ОХУ-д Ерөнхийлөгч В.Путины зурагтай шоколад худалдаанд гарсан байна. “Ерөнхийлөгч” нэртэй цуврал шоколад нь янз бүрийн амттай аж. Түүнийг худалдаж авснаар та Оросын үйлдвэрлэгчдийг дэмжинэ хэмээн шоколад үйлдвэрлэгчид шинэ бүтээгдэхүүнээ сурталчилж байна.
Ю.Дэлгэр
Унадаг дугуйгаар явах үед их хэмжээний энерги зарцуулж, тэр хэмжээгээр ам цангадаг. Энэ асуудлыг шийдсэн нэг сонирхолтой төхөөрөмжийг зохион бүтээжээ. Унадаг дугуйнд зориулсан уг нэмэлт төхөөрөмжийг Kristof Retezbr гэдэг хүн зохиосон байна. Энэ төхөөрөмж дугуйгаа унаад явж байхад агаарыг ус болгон хувиргах аж. Унадаг дугуй урагшлах бүрд уг төхөөрөмж рүү агаарын урсгал ордог байна. Агаараас чийгшлийг нь ялгаснаар доор хэсэгт байрлах сав руу ус болон орох юм байна. Энэ төхөөрөмжийн үнэ 25-40 ам.доллар байх аж. Тун удахгүй үйлдвэрлэлд шилжүүлэхээр төлөвлөж байгаа гэнэ.
Энэ сарын 22-нд дуучин Жастин бибер зодолдож байгаад 6 удаа хутгалуулсан гэх албан бус мэдээлэл байна. Жастин бибер нэг найзтайгаа таван залуугийн эсрэг зодолдож биедээ хүнд гэмтэл авсан талаарх мэдээлэл сошиал ертөнцөд тархаад байгаа юм. Тэрбээр тухайн үед архи согтууруулах ундаа хэрэглэсэн байсан бөгөөд энэхүү зодоон шөнийн клубын урд болжээ. Улмаар залуусын дундаас нэг нь хутга гарган ирж Жастин биберийг олон удаа зүсэж гэмтээсэн аж. Харин хамт явсан найзынх нь хөлрүү буудсан гэх мэдээлэл байгаа юм.
Францын Ерөнхийлөгч Франсуа Олландын экс эхнэр Валери Триервейлер өнгөрсөн зун “Thank You For This Moment” хэмээх номоо худалдаанд гаргасан юм. Бестселлерт багтсан энэ ном ойролцоогоор 100 мянган хувь борлогдоод байгаа аж. Харин Францын Ерөнхийлөгч өнгөрсөн амралтын өдөр сэтгүүлчидтэй уулзах үедээ эхнэрийнхээ бичсэн номонд хориг тавихаа мэдэгджээ. Энэ тухай “www.telegraph.co.uk” мэдээлсэн байна. Тэрбээр “Валери ямар зорилгоор гэрийнхээ нууцыг олон нийтэд илчилснийг мэдэхгүй. Надад энэ бүхэн таалагдахгүй байна” гэжээ.
Хэт барууны үзлийг баримталдаг Францын “Үндэсний фронт” нам ОХУ-ын банкнаас 9 сая ам.долларын зээл авсан байна. Үүний өмнөхөн тус намын дарга Ле Пен болон түүний үзэл бодол нэгт нөхдүүд Европын банкууд тэдэнд зээл өгөхгүй үйл ажиллагааг нь дэмжихгүй байна хэмээн гомдол мэдүүлж байсан юм. Тиймээс АНУ, Испани, ОХу-ын банкуудад хүсэл тавьжээ.
Дашрамд дурдахад сүүлийн үед Францын “Үндэсний фронт” намын нэр хүнд өссөөр байгаа. Өнгөрсөн зун болсон Европын парламентын сонгуульд ч нэлээд санал авсан юм.
Ю.Дэлгэр
Малид үл таних этгээдүүд 10 хүүхэд хулгайлсан байна. Энэ үеэр хоёр хүүхэд эсэргүүцэл үзүүлсэн тул амийг хороосон тухай мэдээллээ. Энэ хэрэг 2012 оноос хойш лалын дайчид хяналтандаа аваад буй Кидал хотод гарсан байна. Малигийн зэвсэг хүчний албан ёсны төлөөлөгчийн мэдэгдсэнээр лалын дайчид хүүхдүүдийг хулгайлж халааг нь авах цэргүүдээ бэлтгэдэг аж.
Ю.Дэлгэр
Америкийн талархлын өдрийн өмнө сургуулийн сурагчид тус орны тэргүүн хатагтайд тааруухан үдийн хоолны төлөө “талархал” илэрхийлж эхэлжээ хэмээн St-Louis Todayмэдээлэв.
Мишель Обамагийн буянаар АНУ-ын засаг захиргаа хүүхдүүдийн илүүдэл жинтэй тэмцэх үндэсний хөтөлбөрт өөрчлөлт оруулан сургуулийн үдийн хоолны цэсийг өөрчилсөн юм. АНУ-ын сургуулиудад 2012 оноос эхлэн үдийн хоолонд нь ихээхэн хэмжээний жимс, ногоо, будаа оруулах болжээ.
Одоо Twitter дэх сүлжээнд “ThanksMichelleObama” гэсэн мэдээлэл ихэд түгж байна. Сурагчид “тааруухан” үдийн хоолны төлөө түүнд талархаж байна. Эдгээр мэдээллээс будааны усан шөл, алимтай үдийн хоолны зураг хамгийн ихээр тарж байгаа гэнэ.
Холливудын нэрт жүжигчин Анжелина Жоли “Du Jour” сэтгүүлд ярилцлага өгсөн байна. Түүндээ хэдэн кинонд тоглоод жүжигчний ажлаа бүрмөсөн орхихоор шийдсэн тухайгаа ярьжээ. Тэрээр гэр бүлдээ бүх цаг заваа зориулж, кино найруулагчаар ажиллах гэнэ. Гэхдээ чухам хэдийнээс гэдгээ хэлсэнгүй. Хамгийн их орлоготой жүжигчнээр тодорсон А.Жоли яг одоо нөхрийнхөө хамт “Далайн эргэд” нэртэй кинонд тоглож байгаа.
А.Жоли бараг 30 жил жүжигчнээр ажиллах хугацаандаа 40-өөд кинонд тоглосон. 1999 онд туслах дүрээрээ Оскар хүртсэн. Нэрт жүжигчин 13 жилийн өмнөөс НҮБ-ын сайн санааны элчээр ажиллаж байгаа билээ.
АНУ-ын Ерөнхийлөгч өчигдөр өглөө ард иргэддээ хандан үг хэлэхдээ цагаачлалын асуудалд шинэчлэл хийхээр шийдсэн тухайгаа мэдэгдсэн байна. Гэхдээ энэ асуудлыг шийдэхийн тулд Конгрессоор оруулахгүй байхаар шийджээ. Саяхан болсон Конгрессын сонгууль Бүгд Найрамдах нам ялалт байгуулж олонх болсон. Тиймээс Б.Обамагийн цагаачлалын бодлогод шинэчлэл хийх санал хууль батлах дээд байгууллагаас дэмжлэг хүртэх магадлал тун бага юм.
АНУ-ын Ерөнхийлөгч уг асуудлыг шийдэхийн тулд тогтоол гаргажээ. Ингэснээр тус улсад хууль бусаар орж ирсэн 4.4 сая хүн цагаачлах эрхтэй болох юм. Эдгээр хүмүүс нь Америкт олон жил амьдарч байгаа бөгөөд хууль дүрэм зөрчөөгүй гэдгийг төрийн тэргүүн онцлов. Түүнээс гадна АНУ-д төрсөн цагаачдын хүүхдүүдэд тус улсад түр оршин суух эрх олгох гэнэ. Ерөнхийлөгчийг ард иргэддээ хандан үг хэлэхээс өмнө Цагаан ордноос мэдэгдэл гаргахдаа хууль сахиулах байгууллагууд юуны түрүүн аюул заналхийлж хийж буй террористуудтай холбоотой цагаачид илүү анхаарал хандуулан ажиллах ёстой гэдгийг онцлов.
АНУ-ын Мэриленд мужид болсон “Ертөнцийн миссис-2014” тэмцээнд Белоруссийн гоо бүсгүй Марина Алексейчик шалгарчээ. Тус тэмцээний гол шалгуур нь тухайн оролцогч нөхөрт гарсан байх, хүүхэдтэй байх, мөн эх орондоо улс төр, нийгмийн амьдрал болон буяны үйлсэд идэвхтэй оролцсон байх ёстой аж. Найман өдөр үргэлжилсэн энэ удаагийн тэмцээнд 35 бүсгүй зөвхөн гадаад төрхөөрөө төдийгүй, авьяас билгээ уралдуулж, хэр сайхан хоол хийдэг болон бүжиглэх зэрэг олон төрлөөр өрсөлджээ. Тэмцээний ялагч 31 настай Алексейчик бүсгүй дөрвөн жилийн өмнө гэрлэсэн нэгэн. Тэрээр телевизийн хөтлөгч, дуучин аж. Уламжлал ёсоор тэмцээний эцсийн шалгаруулалтад 10 бүсгүй үлддэг бол энэ удаад 11 бүсгүй авхаалж самбаагаа сорьжээ. Тодруулбал, сүүлчийн шалгаруулалтад Польш, Өмнөд Африк, Белоруссь, Парагвай, Филиппин, АНУ зэрэг олон орны гоо бүсгүйчүүд өрсөлдсөн байна.
“Ертөнцийн миссис” тэмцээнийг 1985 онд явуулж эхэлсэн. Дэлхийн олон оронд зохион байгуулсан уг тэмцээн зөвхөн Оросод гэхэд гурван удаа болж байжээ. Ирэх жилийн тэмцээн Хятадад болох юм байна.