Category: спорт

Хятадын Наньжин хотноо өнгөрсөн бямба гарагт эхэлсэн “Наньжин-2014” дэлхийн залуучуудын II наадмын нээлтийн ёслолыг Хятадын Ерөнхийлөгч Си Зиньпин нээж үг хэлсэн юм. Энэхүү наадамд 204 орны 14-18 насны 3808 тамирчин спортын 30 төрөлд өрсөлдөж байна. Уламжлал ёсоор наадмын эхний өдөр усанд сэлэлт, спортын гимнастик болон туялзуур сэлэмний төрлийн тэмцээнээр эхэлж, медалиуд гардуулсан.

Австралийн тамирчин Бриттани Даттон тритлион буюу эмэгтэйчүүдийн гур­ван төрөлт тэмцээнд түр­үүлж “Наньжин-2014” зал­уучуудын II наадмын анхны алтан медалийг хүртлээ.

Тэрбээр 0.75 км зайд сэлж, 20 км замд дугуйгаар уралдаж, таван км зайд гүйхдээ нийт 59 минут 56 секундын хугацаа зарцуулсан амжилтаар алтан медалийн эзэн болсон. Бриттани Даттон “Дугуйн уралдаанд түрүүлж явахдаа тэргүүлэх байраа алдахгүйг хичээх хэрэгтэй” гэж бодож байсан. Би их баяртай байна” хэмээн хэлжээ. Наадмын хоёр дахь өдөр хүндийг өргөлтийн тамирчин хятад бүсгүй Жянь Сюхуа улсдаа анхны алтан медалийг авч ирсэн байна.

Жянь Сюхуа эмэг­тэйчүүдийн 48 кг-ын жинд гурван оролдлогоор нийтдээ 193 кг өргөсөн амжилтаар тэргүүллээ. Өдгөө 16 настай бүсгүй “Хятадын тамирчдаас эхний алтан медалийг хүртсэндээ сэтгэл ихэд хөдөлж байна” гэжээ.

Мөн ОХУ-ын туялзуур сэлэмний тамирчин Иван Ильин залуу­чуудын наадмаас улсдаа анхны алтан медаль авч иржээ.

Тамирчин залуу “Алтан медаль хүртсэн нь миний хувьд том бахархал болж байна. Би энэ тэмцээнд их удаан хугацаанд бэлтгэсэн. Рио-де-Жанейрогийн олимп миний хувьд хол санагдаж байна” хэмээн ярьсан байна.

Өчигдрийн байдлаар Хятад улс дөрвөн алт, нэг мөнгө, таван хүрэл медальтайгаар медалийн чансааг тэргүүлж, ОХУ дөрвөн алт, хоёр мөнгө, хоёр хүрэл медальтайгаар удаалсан бол Унгар улс дөрвөн алт, хоёр хүрэл медальтайгаар гуравдугаарт орсон байна. 

3х3 сагсан бөмбөгийн Нийслэлийн аварга шалгаруулах тэмцээн өнгөрөгч бямба гаригт буюу наймдугаар сарын 16-нд Драмын театрын урд талын талбайд эхэлсэн билээ. Монголын анхны FIBA-гийн зөвшөөрөлтэй явагдаж байгаагаар онцлогтой тус тэмцээн нь эрэгтэй 15-18, 18-аас дээш болон эмэгтэй 16-с дээш гэсэн насны ангиллаар явагдаж байгаа аж. Тэмцээний талаарх мэдээллийг сагсан бөмбөгийн дэлхийн томоохон сайтуудын нэг болох 3x3planet.com-оор дамжуулан дэлхийн нийтэд мэдээлэх юм байна. Тэмцээнд оролцож байгаа тамирчдын амжилтыг FIBA-гийн гурвын эсрэг гурав жагсаалтад оруулж, хэрвээ тэмцээний шилдгүүдийг FIBA-гаас урьвал “FIBA World tour” буюу гурвын эсрэг гурвын ДАШТ-нд эх орноо төлөөлж оролцох боломж нээгдэж байгаа юм байна.

Дашрамд хэлэхэд, уг тэмцээнд нийт 107 багийн 428 орчим тамирчин оролцож байгаа аж.

3х3 сагсан бөмбөгийн Нийслэлийн аварга шалгаруулах энэхүү тэмцээний анхны аваргууд ирэх ням гаригт буюу наймдугаар сарын 24-нд тодорно.

Монгол Улсын Гавьяат тамирчин Т.Үйтүмэнгээр ахлуулсан манай боксчид “Тайпей сити Кап” тэмцээнд амжилттай оролцож, гурван мөнгө, нэг хүрэл медаль хүртжээ.

Тодруулбал, энэ сарын 6-13-нд Тайвань улсын нийслэл Тайбей хотноо Олон улсын А зэрэглэлд тооцогддог “Тайпей сити Кап” тэмцээн дөрөв дэх удаагаа зохион байгуулагдсан юм. Тэмцээнд БНСУ, Тайланд, Индонез, Япон, ОХУ, Австрали зэрэг 18 орны 80 гаруй тамирчид өрсөлдсөн байна. 

Ингэхдээ манай тамирчдаас 60, 64 кг-ийн жинд “Хангарьд” спорт клубийн тамирчин ОУХМ Б.Жавхлан, залуу мастер А.Бадар-Ууган, 75 кг-ийн жинд улсын шигшээ баг, АПУ компанийн тамирчин Ази тивийн аварга Э.Уянга нар тус тус мөнгөн медаль хүртсэн бол 52 кгийн жинд Сэлэнгэ аймгийн спорт хорооны тамирчин Э.Энхтөр хүрэл медаль хүртжээ. Тив, дэлхийн аваргын медальтнууд оролцсон тус тэмцээний сонирхолтой тулаануудын нэг нь Ази тивийн аварга ОУХМ Э.Уянга, Казахстаны боксчин 2012 оны дэлхийн аваргын мөнгөн медальт Юлдиз Маматкулова нарын хооронд болсон. Ширүүн өрсөлдөөн Монголын боксчны ялалтаар өндөрлөжээ.

ОУХМ Б.Жавхлан аваргын төлөө Лондонгийн олимпод оролцсон шилдгүүдийн нэг өмнө нь Ази тивийн аваргаар мөнгөн медалийн төлөө тулаанд ганцхан оноогоор ялагдаж байсан Тайландын боксчин Арди Сэйломтой тулалдаж даагаа нэхэх боломж гарсан ч гэмтлийн улмаас тулалдсангүй. Тэмцээний шилдэг боксчноор 56 кг-ийн жинд “Хангарьд” спорт клубийн тамирчин Ц.Пүрэвсүрэнг нэгийн даваанд ялж цаашид давсаар аваргалсан БНСУын боксчин Хам Сангмеонг тодорчээ.

Английн
Премьер лигийн 2014-15 оны улирал өнгөрсөн амралтын өдрүүдэд эхэллээ.
Лигийн эхний тойрогт Уэльсийн “Свонси Сити” алдарт “Манчестер Юнайтед”
клубыг Олд Траффорд цэнгэлдэх хүрээлэнд нь хожиж, шуугиан тарилаа.
Лигийн аварга цолны төлөө ширүүн өрсөлдөх “Арсенал”, “Ливерпүүл”,
“Манчестер Сити” клуб энэ тойрогт ялалт байгуулсан. Тойргийн сүүлчийн
тоглолт өнөө шөнө дээд лигт шинээр дэвшсэн “Бөрнли” болон “Челси” клубын
хооронд болно. 

 Тойргийн онцлох тоглолтуудын дүн: 

МАНЧЕСТЕР ЮНАЙТЕД – СВОНСИ СИТИ – 1:2

Ки Сун Ен, 28 (0:1). Рүүни, 53 (1:1). Сигурдссон, 72 (1:2).

ЛЕСТЕР СИТИ – ЭВЕРТОН – 2:2

МакГиди, 21 (0:1). Ульоа, 22 (1:1). Нейсмит, 45 (1:2). Вүүд, 86 (2:2).

ВЕСТ ХЭМ – ТОТТЕНХЭМ – 0:1

Дайер, 90+3 (0:1).

АРСЕНАЛ – КРИСТАЛ ПАЛАС – 2:1

Хангеланд, 35 (0:1). Косельни, 45+1 (1:1). Рамси, 90+1 (2:1).

ЛИВЕРПҮҮЛ – САУТХЭМПТОН – 2:1

 (Стерлинг, 23 (1:0). Клайн, 56 (1:1). Старриж, 79 (2:1).

НЬЮКАСЛ – МАНЧЕСТЕР СИТИ – 0:2

Давид Сильва, 38 (0:1). Агуэро, 90+2 (0:2).

Монголын өсвөрийн бейсболын баг “KIA Tigers” клубийн урилгаар БНСУ-д нөхөрсөг тоглолтод оролцож, тэргүүн байрт шалгарлаа. “KIA Tigers” клубийн нөхөрсөг анхны тоглолт 2012 онд манай улсад зохион байгуулагдахад тус улсаас 100 гаруй өсвөрийн тамирчид хүрэлцэн ирж, оролцож байжээ. Харин хоёр дахь удаагийн тэмцээнд Монголын 20 тамирчин, гурван багийн хамт оролцож, өндөр амжилтыг үзүүллээ.
Энэ сарын 11-14-ний өдрүүдэд БНСУ-ын Гуанжү хотод болсон “KIA Tigers” хоёр дахь удаагийн тэмцээнд Монголын өсвөрийн “Киа Тайгерс” баг тус улсын дөрвөн багтаж тоглож, дөрвөн ялалт авснаар тус тэмцээний аваргаар шалгарлаа.

20 сурагч, гурван багшийн хамт явсан Монголын “Киа Тайгерс” баг энэ сарын 11-нд Гёонги аймгийн Янжү хотын, 12-нд Жоннамын Канжин, 13-нд Гуанжу хотын баг болон 14-нд Сөүлийн багтай сүүлийн тоглолтоо хийж, ялалт байгуулжээ. Тэр дундаа тэмцээний зохион байгуулагч Гуанжү хотын багтай өнгөрөгч лхагва гаригт (08.13) тоглосон бөгөөд 14:13-ийн харьцаагаар ялалт байгуулсан. Тэмцээнийг зохион байгуулагч багийн хувьд манай тамирчдаас 2-3 насаар ах байсан ч зочин баг ялалт байгуулж, бейсболын спортоор чамгүй тоглож байгаагаа харуулаад авчээ. Мөн үзэгчдийн зүгээс ч ах нартайгаа тоглож, ялалт байгуулж байгаа Монголын тамирчдын ур чадварыг өндрөөр үнэлсэн байна.
Монголын багийн 12 настай Долгорсүрэнгийн Тэмүүлэнг тус улсын http://sports.chosun.com сайт онцолжээ. Монголын тамирчдын ур чадварыг сайшааж, Тэмүүлэн шиг олон тамирчид байгааг дурдсан байна.  

Долгорсүрэнгийн Тэмүүлэн

Өсвөрийн тамрчин Долгорсүрэнгийн Тэмүүлэн: “Энд тоглох сайхан байна. Солонгос хүүхдүүдтэй тоглож, тэмцээнд оролцоно гэж бодож байгаагүй ээ. Үнэхээр зүүд л юм шиг байна. Цаашид улам хичээж, бейсболын маш сайн тамирчин болохыг хүсэж байна.” гэсэн байна. Мөн түүний тоглолтын үеэр өмссөн малгай ч солонгосчуудыг сонирхлыг татжээ.
Мөн Монголын багийн дасгалжуулагч: “Бейсболын бөмбөг, малгайнаас эхлээд бидэнд тусалж байгаа та бүхэнд талархаж байна. Бейсболын спортоор хичээллэнэ гэдэг бол манай хүүхдүүдийн хувьд зүүд мэт л байсан. Өнөөдөр хүүхдүүд маань улам их итгэлтэй болж, бейсболын спортод маш их дуртай болж байна. Мөн тэдний аав, ээж ч маш ихээр дэмжиж байна. Цаашид бид улам хичээх болно.” гэж тус сайтад ярьжээ.
Монголын өсвөрийн сагсан бөмбөг болон хөлбөмбөгийн тамирчид олон улсын тэмцээнд өндөр амжилтыг гаргаж байгаа энэ үед бейсболын тамирчид ч бидэнд сайхан мэдээг хүргэж, монголд багийн спорт хөгжих боломжтойг дахин нотоллоо.
Сонирхуулахад, “KIA Tigers” клуб 2012 оноос Улаанбаатар хотноо нөхөрсөг тоглолтыг хийж эхэлсэн бөгөөд манай өсвөрийн тамирчид тус улсад хамтарсан бэлтгэлд хамрагдаж байсан байна.

Буудлага спортын насанд хүрэгчдийн улсын аварга шалгаруулах тэмцээн Техник спортын төвд үргэлжилж байна. Тэмцээний дөрөв дэх өдөр буюу өчигдөр 10 метрийн хийн гар бууны дасгалын аваргууд тодорлоо.

Энэ дасгалын эрэгтэйчүүдэд ОУХМ Э.Даваахүү, эмэгтэйчүүдэд спортын мастер Г.Тэгш-Үйлс  аваргалсан байна. Эрэгтэйчүүдийн төрөлд 37 тамирчин өрсөлдсөнөөс спортын мастер Г.Буянбаатар мөнгөн медаль хүртсэн бол спортын мастер О.Төгөлдөр хүрэл медаль зүүжээ. Уг төрлийн тусгай байрт спортын мастер Н.Цэрэнтогтох, тавдугаар байрт спортын мастер Э.Бадамгарав шалгарсан бол М.Сэнгэдорж, спортын мастер Ш.Буянзаяа, спортын мастер Б.Шризандраа нар удаах байруудыг эзэлжээ. 

БНСУ-ын Кёнги мужийн Хвасон хотод наймдугаар сарын 8-11-нд болсон Азийн өсвөрийн хөлбөмбөгчдийн II наадамд Монголын баг тамирчид амжилттай оролцоод ирлээ. Гурван насны ангилалд Азийн 16 улсын 62 баг өрсөлдсөн тус наадамд манайхаас Чингэлтэй дүүргийн Засаг даргын дэргэдэх өсвөрийн шигшээ баг хоёр насны ангилалд өрсөлдөж, гурав, дөрөвдүгээр байр эзэлсэн байна. ССАЖЯ, “Их талын дуулиан” ТББ-ын шугамаар явсан дээрх хүүхдүүдийн 90 орчим хувь нь нийслэлийн 24 дүгээр сургуулийн баг тамирчид гэнэ.

Манай 12 хүртэлх насныхан БНСУ-ын “Gwangmeong West Elemantaryschool” багийг 2:1, Японы “Tamagawa Junior Sports Club”- ийг 3:0-ээр хожиж, Узбекистаны алдарт “Бунёдкор”-т 1:10, БНСУын SFA-д 0:3-аар хожигдсоноор зургаан оноо авч, гуравдугаар байрт оржээ. Харин 15 хүртэлх насны баг тамирчид БНХАУын “Taizhou Team Awesome Sports Club-ийг 1:0-ээр хожиж, БНСУ-ын “Phoenix”-тэй 0:0-ээр тэнцэж, “Daeyong Eagles”-т 0:1, “Gongdo”-д 0:2-оор хожигдож, дөрвөн оноо авснаар дөрөвдүгээр байр эзэлсэн аж.

Азийн өсвөрийн хөлбөмбөгчдийн наадамд оролцох зардлыг хариуцсан Чингэлтэй дүүргийн ЗДТГ, “Хүчит Чулуут” ХХК-ийнханд Монголын багийн ахлагч Ч.Ганхуяг, менежер Б.Батзаяа, дасгалжуулагч Д.Нанжид болон тамирчин хүүхдүүд талархлаа илэрхийлэв.

Залуучуудын “Наньжин-2014” олимпын II наадам БНХАУ-ын Наньжин хотноо өнөөдөр нээлтээ хийнэ.  Наадам энэ сарын 28-ны өдрийг хүртэл үргэлжлэх юм.

Олон улсын олимпийн хорооны 119 дүгээр чуулган Гватемала улсын нийслэл Гватемала хотноо 2007 оны долоодугаар сарын зургаанд болж, тус чуулганаар Олон улсын олимпийн хорооны ерөнхийлөгч асан Жак Рогге залуучуудын олимпийн наадмыг зохион байгуулах шийдвэрийг танилцуулж, санал нэгтэйгээр батлуулжээ.

Манай орноос бокс, жүдо, буудлага, чөлөөт бөх, хүндийн өргөлт, усанд сэлэлт, триатлон, байт харваа, гимнастик, тэквондо, хөнгөн атлетик зэрэг спортын  11 төрөлд  эрх авахаар 2013 оны тавдугаар сараас 2014 оны зургаадугаар сарын 31 хүртэл хугацаанд тивийн болон дэлхийн аваргын тэмцээнд 35 тамирчин оролцсон ажээ.

Харин “Сингапур-2010” залуучуудын анхдугаар Олимпийн наадам нь 2010 оны наймдугаар сарын 14-26-ны өдрүүдэд Сингапур улсад зохиогдож, 205 орны 3517 тамирчид спортын 26 төрөлд өрсөлдсөн байна.

Энэ удаагийн “Наньжин-2014”олимпын наадамд манай улсаас таван тамирчин оролцох бөгөөд Н.Ангирмаа буудлагын спортоор, Ц.Цогтбаатар, Ц.Хулан нар жүдо бөхийн 66 кг болон 52 кг-ийн жинд, Б.Дөлгөөн чөлөөт бөхийн 46 кг-ийн жинд, М.Анхцэцэгхүндийг өргөлтийн спортоор тус тус оролцохоор эх орноосоо мордоод байгаа юм.

Испанийн “Реал Мадрид” багийн довтлогч Криштиан Роналду энэ цаг үеийн хамгийн баян хөлбөмбөгчөөр тодорсон тухай “www.dailymail.co.uk” мэдээллээ. Үүнээс өмнө тус жагсаалтыг Английн хөлбөмбөгийн шигшээ багийн ахлагч асан Дэвид Бекхэм тэргүүлж байсан бол 152 сая еврогийн хөрөнгөтэй Роналду ийнхүү Бекхэмийн дээр бичигдлээ.Ашиг орлогоороо тэргүүлэгч хөлбөмбөгчдийн жагсаалтыг цалин болон бусад арилжаа, сурталчилгааны чиглэлээр байгуулсан гэрээний мөнгөн дүнг тооцоолон гаргадаг уламжлалтай. “Goal.com” сайт өдгөө тоглож буй хөлбөмбөгчдийн олсон бүх орлогыг нэгтгээд дэлхийн хамгийн баян хөлбөмбөгчнөөр Роналдуг нэрлэсэн байна.Роналду 2013 онд Испанийн “Реал Мадрид” багтай 2018 он хүртэл гэрээ байгуулж, 105 сая еврогийн цалин авахаар болсон. Тэрбээр “Armani”, “Herbalife”, “Castrol Edge”, “Jack & Co”, “KFC” зэрэг брэндийг сурталчилж, сард 12 сая еврогийн ашиг олдогоос гадна “CR7” брэндийн хувцас загварын компанийг эзэмшдэг юм.Харин Лионель Месси, Уэйн Руни нар удаалжээ.

БНХАУ-ын Наньжин хотноо маргааш “Наньжин-2014” залуучуудын II наадам болно.

“Нанжин-2014” залуучуудын II наадамд 204 орны 3600 гаруй тамирчин спортын 28 төрөлд 222 багц медалийн төлөө өрсөлдөх билээ.

Залуучуудын олимпод эх орноо төлөөлөн манай таван тамирчин оролцох юм.

Монголоос буудлагын Н.Ангирмаа, жүдогийн Ц.Цогтбаатар, Ц.Хулан, чөлөөтийн Б.Дөлгөөн, хүндийг өргөлтийн М.Анхцэцэг нарын тамирчид дэлхийн үеийнхээ шилдгүүдтэй өрсөлдөнө.

Үүнээс гадна ширээний теннисний тэмцээнийг Монголын шүүгч Э.Мөнхбилэг шүүх юм.

Анхдугаар наадамд манай улсаас спортын долоон төрөлд 11 тамирчин хурд хүчээ сорьсноос Б.Батцэцэг, Г.Эрдэнэболд алтан медаль хүртэж байсан билээ.