Айл өрх, сургууль, цэцэрлэг, эмнэлгийн халаалтыг есдүгээр сарын 15-наас өгч эхэлнэ хэмээн Улаанбаатар Дулааны Сүлжээ компаниас мэдээллээ.
Харин албан байгууллага, ААН-ийн хувьд дулаанаа авах хүсэлт гаргасан тохиолдолд холболт хийнэ гэв. Ингэснээр заавал аравдугаар сарын 1-нээс дулаан өгнө гэхгүй тухайн хүсэлтийн дагуу үйлчилгээ үзүүлэх юм байна.
“Манай компаниас дулааны шугам сүлжээнд засвар хийх төлөвлөгөөт ажлууд үндсэндээ дууссан. Зарим орон сууцны контор шугам сүлжээний засвараа хийж байгаа.
Европын Сэргээн Босголт Хөгжлийн Банк болон Дэлхийн банкны хөрөнгө оруулалтаар хийгдэж буй магистраль шугамыг өргөтгөх шинэчлэх ажил үргэлжилж байна. Уг ажил дулаан өгөхөөс өмнө буюу есдүгээр сарын 15-наас өмнө дуусна” хэмээн мэдээллээ.
2022-2023 оны дулааны гэрээг иргэн болон хуулийн этгээдүүдтэй байгуулахад цахимаар үзүүлж байгаа үйлчилгээнүүдийг төрийн мэдээллийн нэгдсэн системд холбох гэж байгаа аж. Иймд шаардлагатай материалуудыг https://my.dulaan.mn сайтаар хүлээн авч эхэлжээ.