Author: Админ

Хот тохижилт, цэвэрлэгээний талаар албан байгууллага, аж ахуйн нэгж, иргэдээс дагаж мөрдөх журамд зааснаар иргэн, аж ахуйн нэгж, байгууллага 50 метр хүртэлх эдэлбэр газар болон дүүргээс хариуцуулсан нийтийн эзэмшлийн зам талбай, ногоон байгууламж, явган хүний замын хог, цас, мөсийг тогтмол цэвэрлэж, халтиргаа гулгаа үүсгэхгүй, орчныг бохирдолгүй цэвэр байлгах үүрэгтэй байдаг.

Хэрэв байгууллага, аж ахуйн нэгжүүд журмын дагуу хүлээсэн үүргээ биелүүлээгүйгээс үүдэн иргэд халтирч унаж, бэртэж гэмтсэн тохиолдолд хохирлоо тухайн байгууллагаас нэхэмжлэх хууль, эрх зүйн үндэслэлтэй. Журмын хэрэгжилтэд дүүргүүдийн МХГ, Үйлдвэр үйлчилгээний хэлтэс хамтран хяналт тавих үүрэгтэй.

Ерөнхийлөгчийн илгээлт-2100” тэтгэлэгт хөтөлбөрийн болзол хангаж, МУИС болон ШУТИС-д бэлтгэл хөтөлбөрт хамрагдсан оюутнууд гадаадын их, дээд сургуульд суралцахаар эх орноосоо мордлоо.

Энэ жил АНУ, Их Британи, Герман, Франц, Чех, Канад, Польш, Австрали, Хятад, Орос, Унгар, Энэтхэг, Лаос, Вьетнам зэрэг 16 улсын их, дээд сургуульд 260 оюутан залуус суралцахаар явж байна.

Монгол Улсын Ерөнхийлөгч Ухнаагийн Хүрэлсүх тэтгэлэгт хөтөлбөрийн эздийг үдэх ёслолд оролцон баяр хүргэж, сурлагын амжилт хүсэн ерөөв.

Тэр бээр хэлсэн үгэндээ, алс газар сурахаар явж байгаа оюутан залуус дэлхийн боловсрол эзэмшиж, эх орныхоо хөгжил дэвшил, сайн сайхны төлөө хүчин зүтгэх үндэсний манлайлагчид гэдгийг тэмдэглэв. Мөн гадаад улсад эх орныхоо нэр хүнд, монгол хүний үнэ цэнийг өндөрт өргөн, бие биеэ хайрлаж, тусалж, дэмжиж, хүндэтгэж явж байхыг захилаа.

Оюутан залуусыг үдэх ёслолд Боловсрол, шинжлэх ухааны сайд Л.Энх-Амгалан, Монгол Улсын Ерөнхийлөгчийн Боловсрол, шинжлэх ухаан, технологийн бодлогын зөвлөх Ч.Лодойравсал, Монгол Улсын Ерөнхийлөгчийн Тамгын газрын дэд дарга А.Үйлстөгөлдөр нар оролцлоо.

Өнгөрсөн жил “Ерөнхийлөгчийн илгээлт- 2100” тэтгэлэгт хөтөлбөрийн хүрээнд 256 оюутан залуус гадаадын 13 улсын их, дээд сургуульд суралцахаар явсан юм.

Монгол Улсын Ерөнхийлөгч Ухнаагийн Хүрэлсүх монгол хүний дэлхийд өрсөлдөх чадварыг нэмэгдүүлэх, хүүхэд, залуучуудын суралцах тэгш боломжийг хангах, дэлхийн шилдэг их, дээд сургуульд суралцахад дэмжлэг үзүүлэх зорилгоор зарлиг гаргасан.

Энэ дагуу жил бүр 330 сум, нийслэлийн хороо тус бүрээс нэг шилдэг сурагчийг шалгаруулж, дэлхийн шилдэг их, дээд сургуульд суралцуулах ”Ерөнхийлөгчийн илгээлт-2100” тэтгэлэгт хөтөлбөрийг 2021 оноос хэрэгжүүлж байна.

Ус, цаг уур, орчны шинжилгээний судалгаа, мэдээллийн хүрээлэнгээс арваннэгдүгээр сарын урьдчилсан мэдээллийг гаргаад буй. Ургац хураалт, өвлийн бэлтгэл өрнөж байгаа саруудад ихэнх нутгаар цаг агаар ямар байх талаар мэдээллийг нэгтгэн хүргэж байна.

Цаг уурч Э.ДАРИЙМАА “Ирэх 10 хоногийн хувьд ихэнх нутгаар эрс хүйтэрнэ. Тухайлбал, арваннэгдүгээр сарын 3-4-нд нийт нутгаар цас орж, цасан шуурга шуурч, агаарын температур хүйтэрч, салхи шуургатай байна. Баруун болон төвийн аймгийн ихэнх нутгаар, говь, зүүн аймгуудын ихэнх нутгаар цас орно.

Өнөөдрийн байдлаар төв болон зүүн аймгуудын ихэнх нутгаар, маргааш буюу 31-нд Алтай, Хангай, Хөвсгөл, Хэнтийн уулархаг нутгаар, Халх голын сав газраар, арваннэгдүгээр сарын 1-нд баруун, төвийн ихэнх нутаг, говь болон зүүн аймгуудын зарим газраар цастай.

Арваннэгдүгээр сарын 2-нд баруун аймгуудын зарим газар, төв болон зүүн аймгуудын ихэнх нутаг, 3-нд баруун, төвийн аймгуудын ихэнх нутгаар, 4-нд төв, говь, зүүн аймгуудын ихэнх нутгаар, 5-нд Алтайн уулархаг нутгаар 6-нд төв, говь, зүүн аймгуудын нутгаар цас орж, цасан шуурга шуурна.

Улаанбаатар хотын хувьд 30, 31-нд бага зэрэг цас орно. Арваннэгдүгээр сарын 2-6-нд цас орж, цасан шуурга шуурна. Салхи секундэд 9-14 метр хүрч ширүүснэ. Агаарын температурын хувьд 30, 31-нд харьцангуй дулаахан байх боловч цаашид эрс хүйтрэх төлөвтэй байна. Тухайлбал, Яармаг, Сонгинын орчмоор 9-14 градус хүйтэн. Бусад хэсгээрээ 3-8 градусын хүйтэн байх бол өдөртөө 0-5 градусын хүйтэн байх төлөвтэй байна” гэв.

Нийслэлийн удирдах ажилтнуудын шуурхай зөвлөгөөн 2023 оны аравдугаар сарын 30-ны өдөр боллоо.

Зөвлөгөөний үеэр Хотын дарга цас орж эхэлсэнтэй холбогдуулан бэлтгэл ажлаа сайтар хангаж, халтиргаа гулгаанаас сэргийлэх ажлыг шуурхай зохион байгуулах, тоног төхөөрөмжийн бэлэн байдлыг хангаж, шаардлагатай бол хувийн аж ахуйн нэгжүүдийг нэмэлтээр оруулж ирэх хэрэгтэйг хэлж байв. Мөн дүүргийн удирдлагууд хийгээд Хот тохижилтын газрын даргаас зам, талбайн цас цэвэрлэх машин, давс, бодисын нөөцийн талаар тодрууллаа.

Сонгинохайрхан дүүргийн хувьд дөрвөн аж ахуйн нэгж үйл ажиллагаа явуулдаг бөгөөд 200 тонн давс нөөцөлсөн. Цас орж эхэлснээс хойш давс, бодис цацагч зургаан техник хэрэгсэлтэй зам дээр ажиллаж байна гэсэн бол Баянзүрх дүүрэг техник хэрэгсэл дутагдалтай, хоёр техник хэрэгтэй байгааг хэлж байв. Сүхбаатар дүүргийн хэмжээнд орон нутгийн өмчит хоёр, хувийн хэвшлийн нэг байгууллага үйл ажиллагаа явуулж байна. Давс цацагч нэг машин шинээр авч байгаа, ингэснээр хоёр машинтай болж буй гэлээ. Баянгол дүүрэгт 80 тонн бодис, давс цацагч хоёр машин бий. Налайх дүүрэгт орон нутгийн өмчит нэг аж ахуйн нэгж үйл ажиллагаа явуулдаг, цас цэвэрлэгч машин байхгүй, тендер зарласан, ирэх сарын дундуур авна гэв. Дүүргүүд туслах замуудыг хариуцдаг бөгөөд төв замуудад асуудал үүсдэг гэдгийг дүүргийн удирдлагууд хэлж байлаа.

Хот тохижилтын газар ОНӨААТҮГ-ын дарга Б.Мөнхцэцэг “Бодис цацагч 12 машин байгаагаас хоёр нь эвдэрч, хоёр нь тэвшээ солиогүй. 07:40 цагаас эхний машин гарч, 10:00 цагийн байдлаар 12 тонн давс цацаад байна” гэв.

Хотын дарга дүүргийн Засаг дарга нарыг газар дээр нь ажиллаж, давс, бодисын  нөөц, техник хэрэгслийг биеэр шалгахыг үүрэг болголоо. Шаардлагатай тохиолдолд хувийн хэвшлийг ажиллуулах, мөн УБЗАА, орон нутгийн өмчит компани, Геодези, усны барилга байгууламжийн газар, Хот тохижилтын газар зэрэг холбогдох байгууллагын төлөөллөөс бүрдсэн хамтарсан баг гарч, шаардлагатай тоног төхөөрөмжийн судалгааг гаргаж, нэгдсэн стандартыг баталж, худалдан авах ажиллагааг яаралтай зохион байгуулахыг даалгалаа. Түүнчлэн холбогдох албаныхан халтиргаа, гулгаа нэмэгдэж буйтай холбоотойгоор иргэдийг машиныхаа дугуйг өвлийнхөөр солихыг уриалж, мөн скүүтер, дугуйн хэрэглээг хязгаарлах шаардлагатай байгааг хэлж байв.