Нийт өрхийн 53.7 хувь буюу 516.8 мянган өрх зээлтэй амьдарч байгаа нь өмнөх оны мөн үеэс 3.5 нэгж хувиар нэмэгдсэн байна.
Нийт зээлтэй өрхийг зээлийн төрлөөр нь авч үзэхэд 216.2 (41.8%) мянган өрх цалингийн зээлтэй, 153.7 (29.7%) мянган өрх бусад төрлийн зээлтэй, 103.2 (20.0%) мянган өрх хэрэглээний зээлтэй, 101.9 (19.7%) мянган өрх тэтгэврийн зээлтэй, 71.4 (13.8%) мянган өрх орон сууцны зээлтэй байна. Зээлтэй өрхүүдийн сүүлийн 12 сард авсан зээлийн дундаж хэмжээг Зураг 12-т харууллаа. Судалгааны 2022 оны 4 дүгээр улирлын дүнгээр зээлтэй нэг өрх дунджаар 10.8 сая төгрөгийн зээл авчээ. Орон сууцны зээлийн дундаж хэмжээ 68.3 сая төгрөг болж, өмнөх оны мөн үеэс 6.6 (10.7%) сая төгрөгөөр, цалингийн зээлийн дундаж хэмжээ 1.8 (25.0%) сая төгрөгөөр, тэтгэврийн зээлийн дундаж хэмжээ 1.8 сая төгрөгөөр буюу бараг 2 дахин нэмэгдсэн байна.
Зээлтэй нэг өрх сард дунджаар 780.1 мянган төгрөгийг зээлийн эргэн төлөлтөд буцаан төлж байгаа нь өмнөх оны мөн үеэс 3.0 (0.4%) мянган төгрөгөөр буурсан байна. Зээлийн төрлөөр нь авч үзвэл, орон сууцны зээлтэй өрх сард дунджаар 698.2 мянган төгрөгийг, цалингийн зээлтэй өрх 560.3 мянган төгрөгийг, тэтгэврийн зээлтэй өрх 449.2 мянган төгрөгийг зээлийн эргэн төлөлтөд зарцуулж байна.
