БНХАУ-ЫН ЭДИЙН ЗАСГИЙН СЭРГЭЛТИЙГ БЭХЖҮҮЛЭХ “ХОЁР ЧУУЛГАН” БОЛЖ БАЙНА DNN.mn

ХАУТЗЗ-ийн 14 дэх Үндэсний хорооны хоёрдугаар чуулганы нээлтийн ёслол 2024 оны 3 дугаар сарын 4-нд

Хятад улсын нийслэл Бээжин хотноо Ардын их хурлын танхимд болов. /Синьхуа/Жао Айминь/

---

БНХАУ-ын улс төрийн хуанлийн хамгийн их хүлээлттэй арга хэмжээ болох “хоёр чуулган” Хятадын Ардын Улс Төрөөр Зөвлөлдөх Зөвлөлийн (ХАУТЗЗ) 14 дүгээр Үндэсний Хорооны хоёрдугаар чуулганаар энэ долоо хоногийн даваа гарагт эхэллээ.

Дэлхийд эдийн засгийн үзүүлэлтээрээ эхнээсээ хоёрдугаарт ордог БНХАУ нь Хятад маягийн шинэчлэлийг хэрэгжүүлж, эдийн засгийн сэргэлтийн эрчмээ бататгахыг хичээж буй энэ цаг үед зохион байгуулагдаж буй эл хоёр чуулган нь тус улсын хувьд төдийгүй дэлхийн бусад орны хувьд асар чухал холбогдолтой.

БНХАУ-ын улс төрөөр зөвлөлдөх дээд байгууллага буюу ХАУТЗЗ-ийн Үндэсний хорооны гишүүд болох нийгмийн янз бүрийн салбарын төлөөлөл болсон 2000 гаруй хүнийг Бээжин хотын төвд байрладаг Ардын Их Хурлын танхимд халуун дулаан бөгөөд баяр ёслолын уур амьсгалтайгаар угтан авсан байна.

БНХАУ-ын дарга Ши Жиньпин болон тус улсын бусад удирдагч индэр орчимд байрлуулсан сандалд сууж, чуулган эхэлсэнд баяр хүргэн толгой дохицгоожээ.

ХАУТЗЗ-ийн Үндэсний хорооны дарга Ван Хунин чуулганд ажлаа тайлагнан илтгэл тавихдаа “2024 онд ХАУТЗЗ нь Хятад маягийн орчин үеийн шинэчлэлийг ахиулахад анхаарч, идэвхтэй санал санаачилга дэвшүүлж, өргөн хүрээний зөвшилцлийг хөхиүлэн дэмжиж ажиллах болно” гэжээ. Мөн ХАУТЗЗ нь улс орныхоо эдийн засаг болон нийгмийн хөгжлийн бүтэн жилийн зорилтуудыг биелүүлэхийн тулд мэргэн ухаан, хүч чадлаа нэгтгэн ажиллана гэж Ван хэлсэн байна.

УЛС ТӨРИЙН ТОМ АРГА ХЭМЖЭЭ

“Хоёр чуулган” гэж БНХАУ-ын хууль тогтоох дээд байгууллага болох Бүх Хятадын Ардын Төлөөлөгчдийн Их Хурал /БХАТИХ/ болон ХАУТЗЗ-ийн Үндэсний хорооны жил тутмын чуулгануудыг хэлдэг юм. БХАТИХ-ын чуулган нь мягмар гарагт эхэлсэн.

Бээжин хотноо бараг нэгэн зэрэг болж буй уг чуулганууд нь БНХАУ-ын энэ жилийн үндэсний хэмжээний хөтөлбөрийг тодорхойлох төдийгүй дэлхий нийтийн анхаарлыг татахуйц өргөн хүрээний ач холбогдолтой байх болно.

БХАТИХ нь Хятад улсын төрийн эрх барих хамгийн дээд байгууллага билээ. БХАТИХ-ын чуулганы үеэр хэлэлцэх асуудлуудын жагсаалт дахь нэг чухал асуудал бол засгийн газрын ажлын тайланд дүгнэлт хийж, өнгөрсөн хугацаанд гаргасан ололт амжилтыг үнэлэн дүгнэж, энэ жил болон цаашдын хөгжлийн зорилтуудыг тодорхойлох юм. Уг чуулганы үеэр БХАТИХ-ын төлөөлөгчид нь энэ жилийн хөгжлийн төлөвлөгөө болон төсвийн төсөлтэй танилцана. Түүнчлэн, БХАТИХ-ын байнгын хороо, Ардын дээд шүүх, Ардын дээд прокурорын газрын ажлын тайланг хэлэлцэхээс гадна Төрийн зөвлөлийн зохион байгуулалтын тухай хуулийн шинэчилсэн найруулгын төслийг авч хэлэлцэх юм. Даваа гарагт болсон хуралдааны үеэр улс төрийн зөвлөхүүд өмнөх чуулганаас хойших санал, санаачилгуудын хэрэгжилтийн тайланг сонссон байна. Статистик мэдээнээс үзвэл, 2023 оны ээлжит чуулганаас хойш нийт 5621 санал ирсний 4791-ийг нь хянан хэлэлцэж, тэдгээрийн 99.9 хувийг нь шийдвэрлэжээ.

Хамгийн гол нь Хятадын хууль тогтоогчид болон улс төрийн зөвлөхүүд санал, хүсэлт гаргаж, холбогдох байгууллагуудын анхааралд хүргэх замаар улс орныхоо хөгжилд хувь нэмрээ оруулж, чухал үүрэг гүйцэтгэдэг. Засгийн газрын тоо баримтаас үзвэл, 2023 онд Төрийн Зөвлөлийн харьяа газрууд БХАТИХ-ын төлөөлөгчид болон ХАУТЗЗ-ийн Үндэсний Хорооны гишүүдээс ирүүлсэн 12480 санал, хүсэлтийг авч хэлэлцсэн байна.

ЧУХАЛ ЖИЛ

БНХАУ байгуулагдсаны 75 жилийн ой 2024 онд тохиож, 14 дүгээр таван жилийн төлөвлөгөөнд (2021-2025) тусгагдсан зорилго, зорилтуудад хүрэхэд чухал жил болж буй учир энэ удаагийн “хоёр чуулган” онцгой ач холбогдолтой юм.

 ХАУТЗЗ-ийн 14 дэх Үндэсний хорооны хоёрдугаар чуулган 2024 оны 3 дугаар сарын 4-нд

Хятад улсын нийслэл Бээжин хотноо Ардын их хурлын танхимд эхлэхийн өмнө ХАУТЗЗ-ийн 14 дэх

Үндэсний хорооны гишүүд ярилцлага өгч буй нь. /Синьхуа/Ван Зяньхуа /

---

Хятад улсын эдийн засаг 2023 онд сэргэж, өндөр чанартай хөгжил хүрэхэд баттай ахиц дэвшил гарч буйг нотлон харуулсан. Дотоодын нийт бүтээгдэхүүн 5 орчим хувиар өсгөнө гэсэн зорилтоос давж, 5.2 хувиар өссөн. Хятад улс нь дэлхийн эдийн засгийн өсөлтөд 30 орчим хувийн хувь нэмэр оруулж, дэлхийн хөгжлийн амин чухал хөдөлгүүр хэвээр байна.

Цаашид тогтвортой байдлыг хадгалахын зэрэгцээ илүү их ахиц дэвшил гаргахыг эрмэлзэж, хөгжлийн шинэ философийг бүх салбарт тууштай хэрэгжүүлэх нь чухал болохыг Хятад улсын удирдагчид онцлон тэмдэглэсээр байна. Эдийн засгийн сэргэлтийн эрч хүчийг нэгтгэн бэхжүүлэх нь нэн чухал юм.

Хятадын эдийн засгийн сэргэлтийг цаашид ахиулахад тулгарч буй сорилт бэрхшээлүүд байсаар байгаа хэдий ч эдийн засгийн сэргэлтийн ерөнхий хандлага өөрчлөгдөөгүй, урт хугацааны хэтийн төлөв өөдрөг хэвээр байна.

“Хоёр чуулган” нь эдийн засгийн асуудлаарх зөвшилцлийг бэхжүүлж, итгэлцлийг нэмэгдүүлэх болно.

ӨНДӨР ЧАНАРТАЙ ХӨГЖИЛ

“Хоёр чуулган” нь Хятад маягийн орчин үеийн шинэчлэлд хүрэхэд нэн чухал шаардлага болох өндөр чанартай хөгжлийг хөхиүлэн дэмжихэд чиглэнэ.

БХАТИХ-ын төлөөлөгчид болон ХАУТЗЗ-ийн Үндэсний хорооны гишүүд төвийн болон орон нутгийн эдийн засгийн ажлыг хэрэгжүүлэхэд чухалчилж буй “шинэ бүтээлч хүчнүүд”-ийн талаарх санал, санаачилга гаргахад хувь нэмрээ оруулахыг эрмэлзэж байна.

Хятад улсын зүүн нутгийн Зянсу мужийн Уси хот дахь ухаалаг төхөөрөмжүүдийн цехэд ажиллаж буй механик гар. 2024 оны 2 дугаар сарын 28-нд авсан зураг. (Синьхуа/Зи Чуньпэн)

БХАТИХ-ын төлөөлөгч бөгөөд Гуанжоу хотод төвтэй “Medprin Regenerative Medical Technologies” ХХК-ийн захирал Юань Юйюйгийн хэлснээр “шинэ бүтээлч хүчин” хэмээх үзэл баримтлал нь инновацид тулгуурласан дэвшилтэт бүтээлч хүчнүүдийг хэлж буй юм. Өөрөөр хэлбэл, шинжлэх ухаан болон технологийн салбарт өндөр түвшний бие даах чадвар, чадавхыг бэхжүүлэхэд гол анхаарал хандуулна гэсэн үг.

Энэ жил мөн иж бүрэн шинэчлэлийг гүнзгийрүүлэх ач холбогдолтой жил бөгөөд илүү өргөн хүрээтэй шинэчлэлийн төлөвлөгөөг боловсруулах нь үндсэн зорилт юм. Өнгөрсөн хоёрдугаар сард болсон Иж бүрэн шинэчлэлийг гүнзгийрүүлэх төв комиссын хурлаас энэхүү санаа гарч ирсэн. Дотоодын эрэлт хэрэгцээг тэлэх, эдийн засгийн бүтцийг илүү оновчтой болгох, иргэдийн итгэлийг нэмэгдүүлэх, иргэдийн амьжиргааг хангах, эрсдэлээс урьдчилан сэргийлэх, бууруулахад чиглэсэн шинэчлэлийн арга хэмжээнүүдийг үргэлжлүүлэн хэрэгжүүлэх нэн шаардлагатай байгааг хууль тогтоогчид болон улс төрийн зөвлөхүүд уг хурлын үеэр онцолж байлаа. Тухайлбал, үндэсний улс төрийн зөвлөх бөгөөд Төрийн зөвлөлийн Хөгжлийн судалгааны төвийн дэд захирал асан Жан Зюнько зах зээлд чиглэсэн шинэчлэлийг тууштай хэрэгжүүлэхийн чухлыг онцолж, зах зээлийн шийдвэрлэх үүргийг баталгаажуулахын зэрэгцээ засгийн газрын үүргийг үр дүнтэй ашиглах шаардлагатайг онцлон тэмдэглэсэн юм.

Мөн хувийн хэвшлийн аж ахуйн нэгжүүд нь Хятад улсын өндөр чанартай хөгжилд амин чухал хөдөлгөгч хүч бөгөөд өөрчлөлт шинэчлэлийг гүнзгийрүүлэхэд ихээхэн хувь нэмрээ оруулах чухал ач холбогдолтойг БХАТИХ-ын төлөөлөгч бөгөөд Бүх Хятадын Хуульчдын холбооны ерөнхийлөгч Гао Зычэн онцлон тэмдэглээд, хувийн хэвшлийн хөгжлийг хөхиүлэн дэмжих, улмаар зах зээлд итгэх итгэл, эрч хүчийг нэмэгдүүлэхийн тулд шинэ зохицуулалтуудыг нэвтрүүлэхийг санал болгосон байна.