Зорчих хэсгийн нэгдүгээр эгнээ болон автобусны буудал дээр түр болон удаан хугацаагаар зогсож, дүрэм зөрчсөн жолооч нарыг автобусанд байршуулсан телекамераар баримтжуулан, Зөрчлийн тухай хуулиар хариуцлага тооцож байгааг Нийслэлийн Засаг даргын тамгын газраас мэдээллээ.
Өнөөдрийн байдлаар нийтийн тээврийн 1123 автобус нийслэлийн иргэдэд үйлчилж байна.
Нийслэлийн Засаг даргын Зөвлөлөөс барилгын гадна фасадыг манай орны эрс тэс цаг уурт тохируулж стандартыг үнэлж, дүгнэх үүрэг өгсөн. Үүний дагуу “Барилгын гадна фасадын материалын чанар, стандарт, өнөөгийн байдал, цаашдын чиг хандлага” сэдэвт хэлэлцүүлгийг нийслэлийн Хяналт шалгалтын газар, нийслэлийн Онцгой байдлын газар, Хот байгуулалт, барилга, орон сууцжуулалтын яам хамтран өнөөдөр зохион байгуулж байна. Хэлэлцүүлгээр Монгол Улс болон олон улсад барилгын фасад болон дулаалгын материалын хэрэглээ өнөөгийн байдлын судалгааг гаргаж, танилцуулсан юм.
Барилгын гадна фасадын материалын чанар, стандарт, өнөөгийн байдлын талаар НХШГ-ын Барилгын техникийн хяналтын улсын ахлах байцаагч С.Мөнхцэлмэгээс тодрууллаа.
Тэрбээр “Бид барилгын гадна фасад болон дулаан тусгаарлах материал үйлдвэрлэж байгаа аж ахуйн нэгжүүдэд хяналт шалгалт хийсэн. Хяналт шалгалтын үр дүнд суурилан уг хэлэлцүүлгийг зохион байгуулж байгаа юм. Тодруулбал, нийслэлийн есөн дүүргийн хэмжээнд барилгын гадна фасадын дулаалгын материал үйлдвэрлэдэг 48 аж ахуйн нэгжид шалгалт хийсэн. Үүнээс хөөсөн полистрол хавтан үйлдвэрлэдэг аж ахуйн нэгж олонх байдаг. Хяналт шалгалтаар аж ахуйн нэгжүүд барилгын материал үйлдвэрлэх тусгай зөвшөөрөл, тохирлын гэрчилгээгүйгээр үйл ажиллагаа явуулж байсан. Холбогдох тоног төхөөрөмжөөр баталгаажаагүй, үйлдвэрлэсэн бүтээгдэхүүнээ лабораторид шинжлүүлээгүй зэрэг нийтлэг зөрчил, дутагдал илэрсэн. Түүнчлэн манай улсад барилгын гадна фасад болон дулаан тусгаарлах материалд хэрэглэгдэж байгаа тухайлсан норм, дүрэм байдаггүй. Тийм учраас тухайлсан норм, дүрмийн саналыг хэлэлцүүлгээс гаргаж, холбогдох газруудад хүргүүлэхийг зорьж байна” гэв.
Гэсэн ч манай оронд ихэвчлэн хэрэглэдэг барилгын гадна фасадын дулаалгын материал болох хөөсөн полистрол хавтангийн дундаж нягт, хэрэглээ болон барилга угсралтад ашиглаж буй технологийн хувьд олон улсын стандартад нийцдэг байна.
Мөн хөөсөн полистрол хавтангийн түүхий эд болох стирол үрлийг импортоор авч, 100 хувь дотоодын үйлдвэрт боловсруулж үйлдвэрлэдэг.
Уур амьсгалын өөрчлөлтийн нөлөөллийг бууруулах, ой, усны нөөцийг хамгаалж нэмэгдүүлэх, экологийн тэнцвэрт байдлыг хангах, мод тарих соёлыг түгээн дэлгэрүүлэх, олон нийтэд сурталчлан таниулах зорилгоор 2024 оны намрын мод тарих арга хэмжээг нийслэлийн Байгаль орчны газраас “Ногоон хот – Иргэний оролцоо” уриатайгаар аравдугаар сарын 4-26-ны хооронд нийслэлийн 9 дүүргийн хэмжээнд зохион байгууллаа.
2024 оны намрын байдлаар 23084 иргэн, 1052 аж ахуйн нэгж байгууллага нийт 559802 мод, бут, сөөгийг тарьж, агаар орчны бохирдлыг бууруулахад хувь нэмэр оруулаад байна. Гэр хорооллын 15974 айл өрх хашаандаа 44425 ширхэг мод тарьжээ. Мөн нийслэлд нийтийн эзэмшлийн 67084 ам.метр талбайд зүлэгжүүлэлт, 19851 ам.метр талбайд цэцгийн мандал байгуулжээ.
Түүнчлэн модлог ургамлын тарьц, суулгацын үзэсгэлэн худалдааг нийслэлд 5 байршилд зохион байгуулж, мод тарих аж ахуйн нэгж, байгууллага, иргэдийг стандартын тарьц, суулгацаар хангаж, технологийн заавар, зөвлөмж өгөх, тарьц, суулгацын гарал үүсэлд хяналт тавих ажлуудыг хэрэгжүүлээд байна.
Монгол Улсын Ерөнхийлөгчийн 2021 оны 58 дугаар зарлиг “Тэрбум мод” үндэсний хөдөлгөөний хүрээнд 2021-2024 онуудад нийт 3.369.619 ширхэг мод бут таригдаж, 95 хувийн амьдралтай байгаа билээ.
2024 оны намрын байдлаар дараах байршлуудад мод тарьжээ.
– Баянзүрх дүүргийн 28 дугаар хороо “IGM” цэцэрлэгт хүрээлэн – 8267
– Хан-Уул дүүрэг, 14 дүгээр хороо, Түргэний гол дагуух “Ногоон хэрэм” зурвас – 10570
– Налайх дүүрэг, 7 дугаар хороо, “Шинэ Налайх цэцэрлэгт хүрээлэн”- 1671
– Баянгол дүүрэг, 20 дугаар хороо, “Баянгол цэцэрлэгт хүрээлэн”- 1292
– Сонгинохайрхан дүүрэг, 21 дүгээр хороо, “Инчон мөрөөдлийн төгөл”- 13846
– Чингэлтэй дүүрэг, 19 дүгээр хороо, дээд салхит “Хайрхан хөгжлийн төв”- 256
-Хан-Уул дүүрэг, 14 дүгээр хороо, Айцын ам – 1680
-Баянзүрх дүүрэг, 20 хороо, Гачууртын зам-1, “УБЗАА-Мод үржүүлгийн газар”- 30460
Сэтгэцийн эрүүл мэнд гэдэг нь ДЭМБ-ын тодорхойлсноор энэ нь тухайн хүн өөрийн чадавхыг ухамсарлаж, амьдралын хэвийн стрессийг даван туулж, үр бүтээлтэй ажиллаж, нийгэмдээ хувь нэмрээ оруулах боломжтой сайн сайхан байдлын төлөв юм. Энгийнээр хэлэхэд аливаа бэрхшээлийг үл харгалзан өөрийгөө хянаж, амьдралаас таашаал авах чадвар. Мөн сэтгэцийн эрүүл мэнд маш эмзэг.
Танд асуудал байгаа гэдгийг яаж ойлгох вэ
Гол шинж тэмдэг нь байнгын сэтгэл ханамжгүй байдал юм. Хэрэв аз жаргалгүй, сэтгэлээр унасан, ганцаардмал, хайхрамжгүй мэдрэмж төрдөг бол энэ нөхцөл байдлыг яг юу үүсгэдэг талаар бодох хэрэгтэй. Сэтгэл санааны асуудлаа үл тоомсорлох хандлагатай хүмүүс хэн нэгэнтэй дотно харилцаа тогтоох боломжгүй, ижил таагүй нөхцөл байдалд дахин дахин орсоор байх болно. Энэ бүхэн нь мэдрэлийн системд шаардлагагүй дарамт үүсгэж, асар их энерги зарцуулж, архаг стресст хүргэдэг. Хүмүүс сэтгэцийн эрүүл мэндтэй холбоотой асуудлуудыг үл тоомсорлохыг хичээдэг ч олон жилийн турш сэтгэлзүйн таагүй байдлыг тэсвэрлэх, сөрөг сэтгэл хөдлөлөө дарах оролдлого нь утга учиргүй мэдрэмж юм.
Стрессийг сэтгэлийн ядралаас хэрхэн ялгах вэ
Эдгээр ойлголтыг ихэвчлэн андуурдаг. Харамсалтай нь стресс нь орчин үеийн хүний амьдралын салшгүй хэсэг болсон. Үндсэндээ бид бие махбодид гормон, адреналин, кортизол, эндорфин, допаминыг үүсгэдэг аливаа гаднын өдөөлтөд үзүүлэх хариу урвалын тухай ярьж байна. Үүний үр дүнд анхаарал, хариу үйлдэл илүү хурц болдог ч сэтгэлийн түгшүүрийн эх үүсвэр нь хамааралгүй болсон үед дааврын түвшин хэвийн хэмжээндээ ордог. Тиймээс стрессийн төлөв байдал нь бие махбодын хүндрэлд үзүүлэх эрүүл хариу үйлдэл боловч архаг үе шатанд шилжиж, асуудлыг шийдэж чадахгүй, байнгын хурцадмал байдалд орсон үед бид ядрах асуудлын талаар ярьж болно. Ийм нөхцөлд ядаргаа үүсдэг. Мэдээж ядрах нь нэг өдрийн дотор тохиолддоггүй. Нэгдүгээрт, түүний боломжит хохирогч нь чадварынхаа хязгаар хүртэл ажиллаж эхэлдэг. Жишээлбэл, удирдлагад сэтгэгдэл төрүүлэхийг хичээдэг эсвэл амьдралын тодорхой нөхцөл байдлын нөлөөнд автдаг. Ийм их хүсэл эрмэлзэл нь карьерын шатыг ахихад үргэлж тусалдаг эсэх нь маргаантай асуудал боловч энэ нь ядрах найдвартай зам гэдэг нь өнөөдөр бараг тодорхой байна.
Асуудлыг хаанаас засаж эхлэх вэ
Юуны өмнө та байнгын стрессийн эх үүсвэрийг олж, тэдгээрийг арилгахыг хичээх хэрэгтэй. Та энэ байдалд хэр гүн гүнзгий орсноос хамааран үүнийг бие даан эсвэл мэргэжилтний туслалцаатайгаар хийж болно. Жишээлбэл, стресс нь их хэмжээний ажлын урсгалаас үүдэлтэй бол ачааллыг хэрхэн бууруулах талаар удирдлагатай ярилцах нь зүйтэй. Ерөнхийдөө шинжээчид сэтгэцийн хэт их дарамтыг даван туулах янз бүрийн арга замыг санал болгодог. Тиймээс Оксфордын мэдрэл судлаач Эмили Холмс хэрвээ та сэтгэл хөдлөлийн үйл явдлаас хойш хэдхэн минутын дараа Тетрис тогловол түүнийг даван туулахад амар байх болно гэж үзэж байна. 2000 британичуудын дунд явуулсан судалгаагаар тэдний гуравны хоёр нь найз нөхөдтэйгээ харилцах нь сэтгэцийн эрүүл мэндээ сайжруулах үр дүнтэй арга гэдэгт итгэдэг байна. Судалгаанд оролцогчдын үзэж буйгаар иймэрхүү 25 минутын харилцан үйлчлэл нь биеийн тамирын зааланд дасгал хийх эсвэл халуун усанд орохтой адил ашиг тусыг өгдөг. Талаас илүү хувь нь (51 хувь) хайртай хүмүүстэйгээ аяга кофе ууж, уулзах дуртай гэж тэмдэглэсэн бол бараг ижил тооны хүмүүс (55 хувь) архигүй найрсаг уулзалт хийхийг илүүд үздэг гэж хариулжээ.
Та сэтгэцийн эрүүл мэнддээ өөр яаж анхаарах ёстой вэ
Их хэмжээний мэдээлэл нь хүнийг түгшээж, анхаарлаа төвлөрүүлэхэд хүндрэл учруулдаг тул сэтгэл судлаачид нийгмийн сүлжээнд өдөрт хоёроос илүү цаг зарцуулахгүй байхыг зөвлөж байна. Мөн сэтгэцийн стрессийн талаар бүү мартаарай. Оньсого тоглоом, гадаад хэл сурах, ном унших нь тохиромжтой. Ажил, амралтын тэнцвэрийг хадгалахын зэрэгцээ хэрэв та суурин ажилтай бол амралтын өдрүүд, амралтаараа гадаа илүү их цагийг өнгөрөөх хэрэгтэй гэдгийг анхаарах хэрэгтэй.Спортыг үл тоомсорлож болохгүй, учир нь тогтмол дасгал хийх нь зөвхөн сайхан харагдахад тусалдаг төдийгүй сэтгэл санааг сайжруулж, сэтгэлийн хямралд орох эрсдлийг бууруулдаг эндорфин үйлдвэрлэхэд хувь нэмэр оруулдаг.
Хэрэв та асуудлыг бие даан даван туулж чадахгүй бол яах вэ
Хэрэв ядрах нь сэтгэл хямралын шинж тэмдэгтэй дагалдаж байгаа бол тусламж хайхаас өөр арга байхгүй. Мэргэжилтэн танд нөхцөл байдлын шалтгааныг ойлгоход тусалж, түүнтэй хэрхэн ажиллахыг хэлэх болно. Хэрэв та шинэ багт дасан зохицох эсвэл зөрчилдөөнийг шийдвэрлэх шаардлагатай бол сэтгэл зүйч рүү хандаарай. Танд асуудлыг тодорхойлоход хэцүү, бүрхэг байсан ч мэргэжилтнүүд танд үүнийг олж мэдэхэд туслах болно. Үүнийг хийх хамгийн хялбар арга бол интернэт юм. Бараг бүх мэргэжилтэн биечлэн болон онлайнаар ажилладаг. Хэцүү тохиолдолд биечлэн уулзах шаардлагатай байж болно. Бусад тохиолдолд эмчтэй алсын зайнаас ажиллах нь зөвлөгөөний чанарт нөлөөлдөггүй. Тэдний олонх нь мэргэжлийн блог хөтөлж, өөрсдийнхөө тухай болон өөрсдийн үйл ажиллагааны талаар ярьдаг тул нийгмийн сүлжээн дээр та мэргэжилтэнтэй урьдчилан танилцаж, түүний талаар мэдээлэлтэй санал бодлоо илэрхийлэх боломжтой.
Эх сурвалж: “Зууны мэдээ” сонин
Сэлэнгэ аймгийн Баянгол сумын Баян багийн “Баян-Уул” гэдэг газар /аймгийн төвөөс урд зүгт 207 км, сумын төвөөс хойд зүгт 8 км/ автомашины төмөр хийцэд хүн хавчуулагдсан гэсэн дуудлагыг 11.06-ны өдрийн 06:55 цагт ОБЕГ хүлээн авсан байна.
Дуудлага мэдээллийн дагуу тус аймгийн Онцгой байдлын газрын Баянгол сум дахь Гал түймэр унтраах, аврах 40 дүгээр ангийн алба хаагчдыг очиход Баянгол сумаас Сэлэнгэ аймгийн чиглэлд зорчиж явсан иргэн Э-гийн “Lexus HS250h” загварын суудлын автомашин /3 зорчигчтой/ ачааны автомашины араас мөргөж жолооч Э /38 настай, эрэгтэй/ хавчуулагдсан байсныг 18 минут ажиллан эсэн мэнд гаргаж, сумын Эрүүл мэндийн төвд хүлээлгэн өгчээ.
Сэтгүүлч Н.Өнөрцэцэг хорих ангид өлсгөлөн зарлаад 48 цаг болж байна. Түүний биеийн байдал болон маргааш болох шүүх хурлын талаар Н.Өнөрцэцэгийн өмгөөлөгч мэдээлэл өглөө.
Тэрбээр “Сэтгүүлч Н.Өнөрцэцэг даваа гаригаас эхлэн Давж заалдах шатны шүүх хурлыг нээлттэй явуулж өгөхийг хүсч өлсгөлөн зарлаад 52 цаг болж байна. Эмчийн үзлэгээр Н.Өнөрцэцэгийг бөөрний архаг дутагдалтай гэж оношилж, өлсгөлөн зарлавал маш эрсдэлтэй гэж дүгнээд өлсгөлөн зарлах хүсэлтийг нь хүлээж аваагүй. Гэвч Н.Өнөрцэцэгийн зүгээс өлсгөлөн зарлахаа шийдэж одоо хүртэл юм идээгүй, үргэлжлүүлж байна. Биеийн байдлын хувьд бөөр нь өвдсөн, хаван ихтэй мөн нойргүйдэлд орсон байдалтай байна. Дөнгөж сая уулзаад гарч ирэхэд Н.Өнөрцэцэг их тамирдаж ядарсан байна” гэлээ.
Үндэсний статистикийн хороо 2024 оны арваннэгдүгээр сарын 4-ний байдлаар гол нэрийн зарим хүнсний барааны дундаж үнийг танилцууллаа. Улаанбаатар хотод арваннэгдүгээр сарын 4-ний байдлаар гол нэрийн барааны үнэ өмнөх сараас 0.2 хувиар буурч, өмнөх долоо хоногоос 0.1 хувиар өссөн байна.
Хэвлэл мэдээллийн “Монгол ньюс” ХХК-иас эрхлэн гаргадаг үндэсний өдөр тутмын анхны чөлөөт хэвлэл “ӨНӨӨДӨР” сонин дэргэдээ өсвөрийн хүүхэд багачуудаас бүрдсэн “НОГООН ТАНХИМ” ТББ-ыг ажиллуулж эхэллээ. Улмаар “НОГООН ТАНХИМ” ТББ-ынхан Хүүхэд, гэр бүлийн хөгжил, хамгааллын ерөнхий газартай хамтран хүүхдэд зориулсан танин мэдэхүйн анхны дугаараа гаргажээ. Тодорхой хэлбэл, зөвхөн хүүхдүүдийн оролцоотой үе тэнгийнхэнд нь зориулсан “ӨНӨӨДӨР”-ийн ХҮҮХДҮҮД сонины анхны дугаарыг хэвлүүлсэн байна.
Зорилго нь хүүхдүүдийн хэл бичгийн боловсрол, танин мэдэхүй, чөлөөт сэтгэлгээ, унших бичих ур чадварыг нэмэгдүүлэх, авьяас чадвар, хүсэл мөрөөдлөө олж өөрийгөө таних, үе тэнгийнхнээсээ суралцаж хамтдаа хөгжих талбар нь болох ажээ.
Цаашид ч гэсэн хүүхдүүд, үе тэнгийн найз нөхдийнх нь бичсэн мэдээ, ярилцлага, захидал, шүлэг зохиолтой эл сониноор дамжуулан танилцах боломжтой. Мөн өөрсдөө мэдээ, сурвалжилга бичиж шагнал урамшуулал авах боломжтой. Тодорхой хэлбэл, дараагийн дугаарт хүүхдүүд маань өөрийн бүтээлээ хэвлүүлэх боломжтой шүү. Мөн хүүхдийн сонины логоны уралдаан зарласан. Уралдаан мэдээж шагналтай, мэдээ ч гэсэн урамшуулалтай. Тиймээс бяцхан найзуудаа өөрийн уран сэтгэмжээс бүтсэн лого болон бүтээлээ unuudurkids@gmail.com хаяг руу илгээгээрэй. Амжилт хүсье.
Судалгаагаар өсвөр үеийнхний дунд эрүүл мэндийн дараах асуудлууд тулгарч байгааг Нийгмийн эрүүл мэндийн үндэсний төвөөс мэдээлсэн. Тодруулбал, судалгаанд оролцсон хүүхдүүдийн,
– 41,8 хувь нь өдөр бүр хийжүүлсэн ундаа хэрэглэдэг
– 39,7 хувь нь гар угаах дадалд суралцаагүй
– 38,5 хувь нь өглөөний цай тогтмол ууж хэвшээгүй
– 26 хувь нь шүдээ угаадаггүй буюу заримдаа л угаадаг гэжээ.
Мөн эрт илрүүлэгт хамрагдсан хүүхдүүдийн 77,8 хувь нь шүдний цооролтой байсан нь манай улс хүүхдийнхээ эрүүл мэндэд яаралтай анхаарал хандуулж, тэднийг мэдлэгжүүлж, эрүүл мэндийн боловсролыг нь дээшлүүлэх зайлшгүй шаардлага байгааг харуулсан.
Тиймээс Эрүүл мэндийн сайд Т.Мөнхсайхан улсын хэмжээнд анх удаа сургуульд суурилсан эрт илрүүлгийн тогтолцоог бүрдүүлэхээр Боловсролын яамтай хамтран зургаан настнууд буюу ЕБС-ийн нэгдүгээр ангийн сурагчдын дунд нүд, шүд, зүрхний эмгэгийн эрт илрүүлгийн үзлэгийг зохион байгуулж эхлээд байна.
Эрүүл мэндийн сайд Т.Мөнхсайхан, Боловсролын сайд П.Наранбаяр нар өчигдөр нийслэлийн Ерөнхий боловсролын 75 дугаар сургуульд ажиллаж, үзлэгийн явцтай танилцлаа.
Энэ удаагийн эрт илрүүлгийн нэг онцлог нь илрүүлээд орхих бус оношлоод, эмчлээд, хяналтадаа авах. Өөрөөр хэлбэл тухайн хүүхдийг эрүүл болтол нь хяналт тавихаас гадна эрүүл мэндийн боловсрол олгосноор ирээдүйд Эрүүл монгол иргэн болох суурь нь тавигдах юм.
Энэ үеэр Эрүүл мэндийн сайд Т.Мөнхсайхан хэлсэн үгэндээ, “Сургуульд суурилсан эрт илрүүлгийн тогтолцоог бий болгох ажлын эхлэл зургаан настнуудын үзлэгээр тавигдаж байна. Цаашид 10 настайд нь амьсгалын эрхтэн тогтолцоо, 8 дугаар ангид нь мэдрэлийн эрхтэн тогтолцоо, 12 ангид нь шээс бэлгийн замын эртхэн тогтолцооны гэх мэт үе шаттайгаар үргэлжилнэ. Бид тандалт хийх зорилгоор 2 аймаг, 1 дүүрэгт үзлэг хийсэн. Үүнээс нийт хамрагдсан хүүхдүүдийн 11 хувь нь зүрхний өөрчлөлттэй, 21 хувь нь харааны өөрчлөлтэй, 80 хувь шүдний өвчлөлттэй байхаар байна гэсэн тооцооллыг гаргаж байсан бол өнөөдрийн байдлаар хүүхдүүдийн 23 хувь нь нүдний өөрчлөлттэй, 83 хувь нь шүдний өвчлөлтэй гарч байгаа нь хүүхдийн эрүүл мэнд ямар түвшинд байгааг харуулж байна” хэмээн онцлов.
Мөн Сайд П.Наранбаяр Эрүүл мэндийн сайд Т.Мөнхсайханд Боловсролын яамтай хамтран улс орон даяар ЕБС-д суурилсан эрт илрүүлгийн үзлэгийг зохион байгуулахаар санаачилсанд талархал илэрхийлээд “Энэ бол хүн амаа эрүүл болгох, хүүхдүүдийнхээ эрүүл мэндийг хамгаалах, багш сурагчдад эрүүл аж төрөх ёсыг нэвтрүүлэх гэсэн оролдлого. Сайдын хувьд эцэг эхчүүдэд үүргээ сайн гүйцэтгээрэй, хүүхдүүдээ эрүүл болгох арга хэмжээг нь аваарай гэж уриалмаар байна. Эрүүл боловсролтой иргэн бол Монгол Улсын баялаг” гэлээ.
Зүрхний үзлэгт 2067 сурагч хамрагдсанаас 0.34 хувь нь өөрчлөлттэй, нүдний үзлэгт 5061 сурагч хамрагдсанаас 22.5 хувь нь өөрчлөлттэй, шүдний үзлэгт 815 сурагч хамрагдсанаас 83 хувь нь өвчлөлтэй гараад байна.
Тухайлбал, нүдний үзлэгээр нийт оношлогдсон хүүхдүүдийн дийлэнх нь буюу 88 хувь нь харааны өөрчлөлттэй байснаа огт мэдээгүй байжээ. Тэдгээр хүүхдийн 67 хувь нь холын хараа, 39 хувь нь ойрын хараа, 47 хувь нь стерео харааны өөрчлөлттэй байсан нь эрт илрүүлгийн үзлэгээр тогтоогдсон байна. Энэ нь ирээдүйд олон мянган иргэний нүдний эрүүл мэндийг хамгаалахад чухал ач холбогдолтой гэдгийг мэргэжлийн эмч нар нь ярьж байлаа.
Энэ жилийн хувьд эрт илрүүлэгт зөвхөн нийслэлийн ЕБС-ийн нэгдүгээр ангийн 39 мянган сурагч хамрагдах бол хөдөө орон нутгийн сурагчдыг ирэх жилийн 4 дүгээр сараас хамруулахаар бэлтгэл ажлаа хангаад байна.
Ногоон автобусны гэх тодотголтой А.Ганхуяг нарын 24 хүнд холбогдох хэргийн шүүх хурал өнөөдөр болно. Шүүх хурлыг аравдугаар сарын 21-нд товлосон ч шүүгдэгч нарын өмгөөлөгчдийн хүсэлтээр өнөөдрийг хүртэл хойшлуулсан юм.
Хэргийг эргэн сануулбал, Нийслэлийн прокурорын газраас УИХ-ын гишүүн, Монгол Улсын сайд, Улаанбаатар хотын авто замын түгжрэлийг бууруулах Үндэсний хорооны дарга асан Ж.Сүхбаатар, Нийслэлийн Засаг даргын ахлах зөвлөх асан Д.Мөнх-Эрдэнэ, Худалдан авах ажиллагааны газрын Мэдээллийн технологийн хэлтсийн дарга Б.Т, Нийтийн тээврийн газрын дарга асан С.Жавхлантбаатар нарын албан тушаалтнууд, Том оврын автобусны үйлчилгээ эрхлэгчдийн холбоо, “Тэнүүн-Огоо” ХХК-ийн албан тушаалтнууд болон БНСУ-ын хоёр иргэн, нийт 24 хүнд холбогдох хэрэгт Эрүүгийн хуулийн 22.1 дүгээр зүйлийн 1, 3 /Эрх мэдэл, албан тушаалын байдлаа урвуулан ашиглах/, 17.3 дугаар зүйлийн 2.2 /Залилах/, 22.12 дугаар зүйлийн 1 /Хуулийн этгээдийн эрх мэдлийг урвуулан ашиглах/-д зааснаар яллах дүгнэлт үйлдэн Чингэлтэй дүүргийн эрүүгийн хэргийн анхан шатны шүүхэд шилжүүлсэн байдаг.