг хамарчээ. Үүнд:

• Хот тосгоны удирдлагын зарчимд төр, хувийн хэвшлийн түншлэлийг дэмжих, алслагдсан хот, тосгонд аж ахуйн үйл ажиллагаа эрхлэх тохиолдолд татварын болон татварын бус дэмжлэг үзүүлэх, хот, тосгоны зохион байгуулалт, тэдгээрийг байгуулах, өөрчлөн байгуулах, татан буулгах, хотын зэрэглэл тогтоохтой холбоотой шийдвэр гаргахад их өгөгдлийн тооцоололд суурилах дэвшилтэт технологийг ашиглах зарчмыг тусгах,
• Төсөлд хот тосгоны хөгжлийг дэмжихээр харилцаа холбоо мэдээлэл, технологи ашиглах гэсэн зүйлийг нэмж хот, тосгоны удирдлага нь хот, тосгоны чиг үүргийг хэрэгжүүлэхэд инновац, их өгөгдөл, хиймэл оюун ухаан, юмсын интернэт зэрэг дэвшилтэт технологийг нэвтрүүлэх шийдвэр гаргахаас өмнө тухайн шийдвэрийг цахим орчинд урьдчилан загварчилж үр дүнг тооцоолох дэвшилтэт технологи нэвтрүүлэхэд зохицуулалтын сэндбокс орчинд туршиж оршин суугчдын саналыг авах, харилцаа холбоо, мэдээлэл технологийн дэд бүтэц, мэдээллийн системийг бий болгох зэрэг зохицуулалтыг тусгах,
• Тосгоны удирдлага нь тосгоны зөвлөл, тосгоны Захирагчаас бүртгэх бөгөөд Тосгоны зөвлөл 9 гишүүний бүрэлдэхүүнтэй байх, Зөвлөлийн гишүүн Тосгоны захирагчийг оршин суугчдаас сонгох,
• Төсөлд хотын зөвлөлтэй холбогдуулан тусгагдсан зохицуулалттай адил тосгоны зөвлөл бүрэн эрхээ хэрэгжүүлж анхдугаар хуралдааныг хуралдуулж чадаагүй, төсвөө батлаагүй, хуралдаан зарлаж товлосон хугацаанаас хойш хуралдахгүй 60 хоног өнгөрсөн бол тосгоны зөвлөлийг харьяалах сум, дүүргийн Засаг дарга, эсхүл орон нутгийн зэрэглэлтэй хотын захирагч тараах шийдвэр гаргах зохицуулалтыг нэмж тусгах,
• Тосгон нь зөвлөлтэй байхаар нэмж тусгахтай холбогдуулан төсөлд тусгагдсан. Хотын зөвлөлийн чиг үүргээс албан татварын хувь хэмжээ тогтоох, аймаг, нийслэлийн ИТХ үнэт цаас гаргах чиг үүргээ шилжүүлсэн тохиолдолд хотын захирагчийн өргөн мэдүүлснээр хуульд заасан үндэслэл журмын дагуу үнэт цаас гаргах, зээл авах зөвшөөрөл олгохоос бусад чиг үүргийг тосгоны зөвлөл хэрэгжүүлэхээр тусгах,
• Хот, тосгоны захирагчийн бүрэн эрх хугацаанаас өмнө дуусгавар болгохтой холбогдох зохицуулалтын нийцлийг хангах,
• Хот, тосгоны шаардлага, одоо үйл ажиллагаа эрхлэхэд татварын болон татварын бус дэмжлэг үзүүлэх асуудлыг тухайн төрлийн татварын хуулиар зохицуулахаар тусгах,
• Хот нь эдийн засгийн тусгай бүтэцтэй байж болох зохицуулалтыг тусгах,
• Төслийн зүйл, хэсэг, заалтын хоорондын нийцлийг хангах болон бусад хууль тогтоомжийн зохицуулалттай нийцүүлж өөрчлөх зэрэг агуулгыг хамарчээ.

Мөн Хот, тосгоны эрх зүйн байдлын тухай хуулийн төсөлтэй хамт өргөн мэдүүлсэн бусад хуулийн төслүүдтэй холбоотойгоор боловсруулсан зарчмын зөрүүтэй саналын томьёоллуудыг танилцуулсан.

Байнгын хороо Монгол Улсын Их Хурлын чуулганы хуралдааны дэгийн тухай хуульд заасны дагуу хуулийн төслүүдийг зүйл тус бүрээр нь хэлэлцэн, зарчмын зөрүүтэй саналын томьёоллуудаар санал хураалт явуулж эхэлснээр Байнгын хорооны хуралдаан өндөрлөлөө.

Байнгын хороо маргааш хуралдан хуулийн төслүүдийн анхны хэлэлцүүлгийг үргэлжлүүлэхээр тогтлоо хэмээн Улсын Их Хурлын Хэвлэл мэдээлэл, олон нийттэй харилцах газраас мэдээллээ.

Сонгогчдын нэрийн жагсаалтад бүртгэл нь баталгаажсан сонгогч Та 2024 оны 6 дугаар сарын 20, 21, 22 болон 23-ны өдрүүдэд 07:00-22:00 цагийн хооронд /орон нутгийн цагаар/ саналаа өгөхөөр бүртгүүлсэн тухайн Элчин сайдын яам, Ерөнхий консулын газар, Консулын газарт байрлах санал авах байранд гадаад паспорт эсхүл иргэний үнэмлэхтэйгээ биечлэн очиж саналаа өгнө.

Элчин сайдын яам

1. Анкара дахь ЭСЯ
2. Астана дахь ЭСЯ
3. Абу-Даби
4. Бангкок дахь ЭСЯ
5. Берлин дэх ЭСЯ
6. Брюссель дэх ЭСЯ
7. Бишкек дэх ЭСЯ
8. Будапешт дахь ЭСЯ
9. Бээжин дэх ЭСЯ
10. Варшав дахь ЭСЯ
11. Вашингтон дахь ЭСЯ
12. Вена дахь ЭСЯ
13. Вьентьян дахь ЭСЯ
14. Гавана дахь ЭСЯ
15. Дели дэх ЭСЯ
16. Каир дахь ЭСЯ
17. Канберра дахь ЭСЯ
18. Кувейт дахь ЭСЯ
19. Лондон дахь ЭСЯ
20. Москва дахь ЭСЯ
21. Минск дэх ЭСЯ
22. Оттава дахь ЭСЯ
23. Парис дахь ЭСЯ
24. Прага дахь ЭСЯ
25. Ром дахь ЭСЯ
26. Софи дахь ЭСЯ
27. Сөүл дэх ЭСЯ
28. Стокгольм дахь ЭСЯ
29. Сингапур дахь ЭСЯ
30. Ташкент дахь ЭСЯ
31. Токио дахь ЭСЯ
32. Ханой дахь ЭСЯ

Байнгын төлөөлөгчийн газар

33. Женев дахь БТГ
34. Нью-Иорк дахь БТГ

Ерөнхий консулын газар

35. Истанбул дахь ЕКГ
36. Сан Франциско дахь ЕКГ
37. Осака дахь ЕКГ
38. Кызыл дэх ЕКГ
39. Улаан-Үд дэх ЕКГ
40. Эрхүү дэх ЕКГ
41. Хөх хот дахь ЕКГ
42. Хонконг дахь ЕКГ
43. Шанхай дахь ЕКГ

Консулын газар

44. Эрээн дэх Консулын газар
45. Пусан дахь Консулын газар
46. Манжуур дахь Консулын газар
47. Чикаго дахь Консулын газар

Гадаад улсад оршин суугаа сонгуулийн эрх бүхий Монгол Улсын иргэд Улсын Их Хурлын 2024 оны ээлжит сонгуульд оролцож, сонгох эрхээ эдлэхийн тулд тавдугаар сарын 06-аас зургадугаар сарын 15-ны өдрийн хооронд оршин суугаа эсвэл түр зорчиж буй улс, хотод байршилтай Монгол Улсын Дипломат төлөөлөгчийн газар буюу Элчин сайдын яам, Ерөнхий консулын газар, Консулын газарт санал өгөх тухай хүсэлтээ дор дурдсан бүртгэлийн хэлбэрүүдийн нэгийг сонгон сонгогчдын нэрийн жагсаалтад бүртгүүлэх шаардлагатай. Үүнд:

https://election.burtgel.gov.mn/request хаягаар орон шууд;

https://election.burtgel.gov.mn/request хаягаас бүртгэлийн маягт татан авч бөглөн гадаад паспорт эсхүл иргэний үнэмлэхийн хуулбарыг цахим шуудангаар санал өгөх Дипломат төлөөлөгчийн газарт хүргүүлэх;

Элчин сайдын яам, Ерөнхий консулын газар, Консулын газарт биечлэн очиж, зэрэг болно.

МАН-аас УИХ-ын 2024 оны сонгуульд тойрогт нэр дэвшигчдийн мэдээллийг хүргэж байна.

Тойрог 1: Архангай, Баянхонгор, Өвөрхангай /Мандатын тоо 9/

1. Батмөнхийн Батцэцэг
2. Гочоогийн Ганболд
3. Батсуурийн Даваадалай
4. Гомбожавын Занданшатар
5. Гүрсэдийн Сайханбаяр
6. Дуламдоржийн Тогтохсүрэн
7. Ганзоригийн Тэмүүлэн
8. Аюушийн Цогцэцэг
9. Содномын Чинзориг

Тойрог 2: Говь-Алтай, Завхан, Увс, Ховд /Мандатын тоо 10/

1. Дашзэвэгийн Амарбаясгалан
2. Балжиннямын Баярсайхан
3. Сандагийн Бямбацогт
4. Энхбатын Болормаа
5. Батжаргалын Заяабал
6. Загджавын Мэндсайхан
7. Чимэдийн Хүрэлбаатар
8. Цэдэндамбын Цэрэнпунцаг
9. Баттогтохын Чойжилсүрэн
10. Сэрээжавын Энхболд

Тойрог 3: Баян-Өлгий /Мандатын тоо 3/

1. Тилеуханы Аубакир
2. Зулпайн Батырбек
3. Хажекберын Жангабыл

Тойрог 4: Булган, Орхон, Хөвсгөл /Мандатын тоо 8/

1. Бат-Өлзийн Бат-Эрдэнэ
2. Жадамбын Бат-Эрдэнэ
3. Дамбын Батлут
4. Батсүхийн Баярмагнай
5. Цэрэнпилийн Даваасүрэн
6. Лхагвын Мөнхбаатар
7. Доржсүрэнгийн Үүрийнтуяа
8. Лувсанцэрэнгийн Энх-Амгалан

Тойрог 5: Дархан-Уул, Сэлэнгэ, Төв /Мандатын тоо 10/

1. Жигжидийн Батжаргал
2. Гонгорын Дамдинням
3. Болдын Жавхлан
4. Нацагдоржийн Лхагвадорж
5. Сүрэнжавын Лүндэг
6. Дамдинсүрэнгийн Өнөрболор
7. Буяагийн Тулга
8. Чинбатын Ундрам
9. Батчулууны Цогтгэрэл
10. Жадамбын Энхбаяр

Тойрог 6: Дорнод, Сүхбаатар, Хэнтий /Мандатын тоо 7/

1. Пүрэв-Очирын Анужин
2. Мягмарсүрэнгийн Бадамсүрэн
3. Мөнгөнцогийн Ганхүлэг
4. Цагаанхүүгийн Идэрбат
5. Ухнаагийн Отгонбаяр
6. Лувсаннамсрайн Оюун-Эрдэнэ
7. Лхагвасүрэнгийн Соронзонболд

Тойрог 7: Говьсүмбэр, Дорноговь, Дундговь, Өмнөговь /Мандатын тоо 7/

1. Гомбодоржийн Батсуурь
2. Борхүүгийн Дэлгэрсайхан
3. Өлзийбаярын Золбаяр
4. Гомпилдоогийн Мөнхцэцэг
5. Нанзадын Наранбаатар
6. Батсүхийн Саранчимэг
7. Төмөртогоогийн Энхтүвшин

Тойрог 8: Баянзүрх /Мандатын тоо 5/

1. Энхтайваны Бат-Амгалан
2. Нацагийн Баянмөнх
3. Хүрэлбаатарын Булгантуяа
4. Жигжидсүрэнгийн Чинбүрэн
5. Баттөмөрийн Энхбаяр

Тойрог 9: Баянгол /Мандатын тоо 3/

1. Жамбалын Ганбаатар
2. Хассуурийн Ганхуяг
3. Өлзий-Оршихын Сумъяабаатар

Тойрог 10: Чингэлтэй, Сүхбаатар /Мандатын тоо 6/

1. Отгоншарын Батнайрамдал
2. Нацагдоржийн Батсүмбэрэл
3. Ганзоригийн Дашням
4. Мөнхөөгийн Оюунчимэг
5. Ням-Осорын Учрал
6. Дамдины Цогтбаатар

Тойрог 11: Сонгинохайрхан /Мандатын тоо 5/

1. Наранцэцэгийн Алтаншагай
2. Энхбаярын Батшугар
3. Чинбатын Номин
4. Пүрэвжавын Сайнзориг
5. Нямдаваагийн Хүрэлбаатар

Тойрог 12: Хан-Уул /Мандатын тоо 3/

1. Жуковын Алдаржавхлан
2. Тогтмолын Мөнхсайхан
3. Лувсандашийн Нинжжамц

Тойрог 13: Багануур, Багахангай, Налайх /Мандатын тоо 2/

1. Сайнбуянгийн Амарсайхан
2. Цэндийн Сандаг-Очир

Жагсаалтаар нэр дэвшигчид

1. Ганзоригийн Лувсанжамц,
2. Мөнхчулууны Энхцэцэг
3. Чинбаатарын Анар
4. Отгоны Саранчулуун
5. Дүгэрийн Рэгдэл
6. Даваасамбуугийн Ганмаа
7. Сүхбаатарын Эрдэнэбат
8. Мэндбаярын Мандхай
9. Дашцэрэнгийн Энхтүвшин
10. Болдын Уянга
11. Жанчивын Галбадрах
12. Аюушийн Ариунзаяа
13. Баярмагнайн Баярбаатар
14. Бадарчийн Хэрлэн
15. Дуламын Бум-Очир
16. Одсүрэнгийн Номинчимэг
17. Сархадын Зулпхар
18. Хүрэлбаатарын Баасанжаргал
19. Ганболдын Ганбаяр
20. Санжаагийн Мөнгөнчимэг
21. Пүрэвсүрэнгийн Баттөр
22. Баярсайханы Солонгоо
23. Чоймаагийн Лодойравсал
24. Нанзадын Баярчимэг
25. Баасандаваагийн Дөлгөөн
26. Адьяажавын Адилбиш
27. Сугаржавын Далхаасүрэн
28. Чулуунбаатарын Болортуяа
29. Ганжавын Баярхүү
30. Дагва-Очирын Бумдарь
31. Дугараагийн Алтанхуяг
32. Пүрэвсүрэнгийн Цолмон
33. Түмэнбаярын Сайнжаргал
34. Баярмагнайн Юмжирмаа
35. Минжигдоржийн Найданхүү
36. Алтайн Энхзул
37. Пүрэвдагвын Бодьсайхан
38. Бямбажавын Нандин-Эрдэнэ
39. Түмэннастын Алтансүх
40. Мавганцэрэнгийн Мөнхчулуун
41. Мягмарсүрэнгийн Батзориг
42. Данзанбалжирын Энхжаргал
43. Цолмонгийн Сүхбаатар
44. Хурцын Оюунцэцэг
45. Чинболдын Энхболд
46. Баасанжавын Гүнжинлхам
47. Нэргүйн Жавхлан
48. Бибишийн Оюун-Эрдэнэ

Нэр дэвшигчдийн баримт бичгийг 2024 оны тавдугаар сарын 24-ний дотор Сонгуулийн Ерөнхий Хороо(СЕХ)-нд хүргүүлж 2024 оны зургадугаар сарын 1-ний дотор СЕХ тэднийг нэр дэвшигчээр бүртгэх эсэхийг шийдвэрлэнэ. З

МАН-ын Бага хурлаас 2024 оны УИХ-ын сонгуульд нэр дэвшигчдээ тодрууллаа. Намын жагсаалтад бичигдэх 48 хүний дотор УИХ, Засгийн газрын гишүүдээс хэнийг ч оруулаагүй байна. Харин нийгмийн төлөөллийг хангах үүднээс жагсаалтын эхний 15-д хөгжлийн бэрхшээлтэй иргэдийн төлөөлөл болон ахмад настан зэрэг нам бус хүнийг багтаажээ. Харин жагсаалтын 15-аас хойш МАН-ын залуучуудын байгууллагын төлөөллийг оруулсан байна. Жагсаалтаас танилцуулбал

1. Архитектор, хот төлөвлөлтийн инженер Г.Лувсанжамц (

2. Доктор М.Энхцэцэг

3. “Ондо” компанийн үүсгэн байгуулагч Ч.Анар

4. “Ахиллис монгол” ТББ-ын үүсгэн байгуулагч О.Саранчулуун

5. ШУА-ийн Ерөнхийлөгч, академич Д.Рэгдэл

6. Харвардын Нийгмийн эрүүл мэндийн их сургуулийн багш Д.Ганмаа

7. МҮЭ-ийн холбооны ерөнхийлөгч С.Эрдэнэбат

8. Социал демократ эмэгтэйчүүдийн холбооны ерөнхий нарийн бичгийн дарга М.Мандхай

9. МҮХАҮТ-ын Ерөнхийлөгч Д.Энхтүвшин

10. УУХҮ-ийн дэд сайд Б.Уянга

11. Шинэ Монгол эрдмийн хүрээлэнгийн ерөнхийлөгч Ж.Галбадрах

12. МАН-ын нарийн бичгийн дарга А.Ариунзаяа

13. МАН-ын хяналтын хорооны дарга Б.Баярбаатар

14. Улс төр судлаач Б.Хэрлэн

15. (Ерөнхийлөгчийн зөвлөх Д.Бум-Очир

16. Нийслэлийн Засаг даргын орлогч О.Номинчимэг

17. ХНХ-ын дэд сайд С.Зулпхар

18. Х.Баасанжаргал

19. БШУ-ны дэд сайд  Г.Ганбаяр

20. Сангийн дэд сайд С.Мөнгөнчимэг

21. Соёлын дэд сайд П.Баттөр

22. ХЗДХ-ийн дэд сайд Б.Солонгоо

23. Ерөнхийлөгчийн зөвлөх Ч.Лодойравсал

24. НИТХ-ын төлөөлөгч Н.Баярчимэг

25. Эдийн засагч Б.Дөлгөөн

26. СДМЭХ-ны дэд ерөнхийлөгч А.Адилбиш

27. УИХ дахь МАН-ын бүлгийн ажлын албаны дарга С.Далхаасүрэн

28. Ерөнхий сайдын хэвлэлийн төлөөлөгч Ч.Болортуяа

29. МАН-ын хэвлэл мэдээллийн газрын дарга Г.Баярхүү

30. МУИС-ийн багш, улс төр судлаач Д.Бумдарь

31. МУГЖ, Соёлын элч Д.Алтанхуяг

32. П.Цолмон

33. Монголын төмөр зам ТӨХК-ийн төслийн удирдагч Т.Сайнжаргал