Category: эдийн-засаг

2015 оны 5 дугаар сарын 15-ны өдрөөс эхлэн Монголын хөрөнгийн биржийн арилжаагаар хийгдэх хувьцааны арилжааны шимтгэлийн хувь хэмжээг гүйлгээний үнийн дүнг үл харгалзан 2015 оны 8 дугаар сарын 15-ны өдрийг хүртэл түр хугацаанд 0.15 хувь болгон бууруулах шийдвэр хэрэгжиж эхлэхээр боллоо.

“Монголын хөрөнгийн бирж” ТӨХК-ийн төлөөлөн удирдах зөвлөлийн 2015 оны 4 дүгээр сарын 30-ны өдрийн хурлаар Монголын хөрөнгийн биржийн “Электрон арилжааны системийн арилжааны журам”-д өөрчлөлт оруулж, уг өөрчлөлтийг Санхүүгийн зохицуулах хороогоор батламжлуулаад байна.

Зах зээлийн өнөөгийн нөхцөл байдалд тохируулан авч буй энэхүү арга хэмжээ нь үнэт цаасны зах зээлд хөрөнгө оруулалт хийх зардлыг бууруулах, мэргэжлийн байгууллагууд болон хөрөнгө оруулагчдыг дэмжихэд чухал ач холбогдолтой юм.

Бүгд Найрамдах Болгар Улсын Ерөнхийлөгч Росен Плевнелиевийн Монгол Улсад хийж буй айлчлалын хүрээнд “Монгол Болгарын бизнес форум” өнөөдөр Гадаад хэргийн яаманд эхэллээ. Форумыг нээж Монгол Улсын Ерөнхий сайд Ч.Сайханбилэг үг хэлсэн юм. Ерөнхий сайд Монгол, Болгар улс бизнесийн салбарт хамтран ажиллах гурван шалтгаан байгааг онцоллоо.

Тэрбээр “Нэгдүгээрт, манай хоёр улсад улстөрийн хүсэл сонирхол бий. Энэ хүрээнд өндөр хэмжээний төрийн айлчлал уулзалтууд болж байна. Одоо цаг нь болсон. Манай хоёр улс “win win” зарчмаар ажиллах боломжтой. Хоёрт, хамгийн их амжилт олж болох салбарууд нь хоорондоо төстэй. Болгар улс мэдээллийн технологийн салбар, компьютер үйлдвэрлэлээрээ дэлхийд дээгүүрт бичигддэг. Энэ амжилтаас нь монголчууд хуваалцах боломжтой. Түүнчлэн эмийн үйлдвэрлэл, хүнс хөдөө аж ахуйн салбар, болгар сарнайг нуагшуулах, метроны системийг нэвтрүүлэх гээд олон чиглэлээр хамтран ажиллах боломж бий. Гуравт, Монголчууд бид өөрсдийгөө далайд гарцгүй гэдгээрээ сул талтай гэж үздэг. Тэгвэл бидэнд хоёр том далай байна. Далай гэдгийг хашилтал хэлж байна. Монголчуудын далайн зам бол Орос, Хятадын томоохон зах зээл юм. Болгар улсын хятадын зах зээл рүү гарах боломжийг Монгол Улс бий болгож өгнө. Харин Монгол Улсад европын зах зээлд гарах нөхцөл бүрдэнэ. Монгол Улсын газар хоёр улсын бизнесийн салбарын хамтын ажиллагааг бүхий л талаар дэмжин ажиллахаа илэрхийлж байна” гэсэн юм.

Мөн форумыг нээж Бүгд Найрамдах Болгар Улсын Ерөнхийлөгч Росен Плевнелиев үг хэлсэн. Энэ удаагийн форумд Болгарын талаас “Ажил олгогч эздийн холбоо”, “Мэдээлэл, программ хангамжийн холбоо”-ны төлөөлөл, бизнес эрхлэгч компаниудын төлөөлөл, Монголын талаас Уул уурхайн яам, Мэдээллинй технологи, шуудан харилцаа холбооны газар, Хөрөнгө оруулалтын газар, бусад бизнесийн салбарынхан оролцож байна.

Болгар Улсын Ерөнхийлөгчийн хувьд манай улсад нэлээд өргөн бүрэлдэхүүнтэй айлчилж буй.

Он гарсаар эрчимтэй өсч байсан ам.долларын ханш өчигдрийн байдлаар 1953 төгрөгтэй тэнцэв. Монголбанкны зарласан ханшаар 1947 төгрөгтэй тэнцэж байгаа бол “Найман шарга” валют арилжааны зах дээр 1954 төгрөгтэй тэнцэж байсан юм. Өнгөрөгч дөрөвдүгээр сарын 15-ны байдлаар ам.доллар 1990 төгрөгт хүрсэн, түүнээс хойш тасралтгүй буурсан үзүүлэлттэй байна.

-ВАЛЮТЫН ОРОХ УРСГАЛ АМ.ДОЛЛАРЫН ХАНШИД НӨЛӨӨЛЖ БАЙНА-

Засгийн газар валютын урсгал орж ирэх сувгуудаа яаралтай сайжруулах хэрэгтэй байгааг эдийн засагчид онцолж байлаа. Одоогийн ханш бол эдийн засгийн суурь нөхцөл байдлыг шууд харуулж буй. Цаашид валютын орох урсгалыг нэмэгдүүлснээр ам.долларын ханш тогтворжих боломжтой. Сар орчмын өмнө 1990 төгрөгт хүрээд байсан ам.долларын ханшид ХХБ-аас гаргасан бондын хагас тэрбум ам.доллар зах зээлд нийлүүлэгдэх цуурхал багагүй нөлөөлж эхэлсэн. Засгийн газрын үнэт цаасыг арилжааны банкууд худалдаж авснаар өнөөдөр банкуудад 800 сая ам.долларын үнэ бүхий үнэт цаас байна. Энэ нь Засгийн газрын баталгаатай бонд бөгөөд Худалдаа хөгжлийн банк 500 сая ам.долларыг нь мөнгө болгосон төдийгүй дахин 300 сая ам.доллар гаднаас оруулж ирэх боломжтой юм байна. Оны өмнөхөн энэхүү таамаг яригдаж байсан нь биеллээ олж байгаа билээ. Мөн “Tranding economics” судалгааны байгууллагаас гаргасан судалгаагаар “Оны эхний улиралд ам.доллар 1963 төгрөгтэй хэлбэлзэнэ, оны 2-р улиралд 1923 төгрөг хүртлээ буурч гурав, дөрөвдүгээр улиралд 1885 төгрөг хүртлээ буурах төлөвтэй байна” гэсэн байна.

Татварын хөнгөлөлт чөлөөлөлтөд хамрагдахаар улсын хэмжээнд 71.9 мянган иргэн тайлангаа ирүүлж 44.1 тэрбум төгрөгийн буцаан олголт олгохоос нийслэлийн хэмжээнд 33.1 мянган иргэнд 24.5 тэрбум төгрөгийн албан татварыг буцаан олгох юм байна. Татварын ерөнхий газраас энэ сарын 15-20 хүртэл татварын буцаан олголтын хоёрдугаар ээлжийг зохион байгуулахаар төлөвлөжээ. Эхний ээлжинд 11.6 мянган татвар төлөгчийн 9.5 тэрбум төгрөгийн буцаан төлөлтийг баталгаажуулж, нийслэлийн Төрийн сангаас өнгөрсөн сард олгосон байна. Хоёрдугаар ээлжинд нэгдүгээр сарын 20-ноос хоёрдугаар сарын 15-ны хооронд тайлангаа өгсөн иргэд хамрагдах аж.

Хөгжлийн банкинд Үндэсний аудитын газраас хийсэн шалгалтын дүн хэвлэлүүдээрмэдээлэгдэж буй. Өнөөдрийг хүртэл байр сууриа илэрхийлээгүй Хөгжлийн банкнаас мэдэгдэл гаргажээ. Мэдэгдлийг бүрэн эхээр нь хүргэе.

Сүүлийн үед өдөр тутмын зарим сонин болон цахим хуудсуудад Монгол Улсын Хөгжлийн банкинд хийсэн аудитын шалгалтын тайлан, дүгнэлт нэртэй ташаа мэдээлэл гарч байгаатай холбогдуулан Монгол Улсын Хөгжлийн банкны зүгээс албан ёсоор дараах мэдэгдлийг хийж байна.

Үндэсний Аудитын газраас “Засгийн газраас гаргасан үнэт цаас болон Чингис, Самурай бондын хөрөнгийн зарцуулалт, Хөгжлийн банкны тухай хуулийн хэрэгжилт, Хөгжлийн банкны санхүүжилтээр хэрэгжсэн төслийн үр дүн”-д аудит хийсэн бөгөөд Үндэсний аудитын газраас аудитын тайлангаа 2015 оны 4 дүгээр сарын 30-ны өдөр Улсын Их Хурлын албан ёсны цахим хуудас www.paliament.mn –нд байршуулсан билээ.

Гэтэл зарим нэг хэвлэл мэдээллийн хэрэгслүүд мэдээллийн эх сурвалжаа сайтар шалгалгүйгээр Үндэсний аудитын газрын дүгнэлттэй зөрүүтэй буруу ташаа мэдээллийг Үндэсний аудитын газрын шалгалтын дүгнэлт хэмээсэн мэдээллийг олон нийтэд тараан нийгмийг төөрөгдүүлж байна.

Иймд хэвлэл, мэдээллийн хэрэгсэл нь аливаа асуудалд ул суурьтай, нухацтай хандаж, олон нийтэд үнэн зөв бөгөөд бодит мэдээлэл хүргэх эрх, үүргийнхээ хүрээнд үнэн зөв мэдээллийг бэлтгэн нийтэлнэ гэдэгт бид найдаж байна. Түүнчлэн аливаа хэвлэл, мэдээллийн хэрэгслүүд нь үндэслэлгүй, буруу ташаа мэдээллийг дахин түгээсэн тохиолдолд Монгол Улсын Хөгжлийн банкны нэр хүндэд учруулсан хохирлыг тухайн мэдээлэл цацсан байгууллагаас нэхэмжлэхээс гадна холбогдох хуулийн дагуу эрх бүхий байгууллагаар шалгуулах болохыг хариуцлагатайгаар мэдэгдэж байна.

Нэмж тайлбар хүргүүлэхэд, баталгаажуулсан эх сурвалжгүйгээр үндэслэлгүй мэдээлэл түгээсэн зарим өдөр тутмын сонин, цахим хуудсууд энэхүү үйлдэлдээ албан ёсоор хүлцэл өчин, залруулга хийж байгаа билээ.

2015 оны 5 дугаар сар 04

МОНГОЛ УЛСЫН ХӨГЖЛИЙН БАНК

УИХ-ын Эдийн засгийн байнгын хорооноос байгуулсан Хөгжлийн банкны үйл ажиллагааг шалгах Ажлын хэсгийн ахлагч, УИХ-ын гишүүн Л.Энх-Амгалан өнгөрсен пүрэв гаригт Хөгжлийн банкинд хийсэн шалгалтын талаар мэдээлэл хийнэ гэж зарласан боловч мэдээлээгүй байгаа. Шалгалтын дүн ирэх долоо хоногт бэлэн болох юм байна. Үүний дараа олон нийтэд танилцуулах аж.Хөгжлийн банкаар дамжсан бонд, төсөл, хөтөлбөрийн санхүүжилтэд нэлээд зөрчил илэрсэн гэх мэдээлэл цацагдаж байгаа юм.

Өнөөдөр /2015.05.07/ болсон гадаад валютын дуудлага худалдаагаар арилжааны банкуудаас 1949.80-1952.00 төгрөгийн ханшаар 5.5 сая ам.доллар худалдах санал ирүүлсэн ч Монголбанк энэ удаагийн арилжаанд оролцсонгүй.

Мөн өнөөдрийн ээлжит гадаад валютын своп, форвард хэлцлээр банкууд 8.0 сая ам.доллар худалдах ам.долларын своп хэлцэлийн, 2.0 сая ам.доллар худалдан авах төгрөгийн своп хэлцэлийн санал ирүүлж, Монголбанк саналыг 100 хувь биелүүлэв.

Тодруулга, Гадаад валютын дуудлага худалдаа гэдэг нь валютын дотоодын захын үйл ажиллагааг ил тод, нээлттэй явуулах, үр ашгийг нэмэгдүүлэх, төгрөгийн ханшийн тогтвортой байдлыг хангах, зах зээлийн зарчмаар тодорхойлох зорилгоор Монголбанкнаас захад оролцох нэг арга хэрэгсэл юм.

Монголбанкнаас гадаад валютын дуудлага худалдааг долоо хоног бүрийн мягмар, пүрэв гарагт тогтмол зохион байгуулдаг ба дуудлага худалдаанд зөвхөн банкны үйл ажиллагаа эрхлэх зөвшөөрөлтэй, Монгол Улсын нутаг дэвсгэр дээр үйл ажиллагаа явуулж буй банкууд оролцдог.

Монголбанк нь валютын дотоодын захад оролцогчдод аливаа мэдээллийг нээлттэй хүргэхийг дэмжиж ажилладаг бөгөөд энэхүү мэдээллийн эцсийн зорилго нь валютын захын тогтвортой байдал, төгрөгийн ханшийн огцом хэлбэлзлийг үүсгэхгүй байхад чиглэгддэг.

Эх сурвалж: mongolbank.mn

Монгол банкнаас гаргасан энэ оны нэгдүгээр улирлын Төлбөрийн тэнцлийн урьдчилсан гүйцэтгэлээр гадаадын шууд хөрөнгө оруулалт 72.2 сая ам.долларын алдагдалтай гарчээ.

Өнгөрсөн оны эхний улиралд 294 сая долларын гадаадын шууд хөрөнгө оруулалт Монгол Улсад орж байсан бол энэ оны эхний улиралд 366 сая доллараар буурч, 72 сая долларын алдагдалтай болсон байна. Үүний гол шалтгаан нь нэгдүгээр сард гадаадын шууд хөрөнгө оруулалт 88.1 сая долларын алдагдалтай гарсантай холбоотой аж. Хөрөнгө санхүүгийн тэнцэл өнгөрсөн оны мөн үед 258.4 сая долларын ашигтай байсан бол энэ оны эхний улиралд 89 хувиар буурч, 28.9 сая доллар болжээ.

Уул уурхайн шинжилгээ туршилтын лабораториос нүүрсний чанарын дундаж үзүүлэлтийг олон нийтэд мэдээлсэн байна. Тухайлбал, энэ сарын 13-17-ны өдрүүдэд Монгол Улсын экспортод гарсан нүүрсний чанарын дундаж үзүүлэлтийг гаргасан бөгөөд түүнд дурдсанаар ажлын чийг 4.7 хувь, үнслэг 12.0 хувь, дэгдэмхий бодисын гарц 29.4 хувь, Илчлэг 6720 ккал/кг, Хүхэр 0.8 хувь, чөлөөт хөөлтийн зэрэг 5.0, барьцалдах чанарын үзүүлэлт 53 зэрэг бүхий нүүрс хилээр гарсан гэж шинжээчид үзжээ.

Монголын Хөрөнгийн биржийн 2015 оны дөрөвдүгээр сарын 21-ний өдрийн үнэт цаасны арилжаагаар “II” болон “III” ангилалд бүртгэлтэй нийт 23 хувьцаат компанийн 27,184 ширхэг хувьцаа, Засгийн газрын үнэт цаасны анхдагч зах зээлийн арилжаагаар 12 долоо хоногийн хугацаатай, 14.988 хувийн хүүтэй, 209,049 ширхэг ЗГҮЦ арилжигдаж нийт 20,918,168,300.00 төгрөгийн гүйлгээ хийгдлээ. Энэ өдөр MSE ALL индекс 943.87 нэгж болсон нь өмнөх өдрөөс 1.00 хувиар буурсан үзүүлэлттэй байна.