Хэнтий аймагт нээлтээ хийсэн АН-ын даргад нэр дэвшигчдийн уулзалт хэлэлцүүлэг гурав дахь өдрөө Буруун-Уртын Жаахан шарга театрт үргэлжиллээ. Тус аймгийн Ардчилсан намын дарга Ж.Батсуурь уулзалт хэлэлцүүлгийг нээж үг хэлэв. Тэрээр хэлэхдээ: “2016 оны улс төрийн сонгуульд Ардчилсан нам ялсан хоёр аймаг бий. Буруун талд Завхан, зүүн бүсээс Сүхбаатар аймгийн Ардчилсан нам ялалт байгуулсан. Бид бол ардчилсан үзэлтэй хүмүүс. Тиймээс намын даргад нэр дэвшиж буй таван лидерийнхээ илтгэл, санаа бодлыг нягтлан үзэж, өөр өөрсдийн мэргэн сонголтыг хийгээрэй, мөн өөр өөрсдийн намын үүр, дэмжигчиддээ ухуулан таниулаарай” хэмээн захилаа.
Намын даргын сонгуулын хорооны дэг ёсоор Жаахан шарга театрт өрнөсөн илтгэл хэлэлцүүлгийн салхийг хагалж нэр дэвшигч Д.Эрдэнэбат илтгэл мөрийн хөтөлбөрөө танилцуулсан юм. Дараа нь Ж.Батзандан, Н.Алтанхуяг, Лу.Гантөмөр, С.Эрдэнэ нарын нэр дэвшигчид мөрийн хөтөлбөрөө танилцуулан тайлагналаа. Сүхбаатар аймгийн АН-ын гишүүд дэмжигчдийн санал хүсэлт, асуултыг тоймлон хүргэвэл:
– Монгол улсыг газар нутаг өрийн хүүнд явчих гээд байна шүү. Үүнд та бүхэн онгой анхаарч улс эх орны хойчийн ирээдүйд санаа сэтгэлээ чилээгээрэй.
– Та бүхний хэн нь ч Намын дарга боллоо ч гэсэн удирдаж чадахаар, чадах ч ёстой улс төрчид байна. Нэг зүйл сануулж хэлэхэд намын бүлэглэлийг тараана гэсэн саналыг оруулж байгаа нь сайн хэрэг. Гэвч ялагдсаныхаа дараа бүлгээ тарааж, ялахаараа бүлэглэл, фракцаа байгуулдаг байдлаа болиорой.
– Юуны өмнө манай нам орон оронтой, оочих аягатай нам болох хрээгтэй байна. Намын шинэ байр барих тал дээр анхаарал хандуулаач ээ.
– Намын даргаа нийт гишүүдийн сонголтоор батална гэдэг бол үнэхээр сонгодог санаа болжээ. Хөдөө орон нутгийн гишүүд дэмжигчид бид чинь унтрах, асахаа мэдэхгүй байж байхад ирж бидний нүдэнд итгэлийн гал бадрааж өгсөнд баярлалаа. Гэвч Сүхбаатар аймгийн ардчилсан нам орон нутгийн сонгуульд ялчихаад байхад засаглах эрх нь алга. Үүнийг одоо яаж шийдэх вэ зэрэг 20 орчим асуулт саналд нэр дэвшигч тус бүр 10 минутад багтаан хариулт өгсөн юм.