Б.Тамир: Монголын сагсан бөмбөгийн шигшээ баг С.Эрдэнэ гишүүний хүсэлтээр олон улсын тэмцээнээс хасагдлаа

-ТАМИРЧИД АЛЬ НЭГ ХОЛБООНООС БИШ МОНГОЛ УЛСЫН НЭРИЙН ӨМНӨӨС АЗИЙН ЭЛСНИЙ НААДАМД ОРОЛЦОХ БАЙЛАА-

Тайландын Пукет хотноо энэ сарын 14-23-ны өдрүүдэд болох Азийн элсний IV наадамд манай улсын сагсчид оролцох боломжгүй болжээ. Энэ талаар Монголын сагсан бөмбөгийн холбоо (МСБХ)-ны ерөнхийлөгч Б.Тамиртай ярилцлаа.

-Монголын үндэсний сагсан бөмбөгийн холбоо (МҮСБХ)-ноос Монголын сагсчдыг олон улсын тэмцээнд оролцуулахгүй байх талаар Монголын үндэсний олимпийн хороонд ханджээ. Үүнээс болж сагсчдыг тэм­цээнд явуулахгүй байх шийдвэрийг Монголын үндэсний олимпийн хороо гаргасан юм байна. Сагсан бөмбөгийн холбоод хэзээнээс зөрчилдөх болсон юм бэ?

-Олон улсын сагсан бөм­бөгийн холбоо, Монголын үндэсний олимпийн хорооны гишүүн, тавин жилийн түүхтэй холбоо нь ерөөсөө Монголын сагсан бөмбөгийн холбоо шүү дээ. Сагсан бөмбөгийн холбоо гэж өөрсдийгөө нэрлээд байгаа бусад нь Монголын сагсан бөмбөгийн холбооныхоо доор буюу салбар зөвлөл нь болж ажиллах ёстой. Гэтэл УИХ-ын гишүүн С.Эрдэнийн нарийн бичгийн дарга Н.Тулга гэдэг залуу гурван жилийн өмнө Үндэсний сагсан бөмбөгийн холбоо гэдэг төрийн бус байгууллага байгууллаа гээд намайг удирдах зөвлөлдөө орохыг гуйж байлаа. Тэр холбоо гээч нь одоо будлиан хутгаад байна.

Уг нь МСБХ нь Олон улсын сагсан бөмбөгийн холбооноос зохион байгуулж байгаа тэмцээн уралдаанд баг тамирчдаа оролцуулах албан ёсны эрхтэй.

-Тийм бол одоо яагаад Азийн элсний наадамд оролцуулахгүй гээд байгаа юм бэ?

-Ерөөсөө л Инчоны наадамд Монголын сагсчид амжилттай оролцоод ирэхэд УИХ-ын гишүүн С.Эрдэнэ, түүний нарийн бичгийн дарга Н.Тулга нарын уур нь хүрсэн. Монгол Улсын сагсчид багаараа амжилт гаргаад ирж байхад МСБХ-ны нэр хүнд өсчихлөө гээд байж ядаад байгаа юм. МСБХ тамирчдыг авч яваад амжилтын эзэн болчихлоо гэж уурлаад байгаа нь инээдтэй. Тэднийхээр МҮСБХ гэдэг төрийн бус байгууллага тэр амжилтын эзэн болох ёстой байж. Шалтгаан нь ерөөсөө л энэ. Азийн Элсний наадамд манай тамирчид мөнгө, хүрэл медаль авч байсан. Одоо дахиад медаль аваад ирэх магадлалтай. Тэгэхээр дахиад МСБХ-ны нэр гарахаас тэд айж байна. Нэр хүндийн төлөө бүхнээ зориулдаг хүмүүс бусдын нэр гарахаас үхтлээ айдаг юм байна. Тиймээс тамирчдыг явуулахгүй гэж Монголын үндэсний олимпийн хороо руу бичиг бариад гүйж байна шүү дээ.

-МҮСБХ тамирчдыг олон улсын тэмцээнд оруулахгүй байхыг шаардах эрхтэй гэж үү?

-Эрх байхгүй. Монгол Улсыг төлөөлж явах гэж байгаа найман тамирчин ямар ч гэмт хэрэг үйлдээгүй. Шүүхээс тэднийг гадаадад гарахыг хориглоогүй. Энэ нь ерөөсөө л С.Эрдэнэ гэдэг хүний хувийн амбицаас эхтэй. МСБХ-ны ээлжит бус чуулган 2014 оны гуравдугаар сарын 23-нд болсон юм. Тэр чуулганд С.Эрдэнэ, Н.Тулга нар ирсэн. Тэр үеэр МСБХ-ны ерөнхийлөгчийн сонгууль нууцаар явагдсан. С.Эрдэнэ гишүүн надтай өрсөлдсөн юм. Нууцаар санал өгсөн хүмүүсийн 68 хувь нь намайг сонгосон. Би 17 жилийн турш улсын чанартай тэм­цээнд оролцсон сагсчин хүн. Сагсчид сагсчнаа дэмжсэн. Энэ нь С.Эрдэнэд таалагдаагүй учраас чуулган хууль бус боллоо гээд шүүхэд өгчихсөн. Маргаашнаас нь эхлээд хэвлэл, мэдээллийн хэрэгслээр “Хурал хууль бус болсон. Би сонирхож байгаад гараад явчихсан” гэж ярьж эхэлсэн. С.Эрдэнэ гишүүн сонгуульд оролцсоныг тэнд байсан хүн бүр мэдэж байгаа. Шүүх нь С.Эрдэнийн гомдлыг хүлээж авч л байдаг.

-Шүүх хоёр холбоо байж болно гэж шийдвэр гаргасан юм биш үү?

-Тэгсэн. Үүнд С.Эрдэнэ гишүүн ханаагүй. Тэр хүн өөрөө МСБХ-г авах гээд үзээд байгаа хэрэг. Дараагийн сонгуулийнхаа сурталчилгаанд ашиглах л гэж тэр байх. Сонгуулийн насныхны талаас илүү хувь нь сагсан бөмбөгт дуртай. Тэгэхээр сонгогчдын дурладаг сагсны төлөө юм хийж байгаа гэж харагдах нь л тэр хүнд чухал. Түүнээс тэр хүн сагсан бөмбөг гэж юу байдгийг мэдэхгүй.

-С.Эрдэнэ гишүүн холбоог нь дэмжээд та мэргэжлийн хүний хувьд сагсчдынхаа бэлтгэлд анхаараад хамтарч ажиллаж болохгүй гэж үү?

-С.Эрдэнэ гишүүний аав Монголын сагсан бөмбөгийн холбооны ахмад үе шүү дээ. Содномзундуй агсны нэрэмжит тэмцээнийг зохион байгуулах хүсэлт МСБХ-нд ирсэн юм билээ. Тэр үед би холбооны ерөнхийлөгч биш тамирчин байсан. Өөр тэмцээн давхцаад Содномзундуй агсны нэрэмжит тэмцээнийг зохион байгуулж амжаагүй гэсэн. Ингээд л Н.Тулга нь С.Эрдэнэд энэ талаар буруу ойлгуулаад зөрчилдүүлээд эхэлсэн. Бидэнд ч санхүүгийн дэмжлэгээс эхлээд тус хэрэг­тэй. Хамтраад ажиллахад болохгүй юм байхгүй. Дэмжээд өгвөл бид PR-ийг нь хангалттай хийгээд өгнө. Гэтэл тэр хүн өөрөө МСБХ-ны үйл ажиллагаанд саад хийгээд эхэлсэн. Улсын бүртгэлийн газарт хүртэл манай холбоог бүртгүүлэхгүй гэсэн. Бид жил гаруй хөөцөлдөж, шүүхийн шийдвэрээр холбоогоо Улсын бүртгэлийн газарт бүртгүүлж байгаа юм. Үүний дараа ээлжит бус чуул­­ган болоход С.Эрдэнэ гишүүн “Би сонгогд­сон ч, сонгог­доогүй ч та бүхэн­тэйгээ хамтарч ажиллана” гэж орж ирчихээд ялагда­хаараа бидний эсрэг дахиад мэдээлэл хийгээд, шүүх­дээд эхэлсэн. Ингээд ажил хийлгэхгүй байхаар яаж хамтарч ажиллах юм бэ.

-Инчоны наадамд явахад ийм маргаан гараагүй юм уу?

-Гаралгүй яах вэ. МСБХ тамирчдыг авч явах ёсгүй гээд бөөн хэрүүл, зарга хийсэн. Уг нь Олон улсын сагсан бөмбөгийн холбооноос манай холбоог ир гээд байдаг. Гэтэл бөөн бичиг баримт, хэрүүл болж байж С.Эрдэнийн холбоо, Эмэгтэйчүүдийн сагсан бөмбөгийн холбооны дөрвөн хүн бидэнтэй хамт явсан. Манайхаас хоёр хүн явсан.

-Тамирчдаа бас булаацалддаг уу?

-Тамирчид аль нэг хол­боонд харъяалагдахгүй. Тэдний эрх ашиг ч зөрчигдөх ёсгүй. Бүртгэлтэй гэж яри­вал Т.Санчираас эхлээд МСБХ-нд бүртгэлтэй. Т.Сан­чир хэдэн настай билээ, хэдэн жил сагс тоглож байгаа билээ энэ утгаар нь бодвол гурван жилийн түүхтэй МҮСБХ-нд ямар ч хамаагүй. Гэхдээ тамирчид амжилт гаргаад ирэхэд С.Эрдэнэ гишүүн тусалсан, дэмжсэн гэж өөрийнхөө PR-ийг хийсэн л гэсэн. Үнэндээ нэг төгрөг ч өгөөгүй, бэлтгэл хийж байхад нь нэг удаа ч ирээ­гүй. МСБХ 17 жилийн турш Лигээ зохион байгуулж ирсэн. 18 дахь жилээ зохиох гэтэл С.Эрдэнийн холбоо Спортын төв ордны заалыг авчихсан. Спортын төв ордон манайд заал өгдөггүй байсан. Үүнээс болж тамирчид хохирох ёсгүй. Бид заалгүй боллоо гээд тамирчдыг лигт нь битгий ор гэж хэлэх ёсгүй. Та нар “Үндэсний лиг”-т нь ороо. Харин бэлтгэлээ өөр заал түрээслэж хийе л гэсэн. Тамирчид тэр лигт нь хоёр жил оролцсон. Энэ жил Спортын төв ордны заалаа авах байх гэж бид найдаж байна. Хүсэлтээ өгсөн, хувиараа ч уулзсан. Заал шийдэж өгнө гэж найдаж байна. МҮСБХ даваа, лхагва, баасан гаригт заал авчихсан гэсэн. Бид үлдсэн мягмар, пүрэв, бямбад нь авъя гэж хандахад бодолцъё л гэсэн.

Энэ сард С.Эрдэнийн хол­бооноос зохион байгуулдаг “Үндэсний лиг”-т оролцох баг алга. Гол таван баг нь оролцохгүй гээд гарын үсэг зураад явж байна. Тамирчидтайгаа хамтарч ажилладаггүй холбооны тэмцээнд оролцохгүй гэсэн бичиг өгсөн байна лээ.

-МҮСБХ нь гадаадаас тоглогчид авчирснаар тамирч­дын амжилтад нөлөөлснийг үгүйсгэх аргагүй байх.

-Тэгж өөрсдөө ярьдаг юм. Үнэндээ тухайн баг нь өөрсдөө гадаадаас тамирчдаа авчирдаг. Аль нэг холбоо авчирдаггүй. Лигт оролцож байгаа тав, зургаан багийн ахлагч өөрсдөө тамирчдаа сонгож, урьдаг юм шүү дээ.

-Багийн спортоор амжилт гаргаад эхлэ­хээр эндээ ирээд хэрүүл хийгээд тэмцээн уралдаанд явуулахгүй гээд байхаар олон улсад муухай харагдаад эхлэх юм биш үү?

-Тэр хүмүүст наадахаа хэлээд ичмээр байна шүү гээч. Тамирчдыг явуул л даа. Тэр бүү хэл С.Эрдэнийн холбооноос Олон улсын сагсан бөмбөгийн холбоонд бичиг явуулчихсан байна. Эндэх хэрүүлийнхээ тухай бичээд МСБХ-г холбооноосоо хасаач гэж хүссэн байна. Ийм ичмээр. Тийм уйваагүй. Олон улсын сагсан бөмбөгийн холбооноос бидэнд “Юу болоод байна вэ. Бид албан ёсны холбоогоо дэмжиж ажиллана” гэсэн хариу ирсэн.

Монголын үндэсний олимпийн хороонд өгсөн бичгийг нь харахад Инчоны наадамд Монголын тамирчид оролцохгүй байсан гэж байна шүү дээ. Одоо Азийн элсний наадамд оролцуулбал Монголын үндэсний олимпийн хороог шүүхэд өгнө гэж байна шүү дээ. Шүүхэд өгнө гэсэн болохоор Монголын Үндэсний олимпийн хороо тамирчдыг явуулахгүй гэдэг шийдвэр гаргачихсан. Уг нь тамирчид манай холбооны биш Монгол Улсын нэрийн өмнөөс тэмцээд оролцох гэж байгаа юм шүү дээ. Тийм учраас салбарын сайд нь байна уу, Ерөнхийлөгч нь байна уу “Тамирчдыг явуул” гэдэг шийдвэрээ гаргаасай гэж хүсч байна.

Монголын сагсан бөм­бөгийн шигшээ баг таван жилийн турш гадаадын тэмцээн уралдаанд оролц­сон. Олон улсын тэмцээнд оролцож эхлэхээсээ өмнө МСБХ-ны удирдлага дор маш олон жил бэлтгэл сургуулилт хийсэн. Тэр үед МҮСБХ гэгч төрийн бус бай­гууллага хаана байсан юм бэ.

-Олон улсын тэмцээнд тамирчдаа оролцохгүй гэж хүртэл маргалдаж байгааг харахад сагсан бөмбөгийн холбоог удирдах нь тийм ашигтай байдаг юм болов уу гэж бодогдлоо.

-Би энэ холбоог удирд­санаас хойш хувиасаа 70, 80 сая төгрөг гаргасан. Найз нөхдийн минь дэмжлэгийг нэмэхээр 150. 160 сая төгрөг гарсан. Надад нэг ч төгрөгийн ашиг байхгүй. Харин ашиг нь тамирчдын минь амжилт. Энэ ажлыг тогоонд нь байдаг, сэтгэлтэй хүн хийдэг юм. Одоо Мон­голын сагсан бөмбөгийн шигшээ багийн залгамж болох багийг бэлтгэж байна. Монголыг төлөөлөх брэнд бүтээгдэхүүн бэлтгэх нь л бидний ажлын үр дүн шүү дээ.

Ц.ӨРНӨХ