Ирэх онд ОХУ-ын зэвсэгт хүчнийг шинэ үеийн гэгдэх “Армата” буюу “Т-16” танкаар хангаж эхлэх гэнэ. Хамгийн эхний 20 танк бараг бэлэн болсон бөгөөд удахгүй ОХУ-ын Батлан хамгаалах яаманд хүлээлгэн өгөх юм. Оросын “Уралвагонзавод” үйлдвэр нь түүнийг хийхээр 2009-2010 онд шаргуу ажилласан байна. Харин зохион бүтээгчид таван жил хөдөлмөрлөхдөө маш нууц байдалд ажиллажээ. Орчин үеийн танкийг бүтээсэн гэхэд харьцангуй бага хугацаа зарцуулсан хэмээн мэргэжилтнүүд үзэж байгаа. “Армата” гэдэг нь arma буюу зэвсэг гэсэн латин үгнээс гаралтай аж. Шинэ танкийг 2020 он хүртэл үйлдвэрлэж Оросын зэвсэгт хүчинд 2300 ширхгийг нийлүүлэхээр төлөвлөсөн байна.
“Т-16” -ын буу нь янз бүрийн сум хэрэглэдэг онцлогтой. Нэг удаа цэнэглээд 22 удаа буудна. Тэр дундаа газар-газар ангиллын пуужинг хүртэл харвах чадвартай. Гинжин дугуйтай бөгөөд ямар ч замаар 70 км/цаг хурдтай явна. Шатахуунаар нэг удаа цэнэглэсэн байхад 500 километр газрыг туулах чадвартай. Таван метрийн гүн усанд болон босоогоороо нэг метрийн өндөртэй газрыг ямар ч саадгүйгээр туулна. Мөн 30 хэмийн налуутай газраар чөлөөтэй явна. Шинэ үеийн танкны бас нэг онцлог нь трамплинаас харайх мэт өндрөөс “үсэрдэг” аж. Цэргийн үзүүлэн сургуулилтын үеэр үүнийгээ нэг бус удаа харуулсан тул нисдэг танк гэгдэх болсон.
Дотроо гурван хүний суудалтай. Түүнээс гадна агаарын довтолгооноос хамгаалах зенитийн системтэй, радартай, зорьсон газраа аль замаар очихыг маш тодорхой харуулдаг тусгай төхөөрөмжтэй. Зарим мэргэжилтнүүд “Армада”-г танк гэхээсээ эсрэг талдаа хүчтэй цохилт өгч чадахуйц универсаль машин хэмээн тодорхойлсон. “Т-16” нь бүрэн алсын удирдлагаар ажилладаг бөгөөд дотор нь сууж яваа хүний аюулгүй байдлыг хангахад нэлээд анхаарсан байна. Тиймээс жолоочийн болон бусад бүхээг нь сум, дэлбэрэлт зэрэгт өртөхгүй. Хөдөлгүүр нь 130 морины хүчтэй тэнцэхүйц, танкны жин нь хамгийн ихээр бодоход 55 тонн. Жолооч нь орчин тойрноо 360 градус эргэж харах боломжтой. Одоогийн байдлаар хамгийн орчин үеийн цэргийн хүнд техник. Харин хэдэн рублиэр үнэлсэн талаар тодорхой мэдээлэл алга. Ямар ч байсан хэдэн сая рублийн үнэтэй гэнэ.
Энэ жил Хятадын Жухай хотод болсон “AirShow China 2014” үзэсгэлэнд уг танкийг толилуулсан. Шинэ үеийн техникийг Хятад хамгийн ихээр сонирхсон бөгөөд түүнийг худалдан авч анхны гадаад хэрэглэгч нь болох хүсэлтэйгээ илэрхийлсэн байна.
Гэвч “Армата”-г үйлдвэрлэгчид үүнийг эрс эсэргүүцсэн аж. Стратегийн чухал ач холбогдолтой бөгөөд технологи алдагдах аюултай хэмээн үүнийгээ тайлбарласан байна. Ямар ч байсан ирэх жил Улаан талбай дээр болох Ялалтын парадад шинэ танкийг оролцуулахаар болжээ.