Author: Админ

БОАЖ-ын Сайд Б.Бат-Эрдэнэ Монгол Улс дахь Азийн хөгжлийн банкны шинээр томилогдсон Суурин төлөөлөгч Шэннон Коулин, тус байгууллагын Байгаль орчны асуудал хариуцсан ажилтан Н.Эрдэнэсайхан болон албаны бусад хүмүүсийг хүлээн авч уулзлаа.

Уулзалтаар одоо Хөвсгөл аймагт Тогтвортой аялал жуулчлалыг хөгжүүлэх төслийн бүтээн байгуулалтын ажил болох Хатгал-Жанхай-Тойлогт, Хатгал-Хүзүүвчийн шил чиглэлийн авто зам барих ажлын явц, цаашид хэрэгжүүлэх төслүүдийн уялдааг хангах асуудлаар мэдээлэл солилцлоо.

Суурин төлөөлөгч Шэннон Коулин хэлэхдээ Азийн хөгжлийн банкны санхүүжилтээр хийгдэж буй уг авто замын ажлыг энэ онд 12 км авто зам тавихаас 8,5 км-ийн гүйцэтгэлтэй байгаа нь бодит ажил болж буйг онцоллоо. Түүнчлэн аялал жуулчлалаас гадна байгаль орчны чиглэлд голлох төсөл, хөтөлбөрүүд хэрэгжиж байгаа тул санал, зөвлөгөө авах хүсэлтэй байгаагаа илэрхийлэв.

Сайд Б.Бат-Эрдэнэ “БОАЖЯ, Азийн хөгжлийн банктай нягт харилцаатай байдаг ба сайн болон сул хэрэгжиж буй төслүүд бий. Хатгал-Жанхай-Тойлогт чиглэлийн хатуу хучилттай зам нь 7 дугаар сард ашиглалтад оруулах байсан ч хугацаандаа амжаагүй бөгөөд үлдсэн 3,5 км авто замыг 11 дүгээр сард хүлээн авахаар төлөвлөж байгаа. Иймд Суурин төлөөлөгч Хөвсгөл аймагт ажиллаж, уг ажлыг хүлээлцэхэд хамт байхыг хүсэж байна” гэлээ.

Мөн Монгол Улсын нутаг дэвсгэрийн дийлэнх хувийг эзлээд байгаа цөлжилтийг сааруулах, уур амьсгалын өөрчлөлтөд дасан зохицоход чиглэгдсэн ажлууд болон хөв цөөрөм байгуулах ажилд манлайлан ажиллахыг хүсэв гэж БОАЖЯ-аас мэдээллээ.

 Хот, суурины ус хангамж ариутгах татуургын ашиглалт, үйлчилгээг зохицуулах хорооны ээлжит хуралдаанаар Улаанбаатар хотын хэрэглэгчдийн цэвэр, бохир усны үйлчилгээний тарифыг шинэчлэн баталжээ.

Тодруулбал, ирэх сарын 1-нээс орон сууцын айлуудын хэрэглээний цэвэр усны төлбөр нэг литр нь 1.34 төгрөг болжээ. Энэ нь өмнөхөөс 27 мөнгөөр нэмэгдсэн дүн аж. Аж ахуйн нэгжүүд цэвэр усны литр тутамд 2.69 төгрөг төлөх нь. Хамгийн их ус хэрэглэдэг спирт, архи, пиво, усны үйлдвэр, машин угаалгын газрууд нэг литр ус тутамд 3.56, айл өрхийнх 1.07, аж ахуйн нэгжийнх нь 2.25 төгрөг болсон нь өмнөхөөс 20-45 мөнгөөр нэмэгдсэн дүн аж. Харин гэр хорооллын худгуудын усны тарифыг нэмээгүй, литр тутамд нь хоёр төгрөг хэвээр үлдээжээ.

Энэ талаар Хот, суурины ус хангамж ариутгах татуургын ашиглалт, үйлчилгээг зохицуулах хорооны Захиргаа, удирдлагын газрын дарга Б.Доржбат “Монгол Улсын Засгийн газар болон АНУ хоорондын Мянганы сорилтын компакт гэрээний дагуу үнэ нэмэхээр шийдвэрлэсэн. Ингэснээр айл өрхүүдийн хувьд усны сарын хэрэглээний төлбөр өмнөхөөсөө 2000-3000 төгрөгөөр нэмэгдэнэ гэж тооцож байна. Хоёр улсын хамтын ажиллагааны хүрээнд манайд олон шинэ тоног төхөөрөмж суурилуулж, ус цэвэршүүлэн, дахин ашиглах үйлдвэр зэргийг барьж буй. Гэрээнд усны орлого нь зарлагаа нөхөх хэмжээнд байх ёстой гэж тусгасан” гэв.

Монгол Улсын Засгийн газрын гишүүн, Батлан хамгаалахын сайд Г.Сайханбаярын урилгаар Бүгд Найрамдах Социалист Вьетнам Улсын Улс төрийн товчооны гишүүн, Цэргийн төв зөвлөлийн орлогч дарга, Үндэсний батлан хамгаалахын сайд, генерал Фан Ван Зианг тэргүүтэй төлөөлөгчид Монгол Улсад 2023 оны 10 сарын 25-27-ны өдрүүдэд албан ёсны айлчлал хийж байна.

Батлан хамгаалахын сайд Г.Сайханбаяр Үндэсний батлан хамгаалахын сайд, генерал Фан Ван Зианг-ийг өнөөдөр /2023.10.26/ Батлан хамгаалах яаманд хүндэт харуулын хамт хүндэтгэн хүлээн авч, сайд нар албан ёсны хэлэлцээ хийв.

Тус хэлэлцээгээр дэлхийн болон бүс нутгийн аюулгүй байдал, хоёр орны найрамдалт харилцаа, түүний дотор батлан хамгаалах салбарын харилцаа, хамтын ажиллагаа, цаашдын төлвийн талаар харилцан санал солилцлоо.

Улмаар сайд нар хоёр орны батлан хамгаалах салбарын харилцаа нь талуудын нийтлэг эрх ашиг сонирхолд нийцэн, хоёр орны ард түмний найрсаг харилцааг гүнзгийрүүлэх, бүс нутагт цэргийн итгэлцлийг бэхжүүлэх, энх тайван, тогтвортой байдлыг сахин хамгаалах үндсэн зарчимд тулгуурлан шинэ агуулга хэлбэрээр өргөжин тэлж, эрчимтэй урагшлан хөгжиж буйд сэтгэл хангалуун байгаагаа харилцан илэрхийлэв.

Албан ёсны хэлэлцээний дараа талууд “Монгол Улсын Батлан хамгаалах яам, Бүгд Найрамдах Социалист Вьетнам Улсын Үндэсний батлан хамгаалах яам хооронд найрамдлын айлчлал зохион байгуулах тухай хэлэлцээр”-т гарын үсэг зурлаа.

Генерал Фан Ван Зианг тэргүүтэй төлөөлөгчид уг айлчлалын хүрээнд Монгол Улсын Ерөнхийлөгч У.Хүрэлсүхэд бараалхах юм.

Гаалийн ерөнхий газраас гааль, тагнуул, цагдаагийн байгууллагаас авч хэрэгжүүлсэн тусгай ажиллагаа, дотоод хяналтын талаар мэдээлэл өглөө.

Гаалийн байгууллага нь 2023 оны эхний 10 сарын байдлаар Монгол улсын хилээр нэвтрүүлэхийг хориглосон болон хязгаарласан бараа бүтээгдэхүүний хэрэг зөрчилтэй тэмцэх ажлын хүрээнд 1578 зөрчлийг илрүүлэн, татвараас зайлсхийснийг нөхөн төлүүлж ажиллаж байна. Эдгээрээс 32 үйлдэл нь гэмт хэргийн шинжтэй байсан гэв.

Жишээ нь

• 17 удаагийн үйлдлээр 5 нэр төрлийн 2630 хүн тун мансууруулах эм, сэтгэцэд нөлөөлөх бодисыг хууль бусаар нэвтрүүлэх гэж байсан
• 2 удаагийн үйлдлээр нийт 4591 гр алтан гулдмайг хилээр гаргах гэж байсан
• 6 удаагийн үйлдлээр түүх дурсгалын өв нэвтрүүлэх гэж байсан
• 1 удаагийн үйлдлээр 375кг химийн бодисыг мэдүүлэггүйгээр нэвтрүүлэх гэж байсныг илрүүлэн таслан зогсоосон.

Монгол Улс ОХУ-тай хил залгаа 10 боомт, БНХАУ-тай хил залгаа 13 боомт, агаарын 1 боомт, нийт 24 боомтод 160 хяналтын бүсэд 1700 орчим хяналтын камер байнга ажиллуулдаг.

Олон улсын аялал жуулчлалын “ITM-2023” үзэсгэлэнг 10 дугаар сарын 27-29-нд Мишээл экспо төвд зохион байгуулна.

Монголын Аялал Жуулчлалын Холбоо “ITM-2023” үзэсгэлэнг 24 дэх жилдээ дэлхийн аялал жуулчлалын чиг хандлага, аялал жуулчлалын салбар сэргэж байгаатай холбогдуулан “Ногоон хөрөнгө оруулалт-Бидний ирээдүй” уриан дор зохион байгуулж, бизнес эрхлэгчдийн үйл ажиллагааг дэмжих, шинэ үеийн хөгжлийн бодлогыг сурталчлах, үр өгөөжийг нь хүртэн хамтын ажиллагааг өргөжүүлэхийг зорьж байна.

Тус үзэсгэлэн нь бизнес эрхлэгчдийг холбож, шинэ бизнесийн түнш олох, гэрээ хэлэлцээр хийх, бараа бүтээгдэхүүнээ сурталчлах, борлуулах зэрэг бизнесийн төрөл бүрийн боломж бүрдүүлдэг.

ITM (International Travel Mart) үзэсгэлэнд 21 аймаг нэгдсэн зохион байгуулалттай, тур оператор, жуулчны бааз, ресторан зоогийн газар, аяллын хэрэгсэл нийлүүлэгч, аяллын бүтээгдэхүүн үйлчилгээ эрхлэгч, урлаг соёлын гээд 200 гаруй аж ахуйн нэгж, байгууллага оролцдог.

Үзэсгэлэнг гурван өдөрт дунджаар 4000 гаруй зочин, мэргэжлийн хүмүүс сонирхдог. Энэ жилийн хувьд 20 аймаг, 150 гаруй аж ахуйн нэгж байгууллага оролцохоор бэлтгээд байгаа.

Мөн үзэсгэлэнгийн хүрээнд аялал жуулчлал, зочлох үйлчилгээний бизнес эрхлэгчдэд зориулсан төрөл бүрийн чөлөөт уулзалт, сургалт, хэлэлцүүлгийг зохион байгуулна.

Аялал жуулчлалын үйл ажиллагаа эрхлэгч старт-апп компаниудад “АЖ-ын бүтээгдэхүүн хөгжүүлэлт, түүний онцлог, анхаарах зүйлс”, орон нутгийн аялал жуулчлалын газрын мэргэжилтэн, бизнес эрхлэгчдэд “ТХГН-т тулгуурласан аялал жуулчлалын бүтээгдэхүүн хөгжүүлэлт, нутгийн иргэдийн оролцоо”, аялал жуулчлалын бизнес эрхлэгчдэд “Монгол орны зорин очих газрын онцлог, гадаад сурталчилгаанд гардаг алдаа”, үйлчилгээний байгууллагынханд “Бизнесийн сахилга бат, хувь хүний харилцаа”, аялал жуулчлалын үйлчилгээнд дижитал технологийг үр дүнтэй ашиглах нь, үндэсний хоол, жуулчдын сэтгэл ханамж зэрэг бүтээгдэхүүн үйлчилгээний сурталчилгаа хийхээр төлөвлөөд байгаа юм.

Монгол Улсад 2019 онд 577 300 жуулчин хүрэлцэн ирсэн нь өмнөх оныхоос 11 хувиар өсөж, 607 231 сая ам.долларыг энэ салбараас олж, байлаа. Өмнөх оноос энэ тоо 29,6 хувиар өссөн байна. Түүнчлэн 2,460,874 монгол хүн гадаадад аялсан байдаг. Харин 2022 онд 290 414 гадны жуулчин хүрэлцэн ирж 350 сая ам.доллар буюу 1,2 их наяд төгрөгийн орлого олсон билээ.

Монгол Улсад одоогоор 600 мянган жуулчин ирж, 3 тэрбум 400 сая орчим төгрөгийн орлогыг оруулаад байна. Харин дэлхий дахинаа 900 сая хүн гадаад улс руу аялал хийсэн нь 2021 оныхоос хоёр дахин их буюу цар тахлын өмнөх өсөлттэй жилүүдээс 63 хувиар нэмэгдсэнийг ДАЖБ (UNWTO) зарлажээ.

Шинэ сэргэлтийн бодлогын хүрээнд “Аялал жуулчлалын үйлдвэрлэлийг хөгжүүлж, эдийн засгийн өсөлтийг дэмжих улмаар тус салбарт үйл ажиллагаа эрхэлдэг аж ахуйн нэгж байгууллагуудыг төрөөс бодлогоор дэмжих олон шат дараатай ажил гүйцэтгэж байгааг Монголын аялал жуулчлалын холбооноос мэдээллээ.

Өнгөрсөн шөнө гал түймрийн улмаас 7 хүн амь насаа алдсан харамсалтай хэрэг гарсан талаар НОБГ-аас мэдээллээ. Тодруулбал, Сонгинохайрхан дүүргийн 3-р хороо Бага наранд байшин шатаж байна дуудлага ОБГ-т 03:48 цагт ирсний дагуу дүүргийн Онцгой байдлын хэлтсийн Гал түймэр унтраах, аврах 26 дугаар ангийн алба хаагчдыг очиход 6*6 хэмжээтэй 2 байшин бүрэн шатаж, нэмэлт дуудлагаар Баянгол дүүргийн Онцгой байдлын хэлтсийн Гал түймэр унтраах, аврах 18 дугаар ангийн бүрэлдэхүүн ажиллаж, галын тархалтыг 04:50 цагт зогсоож, бүрэн унтрааж ажилласан байна.

Байшинд 11 хүн байснаас 5 нь эсэн мэнд гарч, 7 иргэн амь насаа алджээ. Тодруулбал, хажуугийн байшинд бас нэг хүн байсан аж. Одоогийн байдлаар мэргэжлийн байгууллагуудын хамтарсан үзлэг шалгалт явагдаж байгаа аж.