Дэлхийн дээвэр Эверестийн ноён оргилд эх орныхоо соёмбот тугийг мандуулсан анхны Монгол эмэгтэй уулчин Б.Гангаамаа өнөөдөр ээлжит авиралтаа Өмнөд Америкийн ноён оргил Аконкагуа /6962/ уулын оргилд амжилттай хийснээ дуулгалаа. Түүний багийн хамтран авирагч Хонконгийн эмэгтэй уулчин Вяан Чов 5500 метрт гараад авиралтаа зогсоосон байна.
Б.Гангаамаа Өмнөд Америкийн ноён оргилд Аконкагуа ууланд авирахаар 2015 оны 12 дугаар сарын 19-д эх орноосоо мордож байсан юм. Түүний хувьд ийнхүү Дэлхийн долоон тивийн ноён оргилын нэг болох Өмнөд Америкийн ноён оргил Аконкагуа ууланд амжилттай авиралтаа хийлээ.
Б.Гангаамаа өмнө нь 2013 онд эмэгтэйчүүдийн багийг удирдан энэ ууланд авирч байжээ. Тухайн үед хамгийн энгийн замыг сонгож авиралт хийсэн байсан бол энэ удаа уулын хамгийн хүнд зам болох 1934 оны польшуудын замаар авирахаар төлөвлөсан байснаа дуулгаж байсан.
Гавьяат тамирчин Б.Гангаамаа энэ сарын 23-ны өдөр эх орондоо ирэх юм.