Цахилгаан станц, төмөр зам Оросоос болоод явдаггүйг шинэ гишүүд мэдэж байгаа юу? DNN.mn

Намрын чуулган нээлтээ хийлээ. 126 гишүүнтэй шинэ парламентын жинхэнэ ажил эхэлж байна. Энэ парламентад 78 гишүүн шинээр сонгогдсон. Та бүхэнд хандаж хэлэхэд, Монгол Улсын хөгжил дэвшлийн гол гогцоо болсон цахилгаан станц, төмөр зам Оросоос болж гацдагийг мэдэж байгаа юу. Өмнөх парламент дээр Н.Ганибал “Багануурын ЦС-ыг МАН-ын нөхөд зогсоосон. Тэд арай тагнуул биш биз дээ. ЦС ярьсан бүхнийг үгүйсгэдэг бүхэл бүтэн бүлэгтэй болчихлоо, энэ хүмүүс ямар зорилготой вэ” гэж хэлж байсан. Тийм ээ, Эрдэнэбүрэн, Шүрэн, Эгийн гол, Багануур, Тавдугаар ЦС гээд манай ярьсан бүхэн Оросоос болоод, Оросыг хамгаалдаг МАН-ын улстөрчдөөс болоод хөдөлдөггүй.

Канадын “Хан ресурс” ураны компанийг оросууд болиулж барууны хөрөнгө оруулалтыг зогсоосон. Мөн Мянганы сорилтын сангийн 188 сая ам.долларын буцалтгүй хөрөнгөөр хос төмөр зам тавигдах бүтээн байгуулалт эхлэх гэж байхад Якунин гэдэг нөхөр Монголд сандран ирж “Үнэгүй бяслаг зөвхөн хулганын хавханд байдаг” гэж хэлээд шууд болиулж байсан. Хэрвээ 2010-аад оны үед хос төмөр замтай болсон бол Япон, Солонгос, Хятад, Энэтхэг, Америк, Европын бүх оронтой дамжин холбогдож, Тяньжинд бараа гацлаа гэж хэдэн жил хий хоосон орилолдож суух биш хөгжлийн уурхай болох байлаа.

Ингэж хос төмөр замыг болиулчихаад “Богдхан” төмөр зам хэмээх үлгэрээ ярьж итгүүлсэн. Богд уулын урдуур тойрч Мааньт өртөөтэй холбогдох 170 км төмөр замын ТЭЗҮ батлагдаад л үлгэр төгссөн. Үүн дээр шатахууны асуудал бий.

2012-2014 онд дэлхийн зах зээл дээр нэг баррель нефтийн үнэ 110 ам.доллар байхад манайх оросоос 380 ам.доллараар авч байсан. Ингэж шулуулдгаа больё гээд Уул уурхайн сайд бридж Д.Ганхуяг Солонгосоос бензин оруулж ирж байсан. Энэ бүгдийг шинэ гишүүд та бүхэн бодох хэрэгтэй байна. Бид Оросын харьяат биш гэсэн зориг зүрхтэй байх хэрэгтэй байна.