Африк тивийн хөл бөмбөгийн аварга шалгаруулах 33 дахь удаагийн тэмцээн “Africa Cup of Nations (AFCON)”-ийн шөвгийн дөрвийн сүүлийн тоглолт Египет, Камерун улсуудын хооронд боллоо.
Тоглолтын үндсэн цаг 0-0 харьцаагаар өндөрлөсөн бөгөөд нэмэлт 30 минут сунгахад мөн л гоол орсонгүй. Улмаар пенальти цохиход 3-1 харьцаагаар Мохамед Салах тэргүүтэй Египетийн шигшээ баг хожлоо.
Зохион байгуулагч Камеруны шигшээ багаас эхний цохилтыг багийн ахлагч, довтлогч Винсент Абубакар гүйцэтгэж амжилттай болгосон ч түүний араас цохисон гурван тоглогч цохилтоо алдсан.
Ингэснээр Камерун Буркина Фасотой хүрэл медалийн төлөө хоёрдугаар сарын 7-ны 00:00 цагаас тоглох бол Египет аваргын төлөө Сенегалтай 03:00 цагаас тоглоно.
Финалд Английн Ливерпүүл клубийн довтолгооны хослол болох Сенегалын Садио Мане, Египетийн Мохамед Салах нар нэгнийхээ эсрэг тоглохоор боллоо.