Монгол Улсын Засгийн газрын хөрөнгөөр, НҮБ-ын Хүүхдийн сангаар дамжуулан томуугийн эхний ээлжийн 159.500 хүн тун вакциныг өнөөдөр /2019.10.3/ хүлээн авлаа.
Тус вакциныг Эрүүл мэндийн сайдын тушаалаар нийслэлийн төрийн өмчийн 233 цэцэрлэг, зургаан асрамжийн төвийн хүүхдүүдэд үнэ төлбөргүй хийх ажил өнөөдрөөс эхэлж байгаа аж. Хэрэв иргэн улирлын томуугаас сэргийлж, сайн дурын дархлаажуулалтад хамрагдахыг хүсвэл Халдварт өвчин судлалын үндэсний төвийн сэргийлэх тарилгын кабинетаар 8.30-14.30 цагийн хооронд үйлчлүүлэх боломжтой юм байна.
Сонирхуулахад, томуугийн эсрэг вакциныг 15 мянган төгрөгөөр хийх ажээ. Мөн тус вакциныг БНСУ-ын “Грийн кросс” үйлдвэрт үйлдвэрлэсэн байна. Томуугийн эсрэг вакциныг эрсдэлт бүлгийн хүн ам болох бага насны хүүхдүүд, ахмад настан, жирэмсэн эхчүүд томуугийн дэгдэлт эхлэхээс өмнө хийлгэх шаардлагатай ажээ.