Шатахууны хомсдолын асуудлаар Монголын шатахуун хэрэглэгчдийн холбооны гүйцэтгэх захирал Б.Сайнбаяр хэвлэлийн бага хурал хийлээ.
Тэрбээр “Монгол Улсын нийт шатахууны жилийн хэрэглээ 2 сая 400 мянган тонн байдаг. Шатахуун таталтын 91 хувийг компаниуд буюу ченжүүд хийж байна. Хувийн компани шатахуун татахаа боливол манай улсад шатахууны хэрэглээ тэг зогсолтод хүрнэ.
2015 оноос хойш шатахууны нөөцийн асуудлаар Засгийн газартай гэрээ хийгээд буй “National Trading and Transportation” компани одоог хүртэл гэрээний дагуу хийсэн ажил байхгүй. Тийм учраас Засгийн газар энэ компанитай хийсэн гэрээгээ цуцлах хэрэгтэй.
2021 оны гуравдугаар сард Засгийн газрын 168 дугаар тогтоолд “Монгол Улсад шатахууны нөөц бүрдүүлэх журам” баталсан. Гэтэл журам баталсны дараа 2021 оны есдүгээр сар болон 2023 оны арван хоёрдугаар сард шатахууны хомсдол үүссэн. Шатахууны хомсдол үүссэнээс үүдэн бүх бараа бүтээгдэхүүний үнэ нэмэгддэг.Шатахуун хомсдох нь Засгийн газрын асуудал биш. Монголын шатахууны нөөцийг ченж нэртэй шатахуун түгээх станцууд бүрдүүлж байна.
Намуудын мөрийн хөтөлбөртэй танилцах явцад Иргэний Зориг Ногоон нам шатахууны нөөцийн сав бүрдүүлэх талаар хууль санаачлах, шатахууны бүрдүүлэлтийг импортлогч буюу ченжүүдээс хараат бус байлгах, эдийн засгийн эргэлтэд оруулах зэрэг шатахууны асуудлын талаар тусгасан байна” гэлээ.
М.УРАНБИЛЭГ