Улаанбаатар хотын есөн дүүргийн 118 байршилд 3х3 сагсан бөмбөгийн стандартын шаардлага хангасан талбай шинээр байгуулах талаар нийслэлээс төлөвлөжээ. Энэ хүрээнд Баянзүрх дүүргийн 24 дүгээр хороонд 3х3 сагсан бөмбөгийн талбай, ногоон байгууламж, тоглоомын талбай бүхий тохижилтыг хийж дууссан байна. Тус дүүргийн зүгээс энэ ондоо багтаан иж бүрэн тохижилттой 15 талбайг барьж, ашиглалтад оруулахаар төлөвлөжээ.
Сагсан бөмбөгийн 3×3 төрөлд монгол тамирчид амжилт гаргасаар байна. Хамгийн сүүлд Сингапурт болсон 3х3 сагсан бөмбөгийн Азийн аварга шалгаруулах тэмцээнд Монгол Улсын эрэгтэй шигшээ баг таван удаа түрүүлсэн амжилтаар тэргүүлж, ирэх есдүгээр сард болох FIBA 3×3 U23 Nations League Final-д өрсөлдөх эрхээ аваад байгаа юм.