Author: Админ

Categories
нийгэм цаг-үе

6673 хэрэглэгчийн цахилгааныг залгажээ DNN.mn

​Баянзүрх дүүргийн 21, 27, 29 дүгээр хорооны нутаг дэвсгэрт буусан уруйн үерийн гамшгийн хор уршгийг арилгах, авто замыг чөлөөлөх, нэрвэгдэгсдэд шаардлагатай тусламж үзүүлэхээр Нийслэлийн онцгой байдлын газар, мэргэжлийн ангиуд шуурхай ажиллаж байна.

Үерийн үеэр “Улаанбаатар цахилгаан түгээх сүлжээ” ТӨХК-ийн 10 кВ-ын дөрвөн фидер, 143 дэд өртөө, түүнд холбогдсон 6926 хэрэглэгчийн цахилгаан хангамж тасалдсанаас 139 дэд өртөө, 6673 хэрэглэгчийн 10/0.4 кВ-ын цахилгаан дамжуулах агаарын шугамд үзлэг хийж, хүчдэлд залгаж сэргээсэн аж. Өнөөдөр өглөөний 10.00 уагийн байдлаар 4 дэд өртөө, 253 хэрэглэгчийн хэрэглээ хараахан сэргээгүй байна.

“Улаанбаатар цахилгаан түгээх сүлжээ” ТӨХК-иас усанд автсан дэд өртөөнүүдийн усыг соруулах, гэмтсэн, хазайсан тулгууруудыг шинэчлэх, хүчитгэх, бусад эд анги, тоолуурын нэгдсэн хайрцгуудад үзлэг засвар хийж, сэргээн босгох ажлыг шуурхай ажиллагааны 78 ажилтан, 20 машин механизмтай баг бүрэлдэхүүн гүйцэтгэж байна.

Categories
гадаад мэдээ

Украины армийн давуу талууд DNN.mn

АНУ-ын нэр хүндтэй гурван цэргийн шинжээч одоо явагдаж буй Оросын эсрэг Украины чөлөөлөх довтолгооны үйл явцад дүн шинжилгээ хийж, боломжит үр дүнг нь урьдчилан таамаглахыг оролдсон дэлгэрэнгүй нийтлэлийг “How the Ukraine Counterof­fensive Can Still Succeed-Украины сөрөг довтолгооны амжилтад хүрэх давуу талууд” нэртэйгээр “Time” сэтгүүлд хэвлүүлжээ.

Америкийн аж ахуйн нэгжийн судалгааны хүрээлэнгийн Фредерик Каган, Дайны судлалын хүрээлэн(ISW)-гийн тоймч, судлаач Каролин Хирд, Катерина Степаненко нар Украины амжилтад хүрэх боломжийг нэмэгдүүлэх олон давуу тал байна гэж үзжээ. Тэд одоогийн довтолгооны кампанит ажилд Украин ялах гурван өөр хувилбар байгааг тодорхойлсон байна.

Нэгдүгээрт, Украины механикжсан довтолгооны оролдлого амжилттай болж, Украины Зэвсэгт хүчин үүнийг маш ашигтай ашиглан Оросын хамгаалалтын шугамын нэг хэсгийг эсвэл бүгдийг нь бут цохин устгах болно” гэжээ.

Хоёрдугаарт, ёс суртахуун болон зэвсэг, хоол хүнсний хангамж зэрэг бусад тогтолцооны асуудалтай байгаа Оросын арми Украины байнгын системтэй шахалтын дор “нугаран унаж” фронтоо хаян ухарч магадгүй гэж тэд үргэлжлүүлэн бичжээ.

Гуравдугаарт, Украины армийн байнгын дарамт шахалт, “уутанд оруулах” аргаар холын зайнаас орос цэргүүдийг бүслэн их буу, пуужингийн цохилт өгч, их хэмжээний хохирол учруулж байгаа цэргийн кампанит ажил нь Оросын фронтын шугамуудад цоорхой үүсгэн Украины цэргүүд эхлээд хэсэгчилсэн газраар, улмаар илүү гүнзгий, өргөн зайгаар довтолж оросын армийг бут цохих магадлалтай” гэж бичжээ.Зохиогчдын таамаглалаар эхний болон хоёр дахь хувилбар нь хэрэгжих боломж харьцангуй бага боловч боломжтой хэвээр байгаа аж. Харин гурав дахь хувилбар бол Украинд амжилтанд хүрэх хамгийн өндөр магадлалтай зам гэж шинжээчид таамаглан бичжээ.

Каган, Хирд, Степаненко нар гурав дахь хувилбар өнгөрсөн жил Украины Зэвсэгт хүчнийг Харьков, Херсон мужуудад амжилтад хүргэсэн гэдгийг онцолсон байна. Шинжээчид Украины цэргүүдэд Азовын тэнгис рүү хүрэх зам нээгдэх ч энэ тулалдаан маш ширүүн, хохирол их, урам хугарах явдал ч гарах магадлал өндөр байх болно. Энэ бол дайнд тохиолддог энгийн зүйлс гэсэн байна. Мөн тэд Украины сөрөг довтолгоо бүтэлгүйтэж магадгүй магадлалтай ч амжилттай болох магадлал нь хамаагүй илүү байгааг онцолжээ. Энэ нь тулалдааны талбарын газар зүйн байршил, Оросын арми нөөцөө шавхаж, улам бүр чадваргүй байдалд орж байгаа явдал, Оросын армийн хангамж, удирдлагын тогтолцооны чадваргүй байдал зэрэг хэд хэдэн чухал хүчин зүйлээс хамаарч байгааг дурджээ.

Уг нийтлэлд Оросын арми хэтэрхий сунасан хангамжийн шугамтай байгаа учир Украины арми нэг цэг дээр довтлон фронтыг сэтлэн Азовын тэнгист хүрч Украины өмнөд хэсэгт байрлах Оросын бүх цэргийн хангамжийг бүр мөсөн таслах том аюул байгааг онцолжээ. Хэрэв ийм зүйл тохиолдвол хангамжгүй болсон Оросын өмнөд бүлгийн бүх цэргийн хувь заяа юу болох нь тодорхой юм. Энэ зорилгыг биелүүлэхэд Украины армид заавал далайн эрэг хүртэл байлдах шаардлагагүй бөгөөд хэсэгхэн газрын төмөр зам, авто замыг л хяналтдаа авахад л хангалттай гэсэн байна. Ингэснээр Оросын армийн өмнөд бүлэг ямар ч хангамжгүй болох ажээ. “Өөрөөр хэлбэл, украинчууд фронтын баруун талын бараг бүх нутаг дэвсгэрийг хянах чадвартай болохын тулд ганц чиглэлд фронтыг сэтлэхэд л хангалттай байгаа бол Оросын армийн хувьд фронт даяар давамгай байдлаа хадгалж байх шаардлагатай.Энэ бол хэт тэнцвэргүй буюу Украины армид хэт ашигтай нөхцөл”гэж зохиогчид дүгнэжээ.

 

Г.АМАРСАНАА

Categories
мэдээ нийгэм

ЭМДЕГ: Эмнэлгүүд 0-18 насны хүүхэд болон жирэмсэн эмэгтэйчүүдээс 13а маягт шаардахгүй DNN.mn

Эрүүл мэндийн сайдын 2021 оны А/813 дугаар тушаалын дагуу иргэд лавлагаа шатлалын эмнэлэгт үзүүлэхдээ анхан шатны эрүүл мэндийн байгууллагаас 13А маягт буюу үйлчлүүлэгчийн онош, лавлагаа шатлалд илгээх болсон шалтгааныг үндэслэлийн хамт бичсэн мэдээлэл бүхий илгээх бичгийг заавал авч очдог.

Ингэхдээ хүүхэд болон жирэмсэн эмэгтэйчүүдээс 13а маягт нэхэж байгаа нь хүндрэлтэй байна гэж иргэд шүүмжилж буй. Тэгвэл ЭМДЕГ-аас мэдэгдэл гаргажээ. Мэдэгдэлд, “Эрүүл мэндийн даатгалын цахим системд 0-18 насны хүүхдэд үзүүлэх тусламж, үйлчилгээ болон жирэмсэн эмэгтэйчүүдийн жирэмсний хяналтын багцын тусламж, үйлчилгээний анхан шатны эрүүл мэндийн байгууллагаас лавлагаа шатлалын эрүүл мэндийн байгууллагад, лавлагаа шатлалын эрүүл мэндийн байгууллагаас төрөлжсөн мэргэжлийн эмчийн хяналтад шилжих тохиолдолд илгээх бичиг шаардахгүй байх зохицуулалтыг оруулсан.

Иймд дээрх тусламж, үйлчилгээнд гэрээ бүхий эрүүл мэндийн байгууллагууд нь 13А маягтыг шаардахгүйгээр иргэдэд чирэгдэл учруулахгүй ажиллахыг хүсье” гэжээ.

Categories
нийгэм цаг-үе

Есдүгээр сард нэр бүхий 22 их, дээд сургуулийн үйл ажиллагаанд хяналт, шалгалт хийнэ DNN.mn

Сүүлийн үед сургалт эрхлэх зөвшөөрөл нь хүчингүй болсон, нэгдэж нийлсэн их, дээд сургуулиуд бие даан элсэлт зохион байгуулж байна гэх мэдээлэл цахим орчинд тархаж буй.

Үүнтэй холбогдуулан тухайн сургуулиудын элсэлтийн үйл ажиллагаанд хяналт хийхэд зөрчил илрээгүй болно.

Энэ оны 9 дүгээр сард нэр бүхий 22 их, дээд сургуулийн үйл ажиллагаанд салбарын хяналт, шалгалт хийнэ. Олон улсын хэмжээнд их сургуулийн эрэмбэ тогтоодог Times Higher Education (THE) байгууллагатай хамтран Монгол Улсын нийт их, дээд сургуулийн эрэмбэ чансаа тогтоох ажил үргэлжилж байна. 9 дүгээр сард их, дээд сургуулийн эрэмбэ, чансааг олон нийтэд мэдээлнэ. Дээд боловсролын тухай хуулиар 2 жил тутам их сургуулийн эрэмбэ чансааг тогтоон олон нийтэд ил тод мэдээлж байна.

БШУЯ

Categories
нийгэм цаг-үе

Нийслэлийн цэцэрлэгийн цахим бүртгэл үргэлжилж байна DNN.mn

Нийслэлийн цэцэрлэгт хамрагдах хүсэлтийг 2023 оны 08 дугаар сарын 01-ний өдрөөс 08 дугаар сарын 20-ны өдрийг дуустал “E-MONGOLIA” системээр дамжуулан хүлээн авна.

Та хүүхдээ цэцэрлэгт хамруулах үйлчилгээг авахдаа дараах зүйлсийг анхаарна уу.

-Өөрийн болон хүүхдийнхээ хаягийн бүртгэл, мэдээллийг нягталж, баталгаажуулсан байх

-Таны хүүхэд өнгөрсөн жил цэцэрлэгт хамрагдсан бол тухайн цэцэрлэгтээ “Үргэлжлүүлж явах” эсэх сонголтыг хийх

-Хэрвээ та шилжилт хөдөлгөөнийг энэ хугацаанд хийх бол хүсэлт хүлээн авах хугацаанд баталгаажуулсан байх

Жич: Хэрвээ та E-Mongolia системээр дамжуулан цэцэрлэгийн бүртгэлийн хүсэлт явуулах боломжгүй бол харьяа дүүргийн цэцэрлэг дээр ажиллаж буй ажлын хэсэгт 2023 оны 08 дугаар сарын 07-ны өдрөөс эхлэн хандаж зөвлөгөө, дэмжлэг аваарай.

Categories
нийгэм цаг-үе

Дубайн хүнсний худалдааны төвд монгол хонины махны дэлгүүр нээгджээ DNN.mn

Монгол Улсад халал аргаар бэлтгэсэн махыг АНЭУ-ын зах зээлд албан ёсоор 2023 оны дөрөвдүгээр сараас нийлүүлж эхэлсэн билээ.

Монгол хонины махыг Эмиратын хэрэглэгчдэд илүү ойртуулан хүргэх зорилгоор Дубай хотын хүнсний худалдааны хамгийн том төвд монгол хонины махны дэлгүүр нээгджээ.

Манай улс БНХАУ, ОХУ, Вьетнам, Иран, Казахстан, Япон, Эмират зэрэг улс руу мах экспортолдог.

2022 онд 71.1 сая толгой мал тоологдсон нь түүхэн дэх хамгийн өндөр үзүүлэлт болсон юм. Үүнээс хамгийн их буюу 32.7 сая хонь, 27.6 сая ямаа тоологдсон байна.

Categories
мэдээ энтертаймент-ертөнц

​”Barbie” киноны орлого нэг тэрбум ам.доллар давжээ DNN.mn

Нээлтээ хийгээд гурван долоо хонож байгаа “Barbie” киноны дэлхийн театрын зах зээлээс олсон орлого 1 тэрбум ам.доллар давжээ.

Тодруулбал, Зохиолч, найруулагч Грета Гервигийн кино дэлгэцнээ гараад гурван долоо хоноход дэлхийн зах зээлээс 1.03 тэрбум ам.долларын ашиг олсон байна.

Ингэснээр Гервиг тэрбум ам.долларын кино бүтээсэн анхны соло эмэгтэй найруулагч байгаа юм.

​

Өмнө нь “Wonder Woman” кино дэлхийн зах зээлээс 821.8 сая ам.доллар олсон нь эмэгтэй найруулагчдын дээд амжилт байв.

​

Тус кино дэлхийпд амжилтад хүрсэн нь Их Британи, Мексик, Австрали зэрэг дэлхийн хамгийн том кино зах зээл дэх борлуулалтын орлоготой холбоотой юм.

Харин “Barbie” кинотой цуг нээлтээ хийсэн Кристофер Ноланы “Oppenheimer” гурван долоо хоногийн хугацаанд дэлхийн зах зээлээс 552.9 сая ам.доллар олжээ.​

Хятадын кино урлаг, соёлыг судлаач “Барби дэлхий даяар алдартай хэвээр байгаа нь киног олон улсад алдаршуулж байна” хэмээн хэлжээ.

​

АНУ болон Канадын театруудын тасалбарын борлуулалтыг авч үзвэл​: ​

1. “Barbie,” 53 сая ам.доллар

2. “Meg 2: The Trench,” 30 сая ам.доллар​

3. “Oppenheimer,” 28.7 сая ам.доллар​

4. “Teenage Mutant Ninja Turtles: Mutant Mayhem,” 28 сая ам.доллар​

5. “Haunted Mansion,” 9 сая ам.доллар​

6. “Sound of Freedom,” 7 сая ам.доллар​

7. “Mission: Impossible — Dead Reckoning Part I,” 6.5 сая ам.доллар​

8. “Talk to Me,” 6.3 сая ам.доллар​

9. “Rocky Aur Rani Kii Prem Kahaani,” 1.5 сая ам.доллар​

10. “Indiana Jones and the Dial of Destiny,” 1.5 сая ам.доллар байна. ​

П.ТЭРГЭЛСАР

Categories
улс-төр цаг-үе

Зорчих эрхийг хязгаарлах ял эдлэхээс зайлсхийсэн 14 хүний ялыг хорих ялаар сольжээ DNN.mn

Прокурорын байгууллагаас долдугаар сард ял эдлүүлэх ажиллагаанд хүний эрх, эрх чөлөө зөрчигдөхөөс хамгаалах, урьдчилан сэргийлэх зорилгоор хорих, хорихоос өөр төрлийн ял эдлүүлэх болон цагдан хорих, баривчлах, саатуулах шийдвэрийг биелүүлэх ажиллагаатай 379 удаа танилцаж, 10 шалгалт, нэг судалгаа хийжээ.

Хяналтын явцад холбогдох хууль, журмыг зөрчсөн, хангалтгүй хэрэгжүүлсэн 50 зөрчлийг илрүүлж, шүүхийн шийдвэр гүйцэтгэх байгууллагад таван шаардлага бичиж хүргүүлэн зөрчлийг арилгуулах арга хэмжээ авсан байна.

Прокурор ял эдлүүлэх ажиллагааны явцад хуулиар олгосон эрх нь зөрчигдөж байсан нэг ялтан, этгээдийн эрхийг сэргээж, хууль тогтоомжийн хэрэгжилтийг хангуулжээ.

Шүүхийн шийдвэр гүйцэтгэх байгууллагаас

  • Ял солиулах, ялтны зорчих бүсийг өөрчлүүлэх талаар 71
  • Хоригдлыг хугацааны өмнө суллах талаар 130 санал тус тус ирүүлснийг прокурор хянасан.

Мөн хуульд заасан шаардлага хангаагүй 48 саналыг буцаан, шаардлага хангасан бусад саналд дүгнэлт бичин шүүхээр шийдвэрлүүлсэн байна.

Тухайлбал торгох ялыг шүүхээс тогтоосон хугацаанд биелүүлээгүй дөрөв, нийтэд тустай ажил хийлгэх ялыг гүйцэтгээгүй 13, зорчих эрхийг хязгаарлах ял эдлэхээс зайлсхийсэн 14 хүний ялыг хорих ялаар солиулж, бусдад учруулсан хохирлоо нөхөн төлсөн, ял эдлэх хугацаандаа ноцтой зөрчил гаргаагүй, оногдуулсан ялын тодорхой хувийг эдэлсэн 86 хоригдлыг хугацааны өмнө сулласан байна.

Эх сурвалж: Улсын Ерөнхий Прокурорын Газар

Categories
нийгэм цаг-үе

Утсаар ярих гэж ууланд гарсан хоёр хүн аянгад цохиулж нас баржээ DNN.mn

Архангай аймгийн Цэнхэр сумын төвөөс 80 километрын зайд Орхон багийн Тээл гэдэг газар наймдугаар сарын 5-ны 20:40 цагийн орчим дөрвөн хүн уулан дээр гарч утсаар ярих гэж явснаас хоёр нь аянгад цохиулж нас баржээ.

Энэ тухай мэдээллийг наймдугаар сарын 6-ны 11:20 цагт онцгой байдлын алба хүлээн авсан байна.

Өнөөдөр зүүн аймгуудын нутгаар усархаг дуу цахилгаантай аадар бороо орох тул болзошгүй нөөлөг салхи, аянга цахилгаан, мөндөр, үер усны аюулаас сэрэмжтэй байхыг цаг уурын байгууллагаас онцгойлон анхааруулав.

Эх сурвалж: ОБЕГ

Categories
нийгэм цаг-үе

Үерт автах эрсдэлтэй 228 айл өрх байна DNN.mn

Үер усны гамшгийн нөхцөл, авч хэрэгжүүлж буй арга хэмжээний талаар Нийслэлийн онцгой комиссоос мэдээлэл өглөө. Тодруулбал, Наймдугаар сарын 5-ны 19:30 цагаас Улаанбаатар хотод орж эхэлсэн усархаг аадар борооны улмаас Баянзүрх дүүргийн 21, 27, 29 дүгээр хорооны нутаг дэвсгэр буюу Жамсран уулын баруун аманд уруйн үер буусан. Ус, цаг уур, орчны шинжилгээний газраас өгсөн мэдээллээр 20:00 цагт 5 мм, 20:00 цагаас хойш 7 мм буюу нийт 12 мм хур тунадас орсон байна.

Нийслэлийн Засаг дарга бөгөөд Улаанбаатар хотын Захирагч, Нийслэлийн онцгой комиссын дарга Д.Сумъяабазар “Газрын албаны мэдээллээр үер буусан байршилд зөвшөөрөлгүй буусан 46 айл өрх бий. Мөн дахин үерт автах эрсдэлтэй 228 айл өрх байна. Үерт өртсөн айл өрхийг нүүлгэн шилжүүлэх төлөвлөгөөний дагуу Баянзүрх дүүргийн 21 дүгээр хорооны таван га газрын байршлыг бэлдсэн. Тиймээс эдгээр айл өрхийг эрсдэлгүй бүс рүү яаралтай нүүлгэн шилжүүлэх арга хэмжээ авч ажиллахыг дүүргийн болон нийслэлийн газрын албаны удирдлагуудад үүрэг болголоо” хэмээлээ.

Түүнчлэн үер буусан байршилд усны урсац, жалгыг хааж шороо, барилгын хог хаягдал асган тэгшилж газрыг нь зарсан, их хэмжээний хог хаягдал үүсгэсэн ноцтой зөрчлүүд бийг тэрбээр онцолж байсан юм