“Эрдэнэзуу музейн гамшгийн үеийн бэлэн байдлыг сайжруулах нь” төслийг 17.780 еврогийн санхүүжилтээр хэрэгжүүлнэ. 2020 оны гуравдугаар сард Нидерландын Вант улсын хунтайж Клаусын сан болон ХБНГУ-ын Герда Хенкел сан хамтран “Гамшгийн үед соёлын өвийг хамгаалах бэлэн байдал” төслийн сонгон шалгаруулалт зарласан бөгөөд Соёлын Өвийн Сүлжээ, Харилцаа Холбооны Зөвлөлөөс дэвшүүлсэн “Эрдэнэзуу музейн гамшгийн үеийн бэлэн байдлыг сайжруулах нь” төсөл шалгарсан байна.
Төсөл хэрэгжсэнээр гамшгийн үед авч хэрэгжүүлэх үйл ажиллагааны нарийвчилсан төлөвлөгөөг боловсруулж, галын гамшгаас урьдчилан сэргийлэх чиглэлээр дадлага сургалт зохион байгуулах, аянга зайлуулагч суурилуулах, хулгайн эрсдэлээс сэргийлэх зорилгоор музейн дохиоллын системийг сайжруулах ажлыг гүйцэтгэх аж. Төслийг 2021 оны 1 дүгээр сараас 7 дугаар сар хүртэлх хугацаанд хэрэгжүүлнэ.
Сүүлийн жилүүдэд Дорнод аймгийг зорих малчид их болжээ. Отор гэх нэрийдлээр цөөхөн малтай ирж өвөлжөөд хэсэг хугацааны дараа ах дүү, хамаатан саднаараа ирж суурьшдаг аж. Уг нь малын отор нүүдэл, шилжилт хөдөлгөөнийг хийхээс өмнө тухайн очих газарт байгаа сум, багийн даргад мэдэгдэж, зөвшөөрөл авсан байх ёстой. Мөн мал амьтны эрүүл мэндийн тухай хуулиараа малаа эрүүл гэдгийг нотлох, вакцин зэрэгт хамруулсан байх шаардлага тавьдагч малчид малын эрүүл мэндийн бичиг гэж үзүүлээд л нүүж ирдэг болсон байна. Энэ нь тухайн нутгийн бэлчээрийн даац хэтрэх малын халдварт өвчин гарах зэрэг эрсдэлүүд хаа хаанаа хүндрэл учруулдаг байна. Тиймээс Дорнод аймаг энэ тал дээр хэд хэдэн арга хэмжээ авчээ.
Олон улсын хэмжээнд дэгдээд байгаа короновирусийн цар тахал дэлхийн 226 улс оронд бүртгэгдэж, халдвар авсан хүний тоо 67.780.360, нас барсан хүний тоо 1.551.214-т хүрээд байна. Манай улсын хувьд 2020 оны гуравдугаар сарын 10-нд Монгол Улсад ирсэн Францын иргэний шинжилгээнээс коронавирус илэрч анхны тохиолдол болж бүртгэгдсэн бол дотоодын халдвар арваннэгдүгээр сарын 11-ний өдөр тээврийн машины жолоочоос илэрсэн билээ. Улмаар улс орны хэмжээнд бэлэн байдлын болон өндөржүүлсэн бэлэн байдлын зэрэгт шилжсэн билээ. Энэхүү сар гаруйн хугацаанд олон мянган төрийн албан хаагчид ард иргэдийнхээ аюулгүй байдлын төлөө ажиллаж ирсэн юм. Тэгвэл энэхүү сар гаруйн хугацаанд өргөсөн тангарагтаа үнэнчээр зүтгэж, цаг наргүй албандаа тууштай ажилласан цагдаа, дотоодын цэргийн хамт олны амар тайван албан үүргээ гүйцэтгэх нөхцөл боломжийг бүрдүүлж, хань ижлээ ойлгон ар гэрийнхээ аюулгүй байдлыг сахин хамгаалж байсан хань, гэр бүлд нь Орхон аймгийн Цагдаагийн газраас талархлын хуудас илгээлээ. 
Авлигын эсрэг олон улсын өдөр жил бүрийн арванхоёрдугаар сарын 9-ний өдөр тохиодог. НҮБ-ын Конвенц нь авлигын шалтгааныг арилгах, үр нөлөөг бууруулах цогц арга хэмжээг тусгасан, дэлхий даяар авлигатай тэмцэх гол хэрэгсэл хэмээн үздэг бөгөөд түүнд нэгдсэн улс орнууд энэ өдрийг угтан олон нийтийн дуу хоолойг сонсох зорилготой тэмдэглэн өнгөрүүлж иржээ. Энэхүү өдрийн хүрээнд Өндөрширээт сумын ИТХ-ын нарийн бичгийн дарга Б.Отгонцэцэг ИТХ-ын төлөөлөгчдөд “Авлигын эсрэг олон улсын өдрийг тэмдэглэн өнгөрүүлэх” талаар мэдээлэл хийсэн бөгөөд энэ үеэр сумын ИТХ-ын нийт 16 төлөөлөгч “Бид авлигын эсрэг юу хийж чадах вэ” цахим уриалгад нэгдэж өөрсдийн үзэл бодлоо илэрхийллээ.
Монгол Улсын Засгийн газраас айл өрхүүдийн хэрэглэсэн цахилгааны үнийг тэглэх шийдвэр гаргаснаас хойш цахилгаан эрчим хүчний ачаалал нэмэгдэж байна. Баян-Өлгий аймгийн Цахилгаан шугам сүлжээний газраас өгсөн мэдээллээр, өчигдрийн байдлаар тус аймгийн цахилгаан эрчим хүчний ачаалал 12.9 мВт-д хүрч 15 хувиар, өмнөх жирийн өдрөөс 20 хувиар тус тус нэмэгджээ. Харин хэвийн үед оргил ачаалал 10 мВт-д хүрдэг байна. Иймд оргил ачааллын үед буюу 17.00-21.00 цагийн үед өмнөх хэвийн түвшнээс хэтрүүлэхгүй барих, цахилгаан халаагуур зэрэг цахилгаан их зарцуулдаг тоног төхөөрөмж залгахгүй байхыг мэргэжлийн байгууллагаас зөвлөж байна. Хэрвээ хэрэглээ эрс нэмэгдсэн тохиолдолд автомат хязгаарлалтад орох, дэд станц, хүчний трансформатор шатах, агаарын шугам гэмтэх зэргээр цахилгаан эрчим хүчний хэвийн ажиллагаа алдагдаж болзошгүйг анхаарууллаа. 
