БНХАУ-ын буцалтгүй тусламжаар хэрэгжиж буй “НОГООН НУУР-1008 АЙЛЫН ОРОН СУУЦ” төслийн гадна дулааны шугамын ажлыг есдүгээр сарын 29-өөс аравдугаар сарын 1-ний өдрүүдэд хийж гүйцэтгэх тул түр хугацаанд зам хаахаар болжээ.
Тодруулбал Улаанбаатар хот, Сүхбаатар дүүргийн есдүгээр хороо, Галданбошигтын гудамж, Баянбүрдийн тойргоос хойш Дэнжийн 1000-ын цагаан байр хүртэлх 600 метр авто замыг есдүгээр сарын 29-ний өдрийн 22:00 цагаас аравдугаар сарын 1-ний өдрийн 23:59 цаг хүртэл түр хаах юм байна.
НЗДТГ, Нийслэлийн Бизнес инновац хөгжлийн газар, Монголын үндэсний худалдаа аж үйлдвэрийн танхим /МҮХАҮТ/ хамтран 48 дахь жилдээ зохион байгуулж буй “Улаанбаатар түншлэл-2023” олон улсын үзэсгэлэн яармаг өчигдөр буюу есдүгээр сарын 28-ны өдөр нээлтээ хийлээ.
Үзэсгэлэнд ОХУ, БНХАУ, Бүгд Найрамдах Беларус Улсаас хөдөө аж ахуй, хүнс, барилга, эрүүл мэнд, хөнгөн үйлдвэрлэлийн 60 гаруй аж ахуйн нэгж, үндэсний үйлдвэрлэлийн 30 гаруй аж ахуйн нэгж, бизнес эрхлэгч оролцож, бараа бүтээгдэхүүн, үйлчилгээгээ танилцуулж байна.
Тус үзэсгэлэнгийн үеэр Монгол-Орос, Монгол-Беларусь, Монгол-Хятад бизнес уулзалтууд болох бөгөөд бизнес эрхлэгч, үйлдвэрлэгчид зах зээлээ өргөжүүлэх, өрсөлдөх чадвараа нэмэгдүүлэх, түншлэл бий болгох, хэрэглэгчийн эрэлтэд тулгуурласан оновчтой, экспортын шинэ бүтээгдэхүүний үйлдвэрлэл, үйлчилгээг нэмэгдүүлэх боломжтой.
“Улаанбаатар түншлэл-2023” олон улсын үзэсгэлэн аравдугаар сарын 1-ний өдрийг дуустал “Мишээл экспо” үзэсгэлэнгийн танхимд үргэлжилнэ.
Экологийн цагдаагийн албаны алба хаагчид нийт 36 орчим хүний хууль бусаар алт олборлосон үйлдлийг таслан зогсоож, техник хэрэгслийг хураан мөрдөн шалгах ажиллагааг үргэлжлүүлж байна хэмээн мэдээллээ.
Одоогийн байдлаар эдгээр этгээдэд байсан 135 сая орчим төгрөгийн алтыг хурааж авчээ.
Тодруулбал Булган аймгийн Бүрэгхангай сум, Төв аймгийн Заамар сумын нутаг дэвсгэрт хууль бусаар ашигт малтмал олборлож байсан Б, О нарын нэр бүхий 9, Б, Н нарын нэр бүхий 26 этгээд, алтыг худалдан борлуулдаг байж болзошгүй Я нарын үйлдлийг таслан зогсоожээ.
Ашигт малтмал олборлоход ашигласан экскаватор, том оврын автомашин, дунд оврын автомашин, техник хэрэгсэл 17, бусад техник хэрэгсэл, алт угаахад ашигласан тоног төхөөрөмжийг битүүмжилсэн байна.
Зах зээлийн ханшаар 135,408,000 орчим төгрөгөөр үнэлэгдэх 644.8 грамм алтыг эд мөрийн баримтаар хураан авчээ.
Монгол Улсын Ерөнхий сайд Л.Оюун-Эрдэнэ Булган аймагт ажилласан.
Энэ үеэрээ Булган аймгийн иргэдийн саналд үндэслэн Булган-Орхон-Хишиг-Өндөр-Гурванбулаг чиглэлийн босоо тэнхлэгийн хатуу хучилттай авто замын төгсгөл 67.8 км зам, Цогт хун тайжийн түүхэн цогцолбор, Тэшиг сумын авто зам, Боомтын сэргэлтийн хүрээнд Бага Илэнхийн боомт хүртэлх авто зам, Бугат сумыг авто замаар аймгийн төвтэй холбох санхүүжилт зэрэг ажлыг ирэх оны төсөвт тусгуулахаар боллоо гэж ЗТХЯ-наас мэдээллээ.
Монголын үндэсний бөхийн холбооноос тэгш тоотой саруудын эхний 14 хоногт “МҮБХ-ны Алтан цомын төлөөх” барилдааныг зохион байгуулахаар болсон. Хоёр дахь удаагийн “Алтан цом”-ын барилдаан ирэх аравдугаар сард эхэлнэ. Бөх сонирхогчдын үзэх дуртай энэ барилдаанд 21 аймаг болон Улаанбаатар хот, Өвөрмонгол, Тувагийн тус бүр нэг баг буюу нийт 24 баг оролцоно.
Шинээр оруулж ирсэн автобусны асуудлаар Нийслэлийн нийтийн тээврийн газрын дарга С.Жавхлантбаатар Хангарди ордонд өнөөдөр мэдээлэл хийлээ.
Тэрбээр “Өнөөдрийн байдлаар Улаанбаатар хотод 55 цахилгаан автобус оруулж ирсэн. Эдгээр автобус иргэдийн үйлчилгээнд явж байгаа.
Евро дизель хөдөлгүүрт “Daewoo” брэндийн 100 автобус оруулж ирсэн. Сошиал орчинд 80 автобустай холбоотой шүүмжлэл өрнөж буй. Эдгээр 80 автобусыг өнөөдөр газар дээр нь очиж үзлээ.
“Daewoo” үйлдвэрээс гарсан тухайн автобуснуудыг хүлээн авах Ажлын хэсэг буюу комисс ажиллуулна.
Эдгээр автобус шинэ үү, хуучин уу гэдэг нөхцөлд шинжээчид болон техникийн мэдлэг бүхий эрдэмтэн багш нарыг оролцуулсан Ажлыг хэсгийг гаргах нь зүйтэй гэж шийдсэн” хэмээн мэдээлэв.
БНСУ-ын Зэвсэгт хүчин үүсэн байгуулагдсаны 75 жилийн ойн баярын жагсаалд Монгол Улс, БНСУ-ын Батлан хамгаалах яамд хоорондын гэрээний дагуу Тэнгисийн цэргийн академийн хоёрдугаар дамжаанд Монгол Улсаас анх удаа суралцаж буй сонсогч Батгэрэлийн Батбаяр сургуулийнхаа ротын тугчнаар алхжээ.
Засгийн газруудын баримталж буй бодлого шатах түлшний эрэлтийг улам нэмэгдүүлэхээр байна
Дэлхийн хэмжээнд газрын тос, байгалийн хий, нүүрс зэрэг шатах түлшний эрэлт 2030 он гэхэд бүх цаг үеийн дээд түвшинд хүрээд цаашид буурах тооцоог Олон Улсын Эрчим Хүчний Агентлаг гаргалаа.
Энэхүү тооцоолол нь уур амьсгалын өөрчлөлтийн эсрэг тэмцэлд чухал алхам болж буй ч дэлхийн дулаарлыг цельсийн 1.5 хэмд барих олон улсын зорилтод хүрэхээргүй байгааг онцолсон байна.
Нарны хавтан, цахилгаан автомашин зэрэг цэвэр эрчим хүчний технологийн эрчимжилт нь эрчим хүчний эх үүсвэрийн өөрчлөлтөд чухал үүрэг гүйцэтгэж байгаа. Эдгээр цэвэр эрчим хүчний инновацууд шатах түлшний ноёрхлыг аажмаар арилгах хүлээлттэй байна.
Нүүрсний хэрэглээгээр дэлхийд тэргүүлэгч БНХАУ цэвэр эрчим хүчний шилжилтэд хүч түрэн орж ирж байгаа бөгөөд энэ утгаараа тус улсын нүүрсний хамаарал буурахаар байгаа аж.
Хэдий тийм боловч улс орны Засгийн газруудын бодлого энэ мэт үргэлжилбэл ойрын жилүүдэд шатах түлшний эрэлтийг дээд түвшинд хүргэж болзошгүйг анхаарууллаа.
О.Цэнгэг
Манай улс жилд 50-60 сая ам.долларыг тахианы махны импортод зарцуулж 22.5 мянган тонн мах авдаг байна. Харин дотоодын аж ахуйн нэгжүүд жилийн хэрэгцээний 2-3 хувийг хангадаг аж. Монгол Улсын Ерөнхийлөгч У.Хүрэлсүхийн санаачилсан “Хүнсний хангамж, аюулгүй байдал” үндэсний хөдөлгөөний хүрээнд тахианы махны импортыг бууруулж, дотоодын зах зээлд эрүүл, шинэ мах нийлүүлэх үндэсний үйлдвэрүүдийг дэмжих зорилгоор хөнгөлөлттэй зээл олгож эхэлсэн юм. Үүний үр дүнд ойрын таван жилд тахианы махныхаа хэрэглээг дотоодоосоо 100 хувь хангах боломжтой гэдгийг энэ чиглэлээр үйл ажиллагаа явуулдаг аж ахуй эрхлэгчид хэлжээ.
“Хүнсний хангамж, аюулгүй байдал” үндэсний хөдөлгөөний хүрээнд УИХ 36 дугаар тогтоолыг баталж, ирэх таван жилийн хугацаанд хүнс, хөдөө аж ахуйн салбарт 1.7 их наяд төгрөгийн хөрөнгө оруулалт, санхүүжилтийг хийхээр шийдвэрлэсэн. Энэ дагуу арилжааны арван банк жилийн 3-5 хувийн хүүтэй, 3-5 жилийн хугацаатай, нийт нэг их наяд төгрөг хүртэлх зээлийг үйлдвэр эрхлэгчдэд олгож байгаа юм.
Ус цаг уур, орчны шинжилгээний газраас цасны зузааны мэдээг танилцууллаа.
Өнөө өглөөний цаг уурын станц, харуулын цасны зузааны мэдээгээр Баян-Өлгийн нутаг, Ховд, Архангай, Хөвсгөлийн баруун, Увсын зүүн, Говь-Алтай, Баянхонгорын хойд хэсэг, Завханы зарим газраар 0.0-18.0 см зузаан цасан бүрхүүл тогтсон байна.
Үүнээс хамгийн их нь Баян-Өлгийн Толбод 18.0 см, Сагсайд 10.0 см, Ялалтад 8.0 см, Увсын Малчинд 9.0 см, Ховдын Дунд-Ус, Хөвсгөлийн Ханхад 7.0 см, бусад нутгаар 0.0-5.0 см цасан бүрхүүл тогтсон байна.