Category: энтертаймент-ертөнц

Өнгөрсөн аравдугаар сард Бразилын Порто Алегре хотын иргэдийн хурлын төлөөлөгчид усны тоолуурын талаар хуулийн төслийг хэлэлцэж баталсан аж. Гэтэл арваннэгдүгээр сарын 23-ны өдрөөс хүчин төгөлдөр үйлчилж эхэлсэн уг хуулийн төслийг хиймэл оюуны ChatGPT платформоор боловсруулсан нь өнгөрсөн долоо хоногт олон нийтэд ил болжээ. Учир нь уг хотын иргэдийн хурлын төлөөлөгч Рамиро Росарио хуулийн төслийг ChatGPT ашиглан боловсруулснаа хэвлэлд дэлгэсэн байна.

Тэрбээр уг хуулийн төслийг хиймэл оюунаар боловсруулахад ердөө 15 секундийн хугацаа зарцуулсаныг “Вашингтон Пост” сонинд ярьжээ.Росарио уг платформын асуултын цонхонд “Усны тоолуур алдагдсан тохиолдолд хотын ус, бохирын албанаас шинэ тоолуурын төлбөрийг өмчлөгчөөс авахыг хориглох захиргааны хуулийн төслийг Порто Алегре хотын гүйцэтгэх засаглалаас биш, хууль тогтоох байгууллагаас боловсруулах” гэсэн утгатай хүсэлтийг бичиж оруулсан байжээ.

Гэтэл уг ChatGPT хэдэн сарын турш маргаан болж байсан асуудлын шийдлийн хоёр хувилбарыг хэдхэн секундийн дараа гаргаж өгсөн нь Росариог ихэд гайхшируулсан гэнэ. Росарио хуулийн төслөө хиймэл оюунаар боловсруулсаныг мэдэгдэлгүй танилцуулахад хотын иргэдийн хурлын 36 төлөөлөгч хуулийн үг хэллэгт бага зэргийн өөрчлөлт оруулан бүгд дэмжсэн байна.

Порто Алегре хотын хурлын төлөөлөгчдийн дарга Хамилтон Соссмейер эхэндээ үнэнийг нуусан хэмээн Росариог буруутгаж, “буруу жишиг тогтоолоо” хэмээн шүүмжилж байсан бол харин сүүлд “Би хиймэл оюуны технологийн боломжийн талаар илүү гүнзгий уншиж судаллаа. Харамсалтай нь, эсвэл азаар ч гэх юм уу, ийм хандлага давамгайлах цаг үе ирж буйг би ойлгосон” гэж хэвлэлд ярьжээ.Харин Росарио хиймэл оюунаар боловсруулсаныг нь мэдвэл хэчнээн зөв шийдэл байсан ч хурлын төлөөлөгчид эсэргүүцэх магадлалтай байсан тул нуухаас өөр аргагүй болсон гээд “Хиймэл оюун ухаан төрийн байгууллагууд, албан хаагчдын нөөц бололцоо, цаг хугацааг оновчтой болгож, тэдний ажлыг илүү чухал зүйлд хандуулахад тусална гэдэгт би итгэлтэй байна” гэжээ.

Г.АМАРСАНАА

Жил бүр шинэ жилийг угтан Монгол Улсын Филармониос зохион байгуулдаг “Snow Melody” тоглолт арванхоёрдугаар сарын 23-нд Соёлын төв өргөөний тайзнаа болох гэж байна. Шинэ жилийн баярт зориулан тусгайлан бэлддэг “Snow Melody” тоглолтыг энэ жил FatCat Jazz Club-тай хамтран зохион байгуулж байгаа ба үзэгчид, хөгжимд дурлагсдын өвөл бүр тэсэн ядан хүлээдэг тоглолтын нэг болсон билээ.

Энэ жилийн “Snow Melody” тоглолтын гол дүр Жожо нэрээрээ олонд танигдсан, жазз дуучин Б.Өнөрзул аж. Дуучин Жожо мэргэжлийн шилдэг уран бүтээлчидтэй нэгдэн шинэ жилийн сэдэвт хөнгөн цолгиун, хөвсөлзүүлсэн уянгалаг дуунуудаар үзэгчдийн сонорыг мялаах юм.

Тоглолтод “Төрийн Соёрхолт” Баянмонгол чуулга, Улсын Филармонийн симфони найрал хөгжмийн цөөхүүл, удирдаач С.Саруул-Од, дуучин Н.Наранбаатар /Наагий/, Г.Тэнүүн, Ж.Ариунжаргал / Ариу/, О.Энх-Эрдэнэ, Б.Энхжаргал нар оролцоно.

Шинэ жилийн шидэт мэдрэмжийг бэлэглэх онцгой нэгэн үдшийг хайртай дотнын хүмүүстэйгээ хамтдаа үзэж сонирхоорой!

Тоглолт: 2023.12.23-нд 19:00 цагаас Соёлын Төв Өргөөнд

ТАСАЛБАРЫГ: www.fatcatjazzclub.com

Нэмэлт мэдээлэл: linktr.ee/snowmelody

Холбоо барих: 86108160

Монголын үндэсний Кино урлагийн зөвлөл, “Кино гүүр хөгжлийн холбоо” төрийн бус байгууллагатай хамтран зохион байгуулсан “Хархорум” олон улсын кино наадам өндөрлөлөө. Уг кино наадмыг дэлхий даяар хүний эрхийг дээдэлж, аливаа ялгаварлалаас ангид бүх талаар тэгш эрхтэй байхыг баталгаажуулсан Хүний эрхийн түгээмэл тунхаг батлагдсаны 75 жилийн ойг тохиолдуулан “Хүний эрх 75” сэдвийн дор зохион байгуулсан байна.

Уг наадмын “Шилдэг уран сайхны кино”-гоор найруулагч Б.Амарсайханы “Эргэж ирэхгүй намар” /Harvest Moon/ шалгарсан. Тус  уран сайхны кино нь олон улсын 17 кино наадамд сонгогдон шалгарч, нэр дэвшиж байсан. Мөн тэрээр есдүгээр сард АНУ-ын Чикаго хотноо 15 дахь удаагаа зохион байгуулагдсан “Chicagos Asian pop up cinema” фестивальд “Карьерын оргил амжилт” шагналыг хүртэж байсан. Түүний найруулагчийн анхны бүтээл “Эргэж ирэхгүй намар” киноноос Монгол сүнс мэдрэгдсэн, гайхалтай уран бүтээл болсон гэж тус фестивалийн үүсгэн байгуулагч София Фон Бочиа хэлсэн байна.

“ЭРГЭЖ ИРЭХГҮЙ НАМАР” кино нь Vancouver International Film Festival-н Vanguard уралдаант хэсэгт шалгарч Дэлхийн нээлтээ хийснээс хойш 95 дахь удаагийн Оскарт эх орноо төлөөлөн оролцож мөн Энэтхэг, Иран, Итали, Канад, Швейцар, Солонгос, Польш, Испани, Америк, Нидерланд, Хятад, Хонконгийн нийт 12 кино фестивалиудад шалгарч, Тайвань болон Итали улсуудын кинотеатруудаар гаран, Монгол орныг дэлхийн үзэгчдэд таниулж байгаа уран бүтээл юм.

Монголын Үндэсний Кино урлагийн зөвлөл, Кино гүүр хөгжлийн холбоо НҮТББ нар хамтран “Хархорум” олон улсын кино наадмыг арванхоёрдугаар сарын 7-12-ны өдрүүдэд Улаанбаатар хотноо зохион байгуулах гэж байна.

“Хархорум” олон улсын кино наадам нь жил бүр онцлог нэгэн сэдэвт анхаарал хандуулах ба тухайн сэдвээр сүүлийн хоёр жилд бүтээсэн уран сайхны кинонуудыг сонгон оролцуулж шилдэг уран сайхны кино, шилдэг баримтат кино, тухайн сэдвийн ивээн тэтгэгчийн нэрэмжит шагнал гэсэн нэр хүндтэй гурван шагналын төлөө өрсөлдүүлэх юм. Мөн наадмыг жил бүр Монголын нэг шинэ бүтээлээр нээх ба наадам нь уралдаант хэсэг, уралдаант бус хэсэг, чадавхжуулалтын хөтөлбөр, кино үзвэр гэсэн хэсгүүдээс бүрдэх юм.

Энэхүү кино наадмыг дэлхий даяар хүний эрхийг дээдэлж, аливаа ялгаварлалаас ангид бүх талаар тэгш эрхтэй байхыг баталгаажуулсан Хүний эрхийн түгээмэл тунхаг батлагдсаны 75 жилийн ой тохиож буйтай холбогдуулан “Хүний эрх 75” сэдвийн дор зохион байгуулах юм.

Түүнчлэн наадмын үеэр 15 улсын 22 киног үзүүлэх ба дэлхийн томоохон кино наадмуудын шагналт уран бүтээлчдийн шилдэг кинонуудыг үзүүлэх бол уралдаант хэсэгт 9 орны 14 кино өрсөлдөж байна. Үүнд, Венец, Пусан, Берлин, Токиогийн кино наадмын шагналт тэр дундаа Оскарын шагналт найруулагчын шилдэг уран бүтээл багтаж буй билээ.

Тус кино наадмын хөтөлбөр боловсруулагчаар Н.Цогтбаяр, Б.Онон, Мариа Разакамболи, Ким Ян Ву нар ажилласан бол шүүгчээр найруулагч, зохиолч Малколм Кларк (Оскарын шагналт найруулагч), жүжигчин Ким Хе На, кино зохиолч, найруулагч Н.Уранчимэг, жүжигчин С.Ариунбямба, эрхзүйч Ч.Алтангэрэл нар ажиллана.

Мөн олон улсын зочдоор найруулагч Чунг Жи Яан, найруулагч, продюсер Хан И, продюсер Жун Санг Мин, продюсер Эллен Ким, продюсер И Жонг Хо, найруулагч Вахагн Хачатрян, кино найруулагч Арен Малакян, жүжигчин Стефани Ариэнн нар оролцох юм.

Иймээс Монголын кино урлагийн салбарын уран бүтээлчид болон үзэгчид дэлхийн томоохон кино наадмуудын захирал, хөтөлбөр боловсруулагчидтай уулзах боломжтой ба мастер класс, сургалтад нь хамрагдаж, нэр хүндтэй кино найруулагч нартай биечлэн уулзан ярилцах, зөвлөгөө авах боломж бүрдэж буй аж.

“Хархорум” олон улсын кино наадмын үеэр буюу арванхоёрдугаар сарын 7-12-ны өдрүүдэд нийт 15 улсын 22 киноны 45 удаагийн кино үзвэрийг үнэ төлбөргүй толилуулахаар төлөвлөжээ.

Кино наадмын үеэр толилуулах үзвэрийг танилцуулъя.

Жүжигчин Б.Одгэрэл Египет улсын соёлын сайдын ивээл доор зохион байгуулж буй “Шарм Эл-Шейх” олон улсын театрын наадамд амжилттай оролцож, “Шүүгчдийн нэрэмжит шагнал” хүртжээ.

Дэлхийн 57 орны 413 бүтээлээс бүрэн хэмжээний театрын бүтээлийн төрөлд 81, гудамжны театрын төрөлд 40, моно драмын төрөлд 31 буюу нийт 152 бүтээл шалгарсны нэг нь Монголын уран бүтээлчдийн “Галт шувуу” нэг хүний жүжиг байсан бөгөөд олон улсын наадмын нээлтийг хийсэн байна.

2024 оны Олимпийн үеэр Парисын метроны тасалбарын үнэ бараг хоёр дахин нэмэгдэнэ гэж Францын нийслэлийн бүсийн тэргүүн мягмар гарагт  мэдэгджээ.

Парис хотын дарга өнгөрсөн долоо хоногт бүс нутгийн эрх баригчдын үзүүлж буй нийтийн тээврийн үйлчилгээ хангалтгүй байх болно гэж анхааруулсан. Олимп долдугаар сарын 26-наас наймдугаар сарын 11-ний хооронд, Паралимп наймдугаар сарын 28-наас есдүгээр сарын 8-ны хооронд болно.

“Гамлет” жүжиг өнөөдрөөс IPTV-үүдийн видео сангуудад байршлаа. Тодруулбал, Дэлхийн сонгодог урлагийн ноён оргил болсон “Гамлет”-ыг УДЭТ-ын тай¬знаа 1979 онд, Урлагийн гавьяат зүтгэлтэн С.Галсанжав найруулан тавьж, Гамлетын дүрд Ардын жүжигчин Г.Жамсранжав тоглож байв. Тэгвэл эл алдарт жүжгийг Төрийн соёрхолт, Урлагийн гавьяат зүтгэлтэн Н.Наранбаатар 2012 онд дахин “төрүүлж”, гол дүрүүдэд Хөдөлмөрийн баатар, Ардын жүжигчин П.Цэрэндагва, Ардын жүжигчин Б.Жаргалсайхан, Гавьяат жүжигчин С.Болд-Эрдэнэ тэргүүтэй уран бүтээлчид тоглосон юм. Тэгвэл “Цахим театр” төслийн хүрээнд эл жүжгийг өнөөдрөөс IPTV-үүдийн видео сангуудад өнөөдрөөс байршууллаа.

1600-гаад оны сүүлчээр бичигдсэн, таван бүлэг, 20 үзэгдэлт “Гамлет” жүжгийн үйл явдал Эльсинор шилтгээнд өрнөнө. Данийн ван өөрийн төрсөн дүүдээ хорлогдон хаан ширээ, хань ижил, газар нутгаа алдахад хүрч буйг эл жүжигт үзүүлдэг. Хаан ширээ, эрх мэдэл, эд хөрөнгийн төлөөх увайгүй тэмцэл нь үеийн үед хүн төрөлхтнийг эмгэнэлт байдалд оруулсаар ирсэн. “Гамлет” жүжиг ч бас үүний нэгэн адил. Түнэр харанхуй цайзын хонгилд бодол болон гуниглах Гамлет “Орших уу, эс орших уу” хэмээн өгүүлнэ. Бат бэх чулуун хэрэмт энэ цайз нэгэн цагт түүний төрсөн гэр байсан бол харин одоо шорон гяндан мэт санагдах болжээ. Шударга ёс, хүнлэг чанар, үнэнч сэтгэл гэдэг энэ цайзад нэгэнт үгүй болсон байв. Орчлон хорвоогийн бузар булайтай эвлэрээд үхсэн мэт амьд явах уу, эсвэл энэ бүхний эсрэг халуун амь, бүлээн цусаа зориулаад мөнхийн амьтай үхэх үү гэдэг л Гамлетын өмнө тулгарчээ.

Солонгосын алдарт охидын хамтлаг “BLACKPINK”-ийн гишүүдэд Их Британийн  төрийн хамгийн дээд шагнал болох MBE-г /Member of the Most Excellent Order of the British Empire/ Лондон хотноо өчигдөр гардуулан өгчээ.

Их Британийн эзэн хаан Ханхүү III Чарльз тус хамтлагийн гишүүдийн уран бүтээлээрээ дамжуулан дэлхийн уур амьсгалын өөрчлөлтийн эсрэг тэмцэлд оруулсан хувь нэмрийг нь үнэлэн тус шагналыг олгожээ.