Category: нийгэм

-ТҮҮНИЙГ ХУВЬ ХҮМҮҮСТ ЖОНШ ОЛБОРЛОХ ГАЗАР ОЛГОЖ ИХ ХЭМЖЭЭНИЙ МӨНГӨ АВСАН ГЭЖ БУРУУТГАЖ БУЙ ГЭНЭ-

Дундговь аймгийн Засаг даргын орлогч Ш.Энхбатыг  бусдаас авлига авсан хэргээр Авлигатай тэмцэх газрынхан өнгөрсөн сарын сүүлчээр цагдан хорьжээ. Түүнийг бусдаас авлига авсан гэх мэдээллийн мөрөөр шалгаж эрүүгийн хэрэг үүсгэсэн байна. Энэ сарын эхээр харин шүүхийн шийдвэрээр түүний цагдан хорих таслан сэргийлэх арга хэмжээг цуцалжээ. Түүний оронд О.Бат-Эрдэнэ гэдэг хүнийг  Засаг даргын орлогчоор томилсон бололтой. О.Бат-Эрдэнэ энэ албан тушаалд томилогдохоосоо өмнө аймгийн МАН-ын дэд дарга, аймгийн II сургуулийн захирлын албыг хашиж байсан аж. 

“Уг нь Засаг даргын орлог­чийг ИТХ-аар оруулж томилох ёстой. Гэтэл өчигдрийн 11.00 цагийн Засгийн газрын теле хуралд оролцохоор О.Бат-Эрдэнэ орж  ирсэн. Үүнээс нь аймгийн удирдлагууд Ш.Энхбатын оронд О.Бат-Эрдэнэ болсныг мэдсэн. ИТХ-д түүний талаар ямар нэгэн асуудал орж ирэлгүй томилсон байх. Аймгийн Засаг дарга ямар шийдвэр гаргасныг одоохондоо мэдэхгүй” гэж ИТХ-ын зарим төлөөлөгч ярьж байв. Тэдний нэгнээс “Ямар учраас Ш.Энхбатыг ажлаас нь чөлөөлсөн юм бол” гэж асуухад “Бид нарийн ширийн зүйл мэдэхгүй байна. Өнгөрсөн хоёрдугаар сараас хойш түүнтэй холбоотой үнэн худал нь мэдэгдэхгүй мэдээлэл аймгаар яригдах болсон. Хуулийн байгууллага болон аймгийн Засаг даргаас Ш.Энхбаттай холбоотой албан ёсны мэдээлэл ирээгүй учраас хэлж мэдэхгүй байна. Гурван сарын эхээр аймгийн эмнэлэгт хэвтэж, дараа нь “Оргил” сувилалд хэвтэж буй сураг гарсан. Тэгээд л чимээгүй болсон” гэв.  Хуулийн эх сурвалж харин Ш.Энхбатыг хувь хүмүүст жонш олборлох газар олгож  хариуд нь их хэмжээний мөнгө авсан гэж буруутгаж буй тухай хэлэв. 

Ш.Энхбатаас хэргийнх нь талаар тодруулахад “Энэ талаар би мэдээлэл өгөх боломжгүй байна. Прокурорт шилжихээр нь ярья” гэв.

Ш.ЭНХБАТ ГЭЖ ХЭН БЭ?

Ам бүл тав. Эхнэр хүүхдүү¬дийн хамт амьдардаг. Малын их эмч, төрийн удирдлагын менежер мэргэжилтэй. 1972-1982 онд дунд сургууль, 1982-1984 онд ЗХУ /хуучнаар/ Ойн ТМС , 1987-1995 онд ХААИС, 2003-2004 Удирдлагын академи төгсчээ. 1984-1987 онд Дундговь аймгийн Ойн аж ахуйд техникчээр ажлын гараагаа эхэлж байсан байна. Дараа нь 1995-1998 онд аймгийн ХХААГ-т мал эмнэлэгт ариун цэврийн их эмч, 1998-2001 онд аймгийн ХХААГ-ын дарга, 2001-2006 онд аймгийн Ардчилсан намын нарийн бичгийн дарга, -2006-2008 онд “Наранцацралт” сангийн Дундговь аймаг дахь төлөөлөгчийн газрын захирал, 2008-2013 онд Өлзийт сумын Засаг дарга,  2013 оноос Дундговь аймгийн Засаг даргын орлогчоор ажиллаж байв.  2012 оноос аймгийн ИТХ-ын төлөөлөгч, 2013 онд “Нарны хүлэг” уяачдын холбооны гүйцэтгэх захирлаар сонгогдсон байна. 2006 онд МЗХ-ны “Тэргүүний залуу” алтан медаль”, 2007 онд МоАХ-ны дээд шагнал “Эрх чөлөөний одон”, 2011 онд “Алтан гадас” одон, 2012 онд МоАХ-ны “Тусгаар тогтнол” одон зэрэг шагналаар шагнагдаж байжээ.

 Г.ЯЛГУУН

Улаанбаатар хотын замын хөдөлгөөний ачааллыг бууруулах, нийтийн тээврийн үйлчилгээг сайжруулах зорилгоор зарим автобусны буудлыг шилжүүлэхээр “Улаанбаатар хотын авто замын хэт  ачааллыг зохицуулах арга хэмжээг зохион байгуулах, нэгдсэн удирдлагаар хангах ажлын хэсэг”-ээс шийдвэрлэсэн.

Энхтайваны өргөн чөлөө, Баруун дөрвөн замаас Зүүн дөрвөн замын хооронд 18-22 чиглэлийн 260-300 их багтаамжийн автобус зорчдог гэж нийслэлийн Тээврийн газраас мэдээллээ. Зарим автобусны маршрут давхардсанаас хотын төвийн замын хөдөлгөөний ачаалал нэмэгдэж, автобусууд буудал руу гүйцэт оролгүй зорчигчоо буулгах зэрэг зөрчил байгаа учраас  зогсоолуудыг ээлжлэн зогсоох маягаар зохион байгуулахаар болж эхний ээлжинд 11 зогсоолыг шилжүүлэхээр болсон юм.

Энэ ажлын хүрээнд  Хөдөө аж ахуйн яамны урд тал, Max mall Их дэлгүүрийн баруун тал, Баруун дөрвөн зам, Улсын Их дэлгүүрийн баруун урд /замын урд талд/ зэрэг байршлуудад автобусны зогсоол хийхээр Нийтийн үйлчилгээний “Улаанбаатар нэгтгэл” ОНӨААТҮГ ажлаа эхлүүлээд байна.  Ирэх долоо хоногийн Даваа гарагт эдгээр зогсоолуудын ажлыг бүрэн дуусгахаар төлөвлөж байна гэж Нийслэлийн Хэвлэл мэдээлэл, олон нийттэй харилцах хэлтсээс мэдээллээ. 

Хан-Уул дүүргийн  XII  хорооны нутаг дэвсгэр биокомбинатын ойролцоо “Био агро” гэх мод үржүүлгийн газарт “Цэцэрлэгжилт” компанийн ажилтан хүний амь хөнөөж, арван оюутныг барьцаалсан хэрэг өчигдөр үүрээр гарчээ. Энэ талаар албаны эх сурвалжаас авсан мэдээллээр “Цэцэрлэгжилт” компанийн ажилтнууд мод үржүүлгийн газарт суулгац тарьж байсан юм байна.  Хотын төвөөс зайдуу болохоор тэндээ байрлан ажиллаж байжээ. Хэрэг гарахын урьд  өдөр буюу энэ сарын 6-нд  ажлаа тарсны дараа тус компанийн ажилтнууд мөнгөө нийлүүлж архи, пиво бусад зүйлийг биокомбинатын хүнсний дэлгүүрээс  худалдан авч уусан байна. Тэд шөнөжин архидаж байгаад үүрээр  хоорондоо маргалдаж улмаар зодоон цохиондоо тулсан гэнэ. Ийн хоорондоо зодолдож байгаад Дорнод аймгийн харьяат 1989 онд төрсөн Б гэх 25  настай залуу хамт ажиллаж байсан  Г-ыг зодож аминд нь хүрсэн гэнэ. Мөн Ж гэх залууг  зодож хүнд гэмтжээ. Тэрбээр хүний амь нас хөнөөгөөд зогсохгүй тус компанид гэрээгээр ажиллахаар ирсэн Мэргэжлийн сургалт үйлдвэрлэлийн төвийн арван оюутныг барьцаалж, “Та нарыг бүгдийг чинь ална” хэмээн айлган сүрдүүлж, хутга тулгасан аж. 

Мэдээлэл шуурхай удирдлагын төвийн 102 утсанд 03:00 цагийн орчимд нэгэн иргэнээс “Цэцэрлэгжилт” компанийн ажилтнууд хоорондоо зодолдоод байна. Хурдан ирж салгахгүй бол нэгнийхээ аминд хүрч байх шиг байна” гэсэн мэдээлэл  ирсэн байна.  Дуудлагын дагуу “Эрхэс” 102 чиглэлийн хөдөлгөөнт эргүүлийн ахлах дэслэгч  Н.Дашцэрэнгээр ахлуулсан баг хэргийн газар дээр очсон байна. Цагдаа нарыг хэргийн газарт очиход Б гэх залуу  дадлага хийж байсан арван оюутныг жагсаагаад  зогсоочихсон “Хөдлөх юм бол хутгална. Цагдаа нар эндээс холд. Хэрэв холдохгүй гэвэл  энд байгаа оюутнуудыг ална” гэж сүрдүүлсэн байна.  Бүр зарим оюутны хоолойд хутга тулгасан гэнэ.  Барьцаалагдсан МСҮТ-ийн арван оюутны гурав нь эрэгтэй, долоо нь эмэгтэй, 16-18 насных байжээ. 

Цагдаа нар шуурхай арга хэмжээ авч барьцаалагч этгээдтэй ярилцлага хийсэн байна. 20 гаруй минут ярилцлага хийж оюутнуудыг суллаж явуулахаар  тохирч, шуурхай байдлаар хэлэлцээр хийсэн гэнэ. Ингэж барьцаалагдсан оюутнуудыг суллаж  гэмт этгээдийг хүний амь дахин хөнөөхөөс өмнө баривчилжээ. Ингээд хэргийн газарт үзлэг хийх үед нэг иргэн бусдад зодуулсан байдалтайгаар амиа алдсан байжээ. Мөн “Цэцэрлэгжилт” компанийн ажилтан хүнд бэртэж ухаан алдсан байдалтайгаар олдсон байна. Бусдад зодуулан ухаан алдсан иргэнд яаралтай эмнэлгийн тусламж үзүүлжээ. Тэрбээр ГССҮТ-д хэвтэн эмчлүүлж байна. Биеийн байдал тааруу байгаа гэдгийг эх сурвалж онцолж байв. 

Нэгнийгээ хөнөөж, оюутнуудыг барьцаалсан хэргийг Хан-Уул дүүргийн цагдаагийн II хэлтсийн мөрдөн байцаах тасгийнхан шалгаж байна. Мөрдөн байцаалт эхэлж байгаа бөгөөд барьцаалагдсан оюутнуудаас гэрчийн мэдүүлэг авч эхэлжээ. Мөн “Цэцэрлэгжилт” компанийн ажилтнуудаас ямар учраас хоорондоо маргалдаж, зодолдох болсныг хэн нь Г-г зодож аминд нь хүрсэн болохыг тогтоохоор ажиллаж байна. “Цэцэрлэгжилт” компанийн ажилтнуудаас авсан анхны мэдүүлгээр “Цэцэрлэгжүүлэлтийн мэргэжилтэй  Б гэх залуу   Г, Ж нарыг зодсон” гэж мэдүүлээд байгаа юм байна.   

Бусдын амийг хөнөөж, оюутнуудыг барьцаалсан хэрэгт сэжиглэгдэн шалгагдаж байгаа Б “Хэргийн талаар огт санахгүй байна. Олон шил архи уусан болохоор юу ч санахгүй байна” гэхээс өөр зүйл ярихгүй байгаа гэв. Түүнийг ШШГЕГ-ын харьяа  цагдан хорих  төвд саатуулжээ.

Э.ХҮРЭЛ

Ойрын өдрүүдэд манай орны ихэнх нутгаар нойтон цас, бороо орж байгаа. Үүнээс үүдэн  манай орны томоохон гол мөрөн үерлээд байгааг анхааруулж байна. Дэлгэрмөрөн-Мөрөн, Эг, Хатгал, Идэр, Зүрх, Чулуут, Хойдтамир, Ихтамир, Хүдэр, Хараа, Баруунхараа,  Туул, Алтанбулаг, Сэлэнгэ, Тосонцэнгэл, Ховд, Мянгад, Сагсай, Буянт, Завхан, Дөрвөлжин, Түй, Богд, Хархираа, зэрэг манай орны томоохон гол мөрний усны түвшин 5-15 см нэмэгджээ. Иймд иргэдийг  улсын чанартай гүүр гармаар автомашинуудыг явахыг Онцгой байдлын ерөнхий  газраас анхааруулж байна. Мөн ихэнх зам, гарам  шавар намаг ихтэй, шар усны үертэй байгаа гэнэ. Архангай аймгийн Суман голын модон гүүр эвдэрсэн байгаа аж.  

Хүүхдийг ивээх сангийн олон улсын эвслээс гаргасан “Эхчүүдийн 2014 оны
индекс”-ээр Монгол Улс  дэлхийн 178
улсаас 88-д жагсаж Вьетнамыг ардаа орхин гурван шат ахисан үзүүлэлттэй гарчээ. Манай
хөрш болох БНХАУ 61-д бичигддэг бол ОХУ 62-т бичигддэг юм байна. Тус индекс нь
Хүүхдийг ивээх сангаас жил бүр хэвлэн нийтэлдэг “Дэлхийн эхчүүдийн байдал”
тайлангийн нэг хэсэг бөгөөд 15 дах удаагийн энэ тайланд дэлхийн 178 улс орныг
эх болон хүүхдийн аж байдал сайжирсан эсхүл буурсан үзүүлэлтээр харьцуулан
эрэмбэлсэн аж. Жагсаалтыг Финланд улс хоёр дах жилдээ тэргүүлж Сомали улс
жагсаалтын төгсгөлд бичигджээ. Хүндрэл бэрхшээлтэй тулгарч буй улс орнуудад эх
болон хүүхдэд чиглэсэн үйлчилгээг сайжруулснаар эх, хүүхдийн эндэгдлийг эрс
бууруулж болдогийг тус тайлангаас харж болох аж.  Монгол Улсад сүүлийн 15 жил эхийн эндэгдэл 30
хувиар, хүүхдийн эндэгдэл 50-иас илүү хувиар буурч, нэг хүнд ноогдох үндэсний нийт орлого бараг долоо
дахин өссөний дээр парламентад эзлэх эмэгтэйчүүдийн суудлын тоо хоёр дахин
нэмэгдсэн байна. Манай улс 88-д бичигдсэн ч 36 хүүхдийн нэг нь тав хүртэлх
насандаа эндэж буй үзүүлэлт нь урьдчилан сэргийлж болох шалтгаанаар гарч буй
эх, хүүхдийн эндэгдлийг эцэслэхэд манай улс илүүтэй хүчин чармайлт гаргах
хэрэгтэйг харуулж байгаа аж.

Энэ жилийн “Дэлхийн эхчүүдийн байдал” тайлан хүмүүнлэгийн хямралд буй улс
орнуудын эхчүүдэд илүүтэй анхаарсан байна. Тэдний нөхцөл байдал, хэрэгцээг
ойлгох, улмаар хариу үйлдэл үзүүлэх асуудалд төвлөрч байжээ. Хямралд өртсөн улс
орны эхчүүдийн хувьд хүүхдээ эсэн мэнд өсгөхөд нийгмийн суурь үйлчилгээнд
хамрагдах эдийн засгийн болон хувийн чадамж хомс байх, ядуурал, хоол тэжээлийн
дутагдал, бэлгийн хүчирхийлэл, төлөвлөөгүй жирэмслэлт, амаржих үедээ эмнэлгийн
тусламж авч чадахгүй байх зэрэг эмзэг байдлаас үүдсэн олон төрлийн бэрхшээлтэй
тулгарч байна. Уур амьсгалын өөрчлөлтөөс улбаалсан зудын эрсдэл сүүлийн жилүүдэд
Монгол оронд эмзэг тусч байгаа аж. Зудад нэрвэгдэж, амьжиргааны малаа алдсан
өрхүүд эдийн засгийн хямралд өртөж байгаа гэнэ. Энэ нь хоол тэжээлийн дутагдал,
хүүхдүүдийн сургууль завсардалт, эрүүл мэндийн үйлчилгээний зардал ихсэхэд
хүргэж байгаа юм байна.

Хувьцаа эзэмшигч, хөрөнгө
оруулагчдын эрхийг хамгаалах төвөөс иргэдэд “Эрдэнэс таван
толгой” компани 1072 ширхэг хувьцаагаа бэлэн мөнгөөр
авах бус хувьцаа хэлбэрээр авах нь хамгийн зөв сонголт” хэмээн зөвлөлөө. Учир нь одоогоос 20
орчим жилийн өмнө Хөрөнгө оруулалтын эрхийн бичиг гэсэн долоон мянган төгрөгийн
үнэтэй цэнхэр, ягаан тасалбар авсан 447 мянган иргэдийн зарим нь өнөөдөр ашгаа
хүртээд сайхан амьдарч байгааг дурдав. Тэд зөв сонголт хийснийхээ дүнд том
компанийн нөлөө бүхий хувьцаа эзэмшигч болж, ногдол ашиг авч байгаа. Мал авсан
иргэд мянгат малчин болчихсон, тоног төхөөрөмж авсан нэг нь хөл дээрээ зогссон
өөрийн гэсэн үйдвэртэй болжээ. Танд уг тасалбар байгаа бол одоо ч ашиглаж болох
аж. Эмээ, өвөөгийн чинь нэр дээр байдаг ч нас барсан бол шилжүүлэн авах
боломжтой гэнэ. Энэ үйл явдлыг давтсан явдал болсон нь иргэн бүрт “Эрдэнэс
таван толгой” компанийн 1072 ширхэг хувьцааг тараасан хэрэг юм байна. Учир нь
“Эрдэнэс таван толгой” хувьцаат компани 320 жилийн настай, өгөөжөө өгөх
томоохон орд юм. 1072 ширхэг хувьцаагаа бэлэн мөнгөөр сольсон оюутнууд
сургалтын төлбөр хэлбэрээр хоёр жил дараалан авсан бол өндөр настай,
хөгжлийн бэрхшээлтэй иргэд нэг сая орчим төгрөг хуваан авсан. Харин 1072 ширхэг
хувьцаа авахгүй нэг сая төгрөгөө бэлнээр авна гэж мэдүүлсэн иргэд одоо хэрнэ
мөнгөө аваагүй байгаа бол хувьцаа авна гэсэн иргэдийн 770 мянга нь нэрийн данс
нээлгэж, 330 мянга нь дансандаа хувьцаагаа шилжүүлжээ. Хэрэв хувьцаа
биш мөнгө авна гэсэн иргэд бодлоо өөрчилсөн бол Хувьцаа эзэмшигч,
хөрөнгө оруулагчдын эрхийг хамгаалах төвд өргөдлөө өгөх боломжтой юм байна. Тус газар таны өргөдлийг зохих газарт нь хүргэснээр та 1072
ширхэг хувьцаагаа авах боломжтой болох аж.

Нийслэлийн цэрэг татлагын товчооны
ээлжит хурал өчигдөр боллоо. Нийслэлийн Засаг даргын “2014 оны нэгдүгээр ээлжийн цэрэг
халах, татах ажлыг зохион байгуулах тухай” А/259 дугаар захирамжийн дагуу
нийслэлийн хэмжээнд цэргийн жинхэнэ алба хаах хугацаа дуусч бэлтгэлээр
халагдсан байлдагч, түрүүчийг хүлээн авах ажлыг тавдугаар сарын 01-03-ны
өдрүүдэд зохион байгуулсан. Харин цэргийн жинхэнэ албанд иргэдийг татах, гэрээт
цэрэгт элсүүлэх ажлыг тавдугаар сарын 09-11-ний өдрүүдэд зохион байгуулах аж. Ээлжит
цэрэг татлагын ажлыг эрхлэн явуулах “Цэрэг татлагын товчоо”-г дүүргүүдийн Засаг
даргын Тамгын газрын дарга удирдаж байгаа гэнэ. Өнөөдрийн байдлаар цэрэг
татлагын ажлыг явуулах бэлтгэл хангагдсан бөгөөд хуваарийн дагуу тавдугаар
сарын 08-нд дүүргүүдийн цэрэг татлага явуулах байр бэлэн болох юм байна. Зарлан
дуудах хуудас тараах ажил 93.1 хувьтай байгаа аж. Цэргийн албан тэнцүүлэх
зааврын дагуу шалгуур хангасан иргэдийг тавдугаар 09-ний 19 цагт Ховд,
Өмнөговь, Баянхонгор, Өвөрхангай аймгийн цэргийн ангируу, 10-нд Орхон,
Зүүнбаяны цэргийн анги руу тээвэрлэх юм байна.

ШШГЕГ-ын харьяа Мэргэжлийн
сургалт үйлдвэрлэлийн төвийн 2015 оны хичээл сургалтын хөтөлбөрийн дагуу
хүмүүжигчдэд мэргэжлийн зэрэг олгох суурин сургалтын хоёрдугаар ээлж 5 дугаар
сарын 07-ны өдрөөс эхэллээ.

Энэ удаагийн сургалтад Барилгын засал
чимэглэлч, Барилгын өрөг угсрагч, Сантехникч, Бетон-арматурчин гэсэн 4 мэргэжлээр
нийт 80 хүмүүжигч суралцах юм.

Суралцагсад эхний 2 сар
танхимын онолын сургалтад хамрагдаад 3 сарын хугацаанд үйлдвэрлэлийн дадлагад
шилжинэ. 

Аймгийн
удирдлагуудтай сар бүр хийдэг цахим хурал өнөөдөр боллоо. Өнгөрсөн долоо хоногт
болсон Засгийн газрын хуралдаанаар Дорнод аймгийн Дашбалбар, Төв аймгийн
Жаргалант, Архангайн Эрдэнэмандал, Ховдын Үенч сумыг улсын тэргүүний сумдаар
шалгаруулсан гэж Монгол Улсын сайд, Засгийн газрын Хэрэг эрхлэх газрын дарга
Ч.Сайханбилэг хэллээ.

Дорноговь
аймгийн Сайншанд, Замын-Үүд сумын дэд бүтцийн барилгын ажлын хэрэгжилт сайн
байна. Энэ төсөл хэрэгжсэнээр тус аймгийн 60 мянган хүн амын 50 хувь нь оршин
суудаг энэ хоёр сумын цэвэр, бохир ус, дулааны шугам сүлжээ бүрэн шинэчлэгдэж,
иргэдийн ая тухай амьдрах боломж бүрдэнэ. Тус аймаг архи үйлдвэрлэдэггүй аймаг
болсноо зарласан.

Орхон аймагт
“Өлзий хутгийн наран” ХХК асфальт, бетоны үйлдвэр байгуулж, үйл ажиллагаагаа
эхлүүллээ.

Өвөрхангайд
бетон зуурмагийн  “Зул баян ундрах”
үйлдвэр байгуулагдаж, 20 гаруй хүн ажилтай боллоо. Энэчлэн өнгөрсөн сард
аймгуудад зохион байгуулсан сайн ажил олон байна гэж Засгийн газрын ХЭГ-ын
дарга Ч.Сайханбилэг онцоллоо.

Энэ онд 6
аймгийн төвийг Улаанбаатар хоттой хатуу хучилттай автозамаар холбоно, 9 аймагт
дулааны станц барина. Мөн аймгуудад 1000 айлын орон сууц барих ажлыг эхлүүлсэн
зэрэг аймаг бүрийг хот болгох Засгийн газрын зорилтын хүрээнд олон ажил
хийгдэнэ. Эдгээр бүтээн байгуулалтын ажилд 
аймгийн удирдлагууд онцгой анхаарал хандуулж, хяналт тавьж, ажлын явцын
талаар тогтмол мэдээлж байхыг үүрэг болголоо.

11 аймгийн төвд иж бүрэн Оношилгооны төв байгуулсан. Энэ
төвийн үйл ажиллагааг жигдрүүлэх, эмч мэргэжилтнийг сургаж, чадавхижуулах,
иргэдэд хүрэх эрүүл мэндийн үйлчилгээг чанартай, хүртээмжтэй байлгахад анхаарч
ажиллах ёстой гэж тэрээр хэллээ.

Хуралд оролцсон Барилга, хот байгуулалтын сайд
Ц.Баярсайхан,

-Өнгөрсөн онд улсын хэмжээнд гурван суманд “Шинэ сум”
төсөл хэрэгжсэн, энэ онд 16 суманд Засгийн газрын энэ төсөл хэрэгжинэ, мөн НҮБ,
Азийн хөгжлийн банкнаас 12 суманд шинэчлэлийн хөтөлбөр хэрэгжүүлнэ. Эдгээр
сумдын хөгжлийн ерөнхий төлөвлөгөө гарсан гэлээ. Мөн тэрээр “Аймгийн төвүүдэд
1000 айлын орон сууц барих  ажил эхэлсэн.
Энэ хүрээнд аймгийн төвд баригдсан орон сууц болон амины орон сууц худалдаж
авсан иргэдийг 8 хувь, үүнээс бага хүүтэй зээлд хамруулахаар судалгаа ид
хийгдэж байна” гэлээ.

Хурлын төгсгөлд Сангийн яам, Барилга, хот байгуулалт,
Эдийн засгийн хөгжил, Уул уурхай, Боловсрол шинжлэх ухаан, Эрүүл мэнд зэрэг
яам, агентлагийн  удирдлагууд аймгийн
Засаг дарга нарын асуултад хариуллаа гэж Засгийн газрын Хэвлэл мэдээлэл, олон
нийттэй харилцах албанаас мэдээллээ.

Henna Heals /Хенна Хийлс/ хэмээх
байгууллагынхан хорт хавдраар өвчлөн зовж буй хүмүүст зориулан шинэлэг санааг
сэдээг, хэрэгжүүлж байна. Ийм өвчтэй хүмүүст хийдэг химийн эмчилгээний
нөлөөгөөр үс нь гуужиж унадаг бөгөөд өвчтөнүүдийн сэтгэл санаанд хүндээр
тусдаг. Тэгвэл дээрхи шинэ санаа нь эл асуудлыг бүр мөсөн шийдэж, нэг ёсны шинэ
“моод” дэлгэрүүлж буй юм.  Хенна
Хийлсийнхний сэдсэн энэ санаа бол үс нь унаж, халцарсан өвчтнүүдийн толгойд
тусгай хена будаг ашиглан гоёлын шивээс хийх юм. Хена будаг нь нэг удаа түрхсэн
байхад удаан хугацаанд арилдаггүй ч энгийн шивээс шиг арьсанд гүн
суудаггүйгээрээ давуу талтай. Хена шивээс нь 2-3 сарын хугацаанд арилдаггүй ч
хиймэл шивээс шиг ганц угаалтаар л арилгах боломжтой.

Хенна
Хийлсийнхний тайлбарлаж буйгаар уг будгийг 100 хувь байгалийн гаралтай
бүтээгдэхүүнээр найруулан хийдэг тул ямар нэгэн харш нөлөөгүй гэнэ. Өвчтөн
Хенна Хийлсийн мэргэжлийн шивээсчинд захиалга өгч өөрийн хүссэн загварын
шивээсийг хийлгэх боломжтой юм. Өвчтнүүд гэсэн эл үйлчилгээнд сэтгэл хангалуун байгаа
бөгөөд шинэ “моод”-доо “Хена титэм” хэмээх нэр өгөөд амжжээ.