Category: гадаад

Оросын сансар судлалын “Роскосмос” агентлагийн тэргүүн Дмитрий Рогозин хэвлэлд ярилцлага өгөхдөө дэлхийн тэргүүн тэрбумтан Элон Маскийг “Нацист Азовын батальон” гэж нэрлэгддэг Украины армийн салбаруудад “Starlink”-ийн тоног төхөөрөмж өгсөн гэж буруутгажээ. “Элон Маск Украин дахь фашист хүчнийг харилцаа холбоогоор хангахад оролцсоныхоо төлөө насанд хүрсэн хүний ёсоор хариуцлага хүлээх ёстой болно” гэж Рогозин заналхийлсэн байна. Харин Элон Маск уг заналхийллийн хариуд, “Хэрвээ би учир битүүлгээр нас барах юм бол чамайг гэдгийг нь мэдэхэд таатай байна” гэжээ.

Элон Маск Украины Гадаад хэргийн сайдын хүсэлтээр Оросын түрэмгийллийн үеэр Украиныг интернэттэй байлгахын тулд дэлхийн нам тойрог замд 2000 гаруй хиймэл дагуултай “Starlink” сүлжээг ашиглах тоног төхөөрөмж бэлэглэсэн юм.

Оросын талаас “Starlink” сүлжээг хакердах, гацаах ородлого дөрөвдүгээр сард хэд хэд гаргасныг Элон Маск баталсан. Тиймээс үүний эсрэг арга хэмжээ авахад анхаарч ажиллаж байна гэв. Халдлагын эсрэг хариу арга хэмжээ авахтай зэрэгцээд Оросын түрэмгийлэгчдийг хаана юу хийж байгааг илрүүлэхэд өндөр технологийн “Starlink” сүлжээ Украины талд давуу байдал бий болсон гэж албаны хүмүүс мэдэгдээд байсан юм. Энэ сүлжээ нь Оросын их буунуудаас 5-20 км хол буудаж сум нь “GPS” системээр байгаа онодог барууны их буугаар зэвсэглэж буй Украины армид маш том давуу байдал бий болгож байгаа билээ.

BBC.CNN. REUTERS. NHK. UKRINFORM.TASS.Global Times.Xinhua. Yonhap-гоос бэлтгэсэн Г.АМАРСАНАА

НҮБ-ын Ерөнхий Ассамблей Дэлхийн хүний эрхийн байгууллагын зөвлөлд ОХУ-ын оронд Чех улсыг элсүүлжээ.

Дөрөвдүгээр сарын 7-ны өдөр Украины асуудлаар хуралдсан Ерөнхий ассамблейн санал хураалтын үр дүнд ОХУ-ын гишүүнчлэлийг түдгэлзүүлсэн. Харин зүүн европын орнууд дундаас нэр дэвших боломжтой цорын ганц боломжит улс нь Чех байсан аж.

Тус зөвлөлд шинэ улсыг гишүүнээр элсүүлэх санал хураалтыг нууцаар явуулсан бөгөөд Чех нийт 157 санал авч, 2023 оны арванхоёрдугаар сарын 31-нийг хүртэл гишүүнээр сонгогджээ.

Хүний эрхийн зөвлөл нь НҮБ-ын засгийн газар хоорондын тогтолцооны байгууллага юм. 2006 онд байгуулагдсан тус зөвлөл нь 47 гишүүнтэй бөгөөд нууц санал хураалтаар нэг гишүүн улсыг гурван жилээр сонгодог юм байна.

Эх сурвалж: ТАСС

Киевт цэргийн тусламж үзүүлэх явдлыг хялбар болгон Украинд “ленд-лийз” гэрээгээр зэвсэг нийлүүлэх тухай хуульд АНУ-ын ерөнхийлөгч Жо Байден Оросын ялалтын баярыг давхацуулан гарын үсэг зурав. “Украины ардчиллыг хамгаалах 2022 оны хууль” нэртэй уг баримт бичгийг ОХУ Украин руу довтолж эхлэхээс өмнө буюу энэ оны нэгдүгээр сард Конгресст өргөн бариад байсан юм. Харин энэ сарын 3-нд уг хуулийн төслийг АНУ-ын Конгрессын Төлөөлөгчдийн танхим олонхын саналаар (417 нь дэмжин, 10 нь эсэргүүцэж) баталсан ба үүнээс өмнө уг хуулийн төслийг Сенатын танхим батлаад байсан билээ.

Уг хуульд АНУ-ын ерөнхийлөгч “эдгээр орнуудын батлан хамгаалах чадавхыг бэхжүүлэх, энгийн иргэдийг ОХУ-ын болзошгүй халдлага, эсвэл тус улсын зүгээс үргэлжилж буй түрэмгийллээс хамгаалахад туслах зорилгоор Украинд болон ОХУ-ын Укриан руу хийсэн довтолгооны улмаас хохирсон Зүүн Европын бусад улсад батлан хамгаалахын зэвсэг, тоног төхөөрөмжийг зээлээр олгох, түрээслэхийг Засгийн газарт зөвшөөрнө” хэмээн заасан юм.

Энэхүү хууль нь Дэлхийн II дайнд эргэлт гаргах гол нөхцөл болсон, АНУ-аас холбоотнууддаа зэр зэвсэг, цэргийн тоног төхөөрөмж, хоол хүнсийг урьдчилгаа төлбөргүйгээр урт хугацааны зээлээр нийлүүлж байсан ленд-лийзийн тухай хуультай адил хэрэгжих юм. Дэлхийн II дайны үед энэ тусламжийг гол хүлээн авагч нь эхлээд Англи удалгүй Зөвлөлт Холбоот Улс болж байв.

Украины ерөнхийлөгч Владимир Зеленский АНУ болон Жо Байденд уг тусламжийн хөтөлбөрийг дахин сэргээсэнд талархал илэрхийлсэн байна. “Эрх чөлөө, ирээдүйнхээ төлөө хийж буй тэмцэлд Украинд дэмжлэг үзүүлсэнд ерөнхийлөгч Жо Байденд болон Америкийн ард түмэнд баярлалаа. “Ленд-лийз”-ийн тухай хуульд өнөөдөр гарын үсэг зурсан нь түүхэн алхам боллоо. Бид хамтдаа дахин ялна гэдэгт итгэлтэй байна. Бид Украины, мөн Европын ардчиллыг яг 77 жилийн өмнөх шигээ хамгаалах болно” гэж В.Зеленский твиттер хуудсандаа англиар бичжээ.

“Ленд-лийз”-ийн тухай хууль нь ихэвчлэн зэвсгийн худалдаанд гардаг хүнд суртлын үйл явцыг ихээхэн хялбаршуулдаг аж. Энэ тохиолдолд Америк хүссэн зэвсгээ Украин болон Зүүн Европын бусад улсуудад төлбөргүйгээр шууд түрээслэх боломжтой болж байгаа юм. “Энэ хуульгүй байхад цэргийн тоног төхөөрөмжийг түрээслэхдээ Украин улс таван жилийн дотор АНУ-д буцааж өгч, эвдрэл хохирлыг нөхөн төлөх ёстой байсан. Харин уг хууль нь энэ хязгаарлалтыг арилгаж байна” гэж Катоны Институтийн улс төрийн шинжээч Жордан Коэн хэлжээ. Үүнээс гадна, энэ хууль нь Жо Байденыг Украинд чухам ямар төрлийн зэвсгийг яаралтай түрээслэхийг хүсч байгаа талаараа Конгресст заавал үндэслэл гаргах шаардлагагүй болгож байна гэж Коэн нэмж хэлсэн байна.

“Ленд-лийз”-ийн гэрээний тухай хууль нь Москватай хийж буй энхийн хэлэлцээнд Киевийн байр суурийг бэхжүүлэх зорилготой гэж Атлантын зөвлөлийн “For­ward Defense” хөтөлбөрийн шинжлэх ухааны ахлах ажилтан Томас Уоррик үзэж байна. “Энэ нь украинчуудад төдийгүй Путинд түүний эсрэг илүү сайн, олон тооны зэвсэг, сум удахгүй бэлэн болно гэсэн дохио болж байна” гэж Уоррик хэлжээ.

Г.АМАРСАНАА

Украин дахь үйлдлээсээ болж барууны орнуудын авсан арга хэмжээний хариуд “ОХУ Европ дахь Элчин сайдын яамуудаа хаах бодолгүй байна” гэж Оросын хэвлэлүүд мэдээлжээ. Тодруулбал, Гадаад хэргийн дэд сайд А.Грушко төрийн мэдлийн РИА агентлагт мэдээлэл өгөхдөө “Энэ нь бидний уламжлалд байдаггүй. Тиймээс дипломат төлөөлөгчийн газруудын ажил чухал гэж үзэж байна” гэжээ.

Харин өчигдөр /2022.05.09/ Польш улсад суугаа Оросын Элчин сайд руу улаан өнгийн будаг цацсан явдал болсон. Тэрээр энэ үеэр Дэлхийн хоёрдугаар дайнд нацист Германыг ялсны 77 жилийн ойг тохиолдуулан Варшав дахь Зөвлөлтийн оршуулгын газарт цэцэг өргөх гэж байсан юм. Тэгвэл “улаан будаг”-ны хариуд Оросоос Польш руу хатуу үгтэй эсэргүүцлийн ноот илгээсэн талаар олон улсын хэвлэлүүд мэдээлжээ.

Эх сурвалж: CNN

БНСУ-ын шинэ Ерөнхийлөгч Юн Сог Ёл мягмар гаригт /2022.05.10/ тангараг өргөж, албан ёсоор ажилдаа орлоо.

Тэрбээр тангараг өргөх ёслолын үеэр хэлсэн үгэндээ Хойд Солонгосын цөмийн хөтөлбөр аюул заналхийлэл учруулж байгаа ч Умард цөмийн зэвсгээсээ татгалзвал эдийн засгийг нь сэргээх, ард түмнийх нь амьдралын чанарыг дээшлүүлэх “зоримог” төлөвлөгөө хэрэгжүүлэхэд бэлэн гэж мэдэгдэв.

26 жил прокуророор ажилласан 61 настай Юн Сог Ёлыг хоёр том сорилт хүлээж байна гэж Ройтерс бичжээ. Нэг нь Умард Солонгосын цөмийн хөтөлбөр бол хоёр дахь том асуудал нь хоёр жил үргэлжилсэн ковид-19 цар тахлаас үүдэлтэй инфляц.

Тэрбээр Умард Солонгосын талаар хатуу бодлого баримтлах тухай дохио өгч байсан ч тангараг өргөх ёслолын үеэр Пёньянтай яриа хэлэлцээг үргэлжлүүлэх хүсэлтэй байгаа илэрхийлэв.

Түүний хэлснээр, Умард Солонгосын цөмийн хөтөлбөр БНСУ төдийгүй Зүүн хойд Азийн аюулгүй байдалд заналхийлж байгаа ч яриа хэлэлцээний үүд хаалга нээлттэй байгаа бөгөөд асуудлыг энхийн замаар шийдвэрлэх боломжтой гэж Юн Сог Ёл онцолсон байна.

БНСУ-ын ерөнхийлөгчийн сонгууль гуравдугаар сарын 9-нд болсон. “Иргэний хүч” намаас нэр дэвшсэн Юн Сог Ёл 48.56 хувийн санал авч, ялалт байгуулсан бол түүний гол өрсөлдөгч, эрх баригч “Тобуро” намын нэр дэвшигч Ли Жэ Мён 47.83 хувийн санал авсан юм.

“G7” гэгддэг “Их долоо”-гийн улсууд нэгдэн Оросын газрын тосны импортоос аажмаар татгалзах, эсвэл хориглох үүрэг хүлээцгээв. Энэ тухай “G7”-ийн улсуудын удирдагчдын цахим бага хурлын дараа нийтлэгдсэн Цагаан ордны мэдээлэлд дурдсан байна.

Учир нь Европын Холбооны байнгын төлөөлөгчид хэд хоног хэлэлцсэний эцэст Оросын эсрэг нефтийн хориг тавих тухай нэгдсэн тохиролцоонд хүрч чадаагүй байгаа юм. ОХУ-ын газрын тосны нийлүүлэлтээс ихээхэн хамааралтай зарим улсын нефть хангамжийн аюулгүй байдлыг хэрхэн хангах асуудлыг судлах ажил эхэлсэн гэж тус холбооны Зөвлөлийг даргалж буй Франц улс болон Европын Комисс тавдугаар сарын 8-нд мэдэгдээд байна. Мөн тэд сүүлийн хэдэн өдөр харилцан буулт хийх саналуудыг идэвхтэй хэлэлцэж, үр дүнд нь томоохон ахиц дэвшил гарсан гэдгийг онцолсон юм.

Тус цахим хуралд мөн Украины ерөнхийлөгч Володимир Зеленский Канадын ерөнхий сайд Жастин Трюдотой хамт цахимаар оролцжээ. Энэ үеэр АНУ-аас Оросын Сбербанк, Газпромбанкны менежерүүд, түүнчлэн Оросын телевизийн гурван сувгийн эсрэг шинэ хориг арга хэмжээ авснаа мэдэгдсэн байна. “АНУ “Нэгдүгээр суваг”, “Россия-1”, “Телевизийн НТВ компани” гэсэн хамгийн олон үзэгчтэй, шууд болон шууд бусаар төрийн хяналтад байдаг гурван сувагт хориг арга хэмжээ авч байна” гэж Цагаан ордны мэдэгдэлд дурджээ. АНУ-ын эрх баригчид мөн цөмийн аж үйлдвэр зэрэг Оросын хэд хэдэн салбарт бараа бүтээгдэхүүн экспортлохыг хоригложээ. Түүнчлэн Орос, Беларусийн 2600 албан тушаалтан шинэ хоригт өртсөнөөс гадна оросуудад зөвлөх, зар сурталчилгаа, нягтлан бодох бүртгэлийн үйлчилгээ үзүүлэхийг АНУ-ын компаниудад хориглосон байна.

ХБНГУ “G7”-г даргалж эхэлснээс хойш тус бүлгийн удирдагчид гурав дахь удаагаа уулзсан нь энэ юм. Хурал Дэлхийн II дайн Европт дууссаны ойн үеэр болж байгааг Берлин дэх Холбооны засгийн газрын албан ёсны төлөөлөгч уулзалтын өмнө онцолсон байна.

Тэрээр 77 жилийн өмнө дууссан дайн Европ тивд урьд өмнө байгаагүй аймшигт үхэл, сүйрлийг авчирсан тул өнөөдөр “G7”-ийн эв нэгдэл “урьд өмнө хэзээ ч байгаагүйгээр чухал болоод байна” гэж тэрбээр цохон тэмдэглэжээ. Харин энэхүү уулзалтад оролцсон Их Британийн ерөнхий сайд Борис Жонсон “Өнөөдөр Украинд газар нутгаа хамгаалаад зогсохгүй эзлэн түрэмгийлэгчдийг эх нутгаасаа хөөн гаргах зэр зэвсэг хэрэгтэй болоод байна” гэж мэдэгдсэн байна.

Г.АМАРСАНАА

АНУ-ын тэргүүн хатагтай Жилл Байден өнгөрсөн ням гаригт Украинд айлчилж, тус улсын тэргүүн хатагтай Олена Зеленскийтэй уулзжээ.

Тэрбээр “Би Ээж нарын өдрийг тааруулан энд ирлээ. Энэхүү харгис дайныг зогсоох ёстой, Украины ард түмэнтэй АНУ-ын ард түмэн эв санааны нэгдэлтэй байгааг харуулах гэж би энд ирээд байна” гэж хэлсэн байна. Олена Зеленский Жилл Байденд зоригтой алхам хийж ирсэнд нь талархал илэрхийлээд “Цэргийн ажиллагаа өдөр бүр болж, агаарын дуут дохио дуугарч байгаа дайны үеэр АНУ-ын тэргүүн хатагтай энд ирсэн нь бидэнд том итгэл найдвар өгч байна” гэжээ. Тэргүүн хатагтай нар Украины дүрвэгсэд болон хүүхдүүдийн талаар ярилцав. Ингэснээрээ Жилл Байден Украины дайн болж буй нутаг дэвсгэрт хөл тавьсан АНУ-ын хамгийн өндөр албан тушаалтан болж байгаа билээ.

Жилл Байден, Олена Зеленский нар дайнаас дүрвэгсдийн хоргодох байр болсон дунд сургуулийн байранд хүүхдүүдтэй уулзаж, тэдэнд бэлэг тараасан байна.Энэ өдөр бас Канадын ерөнхий сайд Жастин Трюдо Украины нийслэл Киев хотод гэнэтийн айлчлал хийлээ. Тэрээр Киев хотод Канадын Элчин сайдын яамаа дахин нээж, Украины ерөнхийлөгч Владимир Зеленскийтэй уулзахдаа тус улсад үзүүлэх зэр зэвсгийн тусламжаа 36.7 сая евро болгон нэмэгдүүлж буйгаа дуулгасан байна. Трюдо мөн Оросын цэргүүд энгийн иргэдийн эсрэг дайны гэмт хэрэг үйлдсэн Ирпин тосгонд зочилж, нөхцөл байдалтай биечлэн танилцжээ.

Энэ өдөр мөн Ирландын дэлхийд алдартай “U2” рок хамтлагийн гишүүд бөмбөгдөлтөөс хоргодох байр болон ашиглагдаж буй Киевийн метроны өртөөн дээр тоглолтоо хийсэн нь гэнэтийн сонин үйл явдал байлаа. Тус хамтлагийн гоцлол дуучин Боно, гитарчин Дэвид Ховел Эванс нар хэд хэдэн хит уран бүтээлээ украинчуудад хүргэсэн юм. “Украины ард түмэн зөвхөн өөрсдийнхөө эрх чөлөөний төлөө бус, эрх чөлөөнд хайртай хүн бүхний өмнөөс тулалдаж байгаа” гэж Боно хэлжээ. Тэрээр энэ үеэр төрөлх Ирланд нь түүхийнхээ турш Их Британитай хэрхэн дайтаж байсан, өнөөдөр эдгээр улсууд ямар тайван амгалан амьдралтай болсныг дурдсан байна. “Та бүхнийг ийм амар амгалан амьдралтай хурдан золгуулахын төлөө бид залбирч байх болно” гэж Боно тоглолтынхоо үеэр хэлжээ. Боно Украинд тус улсын ерөнхийлөгч Владимир Зеленскийн урилгаар ирснийг “U2” хамтлагийн твиттер хуудсанд мэдээлсэн байна.

Барууны улсын томчууд ээлж дараалан Украинд айлчилж, Киев хотод элчин сайдын яамдаа дахин нээж байгааг олон улсын шинжээчид эдгээр улсууд Путины цөмийн цохилт төдийгүй ерөөс Оросоос айхгүй болсны илрэл. Урьд нь барууны улсуудын удирдагчид бүгд “Путиныг бүү буланд шах. Түүнийг бүү уурлуул” гэдэг байсан. Харин одоо Украин заавал ялах ёстой гэдэг болсон. Энэ бол цоо шинэ үзэгдэл хэмээн дүгнэн бичицгээж байна.

Г.АМАРСАНАА

Украинд Оросын эзлэн түрэмгийлэх дайн эхэлснээс хойш 200 гаруй тэсрэх бөмбөг илрүүлсэн нохойд медаль гардуулах ёслол Киев хотноо болжээ.

2 нас хагастай Патрон нэртэй нохойд Украины ерөнхийлөгч Володимир Зеленский медалийг өөрөө гардуулсан байна.

Тэсрэх бодис олж илрүүлэх эрдэмд суралцсан уг нохой эзний хамт Украины зүүн хойд Чернихов хотод Оросын цэргүүдийн үлдээсэн газрын минийг аюулгүй болгох ажил гүйцэтгэдэг гэнэ.

Патроныг Украины онцгой байдлын газар өөрийн бэлгэдэл болгожээ.

Медаль гардуулах ёслолд Киев хотод хүрэлцэн ирээд байгаа Канадын ерөнхий сайд Жастин Трюдо бас оролцсон байна.

Эх сурвалж: The Guardian