Өнөөдөр НҮБ-ын Аюулгүйн Зөвлөлд Умард Солонгосын асуудлаар хуралдаан зарласан байна. БНАСАУ лхагва гаригт пуужингийн гурван туршилт явуулсантай холбогдуулж энэ хуралдааныг хийж байгаа юм.

АНУ-ын засаг захиргааны төлөөлөгчөөс иш татан Ройтерс-ийн мэдээлж байгаагаар, Аюулгүйн зөвлөлд Пхеньяны эсрэг хориг арга хэмжээг чангатгах тухай Америкийн тогтоолын төслөөр санал хурааж магадгүй байна.

Өмнөд Солонгосын цэргийнхэн, умардын харвасан пуужингуудын нэг нь тив алгасагч, хоёр нь ойрын тусгалын баллистик пуужин байсан гэж үзэж байгаа аж. Түүнчлэн ойрын тусгалын нэг пуужингийн хөөргөлт амжилтгүй болсон гэж мэдээлжээ. Пхеньяны эдгээр туршилтын хариуд Өмнөд Солонгос болон Америкийн тус бүр нэг пуужинг Япон тэнгисийн чигт харважээ.

Умард Солонгос улс энэ он гарсаар 17 дахь удаагаа пуужин туршаад байна. АНУ-ын ерөнхийлөгч Байденийн Азийн гол холбоотон орнуудаар хийсэн айлчлалтай холбогдуулж Пхеньян нэг дор олон пуужин туршлаа гэж олон улс дүгнэж байгаа юм.

НҮБ-ын Аюулгүйн Зөвлөл БНАСАУ-ын саяхан явуулсан пуужингийн туршилтын талаар хэлэлцэх хуралдааныг АНУ-ын Нью-Йорк хотноо баасан гарагт зохион байгуулахаар болжээ.

АНУ болон Их Британи, Франц зэрэг Аюулгүйн Зөвлөлийн таван гишүүн орон Пёньяны пуужингийн туршилтын тухай хэлэлцэх яаралтай хуралдаан зохион байгуулахыг уриалсан талаар пүрэв гарагт олон нийтийн хэвлэлийн мэдээллийн хэрэгслүүд мэдээлээд байсан юм.

БНАСАУ пүрэв гарагт тив алгасагч баллистик пуужин туршсанаар 2017 оны сүүлээс хойш зогсоогоод байсан алсын тусгалтай пуужингийн туршилтаа үргэлжлүүлсэн байна. Тус улс нь энэ он гарсаар 12 дахь удаагаа пуужин харвасан нь энэ юм.

Гэхдээ АНУ-ын талын мэдээлснээр, БНАСАУ хоёрдугаар сарын 27, гуравдугаар сарын 5-нд явуулсан туршилтаар тив алгасагч баллистик пуужинг хэдийнээ туршсан байна.

БНАСАУ-ын эсрэг нэмэлт хориг арга хэмжээ авахыг АНУ бусад улс орнуудын хамтаар НҮБ-ын Аюулгүй Зөвлөлөөс удаа дараа шаардсаар ирсэн боловч тус зөвлөлийн байнгын гишүүд болох БНХАУ, ОХУ ийм уриалгад хориг тавьсаар иржээ.