Category: гадаад

Оросын эрх баригчид байлдааны ажиллагаа, тэр дундаа Украины дайнд оролцсон ахмад дайчдын хүүхдүүдийг их дээд сургуульд элсүүлэх 10 хувийн квот тогтоох саналыг хэлэлцэж байгаа гэнэ. Энэ саналыг хэлэлцүүлэхээр Төрийн думд оруулсан гэж Интерфакс агентлаг мэдээлжээ.

Оросын нутаг дэвсгэрээс гадна байлдааны даалгавар биелүүлж яваад амь үрэгдсэн, тахир дутуу болсон эсвэл Оросын Баатар цол хүртсэн ахмад дайчдын хүүхдүүдийг квотоор сургахаар саналд тусгагдсан байна. Түүнчлэн тэднийг дунд сургуульд суралцах хугацаандаа их дээд сургуулийн бэлтгэл дамжаанд үнэ төлбөргүй сургах боломжийг бүрдүүлэх гэнэ.

Мөн ахмад дайчдын хүүхдүүд шалгалтгүйгээр их дээд сургуульд элсэн орох боломжтой болохын дээр “цэргийн алба хаагч эцэг эхийнхээ зам мөрөөр мөшгих” гэж байгаа хүүхдүүд элсэлтийн ерөнхий шалгалт өгөөд л цэргийн сургуульд элсэх боломжийг олгохоор төлөвлөж байгаа гэнэ.

Европын холбооны их чуулган энэ сарын 25-нд Франц улсын Страсбург хотод ОХУ-ын ямар ч төлөөлөлгүй хуралдсан нь сүүлийн 24 жилд болж байгаагүй үйл явдал болов. Өнгөрсөн гуравдугаар сарын 16-нд Европын холбооны дүрэм хариуцсан эрх бүхий төлөөлөгчид хуралдан Оросын тугийг буулган хурааж, энэ улсыг холбооноосоо хөөсөн юм. Энэ удаагийн чуулган Оросын түрэмгийллийг эсэргүүцэн тусгаар тогтнолоо хамгаалж буй Украинд хэрхэн туслах вэ гэсэн асуудал байв.

Чуулганаас гаргасан мэдэгдэлд “ ОХУ-ын Украинд учруулж буй харгислал нь зөвхөн энэ улсаар хязгаарлагдахгүй дэлхий нийтийн эрх ашигт сөргөөр нөлөөлж буй үйлдэл болоод байна” гэсэн заалтыг бараг бүх депутатууд дэмжин батлав. Мөн хуралд оролцогсод украинчуудын тусгаар тогтнолын эсрэг хийж буй дайныг зогсоохын тулд Кремлийн эрх баригчдад бүх талын шахалт, дарамт үзүүлэх ёстой гэдэг дээр санал нэгдэн, Европын холбоо Украинд хэрхэн туслахаас “Европын ирээдүй ямар байх нь шалтгаална” гэж үзсэн байна. Чуулганаас дайнд нэрвэгдсэн Украины иргэдэд гишүүн улс бүр бүх талаар тусалж, тус улсын газар нутгийн бүрэн бүтэн байдал, ялангуяа агаарын орон зайг дайсны довтолгооноос хамгаалахад онцгой анхаарах ёстой боллоо гэсэн шийдвэр гаргав.

Чуулган орос цэргүүдийн харгислал, ялангуяа энгийн иргэдийн эсрэг явуулж буй хүмүүн бус үйлдлүүд ил болж, улам олон болж нэмэгдэн батлагдсаар байгааг тусгай асуудал болгон авч хэлэлцэв. Европын холбооны депутатууд гишүүн улсууддаа олон улсад хүний эрх, эрх чөлөөг хөсөрдүүлсэн гэмт хэрэг гарч байгаатай уялдуулан өөрийн улсын хуулийн заалтуудаа ийм хэргийг мөрдөн шалгах, шийтгэл оноох чадвартай болгон өөрчлөн сайжруулахыг уриалаад “ОХУ-ын төр, засаг, цэргийн эрхтэнүүдийн энх тайвны эсрэг үйлдсэн гэмт хэргийг мөрдөн, шалгаж баримт, нотолгоонд нь үндэслэн шүүж тохирсон ял оноох эрх бүхий Олон улсын гэмт хэргийн тусгай шүүх яаралтай байгуулах” шийдвэрийг санал нэгтэй батлав.

Санал хураахын өмнө дээрх асуудлаар илтгэл тавьсан Германы депутат Франк Швабе “Би хоёрдугаар сарын 24-ний өглөө огт өөр ертөнц, огт өөр Европ тивд нойрноосоо сэрсэн. Би үүндээ өнөөдөр ч огт итгэж чадахгүй байна” гэж яриагаа эхэлсэн юм. Тэрээр “Европын холбооны бүх гишүүд Украинтай эв нэгдэлтэй байх хариуцлагатай цаг тулгараад байна. Бид оюун санаа, зүрх сэтгэлээрээ украин хүн байх шаардлага үүсээд байна” гэж илтгэлээ дуусгасан юм. Харин Францын депутат Жак Ле Ней “Оросын армийн үйлдэж буй эвдэн сүйтгэл болон харгислал биднийг үнэхээр цочирдуулан балмагдуулсан. Биднийг бүр их цочирдуулан балмагдуулсан явдал бол НҮБ-ын Аюулгүй байдлын байнгын хорооны байнгын гишүүн нэг улс өөрөө эзлэн түрэмгийлэх дайн дэгдээж, энгийн иргэдийг харгислаж байгаа явдал” гээд “Энэ харгис дайныг зогсоохын тулд Оросын эсрэг авч болох бүхнийг авч хэрэгжүүлэхийг уриалж байна” гэв. Харин Украины төлөөлөгч “Бидэнд Оросын эсрэг бодит хориг хэрэгтэй байна. Украинчуудын цустай Оросын хий, нефтийг худалдаж авахаа зогсоогооч ээ! Энхийн бүс болох Страсбург хотод хуралдаж байгаа манай улсын төлөөлөгчид энд иргэний онгоцны дуу сонсох болгондоо цочин, дав хийсээр байна” гэсэн билээ.

Чуулган дараа нь олон улсын хоригт орж хураагдсан Оросын авлига, луйвраар баяжсан олигархуудын хөрөнгийн асуудлыг хэлэлцэв. Хуралдаанаас Оросын олигархуудын хөрөнгийг цаашид илрүүлэн хураах ажлыг эрчимжүүлж, ОХУ-ын царцаагдсан хөрөнгөнөөс Украины цагаачдад дэмжлэг болгон зарцуулах, Оросын олигархуудын хөрөнгийг дайнд сүйтгэгдсэн Украиныг сэргээн босгоход зарцуулахаар шийдвэрлэв.

Г.АМАРСАНАА

БНСУ-д гадаа талбайд амны хаалт зүүх журмыг ирэх даваа гаргаас цуцална гэж тус улсын Ерөнхий сайд Ким Бу Кюм мэдэгджээ. Гэхдээ 50 болон түүнээс дээш хүн цугласан газарт, мөн олон чиглэлээр үйл ажиллагаа явуулдаг газруудад амны хаалт зүүх шаардлагатай хэвээр байна.

БНСУ-д “COVID-19” халдварын тохиолдлын тоо буурч байгаатай холбогдуулан цар тахлын өмнөх хэвийн амьдралын хэмнэлдээ эргэн орох үүднээс өнгөрсөн долоо хоногоос уулзалт, цуглаанд оролцох хүмүүсийн тоо, үйлчилгээний газруудын ажиллах цаг зэрэг хязгаарлалтын ихэнх арга хэмжээнүүдийг цуцалсан юм.

Сөүл хотноо өнөө өглөө болсон “COVID-19”-тэй тэмцэх асуудлаарх уулзалтын үеэр Ерөнхий сайдын хэлснээр, халдварын тохиолдлын тоо оргил үедээ хүрснээсээ хойш зургаан долоо хоногийн турш буурч байгааг, мөн хүмүүсийн санал бодлыг харгалзан үзсэний дүнд ийнхүү шийдвэрлэсэн байна.

БНСУ-д амны хаалт зүүх журмыг 2020 оны 10 дугаар сараас хойш мөрдөж байгаа бөгөөд одоогоор гадаа талбайд амны хаалт зүүгээгүй хүмүүст торгууль ногдуулж магадгүй байгаа юм. Ким Бу Кюм гадаа талбайд амны хаалт зүүх журмыг зарчмын хувьд сулруулж байгааг тодотгоод, спортын тэмцээн, тоглолт зэрэг 50-иас дээш хүн цугласан газарт амны хаалт зүүх шаардлагатай гэдгийг онцолжээ.

Мөн хүн хооронд нэг метрийн зай барихад хүндрэлтэй тохиолдолд, хүмүүс дуулж, хашгирч байгаа буюу агаар дуслаар халдвар тархах эрсдэлтэй нөхцөлд амны хаалт зүүхийг зөвлөж байна. Үүний зэрэгцээ “COVID-19”-ийн шинжилгээний хариу нь эерэг гарсан, халдвар авах эрсдэл өндөр хүмүүст амны хаалт заавал зүүхийг зөвлөх ажээ.

НҮБ зэрэг олон улсын байгууллагууд болон хэд хэдэн орон Украинд Оросын армийн үйлдсэн цэргийн гэмт хэрэгт буруутай этгээдүүдийг хариуцлагад татахад шаардлагатай бүхнийг хийнэ хэмээн амалжээ. Энэ талаар ВВС агентлаг дамжуулсан байна.

НҮБ-ын Хүний эрхийн дээд комиссар Мишель Бачелет мэдэгдэл хийхдээ цэргийн гэмт хэргийн золиос болсон хүмүүс болон тэдний ар гэрийнхэн нөхөн төлбөр авах ёстой хэмээн онцолсон байна. Түүний өгүүлснээр, Украинд үйлдэгдсэн цэргийн гэмт хэргийн улмаас 5939 энгийн иргэн хохирогч болсон гэдгийг баталсан бөгөөд тэдний 2787 нь амиа алдсан, 3152 нь шархадсан аж.

“Бодит тоо үүнээс хавьгүй их байгаа. Баримтуудыг тогтоохоор бид ажиллаж байна” хэмээн Бачелет мэдэгдээд эдгээр хүмүүс хүн ам шигүү суурьшсан газарт зэвсэг ашигласан, артиллерээр буудсан эсвэл бөмбөгдсөний улмаас хохирогч болсон гэдгийг онцолсон байна.

Харин Украины Ерөнхий прокурор Ирина Венедиктова мэдээлэл хийхдээ байлдааны ажиллагаа явуулах журмыг зөрчсөн 8000 гаруй хэрэг үүсгэн шалгаж байгааг онцолсон байна. Мөн Украинд дайн явуулах хуулийг зөрчсөн гомдлыг 43 орон гаргахаар болжээ.

НҮБ-ын ерөнхий нарийн бичгийн дарга Антонио Гутерреш Украин дахь мөргөлдөөнийг зогсооход зуучийн үүрэг гүйцэтгэх чиглэлд үргэлжлүүлэн хүчин чармайлт гаргасаар байна. Тэрбээр ОХУ-ын ерөнхийлөгч Владимир Путинтэй цэргийн түрэмгийлэл эхэлснээс хойш анх удаагаа уулзжээ. А.Гутерреш Оросыг хүч хэрэглэх явдлыг эхлүүлснийг шүүмжлээд, мөргөлдөөнд нэрвэгдсэн энгийн иргэдэд, ялангуяа Мариуполь хотод гацсан хүмүүст туслахад илүү их хувь нэмэр оруулахыг В.Путинд уриалсан байна. Хэвлэлүүдийн бичиж буйгаар ерөнхийлөгч, ерөнхий нарийн бичгийн дарга хоёрын яриа нэлээд халуухан уур амьсгалд болж өнгөрчээ. В.Путин “Мариуполийг бид нэгэнт эзэлчихсэн. Байлдааны ажиллагаа зогссон” гэдэг байр суурийг баттай илэрхийлж байсан төдийгүй, үүссэн нөхцөл байдалд олон улсын хамтын нийгэмлэгийг буруутгасан өнгө аястай үг хэлсэн аж. Гэхдээ ямар ч байсан Мариупольд хоргодож буй энгийн номхон иргэдийг нүүлгэн шилжүүлэх асуудлаар НҮБ, Улаан загалмай нийгэмлэгтэй хамтарч ажиллахыг зарчмын хувьд зөвшөөрсөн байна. НҮБ-ын хэвлэлийн төлөөлөгч С.Дюжаррикийн мэдээлснээр, В.Путин энэ санааг “зарчмын хувьд” зөвшөөрсөн бөгөөд ингэснээр энэ чиглэлд гаргаж буй хүчин чармайлтад НҮБ, Олон улсын Улаан загалмай нийгэмлэг оролцохоор болжээ.

В.Путины хувьд энхийн замаар шийдвэрлэх боломжийг эрэлхийлсээр байгаагаа онцлоод, цахим хэлбэрээр явагдаж буй хэлэлцээ эерэг үр дүнд хүрнэ гэж найдаж байна гэв. Гэсэн хэдий ч Украины тал өнгөрсөн сард Туркт хийсэн хэлэлцээний үеэр хүрсэн зарим тохиролцооноос буцсан гэдгийг нэмж хэлсэн байна. А.Гутерреш мягмар гаригт мөн Оросын Гадаад хэргийн сайд Сергей Лавровтой уулзаж, гал зогсоохыг уриалсан юм. С.Лавров хэлэхдээ, Өрнөдийн орнууд Украин руу зэвсэг илгээсээр байвал яриа хэлэлцээ амжилтгүй болох нь гарцаагүй хэмээгээд, хурцадмал байдал даамжирч байгааг анхааруулснаас гадна цөмийн мөргөлдөөний аюулыг дутуу үнэлж болохгүй гэсэн байна. НҮБ-ын тэргүүн мөн Украины ерөнхийлөгч Владимир Зеленскийтэй нийслэл Киев хотноо уулзах юм.

Маш олон улсад Ерөнхий нарийн бичгийн дарга Антонио Гутеррешийн энэхүү айлчлалыг ямар ч чадваргүй болсон, НҮБ-аа аврах гэсэн арчаагүй оролдлого гэж үзэж байгаа бөгөөд ялангуяа НҮБ-ын тэргүүнийг эхлээд Укрианд очиж нөхцөл байдлыг нүдээрээ хараагүй байж шууд Москвад айлчилсныг хурцаар шүүмжилж байгаа билээ. Иймээс Ерөнхий нарийн бичгийн дарга ядаж Украины Мариуполь хотын Азовсталь гангийн үйлдвэрээс энгийн иргэдээс гадна эх орноо хамгаалагчдыг аварч чадвал энэ нь украинчуудад төдийгүй НҮБ-ын хувьд маш чухал ач холбогдолтой ажил болох нь дамжиггүй.

BBC.CNN. REUTERS. NHK. TASS. Xinhua. Yonhap-гоос бэлтгэсэн Г.АМАРСАНАА

Саяхан Израил улсын ерөнхий сайдын гэр бүлийн зардалтай холбоотой шүүмжлэл тус улсын хэвлэлээр цацагдсан юм.

Үүнтэй холбогдуулан ерөнхий сайд Нафтали Беннет гэр бүлийнхээ хоол хүнсний зардлыг өөрөө төлж байх шийдвэр гаргажээ.

“Хэдийгээр манай гэр бүл тогтсон дүрэм журмыг зөрчөөгүй ч би олон нийтийн санаа бодлыг ойлгон хүлээж авч байна. Тиймээс өнөөдөр би ажилтнууддаа манай гэр бүлийн хоол хүнсний зардал миний хувийн данснаас гарч байхаар болсныг мэдэгдлээ. Би мөнгөний төлөө эсвэл хүндлүүлэх гэж энэ ажлыг аваагүй. Харин Израилын иргэдэд бүх чадлаараа үйлчлэх гэж ажиллаж байгаа ба цаашдаа ч үргэлжлүүлэн зүтгэх болно” гэж тэр мэдэгдсэн байна.

Сар бүр ерөнхий сайдын урсгал зардалд төсвөөс $26,400 зарцуулдгаас $7,400 нь хоол хүнсэнд зориулагддаг ажээ.

Түүний өмнөх ерөнхий сайд Бенжамин Нетаньяхугийн үед энэ зардлын хэмжээ $84,300 байсан юм байна. Нетаньяхуг татвар төлөгчдийн мөнгийг гамгүй үрдэг гэсэн шүүмжлэл байнга дагадаг байв.

Харин өнгөрсөн оны зургаадугаар сард томилогдсон Нафтали Беннет өмнөх ерөнхий сайдаас өөрөөр ажиллахыг хичээж байгаа.

Тухайлбал тэр Израилын ерөнхий сайдын албан өргөөнд амьдрахаас татгалзаж, Тель-Авивын захад орших хувийн байрандаа амьдарч байна.

Хэвлэлд түүний зардалтай холбоотой шүүмж гарсны дараа Беннет өөрийгөө өмнөх ерөнхий сайдын гаргадаг байсан зардлыг эрс бууруулснаа олон нийтэд тайлбарласан юм. Гэхдээ тэр хоол хүнсний зардлаа өөрөө төлөх шийдвэрийг гаргасан байна.

Беннет нь улс төрд орохоосоо өмнө технологийн хоёр компани үүсгэн байгуулсныгаа нийт $250 гаруй саяар зарж байжээ. Тэр одоо ерөнхий сайдын албыг хашаад сар бүр $16,500-ын цалин авдаг нь Израилын дундаж цалин болох $3,400-аас нэлээд өндөрт тооцогддог байна.