Өвөрхангай Хархорин сумын нутагт орших Мойлтын амны палеолитын суурингаас олдсон дээд палеолитын үед холбогдох сонирхолтой олдворын нэг бол хар өнгийн цахиурлаг чулуугаар хийсэн бифас зэвсэг юм.
Уг эдлэл нь 76 х 46 х 13 мм хэмжээтэй. Эдлэлийг хоёр талаас нь хөндлөн цуулалтаар сайтар нимгэлээд, ирмэгүүдийг холтчих замаар зууван дугуй буюу навч хэлбэртэй болгон зассан байна. Түүний хоёр ирмэгийг солбисон байдлаар бага зэрэг долгиотсон ир гаргаад, шовх үзүүрийг хоёр талаас хурцалж, суурь хэсгийг зөвхөн нэг талаас нь бага зэрэг холтчиж зассан байна. Эдлэлийн нэг зах ирмэг нь нөгөөгөөс үл ялиг гүдгэр ажээ.
Эх сурвалж: ШУА-ийн Археологийн хүрээлэн