Category: гадаад

АНУ-ын Агаарын цэргийн хүчин хамгийн сүүлийн VI үеийн үл үзэгдэх “B-21” буюу “Raider-Дайчин” гэх цөмийн бөмбөг тээх чадвартай байлдааны онгоцоо танилцууллаа. Энэ нь хүйтэн дайны үеэс тус улсад ашиглагдаж байсан В-1, В-2 онгоцуудыг аажмаар орлох юм. Уг онгоцны танилцуулга Калифорни дахь “Northrop Grumman” үйлдвэрт болсон байна. “В-21” нь сүүлийн 30 жилд АНУ-д шинээр үйлдвэрлэсэн анхны бөмбөгдөгч онгоц юм. Түүний өртөг бараг 700 сая ам.доллар бөгөөд цөмийн болон ердийн бөмбөгний алийг нь ч тээвэрлэх чадвартай аж. Бөмбөгдөгч онгоцны бусад хүчин чадал, онцлогийг хараахан зарлаагүй байна.

АНУ-ын Батлан хамгаалахын сайд Ллойд Остин хэлэхдээ, “В-21”-ийн танилцуулга нь АНУ-ын технологи, инновацийн байнгын давуу талыг гэрчилж байна.

Бөмбөгдөгч онгоцыг бүтээсэн нь манай улсын янз бүрийн салбар дахь хагас зуун жилийн судалгаа, ололт амжилтын үр дүн гэж онцлон мэдэгдсэн байна. Шинэ бөмбөгдөгч онгоцыг бүтээхэд дэвшилтэт технологи, шинэ материалыг ашигласан гэж үйлдвэрлэгчид тэмдэглэж байгаа бөгөөд түүний талаарх мэдээлэл нууц хэвээр байгааг онцлон дурдсан бөгөөд “B-12” нь шинэ үеийн үл үзэгдэх технологиор тоноглогдсон гэж мэдээлсэн байна. АНУ-ын Батлан хамгаалахын сайд “Хамгийн дэвшилтэт агаарын довтолгооноос хамгаалах систем ч B-21-ийг тэнгэрт илрүүлж чадахгүй. Уг онгоц одоогоор зохион бүтээгдээгүй байгаа зэвсгийг авч явах боломжтой аж. Америкийн инженерүүд үүнийг “архитектурын нээлттэй систем” гэж нэрлэдэг юм байна.

АНУ-ын Агаарын цэргийн хүчнийхэн “B-12” нь нисгэгчгүй байлдааны үүрэг гүйцэтгэх боломжтой гэж мэдэгдсэн ч нисгэгчгүй нислэгийн талаар хараахан төлөвлөөгүй байна гэжээ. “В-21”-ийн анхны нислэгийг 2023 онд хийх төлөвтэй байна. Одоогоор зургаан онгоц үйлдвэрлэгдэж байгаа бөгөөд АНУ-ын Агаарын цэргийн хүчин дор хаяж 100 ширхэгийг худалдаж авахаар төлөвлөж байгаа аж.

Өмнөд Солонгос V үерүү дөхсөн онгоцтой бол Орос, Хятад IV үеийн байлдааны онгоцнуудтай юм.

Г.АМАРСАНАА

Ираныэсэргүүцлийн жагсаал зарим үр дүнд хүрч эхэлжээ. Тухайлбал, Ираны парламент эмэгтэйчүүдийн толгойн алчуур зүүх тухай хуульд өөрчлөлт оруулахаар хэлэлцэж эхэлсэн байна. Одоогоор хуулийг хэрхэн өөрчилж байгаа нь тодорхойгүй ч парламентын соёлын комисс хуралдаж эхэлсэн талаар тус улсын ерөнхий прокурор Мухаммад Жафар Монтазери мэдэгджээ. Мөн Ираны ерөнхийлөгч Эбрахим Раиси, “Исламын Бүгд Найрамдах Иран Улсын үндэс суурь нь Үндсэн хууль. Гэхдээ Үндсэн хуулийг хэрэгжүүлэх арга барил нь уян хатан байж болно” гэж мэдэгджээ.

Иранд 1979 оны “Исламын хувьсгал”-аас дөрвөн жилийн дараа 1983 оны дөрөвдүгээр сард бүх эмэгтэйчүүдийг хижаб буюу толгойн алчуурыг заавал зүүхийг хуульчилсан юм. Өнөөгийн эсэргүүцлийн жагсаал эмэгтэйчүүд толгойн алчуураа тайлан шатааж, үсээ тайрснаар эхэлсэн бөгөөд богино хугацаанд орон даяарөрнөж, Ираны засгийн газрын эсрэг бослого болон хувирсан юм.

Ираны ард түмний эсэргүүцэл, тэмцэлд Тегераны эрх баригчид АНУ болон түүний холбоотон Их Британи, Израиль, Курдын бүлэглэлүүдийг буруутгаж байгаа юм.. Ираны хувьсгалыг хамгаалах хүчнээс энэ долоо хоногт анх удаа мэдээлэл өгч, эсэргүүцэл тэмцлийн улмаас 300 гаруй хүний амь үрэгдсэн гэж мэдэгджээ. Мөн Үндэсний аюулгүй байдлын дээд зөвлөл, бослогын үеэр амь үрэгдсэн хүний тоо 200 давсан гэв. Харин Ираны хүний эрхийн байгууллагаас мэдээлснээр аюулгүй байдлын албаныхны жагсаалыг дарах оролдлогын улмаас 448 хүн амь үрэгдсэн гэсэн бөгөөдНҮБ-ын хүний эрхийн байгууллагынмэдээллээр Иранд 14 мянга гаруй хүнийг баривчилж, хорьсоны дунд хүүхдүүд ч байгаа аж.

Г.АМАРСАНАА

Украинаас энэ оны хоёрдугаар сарын сүүлээс хойш 7.8 сая гаруй иргэн хөрш орнууд руу дүрвэсэн талаар НҮБ-ын Дүрвэгсдийн асуудал эрхэлсэн дээд комиссарын газраас мэдээлжээ.

Тэдгээр иргэний 5 сая орчим нь Украинтай хөрш зэргэлдээ оршдог Баруун Европын орнуудаас түр оршин суух зөвшөөрөл хүсээд байгааг тус байгууллагын цуглуулсан тоон мэдээлэл харуулсан байна.

“Украинд мөргөлдөөн хурцдаж байгаагийн улмаас энгийн иргэд амь насаа алдаж, иргэний дэд бүтцийг сүйдэж байгаа нь украинчуудыг аюулгүй байдал, тусламж эрэлхийлэн дүрвэхэд хүргэж байна” гэж тайланд тэмдэглэжээ.

Их Британийн хаант улсын бүрэлдэхүүнд багтдаг Англи, Уэльсийн хүн амын дунд загалмайн шашинтнууд анх удаа цөөнх болсон нь хүн амын тооллогын үед хийсэн судалгаагаар батлагджээ. Тус улсад арван жил тутамд нэг удаа зохион байгуулдаг хүн амын тооллогын дүнг Үндэсний Статистикийн Алба танилцуулсан юм. Өнгөрсөн арван жилийн хугацаанд өмнөх арвантай харьцуулахад Их Британи улсад ерөнхийдөө шашин шүтдэг хүмүүсийн тоо буурч, цагаан арьстнуудын тоо ч цөөрсөн байна. Тухайлбал Англи, Уэльсийн хүн амын 46.2 хувь нь өөрийгөө загалмайн шашинтан гэж мэдүүлсэн нь арван жилийн өмнөх 59.3 хувиас нэлээд буурч, анх удаа хүн амын талаас доош хувьд хүрсэн тохиолдол болжээ. Үүнээс гадна 1.7 хувь нь Хиндү шашинтан болсон нь өмнөх арваны 1.5 хувиас бага зэрэг өссөн үзүүлэлт болжээ. Харин нийт хүн амын гуравны нэгээс илүү хэсэг буюу 37 хувь нь өөрийгөө шашингүй үзэлтэн гэсэн байна. 2011 онд энэ хэмжээ 25 хувь байжээ.

Сүүлийн өдрүүдэд улс орон даяар нь өрнөсөн “Ковид”-ын хязгаарлалтыг эсэргүүцсэн олныг хамарсан эсэргүүцлийн жагсаалыг Бээжин “хорлон сүйтгэх үйл ажиллагаа” гэж албан ёсоор зарлан, тэдний эсрэг шийдвэртэй арга хэмжээ авах болно гэдгээ мэдэгджээ. Хятадын хотуудын гудамж цагдаа нараар дүүрчээ. Хууль сахиулах байгууллагынхан мөн жагсагчдыг олохоор ажиллаж байгаа юм байна.

Өнгөрсөн амралтын өдрүүдэд Шинжаан-Уйгурын нийслэл Өрөмч хотоос эдгээр жагсаал эхэлж, дараа ньХятадын бусад бүс нутгуудад тархан тус улсын нийслэл Бээжин төдийгүйхамгийн том хотууд болох Шанхай, Нанжин, Чэнду, Ухань болон бусад хотуудад үргэлжилэн гарсан билээ.

Жагсагчид БНХАУ-ын дарга Си Жиньпинийг огцруулах улс төрийн шаардлага тавьж байсан нь Хятадын хувьд нэн ховор үзэгдэл болсон. Жагсагчдын зарим нь цагаан хуудас барин гудамжинд гарч, хатуу хөл хориог эсэргүүцсэн байна. Тэгвэл өнгөрсөн мягмар гарагт Хятадын Коммунист Намын Төв Хорооны Улс төр, хууль эрх зүйн комисс “дайсагнагч хүчний явуулж буйхорлон сүйтгэх үйл ажиллагааны эсрэг хуулийн хүрээнд шийдвэртэй арга хэмжээ авах шаардлагатай” гэсэн мэдэгдэл гаргажээ. “Синьхуа” агентлагийн дамжуулсан Коммунист Намын Төв Хорооны Улс төр, хууль эрх зүйн комиссийн уг илгээлтэд харин олныг хамарсан жагсаал цуглааны тухай огт дурдаагүй байна. Эсэргүүцлийн жагсаал даваа гарагийн шөнө хүртэл үргэлжилсэн боловч маргааш нь Бээжиндоролцогчдын цуглах газрыг цагдаа нар бүслэн жагсаал хийлгээгүй билээ. Цагдаа нар Шанхайд эсэргүүцлийн жагсаалыын гол зам дагуу хаалт босгож, олон хүнийг баривчилсан байна.

Бээжинд болсон эсэргүүцлийн жагсаалд оролцсон нэгэн хятад эмэгтэй ”Надаас гадна жагсаалд ороцлсон таван найзад маань цагдаагаас дуудлага ирсэн” гэж “Франс Пресс” агентлагт ярьжээ. Мөн цагдаа нар уг эмэгтэйн найзуудын гэрт очиж, жагсаалд яаж оролцсоныг нь асуусан байна. Үүний зэрэгцээ цагдаа нар тэдэнд “Хууль бус цуглаан болсон” гэдгийг онцлон анхааруулсан байна. Өөр нэг хүн “Ройтерс” агентлаг”-т “Намайг ням гарагийн орой хаана байсан, өөрийн хийсэн үйл явдлын талаар бичгээр мэдээлэл өг хэмээнцагдаагийн хэлтэст ирэхийг хүссэн” гэж хэлжээ. Бээжинд жагсаалд оролцсон нэг залуу “Бид бүгд гар утасныхаа захидал харилцааг аль болох хурдан устгацгааж байна” гэж хэлжээ. “Цагдаа нар миний найз охины хэн болохыг тогтоохоор ирж, түүнийг авч явсан. Хэдэн цагийн дараа түүнийг сулласан” гэж тэрээр нэмж хэлжээ.

Хятад улс хүн амаа хянахын тулд тэрбум долларын өртөгтэй улсын хяналтын систем байгуулаад удаж байгаа билээ. 2019-2020 онд Хонконгод болсон ардчиллын төлөөх жагсаалын дараа Хятадын эрх баригчид хэсэг хугацааны дараахамгийн идэвхтэй оролцогчдыг янз бүрийн хяналтын технологи ашиглан баривчилсан билээ.

Сингапурын Үндэсний их сургуулийн ахлах судлаач Дрю Томпсон Хятадын цагдаа асар их чадавхитай болсон гээд “Хятад улсэдгээр эсэргүүцлийн жагсаалыг бүрэн хянах боломжтой” гэж мэдэгджээ.

Өнгөрсөн амралтын өдрүүдэд болсон эсэргүүцлийн жагсаалын дараа Хятадын эрх баригчид олон нийтийн сүлжээ болон хэвлэл мэдээллийн хэрэгслүүдэд тавих хяналтаа улам чангатгаад байна. Эдгээр жагсаалыг харуулсан хэдэн арван сая бичлэг нийтийн сүлжээнээс устгагдан хэвлэл мэдээллийн хэрэгслүүд ковидын хязгаарлалт багасгаж байгаа болон хөлбөмбөгийн дэлхийн аварга шалгаруулах тэмцээн, Хятад улсын сансар огторгуй дахь ололт амжилтын талаарх мэдээлэлд олон нийтийн анхаарлыг хандуулахыг хичээж байна.

Г.Амарсанаа

БНХАУ-ын дарга асан Зян Зэминь цусны хорт хавдар, олон эрхтний дутагдлын улмаас Шанхай хотноо 11 дүгээр сарын 30-ны өдрийн 12:13 цагийн орчимд 96 насандаа таалал төгсжээ.

Энэ талаар Хятадын Коммунист намын Төв хороо, БНХАУ-ын БХАТИХ-ын Байнгын хороо, Төрийн зөвлөл, Хятадын Улс төрийн асуудлаар зөвлөлдөх зөвлөлийн Үндэсний хороо, Хятадын Цэргийн төв зөвлөл мэдэгдсэн байна.

Нам, цэргийн бүх албан тушаалтан, Хятадын нийт ард түмэнд хандан гаргасан захидалд, нөхөр Зян Зэминь таалал төгссөнд гүн эмгэнэл илэрхийлээд, тэрбээр нам, цэргийнхэн, Хятадын нийт ард түмний дунд нэр хүндтэй гарамгай удирдагч, төрийн нэрт зүтгэлтэн, цэргийн стратегич, дипломатч, Хятадын онцлогтой социализмыг байгуулах их үйл хэргийн нэрт зүтгэлтэн байсан гэж цохон тэмдэглэжээ. Тэрбээр Гурван төлөөллийн онолыг үндэслэгч, ХКН-ын гурав дахь үеийн удирдлагын гол цөм байсан юм.

Он гарсаар ОХУ-с гадагшаа чиглэсэн мөнгөний урсгал түүхэн дээд амжилт тогтоон, есдүгээр сар хүртэлх хугацаанд оросууд нийт 32 тэрбум ам.долларыг хувийн данснаасаа гадаадын банкуудад шилжүүлснийг “РИА Новости” агентлаг мэдээлсэн байна. Энэ оны хоёрдугаар сард буюу Украинд дайн эхэлсэн сард хувийн данснаас гарсан мөнгөний хэмжээ 4.3 тэрбум доллар болж, түүхэн дээд хэмжээ тогтоож байсан бол энэхүү хэмжээ энэ хугацаанд дахин гурван удаа шинэчлэгдсэн байна. Оросын төв банк гадаад гүйлгээний хэмжээг хязгаарласны улмаас гуравдугаар сард $1.7, дөрөвдүгээр сард $1.4 тэрбум гадаадын банкууд руу шилжжээ. Харин тавдугаар сард хязгаарлалтын дээд хэмжээг өсгөсний дараа $1.7 тэрбум болж, зургаадугаар сард $5.2 тэрбум болж шинэ түүхэн дээд хэмжээнд хүрсэн байна. Хязгаарлалт нэмж суларсны улмаас долдугаар сард $5.6 тэрбум болж, наймдугаар сард $5.4 тэрбумд хүрчээ.